អារ៉ាប៊ី សាអូឌីតថា ខ្លួនស្ទាក់បាញ់បាន យន្តហោះដ្រូនរបស់ពួកឧទ្ទាមហ៊ូទី យេម៉ែន
ចុះផ្សាយនៅថ្ងៃ៖
ស្តាប់ - ០៧:៥១
មួយថ្ងៃក្រោយ អាមេរិកប្រកាសចង់ដកក្រុមឧទ្ទាមហ៊ូទីយេម៉ែន ចេញពីបញ្ជី ក្រុមភេរវនិយម អារ៉ាប៊ី សាអូឌីត បានអះអាងនៅថ្ងៃអាទិត្យនេះថា ខ្លួនបានចាប់ស្ទាក់ បាញ់កម្ទេច ដ្រូន ដែលក្រុមហ៊ូទី បញ្ជូនទៅវាយប្រហារ ទឹកដីភាគខាងត្បូងអារ៉ាប៊ី សាអូឌីត។ ដំណឹងស្តីពីការកម្ទេចបានយន្តហោះដ្រូនរបស់ក្រុមហ៊ូទី នៅរាជាណាចក្រអារ៉ាប៊ី សាអូឌីត កើតមាន នៅក្រោយដែល ប្រធានាធិបតី អាមេរិក លោកចូ បៃដិន បានប្រកាសកាលពីថ្ងៃព្រហស្បតិ៍ ឈប់គាំទ្រប្រតិបត្តិការយោធា របស់អារ៉ាប៊ី សាអូឌីត និងអេមីរ៉ា អារ៉ាប់រួម នៅក្នុងសង្រ្គាមយេម៉ែន។
នៅតែប៉ុន្មានម៉ោង ក្រោយ អាមេរិកប្រកាសចង់ក្រុមហ៊ូទី យេម៉ែន ចេញពី បញ្ជី ក្រុមភេរវនិយម អារ៉ាប៊ី សាអូឌីតបានអះអាងថា ខ្លួនស្ទាក់ចាប់បាន និងបាញ់កម្ទេចយន្តហោះដ្រូនរបស់ពួកឧទ្ទាមហ៊ូទី នៅថ្ងៃអាទិត្យនេះ។ ប៉ុន្តែ ខាងពួកឧទ្ទាមហ៊ូទី ដែលគាំទ្រអ៊ីរ៉ង់ នៅ មិនទាន់ចេញមុខ ទទួលខុសត្រូវ ថា ខ្លួនជាអ្នកបញ្ជូនយន្តហោះដ្រូននោះទេ។
តាមអ្នកនាំពាក្យរបស់សម្ព័ន្ធយោធា ដែលដឹកនាំដោយអារ៉ាប៊ី សាអូឌីត សម្រាប់ប្រតិបត្តិការធ្វើសង្រ្គាមនៅយេម៉ែន គេបានស្ទាក់ ចាប់បាន និងបាញ់កម្ទេចយន្តហោះដ្រូន បំពាក់ដោយអាវុធ ដែលក្រុមហ៊ូទី បានបញ្ជូនទៅបាញ់បំផ្លាញ ហេដ្ឋារចនាសម្ព័ន្ធ ស៊ីវិល ក្នុងទឹកដីអារ៉ាប៊ី សាអូឌីត នៅថ្ងៃអាទិត្យនេះ។ បើសិនការលើកឡើងរបស់អារ៉ាប៊ី សាអូឌីត ជាការពិត នោះ គឺក្រុមហ៊ូទី អាចឆ្លៀតឱកាសដែលឃើញអាមេរិកដកខ្លួនលែងគាំទ្រអារ៉ាប៊ី សាអូឌីត នៅក្នុងសង្រ្គាមយេម៉ែន ដើម្បី វាយប្រហារទៅលើអារ៉ាប៊ី សាអូឌីត។
ប៉ុន្តែ ដោយសារក្រុមហ៊ូទី នៅមិនទាន់ចេញមុខ អះអាងថា ជាស្នាដៃរបស់ខ្លួន គេអាចយល់បាន អារ៉ាប៊ី សាអូឌីតអាចយករឿងនេះ មកទាញចំណាប់អារម្មណ៍ របស់អាមេរិកឲ្យឃើញថា ក្រុមហ៊ូទី ជាក្រុមដ៏គ្រោះថ្នាក់ ហើយអារ៉ាប៊ី សាអូឌីត នៅតែរងគ្រោះ នៅតែជាផ្ទាំងស៊ីប វាយប្រហារ របស់ក្រុមហ៊ូទីយេម៉ែន។ អារ៉ាប៊ី សាអូឌីតទំនងចង់បង្ហាញថា បើសិន អាមេរិក ដកក្រុមហ៊ូទីចេញពីបញ្ជីភេរវនិយម នោះ ក្រុមហ៊ូទី ដែលគាំទ្រដោយអ៊ីរ៉ង់ ដែលជាសត្រូវរបស់អារ៉ាប៊ី សាអូឌីត ច្បាស់ជាបានដៃ វាយប្រហារ បំផ្លាញសន្តិសុខរបស់អារ៉ាប៊ី សាអូឌីតកាន់តែច្រើនជាងមុន។
ក្រុមឧទ្ទាមហ៊ូទី ដែលគាំទ្រដោយប្រទេសអ៊ីរ៉ង់ បានចូលកាន់កាប់រដ្ឋធានី សាណា របស់យេម៉ែន និងតំបន់ភាគខាងជើងយេម៉ែន ដែលស្ថិតនៅជាប់ព្រំដែនភាគខាងត្បូង អារ៉ាប៊ី សាអូឌីត។ សម្រាប់អារ៉ាប៊ី សាអូឌីត វាមិនមែនជារឿងល្អនោះទេ ដែលក្រុមឧទ្ទាម គាំទ្រដោយអ៊ីរ៉ង់ កាន់កាប់បានតំបន់ក្បែរទឹកដីរបស់ខ្លួនយ៉ាងដូច្នេះ។ នេះជាហេតុផលមួយដែលធ្វើឲ្យអារ៉ាប៊ី សាអូឌីត គៀងគរគេឯង ឲ្យទៅធ្វើសង្រ្គាមនៅយេម៉ែន ដោយចូលទៅគាំទ្ររដ្ឋាភិបាលយេម៉ែន ស្របច្បាប់ ដើម្បីប្រយុទ្ធវាយប្រហារទៅលើក្រុមឧទ្ទាមហ៊ូទី នៅទឹកដីយេម៉ែន។
ហេតុអ្វី អាមេរិកសម្រេចដកក្រុមឧទ្ទាមហ៊ូទីចេញពីបញ្ជីក្រុមភេរវនិយមនៅពេលនេះ?
ក្រុមហ៊ូទី ត្រូវបានរដ្ឋបាលអាមេរិក មុន របស់លោកដូណាល់ ត្រាំ ប្រកាសដោយប្រថុចញ៉ុច បំផុត ដាក់បញ្ចូលក្នុងបញ្ជីភេរវនិយម ក្នុងហេតុផលថា ក្រុមនេះ បានវាយប្រហារទៅលើព្រលានយន្តហោះ ក្នុងទីក្រុងអាដិន ទីក្រុងមួយទៀត របស់យេម៉ែន ដែលបានសម្លាប់មនុស្ស ៣០នាក់។ ការសម្រេចរបស់រដ្ឋបាលលោកដូណាល់ ត្រាំ បានបង្កឲ្យមានការរិះគន់ ជាពិសេស ពីខាងមន្រ្តីអង្គការសហប្រជាជាតិ និងអង្គការសិទ្ធិមនុស្ស ព្រោះថា វានឹងទៅបង្កឧបសគ្គសម្រាប់ប្រតិបត្តិការផ្តល់ជំនួយមនុស្សធម៌សម្រាប់ប្រជាជនយេម៉ែន ដែលកំពុងជួបគ្រោះអត់ឃ្លាន ដ៏ធ្ងន់ធ្ងរដោយសារតែសង្រ្គាម ជិត៦ឆ្នាំមកនេះ។
តាម អង្គការមនុស្សធម៌ ដើម្បីដឹកនាំជំនួយ ទៅចែកជូនប្រជាជនយេម៉ែន ពួកគេគ្មានជម្រើសអ្វីក្រៅតែពីធ្វើការជាមួយពួកឧទ្ទាមហ៊ូទី ដែលគ្រប់គ្រងទឹកដី មួយផ្នែកធំរបស់យេម៉ែននោះទេ។ ប៉ុន្តែ នៅពេល ពួកឧទ្ទាមហ៊ូទី ស្ថិតក្នុងបញ្ជីភេរវនិយមរបស់អាមេរិក នោះអង្គការមនុស្សធម៌ ត្រូវប្រឈមនឹងការចោទប្រកាន់ នៅតុលាការអាមេរិកថា បានធ្វើការសហការជាមួយ ពួកភេរវនិយម។
លោកចូ បៃដិនការពារនយោបាយមនុស្សធម៌
គឺដោយសារតែហេតុផលមនុស្សធម៌នេះហើយ បានជារដ្ឋបាលអាមេរិកថ្មី សម្រេច ដកក្រុមហ៊ូទី ចេញពីបញ្ជី ក្រុមភេរវនិយមនេះ។ នៅថ្ងៃសុក្រ ក្រសួងការបរទេសអាមេរិក បានជូនដំណឹងទៅសភាអាមេរិកពីគម្រោងចង់ដកក្រុមឧទ្ទាមហ៊ូទី ចេញពីបញ្ជី ភេរវនិយម។ តាមអ្នកនាំពាក្យរបស់ក្រសួងការបរទេសវិធានការនេះ នឹងមិនទាក់ទងនឹងការយល់ឃើញរបស់អាមេរិកទៅលើសកម្មភាពរបស់ក្រុមហ៊ូទី ដែលកំពុងធ្វើសង្រ្គាមនៅយេម៉ែននោះទេ ជាពិសេស ការវាយប្រហារដោយហិង្សាក្រុមនេះ ទៅលើប្រជាជនស៊ីវិល និងហើយនិង ការចាប់ជំរិត ជនជាតិអាមេរិកាំង ដោយក្រុមហ៊ូទីនៅយេម៉ែន។
ដោយដកក្រុមហ៊ូទីយេម៉ែនចេញពី បញ្ជីក្រុមភេរវនិយម និងប្រកាសឈប់លក់អាវុធ ទៅឲ្យអារ៉ាប៊ី សាអូឌីត សម្រាប់ធ្វើសង្រ្គាមនៅយេម៉ែន អាមេរិកកំពុងជ្រើសរើសយកផ្លូវចរចានយោបាយ ជាជាងការប្រយុទ្ធតាមផ្លូវអាវុធ ដើម្បី បិទបញ្ចប់សង្រ្គាមនៅ យេម៉ែន។
ក្រុមហ៊ូទី និងអ៊ីរ៉ង់ ដែលជាអ្នកគាំទ្រក្រុមហ៊ូទីយេម៉ែន បានស្វាគមជំហររបស់អាមេរិកដែលឈប់លក់អាវុធឲ្យអារ៉ាប៊ី សាអូឌីត ប៉ុន្តែ និយាយព្រមានថា សង្រ្គាមនៅយេម៉ែននឹងមិនចប់នោះទេ បើសិន ប្រតិបត្តិការយោធាដឹកនាំដោយអារ៉ាប៊ី សាអូឌីត នៅតែបន្តវាយប្រហារលើក្រុមហ៊ូទី ក្នុងទឹកដី យេម៉ែននោះ។
អាមេរិកកំពុងដោះដៃចោលអារ៉ាប៊ី សាអូឌីត ?
រដ្ឋបាលអាមេរិកថ្មី នឹងមិនព្រលែងចោលអារ៉ាប៊ី សាអូឌីត ដែលជាសម្ព័ន្ធមិត្ត និងជាដៃគូសំខាន់ របស់អាមេរិកសម្រាប់ទប់ទល់នឹងអ៊ីរ៉ង់ នៅក្នុងតំបន់នោះទេ។
នៅក្នុងកិច្ចសន្ទនាតាមទូរស័ព្ទជាមួយរដ្ឋមន្រ្តីការបរទេសអារ៉ាប៊ី សាអូឌីត លោកប្រមុខការបរទេសអាមេរិក អង់តូនី ប្លីងកិន បាននិយាយពី សន្តិសុខក្នុងតំបន់ ការប្រយុទ្ធប្រឆាំងក្រុមភេរវនិយម ហើយនិងការសហការដើម្បីការពារ ទប់ស្កាត់កុំឲ្យមានការវាយប្រហារទៅលើរាជាណាចក្រអារ៉ាប៊ី សាអូឌីត។ តាម
Bin Farhan រដ្ឋមន្រ្តីការបរទេសអារ៉ាប៊ី សាអូឌីត ថ្លែងគាំទ្រ ជំហរអាមេរិក ដើម្បីឈានទៅបិទបញ្ចប់សង្រ្គាមនៅ យេម៉ែន ហើយនិងរង់ចាំ ធ្វើការជាមួយរដ្ឋបាលអាមេរិកថ្មី ដើម្បី រក្សាសន្តិសុខ និងស្ថិរភាពក្នុងតំបន់។ នេះបើតាមការចុះផ្សាយរបស់ទីភ្នាក់ងារ ព័ត៌មាន រដ្ឋរបស់អារ៉ាប៊ី សាអូឌីត SPA។
ដោយឈប់លក់អាវុធ ទៅឲ្យអារ៉ាប៊ី សាអូឌីត សម្រាប់ធ្វើសង្រ្គាមនៅយេម៉ែន រដ្ឋបាលលោកចូ បៃដិន គ្រាន់តែចង់ដកខ្លួន បន្តិច កុំឲ្យនៅ ជិតស្និទខ្លាំង នឹងអារ៉ាប៊ី សាអូឌីតដូចក្នុងរដ្ឋបាលលោកដូណាល់ ត្រាំតែប៉ុណ្ណោះ។ ក្នុងរដ្ឋបាលលោកដូណាល់ ត្រាំ អាមេរិកធ្វើនយោបាយ ផ្អៀងខ្លាំង ទៅរកតែម្ខាងៗ ដូចជា គាំទ្រ ផ្តាច់មុខអារ៉ាប៊ី សាអូឌីត ជាពិសេស រាជបុត្រស្នងរាជ្យ Mohammed Bin Salman ដែលជាអ្នកចេញមុខប្រឆាំងអ៊ីរ៉ង់។ លោកដូណាល់ ត្រាំ ធ្លាប់បានយកហេតុផលថា ទំនាក់ទំនងជាមួយ រាជបុត្រស្នងរាជ្យ ហើយនិងការលក់អាវុធអាមេរិកទៅឲ្យអារ៉ាប៊ី សាអូឌីត សំខាន់ជាងអ្វីទាំងអស់។
ដោយដកខ្លួនឃ្លាតឆ្ងាយបន្តិច ពីអារ៉ាប៊ី សាអូឌីត រដ្ឋបាលអាមេរិកថ្មី របស់លោកចូ បៃដិន ចង់ធ្វើឲ្យជញ្ជីង របស់អាមេរិកកុំទោរខ្លាំងទៅភាគីតែម្ខាង ប៉ុន្តែ ត្រូវនៅ កណ្តាល ដើម្បីផ្តល់ឱកាសបើកផ្លូវឲ្យមានសម្របសម្រួល ចរចា រវាងភាគីជម្លោះ។
សម្រាប់អារ៉ាប៊ី សាអូឌីត អាមេរិកនៅតែចេញមុខធានាការពារសន្តិសុខ ព្រោះអារ៉ាប៊ី សាអូឌីតជាសម្ព័ន្ធមិត្តសំខាន់របស់អាមេរិក។ ប៉ុន្តែ ជាមួយគ្នានោះ អាមេរិកក៏ចង់ជំរុញឲ្យមានការចរចា ដើម្បីបិទបញ្ចប់សង្រ្គាមដ៏រ៉ាំរ៉ៃ នៅយេម៉ែន ដែលបង្កឲ្យមានផលវិបាកមនុស្សធម៌ដ៏ធ្ងន់ធ្ងរដែរ។
ដើម្បីឈានទៅបិទបញ្ចប់សង្រ្គាមនៅយេម៉ែន អាមេរិក មានតែដើរផ្លូវនយោបាយដកខ្លួនឃ្លាតឆ្ងាយពីអារ៉ាប៊ី សាអូឌីត ដើម្បីទៅ បន្ទន់ជំហររបស់អ៊ីរ៉ង់ ដែលជាអ្នកគាំទ្រឧបត្ថម្ភផ្តាច់មុខរបស់ក្រុមឧទ្ទាមហ៊ូទីយេម៉ែន។
ម្យ៉ាងដោយសម្រេចឈប់ចូលរួមធ្វើសង្រ្គាមនៅយេម៉ែន ឈប់លក់អាវុធឲ្យអារ៉ាប៊ី សាអូឌីតនិងអេមីរ៉ា អារ៉ាប់រួម ដែលជាសត្រូវរបស់អ៊ីរ៉ង់ អាមេរិកក៏កំពុងចង់បញ្ចុះបញ្ចូលអ៊ីរ៉ង់ឲ្យត្រលប់មកគោរពកិច្ចសន្យា ស្តីពីនុយក្លេអ៊ែរឡើងវិញ មុននឹងអាមេរិកអាចត្រលប់មកចូលក្នុងកិច្ចព្រមព្រៀងសាជាថ្មី។ កិច្ចព្រមព្រៀង នុយក្លេអ៊ែរអ៊ីរ៉ង់ ដែលអាមេរិករបស់លោកដូណាល់ ត្រាំ បានដកខ្លួន កាលពីឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ