ហេតុអ្វីបានជាវ៉ាក់សាំងបង្ការកូវីដ១៩របស់មន្ទីរពិសោធន៍ AstraZeneca កំពុងបន្តចោទជាបញ្ហា?
ចុះផ្សាយនៅថ្ងៃ៖
ស្តាប់ - ០៧:១០
នៅថ្ងៃចន្ទ ទី១៥ មីនា មានប្រទេសអឺរ៉ុបចំនួន ៤ទៀត គឺអាល្លឺម៉ង់ បារាំង អ៊ីតាលី និងអេស្ប៉ាញបានប្រកាសផ្អាកចាក់វ៉ាក់សាំងបង្ការកូវីដ១៩របស់មន្ទីរពិសោធន៍ AstraZeneca។ ប្រឈមនឹងរឿងអាស្រូវដែលកំពុងបន្តផុសផុលមួយនេះ ទីភ្នាក់ងារឪសថអឺរ៉ុបគ្រោងបើកកិច្ចប្រជុំវិសាមញ្ញមួយនៅថ្ងៃព្រហស្បតិ៍ ទី១៨ មីនា។ ចំណែកក្រុមអ្នកជំនាញរបស់អង្គការសុខភាពពិភពលោករួមប្រជុំនាថ្ងៃអង្គារ ទី១៦ មីនាដើម្បីផ្តើមសិក្សាពីសុវត្ថិភាពរបស់វ៉ាក់សាំង AstraZeneca។
គិតត្រឹមថ្ងៃអង្គារ ទី១៦ មីនា មាន ១៣ប្រទេសបានសម្រេចផ្អាក និងលើកពេលចាក់វ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca។ ក្នុង១៣ប្រទេស មានភាគច្រើនជាប្រទេសអឺរ៉ុប ក្នុងនោះមានបារាំង ដាណឺម៉ាក អាល្លឺម៉ង់ អ៊ីតាលី អេស្ប៉ាញ ន័រវែស អ៊ីស្លង់ ប៊ុលហ្ការី ហូឡង់ និងប្រទេសអៀរឡង់។ ចំណែកប្រទេសនៅក្រៅតំបន់អឺរ៉ុបមាន២ប្រទេសនៅអាស៊ី គឺថៃ និងឥណ្ឌូណេស៊ី ហើយមានប្រទេសមួយនៅអាហ្រ្វិក គឺសាធារណរដ្ឋប្រជាធិបតេយ្យកុងហ្គោ។ មានការកត់សម្គាល់ចំនួនពីរដែលត្រូវបញ្ជាក់ឲ្យបានច្បាស់ ទី១ វ៉ាក់សាំង AstraZenecaដែលប្រទេសអឺរ៉ុបមួយចំនួនបានផ្អាកចាក់ពេលនេះ គឺជាវ៉ាក់សាំងដែលផលិតលើទឹកដីអឺរ៉ុប។
ចំណែកវ៉ាក់សាំង AstraZenecaដែលប្រទេសថៃ ឬឥណ្ឌូណេស៊ីបានលើកពេលចាក់ពេលនេះ គឺជាវ៉ាក់សាំងដែលផលិតនៅក្នុងប្រទេសឥណ្ឌាដូចដែលកម្ពុជាបានទទួលពីអង្គការសុខភាពពិភពលោកតាមរយៈយន្តការកូវ៉ាក់។ ការកត់សម្គាល់ទី២ វ៉ាក់សាំង AstraZenecaដែលកំពុងមានបញ្ហាដ៏ចម្រូងចម្រាស់នៅក្នុងប្រទេសអឺរ៉ុបមួយចំនួនពេលនេះ គឺជាវ៉ាក់សាំងដែលផលិតនៅអឺរ៉ុប ពោលមិនមែនវ៉ាក់សាំងដែលផលិតនៅឥណ្ឌាទេ។ តើវ៉ាក់សាំង AstraZenecaដែលផលិតនៅឥណ្ឌានឹងគ្មានបញ្ហាដូចវ៉ាក់សាំង AstraZenecaដែលផលិតនៅអឺរ៉ុបទេ ឬយ៉ាងណា?។ រហូតមកដល់ម៉ោងនេះ គ្មានសញ្ញា ឬផលរំខានណាមួយធ្ងន់ធ្ងរកើតចេញពីការចាក់វ៉ាក់សាំង AstraZenecaផលិតនៅឥណ្ឌាទេ។
ហេតុអ្វីបានជាមានប្រទេសអឺរ៉ុបកាន់តែច្រើនសម្រេចផ្អាកចាក់វ៉ាក់សាំង AstraZeneca?
បើគេពិនិត្យមើលជារួមការសម្រេចរបស់ប្រទេសអឺរ៉ុបមួយចំនួនក្នុងការផ្អាកចាក់វ៉ាក់សាំង AstraZenecaពេលនេះ គឺជាវិធានការបង្ការ ពោលមិនមែនជាវិធានការដោយសារតែវ៉ាក់សាំង AstraZenecaបានបង្កគ្រោះថ្នាក់ខ្លាំងដល់ជីវិតទេ។ វិធានការបង្ការដូចគ្នានេះក៏ត្រូវបានអនុវត្តនៅក្នុងប្រទេសក្រៅតំបន់អឺរ៉ុប ដូចជាថៃ ឬឥណ្ឌូណេស៊ី។ ទោះជាយ៉ាងនេះក្តី វិធានការបង្ការរបស់ប្រទេសទាំងនេះបាន និងកំពុងបង្កឲ្យមានភាពវឹកវរខ្លាំងជុំវិញសុវត្ថិភាព និងប្រសិទ្ធិភាពរបស់វ៉ាក់សាំង AstraZeneca។ គួររម្លឹកថា គឺប្រទេសដាណឺម៉ាកដែលបានប្រកាសផ្អាកចាក់វ៉ាក់សាំង AstraZenecaមុនគេ និងបន្តដោយប្រទេសន័រវែស រួមទាំងប្រទេសអឺរ៉ុបមួយចំនួនទៀតនៅពេលនេះ។
ប្រទេសដាណឺម៉ាកមានស្លាប់ម្នាក់ ហើយមានស្លាប់ចំនួន ២នាក់នៅន័រវែសដោយសារមានឈាមកកដុំៗក្នុងសរសៃឈាមនៅក្រោយចាក់វ៉ាក់សាំង AstraZeneca។ នេះបើតាមការបញ្ជាក់របស់អាជ្ញាធរសុខាភិបាលរបស់ដាណឺម៉ាក និងន័រវែស។ ក៏ប៉ុន្តែមកទល់ពេលនេះ អាជ្ញាធរសុខាភិបាលដាណឺម៉ាកក៏ដូចជាន័រវែសនៅមិនទាន់អាចបញ្ជាក់បានទេថា តើការស្លាប់នោះមកពីការចាក់វ៉ាក់សាំង AstraZenecaឬមួយក៏ដោយសារហេតុផលអ្វីផ្សេង។ បច្ចុប្បន្ននេះ មានពលរដ្ឋអឺរ៉ុបក្នុងសហភាពអឺរ៉ុបប្រមាណជា ៥លាននាក់បានចាក់វ៉ាក់សាំង AstraZenecaហើយក្នុងចំណោមអ្នកចាក់ទាំងប្រមាណ ៥លាននាក់ អ្នកមានបញ្ហាឈាមកកដុំៗក្នុងសរសៃឈាមមានតែ ៣០នាក់ប៉ុណ្ណោះ។
អ្វីដែលនៅមិនទាន់ច្បាស់ និងនៅបន្តជាសំណួរមិនទាន់មានចម្លើយ តើឈាមកកដុំៗក្នុងសរសៃឈាម និងវ៉ាក់សាំង AstraZenecaមានចំណងទាក់ទងគ្នាដែរ ឬទេ។ គេនឹងអាចដឹងចម្លើយចំពោះចម្ងល់ និងសំណួរទាំងនេះនៅពេលខាងមុខ ព្រោះទីភ្នាក់ងារឱសថអឺរ៉ុបត្រូវបើកកិច្ចប្រជុំនៅថ្ងៃព្រហស្បតិ៍ ទី១៨ មីនា ហើយក្រុមអ្នកជំនាញរបស់អង្គការសុខភាពពិភពលោករួមប្រជុំគ្នាក្នុងថ្ងៃអង្គារ ទី១៦ មីនាដើម្បីសិក្សាពីសុវត្ថិភាពរបស់វ៉ាក់សាំង AstraZeneca។
អឺរ៉ុបពឹងខ្លាំងលើវ៉ាក់សាំង AstraZeneca
ការផ្អាកប្រើវ៉ាក់សាំង AstraZenecaនៅអឺរ៉ុបនឹងធ្វើឲ្យប្រទេសអឺរ៉ុបខ្លះមិនអាចសម្រេចបាននូវកម្មវត្ថុចាក់វ៉ាក់សាំងបង្ការកូវីដ១៩។ ចូរកុំភ្លេចថា អឺរ៉ុបបានពឹងខ្លាំងលើវ៉ាក់សាំង AstraZenecaដើម្បីពន្លឿនយុទ្ធនាការវ៉ាក់សាំងបង្ការកូវីដ១៩។ គួរបញ្ជាក់ថា សហភាពអឺរ៉ុបជាចេញមុខកម្ម៉ង់វ៉ាក់សាំង AstraZenecaសម្រាប់ប្រទេសសមាជិករបស់ខ្លួនទាំងអស់។ តែខណៈនេះ មានប្រទេសអឺរ៉ុបខ្លះបានផ្អាកចាក់ និងខ្លះទៀតបានបន្តចាក់ដោយគេយល់ថា អត្រាហានិភ័យកើតចេញពីការចាក់វ៉ាក់សាំង AstraZenecaមានតិចតួចមែនទែន បើធៀបនឹងអត្រាហានិភ័យកើតចេញពីការឆ្លងជំងឺកូវីដ១៩។
រហូតមកដល់ពេលនេះ មន្ទីរពិសោធន៍ AstraZenecaបានបញ្ជាក់ម្តងហើយម្តងទៀតថា វ៉ាក់សាំងរបស់ខ្លួនពិតជាមានផលរំខានដូចវ៉ាក់សាំងបង្ការកូវីដ១៩ ដែលផលិតដោយមន្ទីរពិសោធន៍ផ្សេងទៀត ដូចយ៉ាង Pfizer-BioNtech ឬមួយក៏ Moderna។ ទាក់ទងនឹងផលរំខានដោយមានឈាមកកដុំៗនៅក្នុងសរសៃឈាមត្រូវបានមន្ទីរពិសោធន៍ AstraZenecaអះអាងថា មានតិចតួចណាស់លើអ្នកចាក់វ៉ាក់សាំង AstraZenecaបើធៀបនឹងអ្នកអត់ចាក់។ អ្វីដែលមន្ទីរពិសោធន៍ AstraZenecaអះអាងនេះក៏ជាការយល់ឃើញរបស់ទីភ្នាក់ងារឱសថដែរ។
ចំណែកក្រុមគ្រូពេទ្យភាគច្រើនបានយល់ឃើញថា ការបំភ្លឺបន្ថែមជុំវិញសុវត្ថិភាពរបស់វ៉ាក់សាំង AstraZenecaជារឿងដែលត្រូវធ្វើដើម្បីជម្រះភាពមន្ទិលសង្ស័យ។ តែក្រុមគ្រូពេទ្យដដែលបានបញ្ជាក់ថាក្នុងពេលរង់ចាំ គេគួរតែបន្តយុទ្ធនាការចាក់វ៉ាក់សាំង AstraZenecaជាបន្តទៀតដើម្បីទប់ស្កាត់ការឆ្លងជំងឺកូវីដ១៩ ព្រោះគឺកូវីដ១៩ជាអ្នកសម្លាប់មនុស្ស មិនមែនវ៉ាក់សាំងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ