អាមេរិកព្រមានចិនទាក់ទងសកម្មភាពយោធាផ្ទួនៗទៅលើតៃវ៉ាន់និងហ្វីលីពីន
ចុះផ្សាយនៅថ្ងៃ៖
ស្តាប់ - ០៧:១២
ក្រោយពីចិនបើកធ្វើសមយុទ្ធផ្ទួនៗគ្នាទាំងខាងជើងទឹកនិងទ័ពអាកាសព័ទ្ធជុំវិញតៃវ៉ាន់ អាមេរិកបានចេញមុខព្រមានចិនទាក់ទងនឹងសកម្មភាពយោធាទាំងទៅលើតៃវ៉ាន់ និងទៅលើហ្វីលីពីននៅឯសមុទ្រចិនខាងត្បូង។ នៅថ្ងៃពុធ ទី៧ មេសាម្សិលមិញ អាមេរិកបានរំឭកចិនអំពីកាតព្វកិច្ចរបស់ខ្លួន ក្នុងការចូលជួយអន្តរាគមន៍ប្រទេសសម្ព័ន្ធមិត្តស្របទៅតាមកិច្ចព្រមព្រៀងការពារគ្នាទៅវិញទៅមក។
ចិនបង្កើនសកម្មភាពយោធាខ្លាំងក្លាទៅលើតៃវ៉ាន់និងហ្វីលីពីន
នៅប៉ុន្មានថ្ងៃកន្លងមកនេះ ប្រទេសចិនបានបង្កើនសាច់ដុំកាន់តែខ្លាំងដាក់កោះតៃវ៉ាន់និងហ្វីលីពីនតាមរយៈការធ្វើសមយុទ្ធផ្ទួនៗគ្នានិងតាមរយៈការបញ្ជូននាវាជាច្រើនទៅកាន់តំបន់ជាប់ជម្លោះ។
កាលពីថ្ងៃចន្ទដើមសប្តាហ៍នេះ កងកម្លាំងប្រដាប់អាវុធរបស់ចិនបានធ្វើសមយុទ្ធយោធា ដំណាលពេលគ្នាតែម្តងនៅភាគខាងលិចនិងខាងកើតកោះតៃវ៉ាន់។ យោធាចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា នាវាដឹកយន្តហោះចម្បាំងចិនឈ្មោះឡៅនីង (Liaoning) មានអមដោយគ្រឿងសញ្វាវុធជាច្រើនទៀត កំពុងមានវត្តមានជុំវិញកោះតៃវ៉ាន់ ដើម្បីបើកការធ្វើសមយុទ្ធ។
បើតាមក្រសួងការពារជាតិតៃវ៉ាន់ យ៉ាងហោចណាស់មានយន្តហោះចម្បាំងរបស់កងទ័ពចិន (PLA) ចំនួន ១០ គ្រឿងក្នុងនោះរួមមានយន្ដហោះចម្បាំង J-16 ៤ គ្រឿង J-10 ចំនួន ៤ គ្រឿង និងយន្តហោះចម្បាំងប្រឆាំងនាវាមុជទឹក Y-8 ព្រមទាំងយន្តហោះប្រភេទ KJ-500 បានហោះចូលទៅក្នុងដែនអាកាសរបស់កោះតៃវ៉ាន់។
ភ្លាមៗនោះ តៃវ៉ាន់ បានចេញមុខដំឡើងសំឡេងដាក់ចិនចំពោះសកម្មភាពលុកលុយថ្មីរបស់កងទ័ពអាកាសចិនដែលបានបើកយន្តហោះចម្បាំងជាច្រើនគ្រឿងឆ្លងចូលតំបន់ការពារដែនអាកាសរបស់ខ្លួន។ ទន្ទឹមនេះ កោះតៃវ៉ាន់បានឲ្យដឹងថាកាលពីខែមុនមានយន្តហោះចិនចំនួន ២០ គ្រឿងឯណោះបានហោះឆ្លងចូលតំបន់ការពារនេះ។
មិនខុសពីតៃវ៉ាន់ប៉ុន្មានឡើយ ហ្វីពីលីនដែលជាសម្ព័ន្ធមិត្តម្នាក់ដែររបស់អាមេរិក និងក៏ជាប្រទេសកំពុងមានជម្លោះដណ្តើមដែនកោះជាមួយចិននៅតំបន់សមុទ្រចិនខាងត្បូង ក៏កំពុងទទួលរងសម្ពាធខ្លាំងពីសកម្មភាពយោធារបស់ចិនដែរ។
នៅប៉ុន្មានសប្តាហ៍ថ្មីៗនេះ នាវាកងទ័ពចិនជាង ២០០ បានបណ្តែតខ្លួនជាប់គ្នាជាខ្សែៗនៅក្បែរតំបន់ថ្មប៉ប្រះទឹកដែលចិន និងហ្វីលីពីនកំពុងឈ្លោះគ្នាចង់ដណ្តើមកាន់កាប់រៀងៗខ្លួន នៅសមុទ្រចិនខាងត្បូង។
ទាក់ទងការបង្កើនសាច់ដុំយោធារបស់ក្រុងប៉េកាំង នៅឯតំបន់សមុទ្រចិនខាងត្បូងនាមួយរយៈពេលចុងក្រោយនេះ ក្រុមអ្នកវិភាគបានលើកឡើងថា វាគឺជាសញ្ញាព្រមានមួយរបស់ចិនទៅកាន់ប្រទេសដែលកំពុងមានជម្លោះជាមួយខ្លួន និងអ្នកនៅចាំជួយគាំទ្រពួកគេពីក្រោយ ហើយអ្នកនោះគ្មានប្រទេសណាក្រៅពីអាមេរិកនោះទេ។
អាមេរិក ព្រមានចិនទាក់ទងសកម្មភាពយោធាទៅលើតៃវ៉ាន់និងហ្វីលីពីន
បន្ទាប់ពីចិនបង្ហាញសាច់ដុំរបស់ខ្លួនជាច្រើនដងរួចមកដាក់ទាំងតៃវ៉ាន់និងហ្វីលីពីន អាមេរិកទប់ខ្លួនលែងជាប់និងបានចេញមុខព្រមានចិន។ កាលពីថ្ងៃពុធ ៧ មេសា ម្សិលមិញ សហរដ្ឋអាមេរិកបានព្រមានប្រឆាំង នឹងសកម្មភាពរបស់ចិនដែលគេមើលឃើញថាជាសកម្មភាពឈ្លានពានកាន់តែខ្លាំងឡើងនៅឯតំបន់សមុទ្រចិនខាងត្បូង។
អាមេរិកបានរំឭកចិនថាកុំឲ្យភ្លេចពីកាតព្វកិច្ចរបស់អាមេរិកដែលមានតួនាទីត្រូវចូលជួយអន្តរាគមន៍ប្រទេសសម្ព័ន្ធមិត្តស្របទៅតាមកិច្ចព្រមព្រៀងការពារគ្នាទៅវិញទៅមក។
អ្នកនាំពាក្យក្រសួងការបរទេសអាមេរិកលោក Ned Price បានមានប្រសាសន៍ថា ការវាយប្រហារប្រដាប់អាវុធណាមួយប្រឆាំងនឹងហ្វីលីពីននៅសមុទ្រចិនខាងត្បូង ទោះក្រោមរូបភាពណាក៏ដោយ អាមេរិកនឹងចូលជួយហ្វីលីពីន ស្របទៅតាមកាតព្វកិច្ចដែលមានក្រោមសន្ធិសញ្ញាការពារជាតិរវាងសហរដ្ឋអាមេរិកនិងហ្វីលីពីន។
ដោយនិយាយសំដៅដល់រដ្ឋាភិបាលក្រុងប៉េកាំង លោក Price បានបង្ហាញពីក្តីកង្វល់និងការយកចិត្តទុកដាក់ខ្ពស់របស់អាមេរិកចំពោះគ្រប់សម្ព័ន្ធមិត្តដែលរងការឈ្លានពានពីចិន។
ចំពោះកោះតៃវ៉ាន់ អាមេរិកបានសម្តែងនូវការព្រួយបារម្ភចំពោះការបើកធ្វើសមយុទ្ធផ្ទួនៗគ្នា ទាំងខាងជើងទឹក និងទ័ពអាកាសព័ទ្ធជុំវិញតៃវ៉ាន់។ ក្រសួងការបរទេសអាមេរិក បានឲ្យដឹងថា ក្រុងវ៉ាស៊ីនតោននឹងនៅជាមួយតៃវ៉ាន់ ត្រៀមទប់ទល់នឹងការបង្ខិតបង្ខំណាមួយដែលអាចបង្កគ្រោះថ្នាក់ដល់សន្តិសុខ ឬប្រព័ន្ធសង្គម ឬក៏សេដ្ឋកិច្ចរបស់ប្រជាជាតិតៃវ៉ាន់។ ហើយអ្វីដែលអាមេរិកលើកឡើងនេះ គឺដោយគោរពទៅតាមកិច្ចព្រមព្រៀងទំនាក់ទំនងរវាងអាមេរិក-តៃវ៉ាន់ ដែលចែងថាសហរដ្ឋអាមេរិកមានកាតព្វកិច្ចផ្តល់ឲ្យកោះតៃវ៉ាន់នូវមធ្យោបាយដើម្បីការពារខ្លួនប្រឆាំងនឹងការឈ្លានពានពីទីក្រុងប៉េកាំង។
សមុទ្រចិនខាងត្បូងនៅតែជាទីតាំងប្រឈមមុខគ្នាខ្លាំងរវាងអាមេរិកនិងចិន
នាវាដឹកយន្តហោះចម្បាំងអាមេរិក USS Theodore Roosevelt បានបរចូលសមុទ្រចិនខាងត្បូងកាលពីថ្ងៃអាទិត្យសម្រាប់ប្រតិបត្តិការជាធម្មតារបស់ខ្លួន។ នេះ គឺជាដំណើរទស្សនកិច្ចលើកទី ២របស់នាវារូសសេវែលមកកាន់តំបន់នេះក្នុងឆ្នាំ ២០២១។
គួរជ្រាបថា ដើម្បីប្រឆាំងទល់នឹងមហិច្ឆតារបស់ចិន សហរដ្ឋអាមេរិកតែងបញ្ជូននាវានិងយន្តហោះចម្បាំង ទៅកាន់តំបន់សមុទ្រចិនខាងត្បូង ក្រោមហេតុផលថា ជាការអនុវត្តន៍ “សេរីភាពនៃការធ្វើចរាចរណ៍” ដែលសមស្របទៅតាមច្បាប់អន្តរជាតិ។
សម្រាប់ប្រតិបត្តិការថ្មីចុងក្រោយនេះ មេបញ្ជាការកងទ័ពជើងទឹកអាមេរិកបាននិយាយថា វាជារឿងល្អខ្លាំងណាស់ដែលបានត្រលប់មកកាន់សមុទ្រចិនខាងត្បូង ដើម្បីធានាដល់សម្ព័ន្ធមិត្តនិងដៃគូរបស់អាមេរិក ថាអាមេរិកនៅតែប្តេជ្ញាចិត្តដើម្បីសេរីភាពនៅតំបន់នេះ។
បើយោងទៅតាមការចុះផ្សាយរបស់សារព័ត៌មាន CNN សម្រាប់ប្រតិបត្តិការនៅសមុទ្រចិនខាងត្បូង កងទ័ពអាមេរិកនឹងបើកសមយុទ្ធជាច្រើនមានទាំងសមយុទ្ធទ័ពអាកាស និងសមយុទ្ធជើងទឹក ក្នុងនោះក៏មានដែរប្រតិបត្តិការប្រឆាំងនាវាមុជទឹក ការហ្វឹកហាត់យុទ្ធសាស្ត្រនិងសកម្មភាពៗដទៃជាច្រើនទៀត។
ដោយឡែក ចិនដែលជាមហាអំណាចផុតលេខនៅអាស៊ី និងជាប្រទេសដែលតែងបានអះអាងថាស្ទើរតែទាំងអស់នៃផ្ទៃសមុទ្រចិនខាងត្បូងទំហំ ១,៣ លានម៉ាយការ៉េ គឺជាកម្មសិទ្ធិរបស់ខ្លួន មិនដែលសប្បាយចិត្តសោះឡើយចំពោះវត្តមានរបស់នាវាចម្បាំងអាមេរិកនៅតំបន់នេះ។
ចិន ថាវត្តមានរបស់កងកម្លាំងយោធាបរទេស ដូចជាក្រុមកងទ័ពនៃនាវាដឹកយន្តហោះចម្បាំងអាមេរិក កំពុងតែបង្កឲ្យមានភាពតានតឹងនៅក្នុងតំបន់។ ហើយក៏ដូចសព្វមួយដងដែរ ចិនតែងចេញមុខតវ៉ា និងប្រឆាំងជាដាច់ខាតចំពោះការចល័តនាវារបស់អាមេរិកឆ្លងកាត់តំបន់សមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ