អាមេរិកនិងចិនប្តេជ្ញាធ្វើការរួមគ្នាដើម្បីដោះស្រាយវិបត្តិអាកាសធាតុ
ចុះផ្សាយនៅថ្ងៃ៖
ស្តាប់ - ០៦:៤៤
សហរដ្ឋអាមេរិកនិងចិន បានប្រកាសថានឹងប្តេជ្ញាធ្វើការរួមគ្នា និងជាមួយប្រទេសដទៃទៀត ដើម្បីដោះស្រាយបញ្ហាប្រែប្រួលអាកាសធាតុដែលកំពុងគំរាមកំហែងធ្ងន់ធ្ងរចំពោះសន្តិសុខពិភពលោក។ នៅក្នុងសេចក្តីថ្លែងការណ៍រួមមួយនាថ្ងៃអាទិត្យ ១៨ មេសានេះ ប្រទេសមហាអំណាចទាំងពីរ បានឯកភាពផងដែរអំពីការចូលរួមកាត់បន្ថយការបំភាយឧស្ម័នផ្ទះកញ្ចក់។ អាមេរិកនិងចិនមិនចុះសម្រុងគ្នាទេ ចុះតើអ្វីទៅដែលអាចធ្វើឲ្យប្រទេសទាំងពីរបេ្តជ្ញាចាប់ដៃធ្វើការជាមួយគ្នាលើបញ្ហាអាកាសធាតុបាន?
តើអ្វីជាកត្តាអាចជំរុញអាមេរិក និងចិនឲ្យបែរងាកមកប្តេជ្ញាចាប់ដៃធ្វើការរួមគ្នាបាន?
កិច្ចសហប្រតិបត្តិការដែលសហអាមេរិកនិងចិនបានប្រកាសប្តេជ្ញាធ្វើការរួមគ្នាកាលពីថ្ងៃសៅរ៍ ទី១៧ មេសាម្សិលមិញនេះកើតចេញបន្ទាប់ពីកិច្ចពិភាក្សានៅទីក្រុងសៀងហៃរយៈពេលពីរថ្ងៃ ពោលគឺថ្ងៃព្រហស្បតិ៍-សុក្រ រវាងលោក ចន ឃែរី ប្រេសិតពិសេសទទួលបន្ទុកផ្នែកអាកាសធាតុរបស់អាមេរិកជាមួយប្រេសិតអាកាសធាតុចិនលោកស៊ី ហ្សេនហួរ (Xie Zhenhua)។
ដំណើរទៅកាន់ប្រទេសចិនរបស់លោកឃែរី នេះគឺជាដំណើរទស្សនកិច្ចជាន់ខ្ពស់ដំបូងគេបង្អស់របស់មន្ត្រីអាមេរិក ក្រោមរដ្ឋបាលលោកចូ បៃដិន ចាប់ពីលោកប្រធានាធិបតីថ្មីរបស់អាមេរិករូបនេះ ចូលឡើងកាន់តំណែងនាថ្ងៃទី ២០ មករា ដើមឆ្នាំ ២០២១ នេះមក។
នៅមុនដំណើរទស្សនកិច្ចទៅកាន់ទីក្រុងសៀងហៃ លោកចន ឃែរី បាននិយាយប្រាប់សារព័ត៌មាន CNN ថា កិច្ចសហប្រតិបត្តិការពីចិន ពិតជាមានសារៈសំខាន់បំផុតក្នុងការប្រយុទ្ធប្រឆាំងនឹងវិបត្តិអាកាសធាតុ។
ជាការពិតណាស់ នរណាៗក៏គេដឹងដែរថាសហរដ្ឋអាមេរិកដែលជាមហាអំណាចចាស់ និងចិនដែលជាប្រទេសមហាអំណាចថ្មីមិនចុះសម្រុងគ្នានោះទេ និងមានគោលនយោបាយប្រឆាំងគ្នា នៅចំពោះមុខបញ្ហាជាច្រើន។
ក៏ប៉ុន្តែ វិបត្តិអាកាសធាតុដែលជាបញ្ហាប្រឈមខ្លាំងបំផុតមួយរបស់ពិភពលោកបានជំរុញឲ្យអាមេរិក និងចិនទុកជម្លោះ ឬការខ្វែងគំនិតគ្នាមួយឡែក ដើម្បីជួយគ្នា ពួតដៃរួមគ្នាដោះស្រាយវិបត្តិអាកាសធាតុដ៏ធ្ងន់ធ្ងរខ្លាំងបំផុតនេះ។
បញ្ហាអាកាសធាតុ កំពុងគំរាមកំហែងធ្ងន់ធ្ងរណាស់ចំពោះសន្តិសុខពិភពលោកទាំងមូល មិនមែនប៉ះពាល់ត្រឹមតែលើអាមេរិក ឬចិន ឬរុស្ស៊ី ឬក៏ប្រទេសណាផ្សេងនោះទេ។ ដូច្នោះហើយ មិនថាអាមេរិកឬប្រទេសសម្ព័ន្ធមិត្តនោះទេ ដឹងច្បាស់ក្នុងចិត្តថាពួកគេអាចខ្វែងគំនិតឬប្រឆាំងគ្នាលើបញ្ហាជាច្រើនជាមួយចិន ប៉ុន្តែរឿងពាក់ព័ន្ធអាកាសធាតុត្រូវតែជាករណីលើកលែង ពីព្រោះវិបត្តិអាកាសធាតុប៉ះពាល់ដល់គ្រប់គ្នា មិនថាជាតិសាសសន៍ណាឬប្រទេសណានោះទេ។
ប្រេសិតអាកាសធាតុអាមេរិក លោកចន ឃែរី បានគូសបញ្ជាក់ថា ប្រសិនបើអាមេរិក បដិសេធមិនធ្វើការជាមួយប្រទេសចិនទាក់ទង់បញ្ហាអាកាសធាតុដោយសារតែការ មិនចុះសម្រុងនឹងគ្នាលើរឿងផ្សេងទៀតនោះ អាមេរិកហាក់ដូចជាកំពុងតែសំលាប់ខ្លួនឯងអីចឹង។
អាមេរិកនិងចិនបានប្តេជាធ្វើសកម្មភាពជាច្រើនដើម្បីបុព្វហេតុអាកាសធាតុ
នៅក្នុងសេចក្តីថ្លែងការណ៍រួមគ្នា សហរដ្ឋអាមេរិក និងប្រទេសចិន បានប្តេជ្ញាថានឹងធ្វើការជាមួយគ្នា ដោយសហការផងដែរជាមួយបណ្តាប្រទេសដទៃជាច្រើនទៀត ដើម្បីដោះស្រាយវិបត្តិអាកាសធាតុ ដែលពិភពលោក ចាំបាច់ណាស់ត្រូវឆ្លើយតបជាបន្ទាន់ និងដោយម៉ឺងម៉ាត់ជាទីបំផុត។
មានចំណាត់ការច្រើនត្រូវបានចុះក្នុងបញ្ជីនៃកិច្ចសហប្រតិបត្តិការអាកាសធាតុ រវាងអាមេរិក និងចិន ដែលជាប្រទេសបានបំភាយឧស្ម័នផ្ទះកញ្ចក់ច្រើន ពោលស្មើនឹងចំនួនជិតពាក់កណ្តាលនៃការបំភាយឧស្ម័នផ្ទះកញ្ចក់សរុបទាំងអស់។
ប្រទេសមហាអំណាចសេដ្ឋកិច្ចកំពូលទាំងពីររបស់ពិភពលោក បានអះអាងថានឹងបង្កើនសកម្មភាពរៀងៗខ្លួន ដើម្បីកាត់បន្ថយការបំភាយឧស្ម័នកាបូនិក និងចូលរួមក្នុងសហប្រតិបត្តិការពហុភាគី រួមមានអនុសញ្ញាក្របខ័ណ្ឌអង្គការសហប្រជាជាតិ ស្តីពីការប្រែប្រួលអាកាសធាតុ និងកិច្ចព្រមព្រៀងទីក្រុងប៉ារីស។
ក្រៅពីនេះ ប្រទេសទាំងពីរក៏បានយល់ព្រមនឹងគ្នា ថានឹងជួយផ្តល់ជំនួយហិរញ្ញវត្ថុដល់បណ្តាប្រទេសកំពុងអភិវឌ្ឍ ដើម្បីប្តូរទៅប្រើប្រាស់ថាមពលកាបូនទាប។ ថាមពលកាបូនទាបគឺជាអគ្គិសនីផលិតឡើងដោយមានការបំភាយឧស្ម័នផ្ទះកញ្ចក់ទាបជាងការផលិតថាមពលឥន្ធនៈហ្វូស៊ីលធម្មតា។
ចិនមិនទាន់បញ្ជាក់ពីវត្តមានរបស់ស៊ី ក្នុងជំនួបកំពូលអាកាសធាតុរបស់លោកចូ បៃដិន
ប្រេសិតពិសេសទទួលបន្ទុកផ្នែកអាកាសធាតុរបស់អាមេរិក លោកចន ឃែរី និងលោកស៊ី ហ្សេនហួរ ដែលជាប្រេសិតអាកាសធាតុរបស់ចិន បានជជែកពិភាក្សាគ្នាអំពីជំនួបកំពូលស្តីអំពីអាកាសធាតុដែលរៀបចំដោយលោកចូ បៃដិន។ ចិនបានបង្ហាញពីការទន្ទឹងរង់ចាំក្នុងការចូលរួមក្នុងកិច្ចប្រជុំកំពូលនេះ។
គួររំឭកជូនថា មានមេដឹកនាំពិភពលោកទាំងអស់ចំនួនប្រមាណ ៤០ រូប ត្រូវបានអញ្ជើញឲ្យចូលរួមក្នុងជំនួបកំពូលខាងលើ ក្នុងនោះក៏មានដែរប្រធានាធិបតីរុស្ស៊ីលោកវ្ល៉ាឌីមៀរ ពូទីន និងលោកស៊ី ជីនពីងប្រមុខដឹកនាំនៃប្រទេសចិន។
យ៉ាងណាក៏ដោយ សេចក្តីថ្លែងការណ៍រួមរវាងប្រេសិតអាកាសធាតុអាមេរិក-ចិនមិនបានបញ្ជាក់ប្រាប់នោះទេ ថាតើលោក ប្រធានាធិបតីចិនលោកស៊ី ជីនពីង នឹងចូលរួម ក្នុងកិច្ចជំនួបកំពូលអាកាសធាតុនេះឬក៏អត់។ ជំនួបកំពូលអនឡាញមួយស្តីអំពីអាកាសធាតុនេះ នឹងរៀបចំឡើងនៅថ្ងៃទី ២២ ខែមេសា សប្តាហ៍ក្រោយនិងមានលោកបៃដិនជាម្ចាស់ដឹកនាំកម្មវិធី។
នៅថ្ងៃអាទិត្យនេះ ប្រេសិតអាកាសធាតុរបស់អាមេរិកបាននិយាយថា អាមេរិកសង្ឃឹមថាលោកស៊ី នឹងចូលរួមក្នុងកិច្ចប្រជុំខាងលើ ប៉ុន្តែទន្ទឹមនេះ លោកថា ចូលរួម ឬមិនចូលរួម គឺប្រទេសនីមួយៗជាអ្នកសម្រេចចិត្តខ្លួនឯង ហើយអាមេរិកក៏មិនទៅចាប់បង្ខំនរណាម្នាក់ ឲ្យធ្វើអ្វីដែលពួកគេមិនចង់ធ្វើដែរ។ អាមេរិកគឺកំពុងស្វែងរកកិច្ចសហប្រតិបត្តិការ។
យ៉ាងណាក៏ដោយ ពីខាងសេតវិមានអាមេរិក លោក ចូ បៃដិន សង្ឃឹមថាកិច្ចប្រជុំកំពូលរបស់លោកនឹងនាំមកនូវការប្តេជ្ញាចូលរួមសហការកាន់តែខ្លាំងពីបណ្តាមេដឹកនាំពិភពលោកចំពោះបញ្ហាអាកាសធាតុ ពិសេសនៅមុនកិច្ចប្រជុំដ៏សំខាន់មួយទៀតរបស់អង្គការសហប្រជាជាតិស្តីពីការប្រែប្រួលអាកាសធាតុ ដែលគ្រោងនឹងធ្វើនៅក្នុងទីក្រុង Glasgow ប្រទេសស្កុតឡេន នាខែវិច្ឆិកា ចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ