លោកចូ បៃដិន អញ្ជើញលោកពូទីននិងលោកស៊ី ឲ្យចូលរួមក្នុងជំនួបកំពូលអាកាសធាតុ
លោកប្រធានាធិបតីអាមេរិកចូ បៃដិន បានអញ្ជើញមេដឹកនាំពិភពលោករាប់សិបរូបក្នុងនោះក៏មានផងដែរប្រធានាធិបតីរុស្ស៊ី និងចិនឲ្យចូលរួមក្នុងកិច្ចប្រជុំកំពូលអនឡាញមួយស្តីអំពីអាកាសធាតុ។ បើតាមសេចក្តីប្រកាសរបស់សេតវិមានអាមេរិក ជំនួបកំពូលនេះ គ្រោងនឹងរៀបចំធ្វើឡើងនាថ្ងៃទី ២២-២៣ មេសាខាងមុខ និងដែលមានលោកបៃដិន ជាម្ចាស់ដឹកនាំកម្មវិធី។
ចុះផ្សាយនៅថ្ងៃ៖
ស្តាប់ - ០១:៥៨
ជាសរុបមានមេដឹកនាំពិភពលោកទាំងអស់ចំនួន ៤០ រូបត្រូវអញ្ជើញឲ្យចូលរួមក្នុងកិច្ចប្រជុំកំពូលរយៈពេល ២ ថ្ងៃនេះ ដើម្បីកត់សម្គាល់នូវការវិលត្រឡប់មកវិញរបស់ក្រុងវ៉ាស៊ីនតោនទៅក្នុងជួរមុខនៃយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុដែលបង្កឡើងដោយមនុស្សលោក។
ជាការគួរឲ្យកត់សម្គាល់ ប្រធានាធិបតីរុស្ស៊ីលោកវ្ល៉ាឌីមៀរ ពូទីន ព្រមទាំងលោកស៊ី ជីនពីង ប្រមុខដឹកនាំនៃប្រទេសចិនក៏ត្រូវបានស្នើឲ្យចូលរួមក្នុងជំនួបកំពូលស្តីអំពីអាកាសធាតុនេះដែរ។ លោកចូ បៃដិន បានឲ្យដឹងថាលោកទើបតែបាននិយាយទូរសព្ទជាមួយនាយករដ្ឋមន្រ្តីអង់គ្លេស ហើយកាលពីព្រហស្បតិ៍ លោកបាននិយាយជាមួយសមាជិកទាំងអស់នៃសហភាពអឺរ៉ុប។
លោកចូ បៃដិន នៅមិនទាន់បាននិយាយអ្វីនៅឡើយទេជាមួយមេដឹកនាំនៃប្រទេសរុស្ស៊ី និងចិន។ ក៏ប៉ុន្តែលោកថា ទាំងសមភាពីពូទីន ហើយនិងលោកស៊ី ជីពីន ដឹងហើយថាពួកគេ ត្រូវបានអញ្ជើញឲ្យចូលរួមក្នុងព្រឹត្តិការណ៍ខាងលើ។
គួរជ្រាបថាកិច្ចប្រជុំកំពូលស្តីអំពីអាកាសធាតុនេះ នឹងចាប់ផ្តើមប្រព្រឹត្តធ្វើនៅថ្ងៃទី ២២ ខែមេសា ស្របគ្នាជាមួយនឹងទិវានៃភពផែនដី ហើយក៏នឹងត្រូវរៀបចំដែរនៅមុនកិច្ចប្រជុំដ៏សំខាន់មួយរបស់អង្គការសហប្រជាជាតិ ស្តីពីការប្រែប្រួលអាកាសធាតុដែលគ្រោងនឹងធ្វើនៅខែវិច្ឆិកាក្នុងទីក្រុង Glasgow ប្រទេសស្កុតឡេន។
តាមការគ្រោង កិច្ចប្រជុំកំពូលរយៈពេលពីរថ្ងៃនេះនឹងធ្វើតាមរយៈអនឡាញ ដោយសារការរីករាលដាលនៃជំងឺឆ្លងកូវីដ។ លោកចូ បៃដិននឹងត្រូវធ្វើជាម្ចាស់ផ្ទះដឹកនាំនៃកិច្ចប្រជុំ ហើយលោកក៏នឹងគូសបញ្ជាក់ផងដែរពីគោលដៅរបស់សហរដ្ឋអាមេរិក ចំពោះការកាត់បន្ថយការបំភាយឧស័ន្មកាបូនិកនៅត្រឹមឆ្នាំ២០៣០។ វាជាគោលដៅដែលគេស្គាល់ថាជាការចូលរួមវិភាគទានរបស់ក្រុមប្រទេសជាសមាជិក និងដែលមានកំណត់ចែងក្រោមកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ