អន្តោប្រវេសន៍ ៖ លោកស្រី ខាម៉ាឡា ហារីស ពាំ “ក្តីសង្ឃឹម” ទៅឱ្យម៉ិចស៊ិក និងក្វាតេម៉ាឡា
ចុះផ្សាយនៅថ្ងៃ៖
ក្នុងដំណើរទស្សនកិច្ចនៅបរទេសជាលើកទីមួយ ក្នុងនាមអនុប្រធានាធិបតីអាមេរិក លោកស្រី ខាម៉ាឡា ហារីស ត្រូវអញ្ជើញទៅដល់ប្រទេសក្វាតេម៉ាឡា នៅថ្ងៃអាទិត្យទី ៦មិថុនានេះ។ បន្ទាប់មក លោកស្រីនឹងបន្តដំណើរទៅប្រទេសម៉ិចស៊ិកទៀត។ ទទួលបន្ទុកដោះស្រាយសំណុំរឿងអន្តោប្រវេសន៍ដ៏រសើប លោកស្រី ចង់ពាំនាំនូវ ក្តីសង្ឃឹម ដល់ប្រជាពលរដ្ឋនៅក្នុងតំបន់ ដែលនាំគ្នាភៀសខ្លួនទាំងហ្វូងៗ ប្រថុយជីវិតនឹងគ្រោះថ្នាក់ឱ្យបានទៅដល់ទឹកដីអាមេរិក។
លោកស្រី ហារីស ត្រូវទៅដល់ប្រទេសក្វាតេម៉ាឡា នៅថ្ងៃអាទិត្យនេះ ហើយត្រូវជួបសន្ទនាជាមួយប្រធានាធិបតីក្វាតេម៉ាឡា នៅថ្ងៃចន្ទ និងនៅថ្ងៃអង្គារ លោកស្រីត្រូវជួបប្រធានាធិបតីម៉ិចស៊ិក នៅប្រទេសម៉ិចស៊ិក ជិតគ្នានោះ។ លោកស្រីក៏ត្រូវជួបជាមួយតំណាងសង្គមស៊ីវិល មេដឹកនាំសហជីព និងនិយោជកទៀត។
ជម្រើសធ្វើដំណើរទៅកាន់ប្រទេសទាំងពីរ សម្រាប់ទស្សនកិច្ចជាលើកដំបូងនៅបរទេស មិនមែនជាការចៃដន្យទេ។ ទស្សនកិច្ចនេះធ្វើឡើងតែមួយសប្តាហ៍ប៉ុណ្ណោះ បន្ទាប់ពីទស្សនកិច្ចរបស់រដ្ឋមន្ត្រីការបរទេសអាមេរិក នៅតំបន់អាមេរិកឡាទីន។ កាលពីថ្ងៃអង្គារ លោកប្រមុខការទូតអាមេរិក បានជួបប្រជុំជាមួយរដ្ឋមន្ត្រីការបរទេសនៃក្រុមប្រទេសនៅតំបន់អាមេរិកកណ្តាលរួចមកហើយ(កូស្ការីកា ប្រេស៊ីល ក្វាតេម៉ាឡា ហុងឌូរ៉ាស នីការ៉ាហ្កាយ ប៉ាណាម៉ា សាធារណរដ្ឋដូមីនីក និងសាល់វ៉ាឌ័រ ) ដើម្បីជជែកអំពីសំណុំរឿងលំហូរអន្តោប្រវេសន៍ខុសច្បាប់។ លោកស្រីអនុប្រធានាធិបតី ជាអ្នកកាន់ក្តាប់សំណុំរឿងអន្តោប្រវេសន៍នេះ។ តាំងពីខែមីនា២០២១មក លោកប្រធានាធិបតី ចូ បៃដិន បានប្រគល់បន្ទុកគ្រប់គ្រង និងចាត់ចែងសំណុំរឿងដ៏ស្មុគស្មាញនេះឱ្យលោកស្រីកាន់។
មានទម្លាប់ មិនសូវចេញមុខចេញមាត់ជាទូទៅ តាំងពីចូលកាន់តំណែងមក លោកស្រីក៏មិនសូវលើកឡើងអំពីបញ្ហាអន្តោប្រវេសន៍ដោយចំហដែរនិងទើបចាប់ផ្តើមបញ្ចេញសកម្មភាពនិងជំហរនៅថ្ងៃនេះ។
ទៅជួយដល់ផ្ទះ
ក្នុងពេលចេញដំណើរ ទៅកាន់ប្រទេសក្វាតេម៉ាឡា លោកស្រី ហារីស បានអះអាងថាលោកស្រីនឹងពាំនាំទៅជាមួយនូវក្តីសង្ឃឹមដល់ពលរដ្ឋក្នុងតំបន់ ដែលចេះតែនាំគ្នាប្រថុយជីវិតរត់ចេញពីប្រទេសទៅធ្វើជាអន្តោប្រវេសន៍ខុសច្បាប់នៅសហរដ្ឋអាមេរិក។ ក្តីសង្ឃឹមនោះគឺ ថាពេលនេះសហរដ្ឋអាមេរិកបានមកជួយពួកគេដល់ផ្ទះ។ ជំនួយកំពុងតែមកដល់ ហើយប្រសិនបើពួកគេរស់នៅក្នុងប្រទេសកំណើតនោះអ្វីៗនឹងបានប្រសើរឡើង។
អាមេរិកចាប់ផ្តើមចូលមកជួយស្វែងរកដំណោះស្រាយដល់ប្រភព។ ដើម្បីឆ្កឹះគាស់ឫសដែលជាដើមហេតុនាំឱ្យកើតមានលំហូរអន្តោប្រវេសន៍ លោកស្រីមានផែនការរៀបចំយុទ្ធសាស្ត្ររួមមួយ ដោយនឹងទៅជជែកពិភាក្សា ដោយចំៗនិងដោយស្មោះត្រង់ ជាមួយមេដឹកនាំប្រទេសក្វាតេម៉ាឡា និងម៉ិចស៊ិក អំពីការប្រយុទ្ធប្រឆាំងនឹងអំពើពុករលួយ អំពើឧក្រិដ្ឋ និងអំពើហិង្សា លើពលរដ្ឋទន់ខ្សោយ។
ជាថ្នូរមកវិញ ក្វាតេម៉ាឡា ម៉ិចស៊ិក ឬហុងឌូរ៉ាស សាល់វ៉ាឌ័រ ដែលសុទ្ធជាបេក្ខជនអន្តោប្រវេសន៍ខុសច្បាប់រត់ទៅអាមេរិក នឹងបានទទួលនូវកិច្ចព្រមព្រៀង ដើម្បីបង្កើនវិនិយោគ បង្កើនផាសុកភាពសង្គម និងលុបបំបាត់ភាពក្រីក្រ។ នៅពេលប្រទេសមានសមភាព ភាពសុខដុម និងសន្តិសុខ ការធ្វើចំណាកស្រុកទៅធ្វើអន្តោប្រវេសន៍ខុសច្បាប់នៅអាមេិកលែងជាភាពចាំបាច់ទៀតហើយ។
សូមបញ្ជាក់ កាលពីខែមេសា បីខែក្រោយការឡើងកាន់តំណែងរបស់លោកចូបៃដិននិងលោកស្រីហារីស នៅសេតវិមាន ចំនួនអន្តោប្រវេសន៍ខុសច្បាប់ ចាប់បាននៅព្រំដែនម៉ិចស៊ិក-អាមេរិក បានកើនឡើងយ៉ាងខ្លាំង មិនធ្លាប់មានគិតចាប់តាំងពី១៥ឆ្នាំមក។ ហើយ៨២%មកពីម៉ិចស៊ិក និង ក្វាតេម៉ាឡា ហុងឌូរ៉ាសនិងសាល់វ៉ាឌ័រ។
ក្រៅអំពីសំណុំរឿងអន្តោប្រវេសន៍ និងដើម្បីបញ្ជាក់អំពីការគិតគូររបស់អាមេរិក នាឱកាសទស្សនកិច្ចនេះ លោកស្រីហារីស នឹងបញ្ជាក់បន្ថែមអំពីការផ្តល់ជំនួយជាវ៉ាក់សាំងបង្ការជំងឺកូវីដ១៩ ជាច្រើនលានដូស។ ដំណាក់កាលទីមួយ អាមេរិកនឹងផ្តល់វ៉ាក់សាំងចំនួន៦លានដូស ទៅឱ្យតំបន់អាមេរិកកណ្តាល តាមរយៈយន្តការកូវ៉ាក់ Covax និង៦លានដូសទៀត នឹងចែកចាយជូនផ្ទាល់តាមរយៈប្រទេសដៃគូ ដូចជាម៉ិចស៊ិក កាណាដា ឬអេហ្ស៊ីប។
សំណុំយុទ្ធសាស្ត្រសម្រាប់លោកស្រី ហារីស
នេះជាបេសកកម្មដ៏លំបាកខ្លាំងណាស់សម្រាប់លោកស្រីអនុប្រធានាធិបតី តែវាអាចផ្តល់ផលចំណេញនយោបាយច្រើនដែរ។ ព្រោះសូមកុំភ្លេចថាលោកចូ បៃដិន កាលនៅជាអនុប្រធានាធិបតី មានសមត្ថភាពខ្ពស់ខ្លាំងណាស់ខាងទំនាក់ទំនងអន្តរជាតិ។ ដូច្នេះផ្តល់បេសកកម្មសំខាន់ៗឱ្យមានន័យថាលោកបៃដិនកំពុងបំពាក់បំប៉នលោកស្រីហារីសហើយ។ លោកស្រី ធ្វើដំណើរទៅកាន់ប្រទេសដែលជាយុទ្ធសាស្ត្រក្នុងក្រសែភ្នែកអាមេរិក ជាការសំខាន់ណាស់ដែលត្រូវត្រលប់មកវិញជាមួយលទ្ធផល។ ទោះមិនឃើញលទ្ធផលជាក់ស្តែងភ្លាមមែន តែការបានទៅជជែកជាមួយប្រធានាធិបតី ម៉ិចស៊ិក និងក្វាតេម៉ាឡា ក៏អាចចាត់ទុកជាប្រយោជន៍មួយដែរ ព្រោះប្រធានាធិបតីទាំងអស់នេះនៅកាន់តំណែងច្រើនឆ្នាំទៀត និងត្រូវបន្តធ្វើការរួមគ្នាច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ