សហរដ្ឋអាមេរិក កំណត់យកថ្ងៃបិទបញ្ចប់ទាសភាពទី ១៩ មិថុនា ជាថ្ងៃបុណ្យជាតិ
ចុះផ្សាយនៅថ្ងៃ៖
ស្តាប់ - ០៥:១៥
ពិធីបុណ្យជួបជុំ ដង្ហែ ក្បួន ការថ្លែងសុន្ទរកថាផ្សេងៗ មានរៀបចំឡើងនៅរដ្ឋធានីវ៉ាស៊ីនតោន និងនៅស្ទើរគ្រប់បណ្តាខេត្តក្រុងរបស់សហរដ្ឋអាមេរិក ដើម្បីរំលឹកខួបនៃការបិទបញ្ចប់ទាសភាព។ ពិធីរំលឹកខួបដែលមានតម្លៃពិសេសនៅឆ្នាំនេះ ប្រធានាធិបតីអាមេរិកទើបបានចេញក្រឹត្យ ដាក់ ថ្ងៃទី ១៩ មិថុនា“Juneteenth” ជាថ្ងៃបុណ្យជាតិ។
ចាប់ពីឆ្នាំ២០២១នេះទៅសហរដ្ឋអាមេរិកមានថ្ងៃបុណ្យ ឈប់សម្រាកជាតិ មួយថ្ងៃទៀត ហើយ គឺថ្ងៃទី ១៩មិថុនា Juneteenth ដែលជាថ្ងៃខួបនៃការបិទបញ្ចប់ទាសភាពនៅសហរដ្ឋអាមេរិក។
របបទាសភាពនៅសហរដ្ឋអាមេរិក ត្រូវបានបិទបញ្ចប់ ជាផ្លូវការ នៅថ្ងៃទី ១មករា ឆ្នាំ១៨៦៣។ ប៉ុន្តែ គេត្រូវរង់ចាំដល់ថ្ងៃទី ១៩ មិថុនា ឆ្នាំ១៨៦៥ ទើប ទាសករស្បែកខ្មៅ ក្រុមចុងក្រោយគេបង្អស់ នៅរដ្ឋតិចសាស់ បានទទួលដំណឹងថា ពួកគេអាចមានសេរីភាព លែងជាប់ជាទាសកររបស់ក្រុមស្បែកស។ តាំងពីពេលនោះមកថ្ងៃទី ១៩មិថុនា ត្រូវបានគេចាត់ទុកជាទិវាមួយសម្រាប់រំលឹកថ្ងៃបិទបញ្ចប់ទាសភាព ឬ ទិវាជូនធីន Juneteenth ហៅកាត់តាមភាសាអង់គ្លេស June សម្រាប់សម្គាល់ខែមិថុនា និង Teenth សំដៅលើថ្ងៃទី១៩។ អ្នកខ្លះទៀតបានហៅថ្ងៃទី ១៩មិថុនានេះថា Juneteenth independence day ថ្ងៃឯករាជ្យ ឬ Free day ថ្ងៃមានសេរីភាព។ មានរដ្ឋបួន គឺ តិចសាស់ ញូវយ៉ក វីហ្ស៊ីនី និង រដ្ឋវ៉ាស៊ីនតោន បានចាត់ទុកថ្ងៃ Juneteenth ជាថ្ងៃឈប់សម្រាក។
ពីដំបូង ទិវាជូនធីន Juneteenth ត្រូវបានប្រារព្ធឡើងជាលក្ខណៈជួបជុំគ្រួសារ ទទួលទានអាហារជុំគ្នា តាមផ្ទះរៀងខ្លួនៗ។ ពិធីរំលឹកខួប មានទម្រង់ជាផ្លូវការ និងជារៀងរាល់ឆ្នាំ ចាប់ពី ឆ្នាំ១៨៧២មក នៅពេលគ្រូគង្វាលសាសនាស្បែកខ្មៅ នៅហ៊ូស្តុន បានទិញដី៤ហិចតារ សាងសង់ឧទ្យានឧទ្ទិសដល់ការបិទបញ្ចប់ទាសភាព។
បច្ចុប្បន្ន អាមេរិកទាំងមូលបានប្រារព្វទិវាជូនធីន ក្នុងទម្រង់ពិធីបុណ្យមហាស្រព ដង្ហែក្បួនផ្សេង ជាពិសេសនៅតាមទីក្រុងធំៗ។ ឆ្នាំនេះ ក្រុងGalveston បានសម្ពោធផ្ទាំងគំនូរលើជញ្ជាំងប្រវែង៤០០ម៉ែត្រការ៉េ នៅត្រង់កន្លែងដែលឧត្តមសេនីយ៍ Granger ប្រកាសដោះលែងទាសករស្បែកខ្មៅចុងក្រោយគេបំផុតតែម្តងផង។
ហេតុការណ៍ប៉ូលិសស្បែកសសម្លាប់បុរសស្បែកខ្មៅ ពេលចាប់ខ្លួន
១៥៦ឆ្នាំក្រោយ ទើបទិវាជូនធីន បានក្លាយជាថ្ងៃបុណ្យជាតិ ទី ១២ របស់សហរដ្ឋអាមេរិក ដែលលោកប្រធានាធិបតី ចូបៃដិន និងលោកស្រីអនុប្រធានាធិបតី ខាមាឡា ហារីស បានចុះហត្ថលេខាផ្តល់សុពលភាព និងដាក់ឱ្យចូលជាធរមាន កាលពីថ្ងៃព្រហស្បតិ៍ទី ១៧ មិថុនា។
អាមេរិកបានប្រារព្ធទិវាជូនធីន តែរហូតមកមែន ប៉ុន្តែអ្វីៗ បានប្តូរផ្លាស់ ចាប់ត្រឹមពីមានហេតុការណ៍ បុរសស្បែកខ្មៅស្លាប់នៅពេលប៉ូលិសស្បែកសឃាត់ខ្លួន កាលពីខែឧសភា ២០២០។ រូបភាពប៉ូលិសអាមេរិកស្បែកសសង្កត់កជនស្បែកខ្មៅដល់ដាច់ខ្យល់ស្លាប់ បានគាស់បំផុសដាស់សហរដ្ឋអាមេរិក (ធ្លាយដល់បណ្តាប្រទេសផ្សេងទៀត) ឱ្យកើតមានចលនាប្រឆាំងនឹងការរើសអើងប្រកាន់ពូជសាសន៍ពណ៌សម្បុរផង ប្រឆាំងនឹងអំពើហិង្សារបស់ប៉ូលិសលើពលរដ្ឋមានពណ៌ស្បែកខ្មៅផង។ ចលនានេះក៏រំលេចឱ្យឃើញកាន់តែច្បាស់ ទិវាជូនធីន ដែលកាលពីពីរឆ្នាំសូម្បីតែពលរដ្ឋអាមេរិកដើមកំណើតស្បែកខ្មៅផ្ទាល់ មិនទាំងយល់អត្ថន័យផង។ បើតាមការស្ទង់មតិ មានប្រជាពលរដ្ឋអាមេរិកដល់ទៅប្រមាណ២៨% មិនដឹងប្រវត្តិថ្ងៃជូនធីន Juneteenth នេះទេ។
ការទទួលយកថ្ងៃជូនធីន ជាថ្ងៃបុណ្យជាតិ ជាការផ្តល់ឱកាសមួយដល់សហគមន៍អាមេរិកស្បែកខ្មៅ ដែលរងគ្រោះជាងគេ និងថែមទាំងអាចឈានដល់ការសងជំងឺចិត្ត ដល់តំណាងសហគមន៍ស្បែកខ្មៅ ដែលធ្លាប់រងទាសភាព។ ពេលនេះមានរដ្ឋចំនួន១១បានសន្យាសងជំងឺជានិមិត្តរូប សង្ឃឹមថារដ្ឋាភិបាលនិងសភាអាមេរិកនឹងធ្វើតាមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ