លោកចូបៃដិន ប្រកាសវិធានការ ទប់ស្កាត់ ការរីកសាយអាវុធ នៅទឹកដីអាមេរិក
ប្រៀបធៀបអំពើហិង្សា ដោយប្រើកាំភ្លើង ទៅនឹងជំងឺរាតត្បាត ដែលគេត្រូវបិទបញ្ចប់ ប្រធានាធិបតីអាមេរិក លោកចូ បៃដិន បានប្រកាសវិធានការមួយចំនួន ដើម្បីគ្រប់គ្រងការប្រើប្រាស់អាវុធ នៅប្រទេសអាមេរិក។ នៅក្រោយការប្រកាសរបស់ប្រធានាធិបតី តែប៉ុន្មានម៉ោង ស្រាប់តែ កើតមានការបាញ់ប្រហារមួយ នៅរដ្ឋតិចសាស់ ភាគខាងត្បូង អាមេរិក ដែលបានសម្លាប់មនុស្ស ១នាក់ និងរបួសធ្ងន់ ៤នាក់។
ចុះផ្សាយនៅថ្ងៃ៖
ស្តាប់ - ០២:៤៦
ហេតុការណ៍បាញ់សម្លាប់មនុស្ស នៅរដ្ឋតិចសាស់ កាលពីថ្ងៃម្សិលមិញ កើតឡើង នៅតែប៉ុន្មានម៉ោង ក្រោយ ដែលលោកប្រធានាធិបតី ចូ បៃដិន ប្រកាសក្រឹត្យចំនួន ៦ ដើម្បី ព្យាយាម គ្រប់គ្រង ការប្រើប្រាស់ និង ទប់ស្កាត់ការរីកសាយភាយអាវុធនៅទឹកដីអាមេរិក។
ដោយនិយាយរិះគន់ ចាត់ទុក អំពើហិង្សា តាមរយៈ ការប្រើកាំភ្លើង នៅអាមេរិក ថា ជាជំងឺរាតត្បាត ចំណែក ការបាញ់សម្លាប់មនុស្ស ជាវិបត្តិសុខភាពសាធារណៈ ប្រធានាធិបតីអាមេរិក អំពាវនាវ ឲ្យគេឈប់គិតតែ បន់ស្រន់ ប៉ុន្តែ ត្រូវធ្វើសកម្មភាពជាក់ស្តែង ដើម្បី ព្យាបាលដំបៅមួយនេះ។
នៅក្នុងចំណោមវិធានការទាំង ៦ ដែលលោកចូ បៃដិនបានប្រកាស តាំងពីសេតវិមាន កាលពីថ្ងៃព្រហស្បតិ៍ មានការស្នើច្បាប់ ដើម្បីបញ្ឈប់ការរីកសាយភាយអាវុធខ្មោច ដែលជាអាវុធ កើតចេញពីការផលិតច្នៃ ដោយដៃ ឬ ដោយ”ម៉ាស៊ីនបោះពុម្ព”ជាលក្ខណៈឯកជន។ សេតវិមានបានសំដែងក្តីបារម្ភពីកើនឡើងនៃអាវុធប្រភេទនេះ ព្រោះ វា គ្មានចុះលេខ ត្រឹមត្រូវតាមច្បាប់ ហើយដែលគេពិបាក រកដានចាប់ នៅក្រោយ កើតមាន បទឧក្រិដ្ឋកម្ម។
ទៅតាមក្រឹត្យប្រធានាធិបតី គេនឹងបង្កើតច្បាប់ថ្មី ដើម្បី រឹតបន្តឹង ផងដែរ ការប្រើគ្រឿងបន្ទាប់បន្សំ សម្រាប់ជួយទ្រ ទប់ លំនឹងរបស់កាំភ្លើង ដែលខ្មាន់កាំភ្លើង ធ្លាប់ប្រើ សម្រាប់បាញ់សម្លាប់មនុស្ស នៅរដ្ឋកូឡូរ៉ាដូ កាលពីខែមុន។
វិធានការផ្សេងទៀតរបស់ប្រធានាធិបតី អាមេរិក គឺ ជំរុញ គាំទ្រ ទីភ្នាក់ងារដែលធ្វើការដោះស្រាយអំពើហិង្សា នៅក្នុងសហគមន៍។ នៅថ្ងៃព្រហស្បតិ៍ ក្រៅតែពីប្រកាស បញ្ជាឲ្យគេធ្វើរបាយការណ៍ ស្តីពី ចរាចរណ៍អាវុធ នៅអាមេរិកចាប់តាំងពីឆ្នាំ ២០០០ លោកប្រធានាធិបតី ចូ បៃដិន បានឆ្លៀតឱកាសផងដែរ ប្រកាសតែងតាំង លោក David Chipman ជាប្រធានថ្មីរបស់ទីភ្នាក់ងារ សហព័ន្ធ ដើម្បីគ្រប់គ្រងអាវុធនៅអាមេរិក។ លោកDavid Chipman នេះជាសកម្មជនដែលទាមទារឲ្យមានច្បាប់ រឹតបន្តឹង ការទិញអាវុធ សម្រាប់ការប្រើប្រាស់ជាបុគ្គល។
នៅអាមេរិក ជាទី ដែលការកាន់កាប់អាវុធក្នុងដៃ ត្រូវចាត់ទុកជាសិទ្ធិសេរីភាព ដែលមានចែងក្នុងរដ្ឋធម្មនុញ្ញអាមេរិក វិធានការរបស់លោកចូ បៃដិន ជាការបោះជំហានមួយដ៏តូច។ គណបក្សសាធារណរដ្ឋបានប្តេជ្ញាហើយថា នឹងប្រើគ្រប់មធ្យោបាយ ដើម្បីការពារសិទ្ធិប្រើប្រាស់អាវុធរបស់ពលរដ្ឋអាមេរិកាំង។
ដោយសារតែជំហរប្រឆាំងរបស់បក្សសាធារណរដ្ឋ វិធានការគ្រប់គ្រងអាវុធ របស់លោកចូ បៃដិន មិនបានដាក់បញ្ចូល ការហាម ប្រើប្រាស់អាវុធ ពាក់កណ្តាលស្វ័យប្រវត្តិ AR-15 ដែលខ្មាន់កាំភ្លើងភាគច្រើន ប្រើ នៅក្នុងការបាញ់ប្រហារសម្លាប់មនុស្ស នៅកន្លែងសាធារណៈ។
តាមវិបសៃតិ៍បណ្ណាសារ ស្តីពីអំពើហិង្សា ដោយសារកាំភ្លើង នៅឆ្នាំ ២០២០ មនុស្សជាង ៤០ ០០០នាក់ ស្លាប់ដោយសារគ្រាប់កាំភ្លើង នៅអាមេរិក។ ទោះបីជាការបាញ់ប្រហារសម្លាប់មនុស្ស ឧស្សាហ៍កើតមាន នៅទឹកដីអាមេរិក ប៉ុន្តែ ក្នុងចំណោម ពាក់កណ្តាល នៃមនុស្សស្លាប់ដោយសារគ្រាប់កាំភ្លើង គឺជាអ្នកធ្វើអត្តឃាត។
ចាប់តាំងពីថ្ងៃទី ១មករា ២០២១ មានមនុស្សជាង១ម៉ឺននាក់ ដែលស្លាប់ដោយសារគ្រាប់កាំភ្លើងនៅអាមេរិក។ ទោះយ៉ាងនេះក្តី ប្រជាជនអាមេរិកាំងនៅតែឱបក្រសោបចង់ ទិញ កាន់កាប់អាវុធក្នុងដៃ។ និន្នាការទៅទិញអាវុធ មានកាន់តែច្រើន ចាប់តាំងពីកើតមានវិបត្តិកូវីដ ភាពតានតឹងនៅក្នុងការបោះឆ្នោត ហើយនិង បាតុកម្មប្រឆាំង ការរើសអើងពូជសាសន៍ កាលពីឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ