កូវីដ១៩៖ក្រុមអ្នកប្រឆាំងនឹងវិធានការរឹតត្បិតចេញតវ៉ាកាន់តែច្រើននៅតាមបណ្តាប្រទេសនានា
ចុះផ្សាយនៅថ្ងៃ៖
ស្តាប់ - ០៨:២១
មនុស្សជាង ១០ ម៉ឺននាក់នៅក្នុងប្រទេសជាច្រើនរួមមានអូស្ត្រាលី បារាំង អ៊ីតាលី និងក្រិកបាននាំគ្នាចេញធ្វើបាតុកម្មប្រឆាំងនឹងវិធានការគ្រប់គ្រងកូវីដរបស់រដ្ឋាភិបាលកាលពីថ្ងៃសៅរ៍ ២៤ កក្កដាម្សិលមិញ។ ក្នុងអំឡុងពេលធ្វើបាតុកម្ម ក្រុមអ្នកតវ៉ាខ្លះបានប៉ះទង្គិចគ្នាជាមួយរីប៉ូលិសផង។ នៅទីក្រុងប៉ារីស ប៉ូលិសបារាំងបានប្រើឧស្ម័នបង្ហូរទឹកភ្នែកនិងកាណុងបាញ់ទឹកដើម្បីបំបែកក្រុមអ្នកតវ៉ា ចំណែកនៅទីក្រុងស៊ីដនីរបស់អូស្ត្រាលីវិញ ប៉ូលិសបានចាប់ខ្លួននិងផាកពិន័យមនុស្សជាច្រើននាក់។
ផ្ទុះបាតុកម្មនៅបារាំងប្រឆាំងនឹងការទាមទារលិខិតចាក់វ៉ាក់សាំងកូវីដ១៩
ដើម្បីទប់ស្កាត់រលកឆ្លងកូវីដ រដ្ឋអំណាចនៃបណ្តាប្រទេសជាច្រើន បានដាក់ចេញនូវវិធានការរឹតត្បឹតដូចជា ការបិទខ្ទប់ក្រុង ហាមប្រាមការជួបជុំជាសារធារណៈ ការអនុញាតឲ្យអាចធ្វើដំណើរបានតែក្នុងករណីចាំបាច់ និងការជំរុញប្រជាជនឲ្យចាក់វ៉ាក់សាំងបង្ការកូវីដ១៩ ជាដើម។ល។
ក៏ប៉ុន្តែរស់នៅក្រោមវិធានការរឹតបន្តឹងកាន់តែយូរ ប្រជាជនក្នុងប្រទេសមួយចំនួនមិនសប្បាយចិត្តនោះទេនិងទប់កំហឹងលែងជាប់ រហូតនាំគ្នីគ្នាចេញផ្លូវធ្វើបាតុកម្មប្រឆាំងតវ៉ានឹងវិធានការកូវីដរបស់រដ្ឋាភិបាលតែម្តង។
នៅបារាំង កាលពីថ្ងៃសៅរ៍ ទី ២៤ កក្កដាម្សិលមិញ មានមនុស្សចំនួនប្រមាណ ១៦ ម៉ឺននាក់ បានចេញធ្វើបាតុកម្មនៅតាមដងផ្លូវនានាដើម្បីប្រឆាំងជាពិសេសចំពោះវិធានការថ្មីដែលទើបចេញដោយរដ្ឋាភិបាលរបស់លោកប្រធានាធិបតីម៉ាក្រុង។ វិធានការថ្មីនោះ គឺការទាមទារលិខិតបញ្ជាក់ថាបានចាក់វ៉ាក់សាំងរួចហើយ ឬលទ្ធផលតេស្តកូវីដអវិជ្ជមាន ដើម្បីអាចចូលភោជនីយដ្ឋាននិងទីកន្លែងសាធារណៈផ្សេងៗបាន។
នៅត្រង់ចំណុចនេះ គួរបញ្ជាក់ជូនថានៅក្នុងប្រទេសបារាំង ចាប់ពីថ្ងៃពុធ ទី២១ កក្កដា ឆ្នាំ ២០២១នេះទៅ ប្រជាពលរដ្ឋបារាំងត្រូវមានលិខិតចាក់វ៉ាក់សាំងកូវីដ១៩ ឬលទ្ធផលតេស្តកូវីដអវិជ្ជមានដើម្បីអាចចូលទីកន្លែងវប្បធម៌ និងទីកន្លែងកម្សាន្តមួយចំនួនដូចជារោងកុន រោងល្ខោន សារៈមន្ទីរ ឬមួយក៏ទីកន្លែងជួបជុំណាដែលមានមនុស្សចូលរួមលើសពី ៥០នាក់។ នេះគ្រាន់ជាជំហានទី១ ហើយចាប់ពីថ្ងៃទី១ សីហាខាងមុខទៅ វិធានការដូចគ្នានេះនឹងត្រូវអនុវត្តបន្ថែមសម្រាប់ភោជនីយដ្ឋាន និងផ្សារទំនើបធំៗ។
ខណៈដែលនាំគ្នាស្រែកថា សេរីភាព! សេរីភាព! នៅក្នុងដៃរបស់ក្រុមអ្នកតវ៉ាបារាំង មានកាន់បដាបរិហារលោកប្រធានាធិបតីម៉ាក្រុង ថាជាមេដឹកនាំផ្តាច់ការ បិទខ្ទប់សិទ្ធិសេរីភាព ហើយថាពួកគេមិនគាំទ្រឡើយចំពោះការចាត់តម្រូវឲ្យមានលិខិតឬប័ណ្ណចាក់វ៉ាក់សាំងកូវីដ១៩នេះ។
ក្រៅពីបារាំង ការតវ៉ាធំៗក៏បានផ្ទុះឡើងដែរនៅតាមបណ្តាប្រទេសផ្សេងទៀតនៅអឺរ៉ុប
បាតុកម្មតវ៉ាធំៗបានចាប់រីករាលដាលកាន់ច្រើននៅតាមបណ្តាប្រទេសនានា ជាពិសេសនៅអឺរ៉ុប។ វិធានការរឹតត្បិតបន្ថែមដើម្បីគ្រប់គ្រងកូវីដ ដោយចាត់តម្រូវឲ្យមានលិខិតចាក់វ៉ាក់សាំង ឬលទ្ធផលតេស្តកូវីដអវិជ្ជមាន សម្រាប់ចូលទីកន្លែងវប្បធម៌ឬកន្លែងសារធារណៈផ្សេងៗបានបង្កឲ្យផ្ទុះការតវ៉ានៅអឺរ៉ុបរីករាលដាលតាំពីបារាំងដល់ អ៊ីតាលី និងក្រិកផងដែរ។
ករណីដែលកើតឡើងនៅអ៊ីតាលី គឺមិនខុសគ្នាប៉ុន្មានពីនៅបារាំងឡើយ។ គ្រោងការស្រដៀងគ្នាមួយហៅថាប័ណ្ឌឬច្រកបៃតង “green pass” បានធ្វើឲ្យប្រជាជនអ៊ីតាលីមួយចំនួនខឹងសម្បាជាខ្លាំង។ ពីទីក្រុងរ៉ូមឆ្លងឆ្លងទៅដល់ក្រុងណាផ្ល (Naples) និងទូរីន (Turin) ប្រជាជនបានស្រែកហៅពាក្យថាសេរីភាពនិងប្រឆាំងជាខ្លាំងចំពោះការចាប់បង្ខំរបស់រដ្ឋាភិបាលឲ្យពួកគេគោរពតាមវិធានការដែលតម្រូវឲ្យមានប័ណ្ណបៃតងនេះដើម្បីធ្វើអាចដើរលេងឬចូលទីកន្លែងសាធារណៈផ្សេងៗបាន។
នៅក្នុងប្រទេសអ៊ីតាលីចាប់ពីដើមខែសីហាខាងមុខទៅ ការចូលទស្សនាកីឡដ្ឋាន សារមន្ទីររោងកុន មជ្ឈមណ្ឌលតាំងពិព័រណ៍ អាងហែលទឹក និងកន្លែងហាត់កីឡាជាដើម នឹងត្រូវអនុញ្ញាតឲ្យចំពោះតែប្រជាពលរដ្ឋណាដែលមានប័ណ្ណបៃតងតែប៉ុណ្ណោះ។
ស្របពេលជាមួយគ្នានេះ បាតុកម្មក៏បានផ្ទុះឡើងយ៉ាងសកម្មដែរនៅក្នុងប្រទេសក្រិក។ មានមនុស្សប្រមាណ ៥ ពាន់នាក់បានចេញតវ៉ានៅទីក្រុងអាថែនដោយកាន់បដាក្នុងន័យប្រឆាំងនឹងវិធានការចាក់វ៉ាក់សាំងចំពោះក្មេងៗ។ ឪពុកម្តាយក្រិកបានសរសេរពាក្យស្លោកដូចជាហាមមិនឲ្យប៉ះពាល់កូនៗរបស់ពួកគេឡើយ។ នេះបើយោងតាមអ្នកសារព័ត៌មាន AFP ដែលបានចុះទៅយកព័ត៌មានដល់កន្លែងកើតហេតុផ្ទាល់។
បាតុកម្មនៅក្រុងស៊ីដនីប្រទេសអូស្ត្រាលី ឈានដល់ការប៉ះទង្គិចគ្នាហិង្សា
ក្នុងអំឡុងពេលបាតុកម្មជាច្រើនម៉ោង ក្រុមបាតុករដែលចេញតវ៉ាទាំងដែលភាគច្រើនគ្មានពាក់ម៉ាស់ផងនោះ បានជួបប្រឈមមុខដាក់គ្នាជាច្រើនដងជាមួយប៉ូលិស។ ក្រុមបាតុករនៅក្រុងស៊ីដនីដែលរស់នៅក្រោមវិធានការបិទខ្ទប់ក្រុង និងស្នាក់នៅក្នុងផ្ទះរយៈពេលប្រមាណជាមួយខែមកហើយនោះ បានផ្ទុះកំហឹងឡើងនៅបន្ទាប់ពីអាជ្ញាធរបានលើកឡើងថាការរឹតបន្តឹងអាចនៅតែមានរហូតដល់ខែតុលាខាងមុខ។ ក្នុងពេលប៉ះទង្គិចគ្នា បាតុករខ្លះបានយកថូរុក្ខជាតិនិងដបទឹកគប់ទៅលើមន្ត្រីប៉ូលិសក្រុងស៊ីដនីទៀតផង។
អភិបាលរដ្ឋ New South Wales លោកស្រី Gladys Berejiklian បានមានប្រសាសន៍ថាលោកស្រីមានការស្អប់ខ្ពើមខ្លាំងណាស់ចំពោះក្រុមបាតុករខុសច្បាប់ដែលបានប្រព្រឹត្តសកម្មភាពអាត្មានិយម និងធ្វើឲ្យប៉ះពាល់ដល់សុវត្ថិភាពរបស់ប្រជាពលរដ្ឋអូស្ត្រាលីគ្រប់គ្នា។
ទន្ទឹមគ្នានេះ មន្រ្តីប៉ូលិសរដ្ឋ New South Wales បានឲ្យដឹងដែរថាក្រុមអ្នកស៊ើបអង្កេតនឹងពិនិត្យមើលរូបភាពវីដេអូដើម្បីកំណត់អត្តសញ្ញាណនិងធ្វើការចោទប្រកាន់លើអ្នកដែលប្រព្រឹត្តខុសច្បាប់ឲ្យបានច្រើនតាមដែលអាចធ្វើទៅបាននៅប៉ុន្មានថ្ងៃខាងមុខ។
គួរបញ្ជាក់ជូនថា កាលពីថ្ងៃសៅរ៍ម្សិលមិញប៉ូលិសនៅទីក្រុងម៊ែលប៊នបានចាប់ខ្លួនមនុស្ស ៦ នាក់ហើយនៅទីក្រុងស៊ីដនីវិញ អាជ្ញាធរបានប្រាប់ថាមានមនុស្សខ្ទង់ពី ៦ទៅ៧ នាក់ត្រូវបានចាប់ដាក់ខ្នោះដៃ មនុស្សជិត ១០០ នាក់ត្រូវបានផាកពិន័យ និងមាន ៥៧ នាក់ផ្សេងទៀតត្រូវបានចាប់ខ្លួន។ រដ្ឋមន្រ្តីសន្តិសុខរដ្ឋ New South Wales លោក David Elliott បានមានប្រសាសន៍ថាទីក្រុងស៊ីដនីគ្មានភាពសាំរួមនោះទេព្រោះតែអ្នកតវ៉ាល្ងីល្ងើមួយចំនួន។
សរុបមក ស៊ីដនីដែលជាទីក្រុងប្រជុំដោយប្រជាជនចំនួនជាង ៥ លាននាក់កំពុងតែខំខ្នះខ្នែងខ្លាំងដើម្បីទប់ស្កាត់ការឆ្លងរាលដាលកូវីដបង្កឡើងដោយមេរោគបំប្លែងខ្លួនដែលតា។ នៅទូទាំងប្រទេសអូស្ត្រាលីទាំងមូលមានមនុស្សពាក់កណ្តាលនៃប្រជាជនសរុប ពោលគឺស្មើប្រមាណ ១២ លាន ៥ សែន ស្នាក់នៅតែក្នុងផ្ទះទៅតាមវិធានការរឹតត្បិតជាថ្មីរបស់រដ្ឋាភិបាល។
ប្រជាជនអូស្ត្រាលីដែលរស់នៅក្រោមវិធានការរឹតបន្តឹងកាន់តែយូរ កាន់តែមានកំហឹងខ្លាំងឡើង ចំពោះការរឹតត្បិតនិងបរាជ័យរបស់រដ្ឋាភិបាលក្នុងការផ្គត់ផ្គង់វ៉ាក់សាំងឲ្យបានគ្រប់គ្រាន់។ ដូច្នោះហើយទើបពួកគេចេញធ្វើការតវ៉ាតែម្តង។
ចំណែកនៅបារាំង ដូចជាកន្លែងផ្សេងទៀតនៅអឺរ៉ុប រដ្ឋាភិបាល កំពុងរិះរកវិធីជំរុញប្រជាជនទៅចាក់វ៉ាកសាំងបង្ការកូវីដឲ្យបានច្រើន និងបានដាក់ការចាក់វ៉ាកសាំងជាកាតព្វកិច្ចសម្រាប់អាជីពខ្លះ។ នៅក្នុងប្រទេសអ្នកមាន ប្រជាជនមានសិទ្ធិសេរីភាពច្រើន មានវ៉ាក់សាំងហើយ តែបែរជាតវ៉ាមិនចង់ចាក់ ខណៈដែលប្រទេសក្រីក្រខ្លះឯណោះវិញ ប្រជាជនរកវ៉ាក់សាំងចាក់គ្មានផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ