លោកអេប្រាហ៊ីម រ៉ៃស៊ី ស្បថចូលកាន់តំណែងជាប្រធានាធិបតីអ៊ីរ៉ង់ថ្មី
ចុះផ្សាយនៅថ្ងៃ៖
ស្តាប់ - ០៨:១៥
លោក អេប្រាហ៊ីម រ៉ៃស៊ី ដែលជាអ្នកអភិរក្សនិយមជ្រុល ត្រូវស្បថចូលកាន់តំណែងជាប្រធានាធិបតីថ្មីរបស់អ៊ីរ៉ង់ នៅថ្ងៃអង្គារ ទី៣ សីហានេះ។ ជាការគួរឲ្យកត់សម្គាល់ លោក រ៉ៃស៊ី ឡើងស្នងតំណែងជាមេដឹកនាំ ក្នុងពេលដែលប្រទេសស្ថិតនៅក្នុងវិបត្តិសេដ្ឋកិច្ចធ្ងន់ធ្ងរ និងក្នុងបរិបទនៃភាពតានតឹងជាមួយសហរដ្ឋអាមេរិក និងអ៊ីស្រាអែល។ តើលោក អេប្រាហ៊ីម រ៉ៃស៊ី ជាអ្នកណា? ហើយថាតើអ្វី ជាគោលនយោយបាយការបរទេសសំខាន់ៗរបស់ប្រធានាធិបតីអ៊ីរ៉ង់ថ្មីរូបនេះ?
តើលោកអេប្រាហ៊ីម រ៉ៃស៊ី ជាអ្នកណា?
មានវ័យ ៦០ ឆ្នាំ លោកអេប្រាហ៊ីម រ៉ៃស៊ី គឺជាអ្នកច្បាប់មួយរូបដែលមានទស្សនៈនយោបាយអភិរក្សនិយមជ្រុល និងបានជាប់ឆ្នោតក្លាយជាប្រធានាធិបតីទី ៨ របស់សាធារណរដ្ឋអ៊ីស្លាមអ៊ីរ៉ង់ តពីលោក ហាសសាន រ៉ូហានី។ ប្រទេសលោកខាងលិច និងសកម្មជនសិទ្ធិមនុស្សជាច្រើន បានបរិហារលោកថាធ្លាប់មានតួនាទី ជាប់ពាក់ព័ន្ធក្នុងការប្រហារជីវិតអ្នកទោសនយោបាយដ៏ច្រើនក្នុងអំឡុងទសវត្សរ៍ឆ្នាំ១៩៨០។
អេប្រាហ៊ីម រ៉ៃស៊ី កើតនៅថ្ងៃទី ១៤ ធ្នូ ឆ្នាំ ១៩៦០ នៅម៉ាហាដ (Mashhad) ដែលជាទីក្រុងធំទី ២ របស់អ៊ីរ៉ង់ និងជាទីសក្ការបូជាសាសនាអ៊ីស្លាម ដ៏ពិសិដ្ឋបំផុតរបស់ប្រទេស។ ឪពុករបស់លោក គឺជាបព្វជិតសាសនាម្នាក់និងបានស្លាប់នៅពេលដែលកុមាររ៉ៃស៊ី មានអាយុ ទើបបាន៥ឆ្នាំ។
ប្រវត្តិសិក្សារបស់លោក រ៉ៃស៊ី គឺល្អណាស់ ហើយលោកបានក្លាយជា រដ្ឋអាជ្ញារងនៅទីក្រុងតេហេរ៉ង់ទាំងវ័យក្មេង ពោលនៅវ័យត្រឹមតែ ២៥ ឆ្នាំប៉ុណ្ណោះ។ បន្ទាប់មកទៀត លោកបានបន្តធ្វើជារដ្ឋអាជ្ញាក្រុងតេហេរ៉ង់ និងក្រោយមកជាប់ជារដ្ឋអាជ្ញារងនៃតុលាការបដិវត្តអ៊ីរ៉ង់មុននឹងត្រូវបានតែងតាំងជាអគ្គរដ្ឋអាជ្ញាអ៊ីរ៉ង់ក្នុងឆ្នាំ ២០១៤។
២ ឆ្នាំបន្ទាប់មកទៀត ពោលគឺនៅឆ្នាំ ២០១៦ មគ្គុទេសក៍សាសនាអ៊ីស្លាមអ៊ីរ៉ង់អាលី ខាមេណី បានដាក់ឈ្មោះលោកថាជាមូលដ្ឋានគ្រឹះនៃសាសនាដ៏សំខាន់។ នៅឆ្នាំ ២០១៧ លោករ៉ៃស៊ី បានធ្វើឲ្យអ្នកសង្កេតការណ៍ភ្ញាក់ផ្អើល ដោយលោកបានឈរឈ្មោះជាប្រធានាធិបតីអ៊ីរ៉ង់។
ក៏ប៉ុន្តែកាលណោះ លោកមិនអាចប្រជែងយកឈ្នះ អតីតប្រធានាធបិតី ហាសាន រ៉ូហានី បាននោះទេ។ លោកត្រូវរង់ចាំ រយៈពេល ៤ ឆ្នាំ ទើបអាចដណ្តើមយកឈ្នះ តំណែងជាប្រធានាធិបតីថ្មីរបស់អ៊ីរ៉ង់ នៅក្នុងការបោះឆ្នោត កាលពីខែមិថុនា និងត្រូវស្បថចូលកាន់តំណែងគ្រប់គ្រងប្រទេសជាផ្លូវការ នាថ្ងៃអង្គារ ទី៣ សីហា ឆ្នាំ ២០២១នេះ។
គោលនយោបាយការបរទេសរបស់លោករ៉ៃស៊ី?
លោកអេប្រាហ៊ីម រ៉ៃស៊ី ឡើងគ្រងតំណែងប្រធានាធិបតី ជំនួសលោក ហាសាន រ៉ូហានី។ កិច្ចព្រមព្រៀងនុយក្លេអ៊ែរឆ្នាំ ២០១៥ រវាងអ៊ីរ៉ង់ និងប្រទេសមហាអំណាចចំនួន ៦ គឺជាសមិទ្ធផលដ៏លេចធ្លោជាងគេបំផុតមួយ ក្រោមការដឹកនាំរយៈពេល ២អាណត្តិរបស់ លោកអតីតប្រធានាធិបតី រ៉ូហានី។
ដូច្នោះ បញ្ហាធំដែលមេដឹកនាំអ៊ីរ៉ង់ថ្មីលោក រ៉ៃស៊ី ត្រូវដោះស្រាយនៅចំពោះមុខ គឺកិច្ចចរចា ស្តីអំពីសំណុំរឿងនុយក្លេអ៊ែរ ដែលអាមេរិករបស់លោកអតីតប្រធានាធិបតី ដូណាល់ ត្រាំ បានសម្រេចដកខ្លួន ជាឯកតោភាគីកាលពីឆ្នាំ ២០១៨ និង បានសម្រេច ដាក់ទណ្ឌកម្មសេដ្ឋកិច្ចយ៉ាងធ្ងន់ លើអ៊ីរ៉ង់។
ក្នុងពេលថ្លែងសុន្ទរកថា នៅឯពិធីស្បថចូលកាន់តំណែងប្រធានាធិបតីនាថ្ងៃនេះ លោក រ៉ៃស៊ី បាននិយាយថា រដ្ឋាភិបាលថ្មីរបស់លោក នឹងខំពុះពារធ្វើយ៉ាងណា ដកទណ្ឌកម្មដែលគាបសង្កត់ដោយក្រុងវ៉ាស៊ីនតោនឲ្យបាន។ តែទោះជាយ៉ាងណាក៏ដោយ ប្រធានាធិបតីអ៊ីរ៉ង់ថ្មីរូបនេះ ហាក់បង្ហាញជំហរងាកចេញពីបច្ចិមលោកកាន់តែខ្លាំង។
នៅមុនចប់អាណត្តិដឹកនាំប្រទេស លោកហាសាន រ៉ូហានី បានប្រឹងប្រែង បើកចំហទ្វារចរចាជាមួយរដ្ឋបាលអាមេរិករបស់លោក ចូ បៃដិន ដើម្បីឈានទៅស្រោចស្រង់កិច្ចព្រមព្រៀងនុយក្លេអ៊ែរ និងដើម្បីរួចខ្លួនពីទណ្ឌកម្ម។ ផ្ទុយទៅវិញ នៅប៉ុន្មានថ្ងៃក្រោយជាប់ឆ្នោតក្លាយជាប្រធានាធិបតីអ៊ីរ៉ង់ លោកអេប្រាហ៊ីម រ៉ៃស៊ី បានបង្ហាញជំហរមុតមាំ ក្នុងសំណុំរឿងនុយក្លេអ៊ែរ ដោយនិយាយថាលោកមិនចង់ជួបចរចាជាមួយលោក បៃដិនទេ។
លោករ៉ៃស៊ី បានសង្កត់ធ្ងន់ដែរថា រដ្ឋាភិបាលរបស់លោកនឹងគាំទ្រកិច្ចពិភាក្សាណាដែលធានានូវផលប្រយោជន៍ជាតិរបស់អ៊ីរ៉ង់ ហើយក្រុងតេហេរ៉ង់ នឹងមិនទោរទន់ធ្វើតាមការបង្គាប់បញ្ជារបស់ប្រទេសលោកខាងលិច ដើម្បីតែអាចរួចផុតពីការដាក់ទណ្ឌកម្មឡើយ។
វិបត្តិសេដ្ឋកិច្ចរបស់អ៊ីរ៉ង់ ដែលកាន់តែធ្ងន់ធ្ងរឡើងៗ ដោយសារទណ្ឌកម្មអាមេរិក និងជំងឺកូវីដ គឺជាបញ្ហាប្រឈមខ្លាំងរបស់ប្រធានាធិបតីអ៊ីរ៉ង់ថ្មី។ ទណ្ឌកម្មអាមេរិកបានទៅបង្អាក់ការនាំចេញប្រេងដែលជាវិស័យទ្រទ្រង់ដ៏សំខាន់ដល់សេដ្ឋកិច្ចអ៊ីរ៉ង់។ សេដ្ឋកិច្ចអ៊ីរ៉ង់ បានធ្លាក់ចុះជាង ៦ % ទាំងក្នុងឆ្នាំ ២០១៨ និងឆ្នាំ ២០១៩។
យ៉ាងណាក៏ដោយ មេដឹកនាំថ្មីរបស់សាធារណរដ្ឋអ៊ីស្លាមអ៊ីរ៉ង់ មានភាពជឿជាក់ថា ថាអាចជម្នះរាល់ឧបសគ្គ ដើម្បីនាំយកនូវភាពសុខសាន្តជូនប្រជាជាតិទាំងមូល។ លោក អេប្រាហ៊ីម រ៉ៃស៊ី ដែលជាអ្នកអភិរក្សនិយមជ្រុល ត្រូវបានគេមើលឃើញថា ជាមនុស្សដែលប្រកាន់មនោគមវិជ្ជារឹងរូសបំផុត នៅចំពោះមុខប្រទេសលោកខាងលិច មិនថាសហរដ្ឋអាមេរិក ឬក៏អឺរ៉ុបទេ ទោះបីក្នុងកាលៈទេសៈដែលសេដ្ឋកិច្ចនៃប្រទេសអ៊ីរ៉ង់ កំពុងធ្លាក់ក្នុងជង្ហុកជ្រៅនៃវិបត្តិក៏ដោយ។
ឥឡូវនេះ ដើម្បីដោះស្រាយវិបត្តិសេដ្ឋកិច្ចដែលកំពុងទន់ជង្គង់ខ្លាំង រដ្ឋាភិបាលថ្មីរបស់លោក រ៉ៃស៊ី សំឡឹងឃើញច្រកចេញមួយ ហើយច្រកនោះគឺជំរុញការដោះដូរពាណិជ្ជកម្មជាមួយប្រទេសក្បែរខាងនិងប្រទេសដៃគូផ្សេងទៀតដូចជារុស្ស៊ី និងចិនជាដើម។
តើប្រធានាធិបតីអ៊ីរ៉ង់ថ្មី អាចដឹកនាំប្រទេសឲ្យងើបចេញពីវិបត្តិសេដ្ឋកិច្ចធ្ងន់ធ្ងរបានទេ?
បើយោងតាមការលើកឡើង របស់លោក អេប្រាហ៊ីម រ៉ៃស៊ី ឃើញថា លោកពិតជាទឹកចិត្តមោះមុតណាស់ មានក្តីសង្ឃឹមច្រើនណាស់ ក្នុងការដោះស្រាយវិបត្តិ និងជួយប្រទេសអ៊ីរ៉ង់ឲ្យអាចក្រោកឈរឡើងនិងដើរចាកចេញឆ្ងាយពីវិបត្តិសេដ្ឋកិច្ច ដែលកំពុងបោកបក់ប្រទេសអ៊ីរ៉ង់ក៏ដូចជាប្រជាជនអ៊ីរ៉ង់ដែរ។
ក៏ប៉ុន្តែ ការនិយាយ ឬការសន្យាគឺជារឿងដែលងាយធ្វើ តែអ្វីដែលសំខាន់គឺលទ្ធផលទៅវិញទេ។ ដូច្នោះហើយ ចង់ដឹងថាប្រធានាធិបតីអ៊ីរ៉ង់ថ្មី លោក អេប្រាហ៊ីម រ៉ៃស៊ី អាចជួសជុលសេដ្ឋកិច្ចដែលកំពុងជួបវិបត្តិខ្លាំងបានឬយ៉ាងណា គេមានតែរង់ចាំមើលលទ្ធផលជាក់ស្តែង ក្រោយលោកបានឡើងដឹកនាំប្រទេសអ៊ីរ៉ង់ប៉ុណ្ណោះ។
នៅចុងបញ្ចប់នេះ គួរបញ្ជាក់ដែរថា ក្រៅតែពីកិច្ចចរចាស្តីពីកិច្ចព្រមព្រៀមនុយក្លេអ៊ែរអ៊ីរ៉ង់ បញ្ហាសេដ្ឋកិច្ច លោកប្រធានាធិបតីអ៊ីរ៉ង់ថ្មី ក៏ត្រូវដោះស្រាយផងដែរ ភាពតានតឹង ដែលកំពុងកើនឡើងខ្លាំងនាពេលថ្មីនេះ ជាមួយប្រទេសអ៊ីស្រាអែល សហរដ្ឋអាមេរិក និងអង់គ្លេស ជុំវិញការវាយប្រហារនាវាដឹកប្រេងមួយនៅសមុទ្រអូម៉ង់។
ភាពតានតឹងនេះ បានចាប់ផ្ទុះឡើង បន្ទាប់ពីសហរដ្ឋអាមេរិក អង់គ្លេស បានចូលរួមជាមួយអ៊ីស្រាអែល ចោទអ៊ីរ៉ង់ថាជាអ្នកវាយប្រហារនាវាដឹកប្រេងរបស់អ៊ីរ៉ង់ កាលពីថ្ងៃទី ២៩ កក្កដាកន្លងទៅថ្មីៗនេះ។ អាមេរិក បានព្រមានថានឹងឆ្លើយតបចំពោះការវាយប្រហារ ឲ្យបានស័ក្តិសម។
ដូចគ្នាដែរ ចង់ដឹងថា ទំនាក់ទំនង រវាងសហរដ្ឋអាមេរិក អ៊ីស្រាអែល ជាមួយនឹងអ៊ីរ៉ង់ អាចជួបភាពប្រសើរឡើងវិញខ្លះឬក៏អត់ គេមានតែរង់ចាំមើលប្រតិកម្មតបត របស់មេដឹកនាំអ៊ីរ៉ង់ថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ