ប្រធានាធិបតីថ្មីអ៊ីរ៉ង់ បង្ហាញជំហរតឹងរឹង បដិសេធមិនជួបចរចា ជាមួយ លោក ចូ បៃដិន
៣ថ្ងៃក្រោយជាប់ឆ្នោត ក្លាយជាប្រធានាធិបតីអ៊ីរ៉ង់ថ្មី លោកអេប្រាហ៊ីម រ៉ៃស៊ី បានបង្ហាញជំហរជាក់ច្បាស់ ទាក់ទិននឹងទំនាក់ទំនងអន្តរជាតិ។ ក្នុងសំណុំរឿងនុយក្លេអ៊ែរ លោកប្រធានាធិបតីថ្មីអ៊ីរ៉ង់ បានលើកឡើងថា លោកនឹងមិនជួបចរចា ជាមួយលោកចូ បៃដិនទេ។ តែយ៉ាងណា ទាក់ទិននឹងការភ្ជាប់ទំនាក់ទំនងការទូតឡើងវិញ ជាមួយអារ៉ាប៊ីសាអូឌីត លោក អេប្រាហ៊ីម រ៉ៃស៊ី បានលើកឡើងថា អ៊ីរ៉ង់នឹងមិនដាក់ឧបសគ្គជំទាស់ឡើយ។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងសន្និសីទកាសែតជាលើកទី១ ក្នុងនាមប្រធានាធិបតីថ្មីរបស់អ៊ីរ៉ង់លោក អេប្រាហ៊ីម រ៉ៃស៊ី (Ebrahim Raïssi) បានលើកឡើងថា គោលនយោបាយការបរទេសរបស់អ៊ីរ៉ង់ មិនមែនកំណត់ត្រឹមតែសំណុំរឿងនុយក្លេអ៊ែរនោះទេ។ លោកបានសង្កត់បន្ថែមថា អ៊ីរ៉ង់មិនមែនចរចា ដោយគ្រាន់តែចង់ចរចានោះទេ។ រាល់ការជួបចរចាទាំងអស់ គឺត្រូវតែផ្តល់ជាលទ្ធផលជាក់ស្តែង ដល់ជាតិអ៊ីរ៉ង់។ ទាក់ទិននឹងការស្តារទំនាក់ទំនងជាមួយប្រទេសអារ៉ាប៊ីសាអូឌីត លោក អេប្រាហ៊ីម រ៉ៃស៊ី បានអះអាងថា រដ្ឋាភិបាលលោក នឹងមិនដាក់ឧបសគ្គរារាំង ក្នុងការបើកស្ថានទូតជាមួយគ្នាឡើងវិញនោះទេ។
ឆ្លើយតប នឹងបណ្តាញព័ត៌មានអាមេរិកមួយ ដែលចោទសួរថា តើលោកយល់ព្រមជួបជាមួយលោកចូ បៃដិន ដែរឬទេ ដើម្បីឈានទៅចរចាដកទណ្ឌកម្មសេដ្ឋកិច្ច ព្រមទាំងស្តារទំនាក់ទំនងជាមួយអាមេរិក លោកប្រធានាធីបតីថ្មីអ៊ីរ៉ង់ បានឆ្លើយមួយម៉ាត់យ៉ាងខ្លីថា លោកមិនជួបលោកចូបៃដិនទេ។
សូមបញ្ជាក់ថា បច្ចុប្បន្ននេះក្រុមប្រទេសហត្ថលេខី រួមជាមួយទីភ្នាក់ងារថាមពលនុយក្លេអ៊ែរអន្តរជាតិ កំពុងប្រឹងប្រែងចរចា នៅទីក្រុងវីយែន ដើម្បីស្រោចស្រង់កិច្ចព្រមព្រៀងនុយក្លេអែ៊រអ៊ីរ៉ង់។ ការចរចា គឺផ្តោតសំខាន់ទៅលើការវិលត្រលប់ចូលរួមវិញ របស់សហរដ្ឋអាមេរិក តាមរយៈការលុបចោលទណ្ឌកម្មខ្លះទៅលើអ៊ីរ៉ង់ ហើយអ៊ីរ៉ង់ត្រូវត្រលប់ មកគោរពខសន្យាទាំងស្រុងវិញ។
គួរបញ្ជាក់ថា លោក អេប្រាហ៊ីម រ៉ៃស៊ី គឺជាមនុស្សមកពីក្រុមអភិរក្សនិយមជ្រុល ស្និទជាមួយលោកអាយ៉ាតូឡា អាលី ខាមឺណី មគុទេសន៍សាសនាកំពូលរបស់អ៊ីរ៉ង់។ ក្រុមអភិរក្សនិយមជ្រុល ត្រូវបានគេស្គាល់ថា ជាក្រុមដែលប្រកាន់មនោគមវិជ្ជារឹងរូសបំផុត ជាមួយប្រទេសលោកខាងលិច មិនថាសហរដ្ឋអាមេរិក ឬអឺរ៉ុបទេ។
យោងតាមមន្ត្រីអ៊ីរ៉ង់ និងមន្ត្រីបញ្ចឹមលោកខ្លះ គឺគេពិបាកសង្ឃឹមណាស់ ថារដ្ឋាភិបាលអ៊ីរ៉ង់ថ្មី ដឹកនាំដោយលោក អេប្រាហ៊ីម រ៉ៃស៊ី អាចនឹងបន្ទន់ឥរិយាបថ ព្រមចរចា ឬធ្វើសម្បទានណាមួយ ដរាបណាសហរដ្ឋអាេមរិក មិនដកចេញទាំងស្រុង នូវទណ្ឌកម្មសេដ្ឋកិច្ចទេនោះ។ លោក អេប្រាហ៊ីម រ៉ៃស៊ី បានបញ្ជាក់ថា គឺសហរដ្ឋអាមេរិក ដែលជាអ្នកបំពានកិច្ចព្រមព្រៀងនុយក្លេអ៊ែរ ហើយសហភាពអឺរ៉ុបវិញ មិនបានគោរពការសន្យារបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ