អាមេរិកនិងអង់គ្លេសប្រញាប់ជម្លៀសមន្ត្រីទូតពីអាហ្វហ្កានីស្ថាន ខណៈពួកតាលីបង់វាយលុកកាន់តែជិតដល់ក្រុងកាប៊ុល
ចុះផ្សាយនៅថ្ងៃ៖
ស្តាប់ - ០៨:១០
ក្រុមតាលីបង់ប្រកាសអះអាងនៅថ្ងៃសុក្រ ១៣សីហានេះ ថាបានកាន់កាប់ទីក្រុងកង់ដាហារ (Kandahar) ដែលជាទីក្រុងធំទី២របស់អាហ្វហ្កានីស្ថាន។ ខណៈពេលនេះ ពួកឧទ្ទាមតាលីបង់កំពុងបន្តគោលដៅសំដៅយ៉ាងលឿនឆ្ពោះទៅរដ្ឋធានីកាប៊ុល។ ចំណែកសហរដ្ឋអាមេរិក និងអង់គ្លេសវិញបានបញ្ជូនទ័ពជាច្រើនពាន់នាក់ដើម្បីទៅជម្លៀសមន្រ្តីទូតចេញពីអាហ្វហ្កានីស្ថាន។
ពួកតាលីបង់វាយដណ្តើមបានទីក្រុងកង់ដាហារដែលជាទីក្រុងធំទី២របស់អាហ្វហ្កានីស្ថាន
ស្ថានការណ៍នៅក្នុងប្រទេសអាហ្វហ្កានីស្ថាននាពេលនេះកំពុងកើនកម្តៅខ្លាំងណាស់ ព្រោះថា ពួកតាលីបង់សម្រុកវាយដណ្តើមកាន់កាប់យកទីតាំងសំខាន់ៗបានកាន់តែច្រើន។ ជាពិសេស នៅថ្ងៃសុក្រនេះ ពួកតាលីបង់អះអាងថាពួកគេបានវាយដណ្តើមក្រុងធំទី២ របស់អាហ្វហ្កានីស្ថានគឺទីក្រុងកង់ដាហារ (Kandahar) យកមកកាន់កាប់បានហើយ។
ការយកក្រុងកង់ដាហារមកត្រួតត្រាបាននេះ គឺជានិមិត្តរូបនៃជោគជ័យធំក្រៃណាស់សម្រាប់ពួកតាលីបង់ ព្រោះថាកង់ដាហារ ធ្លាប់ជាបន្ទាយរបស់ក្រុមតាលីបង់ ឬគេអាចនិយាយបានដែរថាវាគឺជាស្រុកកំណើតរបស់ពួកតាលីបង់។ ដូច្នោះ ការចូលគ្រប់គ្រងទីក្រុងដែលមានប្រជាជនចំនួនប្រមាណ ៦០ ម៉ឺននាក់នេះ គឺជារង្វាន់ដ៏ធំមិនអាចកាត់ថ្លៃបានទេសម្រាប់ពួកសកម្មប្រយុទ្ធតាលីបង់។
ជាការពិតពីមួយថ្ងៃទៅមួយថ្ងៃ ក្រុមតាលីបង់បានវាយលុកដណ្តើមបានទីក្រុងសំខាន់ៗ ក្នុងតំបន់ជាច្រើន។ ជាក់ស្តែង កាលពីថ្ងៃព្រហស្បតិ៍ ក្រុមតាលីបង់បានវាយដណ្តើមយកបានទីក្រុងហេរ៉ាត (Herat) ដែលជាទីក្រុងធំទី ៣ របស់អាហ្វហ្កានីស្ថាន និងដែលមានចម្ងាយត្រឹមតែប្រមាណតែ ១៣០ គីឡូម៉ែត្រប៉ុណ្ណោះពីរដ្ឋធានីកាប៊ុល។
ចំណែកទីក្រុងហ្គាហ្វនី (Ghazni) ដែលជាទីតាំងផ្លូវឆ្លងកាត់ដ៏សំខាន់ទៅកាន់រដ្ឋធានីកាប៊ុលវិញ ក៏ធ្លាក់ចូលទៅក្នុងដៃរបស់ក្រុមសកម្មប្រយុទ្ធដែរតាំងពីព្រឹកថ្ងៃព្រហស្បតិ៍ម្សិលមិញ។ មានជនស៊ីវិលអាហ្វហ្កានីស្ថានចំនួនរាប់ម៉ឺននាក់ក្នុងនោះមានកុមារប្រមាណ ៧ ២០០០ នាក់ បានរត់ភៀសខ្លួនពីការវាយលុករបស់ពួកតាលីបង់។ ហើយក៏មានមនុស្សជាច្រើននាក់ដែរ បានធ្វើដំណើរទៅរដ្ឋធានីកាប៊ុល ដើម្បីស្វែងរកកន្លែងសុវត្ថិភាពជ្រកកោន។
នៅតាមដងផ្លូវ គេឃើញសុទ្ធតែមនុស្សម្នាជាច្រើនកំពុងសម្រាកនិងទទួលទានដំណេកផងដែរ។ ទិដ្ឋភាពបែបនេះ ធ្វើឲ្យគេមានការសង្វេគចិត្តអាណិតជាខ្លាំង ចំពោះប្រជាជនអាហ្វហ្កានីស្ថានដែលកំពុងរងគ្រោះពីការវាយការវាយប្រយុទ្ធគ្នា។ បើយោងតាមអង្គការសហប្រជាជាតិ អាហ្វហ្កានីស្ថានមានប្រជាជន រត់ភៀសចេញពីផ្ទះសម្បែងធំជាងគេលំដាប់ទី ៣ក្នុងពិភពលោក។
ខណៈដែលពួកតាលីបង់វាយចូលកាន់តែកៀកជិតដល់ក្រុងកាប៊ុល អាមេរិកនិងអង់គ្លេស ក៏បានប្រញាប់ជម្លៀសមន្រ្តីទូតចេញពីអាហ្វហ្កានីស្ថាន
ពួកតាលីបង់កំពុងបង្កើនសន្ទុះសម្រុកវាយលុកលើទាហានរដ្ឋាភិបាលជាខ្លាំង។ បើយោងតាមអ្នកជំនាញ មកទល់នឹងពេលនេះ ពួកតាលីបង់វាយចូលគ្រប់គ្រងបានទីតាំងច្រើនណាស់នៅលើដែនដីរបស់អាហ្វហ្កានីស្ថានទាំងមូល។ ចំណែកទាហានរដ្ឋាភិបាលរបស់លោកប្រធានាធិបតីអាស្រាហ្វ ហ្កានី វិញ បច្ចុប្បន្នមានតែរដ្ឋធានីកាប៊ុល និងទីតាំងផ្សេងទៀតមិនច្រើននោះទេនៅក្នុងដៃ បើប្រៀបធៀបនឹងពួកតាលីបង់។
ក្រោយទទួលបានជ័យជម្នះជាបន្តបន្ទាប់ ក្រុមសកម្មប្រយុទ្ធរបស់ពួកតាលីបង់ ហាក់កាន់តែមានកម្លាំងខ្លាំងឡើង និងកំពុងតែត្បុលរុលទៅមុខទៀតឆ្ពោះសំដៅទៅរដ្ឋធានីកាប៊ុលដែលជាហេតុធ្វើឲ្យទីក្រុងនេះ កំពុងតែងប្រឈមមុខនឹងគ្រោះថ្នាក់ខ្លាំងណាស់។
ដោយហេតុនេះហើយ ទើបនៅថ្ងៃសុក្រនេះ សហរដ្ឋអាមេរិកនិងអង់គ្លេស ប្រញាប់រូតរះបញ្ជូនទ័ពរាប់ពាន់នាក់ទៅជម្លៀសមន្រ្តីទូតរបស់ពួកគេចេញពីប្រទេសអាហ្វហ្កានីស្ថាន។ កាលពីថ្ងៃព្រហស្បតិ៍ម្សិលមិញ មន្ទីរបញ្ចកោណបានឲ្យដឹងថាមានកងទ័ពអាមេរិកចំនួនប្រមាណ ៣ ០០០ នាក់នឹងត្រូវបញ្ជូនទៅកាន់ប្រទេសអាហ្វហ្កានីស្ថានភ្លាមៗ ដើម្បីជម្លៀសបុគ្គលិកស្ថានទូតអាមេរិកខ្ទង់ ១ ៤០០ នាក់ដែលកំពុងធ្វើការក្នុងរដ្ឋធានីកាប៊ុល។
ជាមួយគ្នានេះ ក្រសួងការបរទេសអាមេរិកបាននិយាយថា សហរដ្ឋអាមេរិកក៏មានគម្រោងរៀបចំជើងហោះហើរប្រចាំថ្ងៃដែរដើម្បីជម្លៀសសម្ព័ន្ធមិត្តទាំងឡាយរបស់ខ្លួនចេញពីអាហ្វហ្កានីស្ថាន។
ដូចគ្នាដែរ អង់គ្លេសដែជាប្រទេសគូកនជិតដិតរបស់អាមេរិក បានប្រកាសថានឹងបញ្ជូនកងទ័ពចំនួន ៦០០ នាក់ទៅអាហ្វហ្កានីស្ថានដើម្បីជួយបុគ្គលិកស្ថានទូតអង់គ្លេសនៅក្នុងទីក្រុងកាប៊ុល។
ជារួម ចំណាត់ការចុងក្រោយរបស់សហរដ្ឋអាមេរិក និងអង់គ្លេសនេះ បង្ហាញពីការខ្វះទំនុកចិត្តរបស់រដ្ឋបាលលោក ចូ បៃដិន និងលោកបូរីស ចនសុន ចំពោះសមត្ថភាពរដ្ឋាភិបាលអាហ្វហ្កានីស្ថានក្នុងការគ្រប់គ្រងសន្តិសុខការទូតឲ្យបានគ្រប់គ្រាន់ សូម្បីតែនៅក្នុងរដ្ឋធានីក៏ដោយ។ ក្នុងខណៈពេលនេះ កងទ័ពអាមេរិកប្រហែលជា ៦៥០ នាក់ នៅតែមានវត្តមានក្នុងប្រទេសអាហ្វហ្កានីស្ថានដើម្បីការពារព្រលានយន្តហោះនិងស្ថានទូត។
ហេតុអ្វីកងទ័ពអាហ្វហ្កានីស្ថានដែលមានចំនួនច្រើនជាងពួកសកម្មប្រយុទ្ធតាលីបង់ និងទទួលបានការហ្វឹកហ្វឺនពីអាមេរិកផងនោះ តែបែរជាមិនអាចទប់ក្រុមតាលីបង់ជាប់?
តើមានអ្វីកើតឡើងចំពោះកងទ័ពអាហ្វហ្គានីស្ថាន? ចំនួនកងទ័ពអាហ្វហ្កានីស្ថានមានច្រើនជាង បំពាក់ដោយគ្រឿងសព្វាវុធក៏ទំនើបជាងពួកតាលីបង់ ហើយថែមទាំងទទួលបានការហ្វឹកហ្វឺនពីអាមេរិកទៅទៀត។ ប៉ុន្តែ ពួកគេនៅតែមិនអាចទប់ទល់ក្រុមតាលីបង់ជាប់ដដែល។ ហេតុអ្វី?
ចម្លើយនោះគឺថា អំពើពុករលួយ កង្វះឆន្ទៈមុះមុតក្នុងការប្រយុទ្ធ និងភាពខ្វះចន្លោះរបស់សហរដ្ឋអាមេរិកដែលប្រញាប់ដកកងទ័ពចេញ ត្រូវគេមើលឃើញថា ជាហេតុផលដ៏សំខាន់ចូលរួមចំណែកក្នុងនៃបរាជ័យរបស់កងទ័ពរដ្ឋាភិបាលអាហ្វហ្កានីស្ថាន។
អស់រយៈពេលជាច្រើនឆ្នាំមកហើយ រដ្ឋាភិបាលក្រុងវ៉ាស៊ីនតោន បានចេញរបាយការណ៍លម្អិតជាច្រើនអំពីអំពើពុករលួយដ៏ច្រើនសន្ធឹកសន្ធាប់ នៅក្នុងជួរកងទ័ពអាហ្វហ្កានីស្ថាន។
ពួកមេបញ្ជាការធំៗរបស់អាហ្វហ្កានីស្ថាន តែងតែលួចបន្លំកិបកេងប្រាក់ ដែលត្រូវផ្តល់ឲ្យកូនទាហានដាក់ចូលហោប៉ៅខ្លួនឯង។ ក្រៅពីនេះ ពួកគេនៅឆ្លៀតលួចលក់អាវុធក្នុងទីផ្សារងងឹត ហើយបង្កើតបុគ្គលិកខ្មោច ដោយនិយាយកុហកបោកប្រាស់ពីចំនួនទាហានដែលនៅក្រោមការបង្គាប់បញ្ជារបស់ពួកគេ។
មួយវិញទៀត ទោះបីជាទទួលបានការហ្វឹកហ្វឺនក្តី ក៏ទាហានអាហ្វហ្កានីស្ថាន គ្មានម្ចាស់ការលើខ្លួនឯងគ្រប់គ្រាន់ និងនៅតែពឹងផ្អែកខ្លាំងលើកម្លាំងទ័ពរបស់អាមេរិក។ ដូច្នោះហើយ នៅពេលទទួលរងការវាយប្រហារលុកលុយ ពីពួកតាលីបង់ដែលខ្លាំងជាងមុននិងដែលមានទឹកចិត្តមុតស្រួចក្នុងការប្រយុទ្ធនោះ កងទ័ពរដ្ឋាភិបាលអាហ្វហ្កានីស្ថានមិនអាចទប់ទល់ជាប់នោះទេ។
តើភាពជ្រួលច្របល់នៅក្នុងប្រទេសអាហ្វហ្កានីស្ថានអាចបិទបញ្ចប់តាមច្រកណាទៅ?
បើពិនិត្យមើលស្ថានការណ៍បច្ចុប្បន្ននេះ ក្រុមតាលីបង់ កំពុងមានជំនឿចិត្តខ្ពស់ថាអាចវាយដណ្តើមយករដ្ឋធានីកាប៊ុលមកត្រួតត្រាបានទៀត។ មានរបាយការណ៍ថ្មីៗជាច្រើនបង្ហាញថា ពួកយុទ្ធជនរបស់ក្រុមតាលីបង់កំពុងវាយរុលទៅមុខយ៉ាងលឿន នៅផ្នែកខាងជើងនិងខាងត្បូងនៃរដ្ឋធានីកាប៊ុល។
សហរដ្ឋអាមេរិកនិងសហគមន៍អន្តរជាតិ ទំនងជានឹងមិនអាចជៀសរួចនោះទេ ពីការដាក់សម្ពាធខ្លាំងឡើងលើរដ្ឋាភិបាលអាហ្វហ្កានីស្ថាន និងពួកតាលីបង់ឲ្យចរចាគ្នាដើម្បីឈានដល់កិច្ចព្រមព្រៀងណាមួយ។ យ៉ាងណាក៏ដោយ ឥឡូវនេះសន្លឹកបៀសំខាន់ៗគឺស្ថិតនៅក្នុងដៃក្រុមតាលីបង់ស្ទើរតែទាំងអស់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ