នូវែលសេឡង់៖ ហេតុអ្វីជនសង្ស័យក្នុងបញ្ជីតាមដានរបស់ប៉ូលិសអាចចេញទៅបង្កភេរវកម្មចាក់សម្លាប់មនុស្ស?
ចុះផ្សាយនៅថ្ងៃ៖
ស្តាប់ - ០៦:៣៣
ប្រទេសនូវែលសេឡង់ បានរងការវាយប្រហារភេរវកម្មសាជាថ្មី នៅថ្ងៃសុក្រទី ៣ កញ្ញា បន្ទាប់ ពីឧក្រិដ្ឋជនម្នាក់បានដើរចាក់មនុស្ស នៅ ផ្សារទំនិញ មួយ ក្នុងទីក្រុងAuckland។ នៅក្នុងសន្និសីទកាសែត នាយករដ្ឋមន្រ្តីនូវែលសេឡង់ លោកស្រី ហ្សាស៊ីនដា អារឌែន បាននិយាយថា មានមនុស្ស៦នាក់រងរបួស ចំណែក ឧក្រិដ្ឋជន ត្រូវប៉ូលិសស៊ីវិល បាញ់សម្លាប់ភ្លាមៗ នៅកន្លែងកើតហេតុ។ នាយករដ្ឋមន្រ្តីនូវែលសេឡង់ បានចាត់ទុកការវាយប្រហារខាងលើជាការវាយប្រហារភេរវកម្ម ព្រោះជនដៃដល់បានទទួលឥទ្ធិពលពីក្រុមជីហាតអង្គការរដ្ឋអ៊ីស្លាម។
នៅថ្ងៃសុក្រទី ៣កញ្ញា ប៉ូលិសនូវែលសេឡង់ បានបាញ់សម្លាប់ ជនជ្រុលនិយមដ៏ហិង្សាម្នាក់ បន្ទាប់ពីជនដៃដល់ ដើរចាក់សម្លាប់មនុស្ស នៅក្នុងផ្សារទំនិញមួយក្នុង ទីក្រុងអូកលែន។ នាយករដ្ឋមន្រ្តីនូវែលសេឡង់ បាននិយាយនៅក្នុងសន្និសីទនៅថ្ងៃនេះថា ជនជ្រុលនិយម បានវាយប្រហារភេរវកម្ម សំដៅ ពលរដ្ឋស្លូតត្រង់ ប៉ុន្តែ ប៉ូលិសបានគ្រប់គ្រងស្ថានការណ៍បានតាំងពីដំបូងទី។
ហេតុការណ៍ចាក់សម្លាប់មនុស្ស កើតមាន នៅម៉ោង ២រសៀល ម៉ោងនៅប្រទេសនូវែលសេឡង់ នៅផ្សារទំនិញ មួយ ឈ្មោះ Countdown Lynnmall ក្នុងទីក្រុងអូកលែន។ តាមកាសែតក្នុងស្រុក ដែលបានដកស្រង់សំដីរបស់សាក្សី ដែលជាអតិថិជន ជនដៃដល់បានចាប់យកកាំបិត ដែលតាំងលក់ក្នុងផ្សារ និងបានរត់ទៅចាក់មនុស្សពេញផ្សារ។ មនុស្ស៦នាក់ ត្រូវឧក្រិដ្ឋជន ចាក់ឲ្យរបួស ក្នុងនោះ មាន៣នាក់ រងរបួសធ្ងន់។
តាមសាក្សីនៅកន្លែងកើតហេតុ នៅពេលកំពុងមានភាពឆោឡោ មនុស្សរត់ប្រសាចចេញពីហាងទំនិញ ទៅតាមការស្រែកអំពាវនាវរបស់សន្តិសុខផ្សារ គេឃើញប៉ូលិសស៊ីវិល រត់ចូល ទៅកាន់កន្លែងកើតហេតុ។ បន្ទាប់មក គេក៏លឺសំឡេងគ្រាប់កាំភ្លើង១០គ្រាប់។ មេប៉ូលិស នូវែលសេឡង់ លោក Andrew Coster បាននិយាយថា ភ្នាក់ងារប៉ូលិសបានអន្តរាគមន៍យ៉ាលឿនរហ័ស ដោយបានបាញ់សម្លាប់ឧក្រិដ្ឋជន នៅតែ ១នាទីក្រោយដែលឧក្រិដ្ឋជនបង្កអំពើហិង្សាចាក់សម្លាប់មនុស្ស។
តើគេអាចដឹងអ្វីខ្លះពីអត្តសញ្ញាណរបស់ភេរវជន?
នៅក្នុងសន្និសីទកាសែតនៅថ្ងៃនេះ លោកស្រីនាយករដ្ឋមន្រ្តីនូវែលសេឡង់ ហ្សាស៊ីនដា អារឌែន បាននិយាយថា លោកស្រីមិនអាចទម្លាយឲ្យដឹងច្រើនពីអត្តសញ្ញាណរបស់ភេរវជននោះទេ ដោយសារ មានបម្រាម ទាក់ទងនឹងកិច្ចការសម្ងាត់របស់តុលាការ។ ប្រមុខរដ្ឋាភិបាលនូវែលសេឡង់បានអះអាងដែរថា លោកស្រី នឹងជំរុញឲ្យតុលាការបញ្ចេញឯកសារសម្ងាត់ផ្សេងទៀត ដើម្បី ឲ្យសាធារណជន នូវែលសេឡង់បានយល់ច្បាស់ច្រើនជាងនេះ ពីហេតុការណ៍ វាយប្រហារភេរវកម្ម នៅក្រុងអូកលែន Auckland។
ក្នុងអំឡុងពេលនេះ គេដឹងត្រឹមថា ភេរវជនដែលបានដើរចាក់សម្លាប់មនុស្ស នៅថ្ងៃនេះ មានដើមកំណើតស្រីលង្កា ដែលបានចូលមករស់នៅ ប្រទេសនូវែលសេឡង់ តាំងពីឆ្នាំ ២០១១។ នៅឆ្នាំ ២០១៦ នៅក្នុងហេតុផលសន្តិសុខជាតិ បុរសស្រីលង្ការម្នាក់នេះ ត្រូវបានប៉ូលិសនូវែលសេឡង់ ប្រឆាំងភេរវកម្ម ដាក់ក្នុងបញ្ជីតាមដានរហូតមក។
ប្រមុខរដ្ឋាភិបាលនូវែលសេឡង់បញ្ជាក់ដែរថា ភេរវជនធ្លាប់ជាប់ពន្ធនាគារ ប៉ុន្តែ ក្រោយមកក៏ត្រូវតុលាការដោះលែងឲ្យមានសេរីភាពមកវិញ។ តាមនាយករដ្ឋមន្រ្តីនូវែលសេឡង់ ចាប់តាំងពីតុលាការដោះលែងឲ្យនៅក្រៅឃុំ ប៉ូលិសនៅតែបន្តតាមដានរហូត និងដឹងថា ជនដៃដល់ធ្លាប់បានទទួលឥទ្ធិពល មនោគមវិជ្ជា ពីក្រុមជីហាតអង្គការរដ្ឋអ៊ីស្លាម។
ភេរវជនស្ថិតក្រោមការតាមដាន របស់ប៉ូលិសតាំង ពី ៥ឆ្នាំ
នៅក្នុងសន្និសីទកាសែត នៅថ្ងៃនេះ លោកស្រី អារឌែន បាននិយាយថា លោកស្រីនាយករដ្ឋមន្រ្តី ហ្សាស៊ីនដា អារឌែន បាននិយាយថា លោកស្រី ខកចិត្តខ្លាំង នៅពេលលឺថា មានការវាយប្រហារភេរកម្មនៅក្រុងអូកលែន។ លោកស្រីផ្ទាល់បានដឹងស្គាល់មុខ ជនដៃដល់ នៅមុនដែល គេដើរចាក់សម្លាប់មនុស្ស ព្រោះថា ជនដៃដល់ស្ថិតក្នុងបញ្ជីតាមដានរបស់ ប៉ូលិសប្រឆាំងភេរវកម្មរហូតមក។
មេប៉ូលិសនូវែលសេឡង់ លោក Andrew Coster ទៀតសោត ទទួលស្គាល់ថា គេបានតាមដានបុរសស្រីលង្កានេះ យ៉ាងជាប់ស្អិត ២៤ម៉ោង លើ២៤ម៉ោង ៧ថ្ងៃក្នុងមួយសប្តាហ៍។ប៉ូលិសនូវែលសេឡង់ បានធ្វើអស់ពីសមត្ថភាពហើយ នៅក្នុងក្របខ័ណ្ឌច្បាប់នូវែលសេឡង់។ កន្លងមក ជនដៃដល់ដឹងថា ខ្លួនគេស្ថិតក្រោមការតាមដានរបស់ប៉ូលិស ដូច្នេះ ប៉ូលិសស៊ីវិល ព្យាយាមមិនចូលទៅជិតខ្លាំងពេក ដើម្បីកុំឲ្យវាយស្មៅបង្អើលពោះ។ ប៉ុន្តែ គេនៅតែមិនអាចទប់ស្កាត់កុំឲ្យកើតមានហេតុការណ៍ចាក់សម្លាប់មនុស្សបាន។ យ៉ាងណាក៏ដោយ គឺមកពីប៉ូលិស នៅឃ្លាំជាប់ជិតជានិច្ច បានជាប៉ូលិស អាចចូលទៅអន្តរាគមន៍ នៅក្នុងរយៈពេល តែ ១នាទីប៉ុណ្ណោះ នៅក្រោយ ភេរវជនចាប់ធ្វើសកម្មភាព។
សំណួរដែលចោទឡើងនៅត្រង់ថា ឧក្រិដ្ឋជនស្ថិតក្នុងបញ្ជីឃ្លាំតាមដានមើលរបស់ប៉ូលិស ប្រឆាំងភេរវកម្ម តាំងពី៥ឆ្នាំមកហើយ។ ឆ្លើយទៅនឹងសំណួររបស់អ្នកកាសែតដែលថា ហេតុអ្វីជនដៃដល់ ត្រូវតុលាការ ដោះលែងឲ្យរស់នៅក្នុងសហគមន៍ ធម្មតា លោកស្រីនាយករដ្ឋមន្រ្តីនូវែលសេឡង់បាននិយាយថា អាជ្ញាធរបានប្រឹងអស់ពីសមត្ថភាព និងអនុវត្តទៅតាមច្បាប់របស់ប្រទេស។ ជាការពិត ជនដៃដល់ធ្លាប់បានជាប់ក្នុងពន្ធនាគារ ប៉ុន្តែត្រូវបានដោះលែងឲ្យមានសេរីភាពមកវិញ។ នេះសបញ្ជាក់ថា តាមផ្លូវច្បាប់ គេគ្មានអ្វីដែលអាចបន្ទោស ដាក់បន្ទុក ចាប់បុរសម្នាក់ នេះ ឲ្យនៅក្នុងពន្ធនាគារទៀតនោះដែរ។ ប៉ុន្តែ យ៉ាងណាក៏ដោយ លោកស្រីប្រមុខរដ្ឋាភិបាលនូវែលសេឡង់សន្យាថា នឹងពិនិត្យមើលឡើងវិញ បញ្ជីឈ្មោះ និងវិធានការតាមឃ្លាំមើលជនសង្ស័យ ដើម្បីធ្វើយ៉ាងណាកុំឲ្យកើតមានហេតុការណ៍ដូចថ្ងៃនេះ។
តើការវាយប្រហារលើកនេះអាចទាក់ទងនឹងការវាយប្រហារភេរវកម្ម នៅវិហារអ៊ីស្លាម ក្រៃឈើច កាលពីឆ្នាំ ២០១៩ ដែរឬទេ បុប្ផា?
ហេតុការណ៍ចាក់សម្លាប់មនុស្ស ដែលលោកស្រី នាយករដ្ឋមន្រ្តីអារឌែនចាត់ទុកជាការវាយប្រហារភេរវកម្ម បានធ្វើឲ្យនឹកភ្លាមទៅដល់ព្រឹត្តិការណ៍ដែលបុរសស្តាំនិយមជ្រុល អូស្រ្តាលីម្នាក់ បាញ់រះ សម្លាប់មនុស្ស ៥១នាក់ នៅវិហារអ៊ីស្លាម នៅទីក្រុងក្រៃឈើច កាលពីឆ្នាំ ២០១៩។ ប៉ុន្តែ សម្រាប់ប្រមុខរដ្ឋាភិបាលនូវែលសេឡង់ ហេតុការណ៍ លើកនេះ មិនទាក់ទង ឬជាការសងសឹក នឹងការវាយប្រហារភេរវកម្ម សម្លាប់ជនជាតិអ៊ីស្លាម កាលពី២ឆ្នាំមុននោះទេ។ សម្រាប់លោកស្រី ការវាយប្រហារភេរវកម្មលើកនេះ បង្កឡើងដោយបុគ្គលមួយរូប គឺគ្មានទាក់ទងនឹងជំនឿសាសនា វប្បធម៌ និងជាតិសាសន៍អ្វីនោះទេ។ ភេរវកម្មនៅអូកលែន ជាការទទួលខុសត្រូវរបស់មនុស្សតែ១នាក់គត់ប៉ុណ្ណោះ។
មេប៉ូលិសនូវែលសេឡង់ បាននិយាយធានាថា ភេរវជនធ្វើសកម្មភាព តែម្នាក់ឯង ដូច្នេះ នឹងគ្មានការគំរាមកំហែង សម្រាប់សហគមន៍នូវែលសេឡង់តទៅទៀតនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ