តើមានអ្វី នៅពីក្រោយ ព្យុហយាត្រាប្លែកពិសេស របស់កូរ៉េខាងជើង ?
ចុះផ្សាយនៅថ្ងៃ៖
ស្តាប់ - ០៧:៣៧
កូរ៉េខាងជើងរៀបចំព្យុហយាត្រា ដើម្បីអបអរបុណ្យជាតិ ដោយគ្មានការតាំង អួតបង្ហាញ គ្រាប់មីស៊ីល ដូចលើកមុនៗ។ នៅក្នុងពិធីបុណ្យខួប លើកទី ៧៣នៃការបង្កើតសាធារណរដ្ឋប្រជាធិបតេយ្យ ប្រជាមានិតកូរ៉េ ដែលត្រូវបានរៀបចំ នៅយប់ថ្ងៃពុធទី ៩ កញ្ញា គ្មានទេ មីស៊ីល រថក្រោះ សព្វាវុធ ធ្ងន់ៗ ប៉ុន្តែ គេឃើញ ត្រាក់ទ័រ រថយន្តពន្លត់អគ្គិភ័យ ចំណែក អ្នកដើរព្យុហយាត្រា ភាគច្រើន ជាយុវជន កសិករ និង ជាពិសេស មន្រ្តីសុខភាព ក្នុងឯកសណ្ឋាន ពណ៌ទឹកក្រូច និងម៉ាសគ្របមុខជិត។ នៅក្នុងពិធីបុណ្យ កាលពីម្សិលមិញ គេឃើញវត្តមានរបស់ប្រមុខដឹកនាំគីម ជុងអ៊ុន ដែលស្រកទម្ងន់អស់ច្រើន ដូចដែលកាសែតក្នុងស្រុក កូរ៉េខាងជើង និងកាសែត បរទេស ធ្លាប់ចុះផ្សាយ កន្លងមក។ ព្យុហយាត្រា កាលពីយប់ថ្ងៃពុធម្សិលមិញ ជាព្យុហយាត្រា លើកទី៣ ដែលព្យុងយ៉ាងរៀបចំឡើង ក្នុងរយៈពេលតែ១ឆ្នាំ។ តើព្យុហយាត្រា របស់កូរ៉េខាងជើង មានអត្ថន័យយ៉ាងណា?
កូរ៉េខាងជើងធ្វើព្យុហយាត្រាកងទ័ព ប្លែក ពិសេស ដោយគ្មានបង្ហាញគ្រាប់មីស៊ីល នៅក្នុងឱកាសខួប ៧៣ឆ្នាំ នៃការបង្កើតសាធារណរដ្ឋប្រជាធិបតេយ្យ ប្រជាមានិតកូរ៉េ ដែលជាឈ្មោះ ផ្លូវការរបស់កូរ៉េខាងជើង។
ព្យុហយាត្រា កាលពីថ្ងៃ ពុធ ម្សិលមិញ ជាព្យុហយាត្រា លើកទី៣ ដែលកូរ៉េខាងជើងរៀបចំឡើង ក្នុងរយៈពេលតែ ១ឆ្នាំ។ នេះជារឿងមិនធម្មតានោះទេ។ កូរ៉េខាងជើង តែងឆ្លៀត យកពិធីបុណ្យជាតិ ដើម្បីរៀបចំព្យុហយាត្រាកងទ័ព។ កាលពីខែតុលាឆ្នាំមុន នៅក្នុងឱកាសគម្រប់ខួប៧៥ឆ្នាំ របស់គណបក្សពលករ -បក្សនយោបាយតែមួយគត់របស់កូរ៉េខាងជើង កូរ៉េខាងជើងបានរៀបចំក្បួនព្យុហយាត្រាកងទ័ព ដ៏ធំសម្បើម ដែលនៅក្នុងនោះ គេឃើញ ព្យុងយ៉ាង បង្ហាញ គ្រាប់មីស៊ីលបាលីស្ទិក អន្តរទ្វីប ដែលតាមពិត ត្រូវហាមឃាត់ ដោយអង្គការសហប្រជាជាតិ។ នៅខែ មករាដើមឆ្នាំនេះ ពោលគឺនៅប៉ុន្មានថ្ងៃមុន លោក ចូ បៃដិន ស្បថចូលកាន់តំណែងជាប្រធានាធិបតីអាមេរិក កូរ៉េខាងជើង ក៏បានធ្វើព្យុហយាត្រាកងទ័ព ម្តងទៀត ក្នុងឱកាស សមាជបក្សពលករកូរ៉េខាងជើង ដែលនៅក្នុងនោះ គេឃើញ កូរ៉េខាងជើង បង្ហាញ មីស៊ីលបាលីស្ទិក ដែលអាចបាញ់ចេញពីនាវាមុជទឹក។
ព្យុហយាត្រារបស់កូរ៉េខាងជើងមានមុខងារ ២។ ទី១គឺជាឱកាស ដែលកូរ៉េខាងជើង ប្រើសម្រាប់ បង្ហាញ អួត សំញ៉ែង បច្ចេកវិទ្យាចុងក្រោយ សព្វាវុធទំនើបៗ ដូចជា មីស៊ីល បាលីស្ទិក អន្តរទ្វីប ក្បាលគ្រាប់នុយក្លេអ៊ែរ ដែលកូរ៉េខាងជើងបានសម្រេចផលិតបាន។ គោលដៅ គឺដើម្បីបង្ហាញ ផ្គើន សហគមន៍អន្តរជាតិ ថា កូរ៉េខាងជើង នៅតែមានសមត្ថភាព ក្លាយជាមហាអំណាចនុយក្លេអ៊ែរ បើទោះបី ជាមានទណ្ឌកម្មសេដ្ឋកិច្ចពីសហគមន៍ អន្តរជាតិ។
តាមអ្នកជំនាញ ទោះកូរ៉េខាងជើង បង្ហាញ សំញ៉ែងមីស៊ីល ក្បាលគ្រាប់នុយក្លេអ៊ែរ ប៉ុន្តែ កូរ៉េខាងជើង ខាន បាញ់សាកល្បង មីស៊ីលបាលីស្ទិក តាំង ពី ឆ្នាំ ២០១៧។ ជារួម កូរ៉េខាងជើង មិនចង់បាញ់សាកល្បង ដែលអាចជាសកម្មភាព ញុះញង់ ធ្វើឲ្យអន្តរជាតិដាក់ទណ្ឌកម្មអន្តរជាតិបន្ថែមទៅលើខ្លួនទៀតនោះទេ។
ប៉ុន្តែ នៅពេល ព្យុហយាត្រា មួយចំនួន ជាមធ្យោបាយឃោសនា ផ្ញើសារ ទៅសហគមន៍អន្តរជាតិ ព្យុហយាត្រា ភាគច្រើន មានន័យ គោលដៅ សំខាន់ សំដៅ ស្វែងរកការគាំទ្រក្នុងស្រុក ជាពិសេស នៅក្នុងកាលៈទេសៈ ដែលប្រទេសកំពុងជួបការលំបាក។ ការដង្ហែរក្បួនព្យុហយាត្រា ដែលភាគច្រើន រៀបចំនៅពេលរាត្រី អមដោយពិធីបុណ្យបាញ់កាំជ្រួច ជាមធ្យោបាយ ជំរុញ លើកទឹកចិត្តប្រជាជន ឲ្យសប្បាយ ជឿជាក់លើការដឹកនាំ និងគាំទ្រ ជំហរនយោបាយរបស់ថ្នាក់ដឹកនាំ កូរ៉េខាងជើង នៅចំពោះមុខ ការដាក់សម្ពាធពីសហគមន៍អន្តរជាតិ។
ក្បួនព្យុហយាត្រា ដែលគ្មានបង្ហាញ មីស៊ីលទំនើបៗ
ព្យុហយាត្រា នៅយប់ថ្ងៃពុធទី ៨ កញ្ញា គឺខុសប្លែក ពីក្បួនព្យុហយាត្រា មុនៗ។ ខុសប្លែក មិនធម្មតា នៅត្រង់ថា គេមិនបានឃើញ កូរ៉េខាងជើង បង្ហាញ គ្រាប់មីស៊ីល បាលីស្ទិក ធំៗ តាមទម្លាប់ នោះទេ។
សព្វាវុធដែលមាន ច្រើនជាងគេ នៅក្នុងក្បួនព្យុហយាត្រា យប់ម៉ិញ គឺកាំភ្លើងផ្លោង កាំភ្លើង ត្បាល់ធំ ប៉ុណ្ណោះ។ ហើយអ្វីដែលប្លែក និងភ្ញាក់ផ្អើលជាងនេះទៅទៀត គឺកាំភ្លើងត្បាល់ ត្រូវអូសនាំមុខ ដោយត្រាក់ទ័រ។ តាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA អ្នកដែលបើកត្រាក់ទ័រ ជា កសិករ ដែល ត្រៀមខ្លួនជានិច្ច ការពារ ទឹកដីពីការឈ្លានពានពីខាងក្រៅ។ ចំណែក អ្នកដើរក្នុងក្បួនដង្ហែរព្យុហយាត្រាផ្សេងទៀត ជាយុវជន ជាភ្នាក់ងារ ការពារសន្តិសុខ សាធារណៈ ជាបុគ្គលិករបស់ក្រុមហ៊ុនអយស្ម័យាន ក្រុមហ៊ុនផលិតជីកសិកម្ម ឬ ក្រុមហ៊ុនដឹកជញ្ជូនផ្លូវអាកាស។ ក្នុងដៃរបស់ពួកគេ មានដៃកាន់អាវុធ ដូចជាកងទ័ពយ៉ាងដូច្នេះដែរ។ នេះអាចជាសារ បញ្ជាក់ទៅប្រទេសខាងក្រៅថា មិនមែនមានតែកងទ័ពទេ ដែល កាន់អាវុធ ប្រឆាំងរាល់ការឈ្លានពាន ពីខាងក្រៅ សូម្បី កសិករ យុវជន និងមន្រ្តីរដ្ឋការទូទៅរបស់កូរ៉េខាងជើង ក៏ចេះកាន់អាវុធ ដើម្បី ការពារ ប្រឆាំង រាល់ការវាយប្រហារពីបរទេសដែរ។
គេអាចថា ព្យុហយាត្រាលើកនេះ សំដៅផ្តោតខ្លាំង លើការចូលរួម របស់ប្រជាជនស៊ីវិល ប៉ុន្តែ មិនមែនកងទ័ពកូរ៉េខាងជើង ដូចព្យុហយាត្រាមុនៗ។ នៅមានចំណុចមួយទៀត ដែលទាក់ទាញ ចំណាប់អារម្មណ៍របស់ប្រព័ន្ធផ្សព្វផ្សាយបរទេស គឺការដើរព្យុហយាត្រារបស់ក្រុមមនុស្ស ដែលមានឯកសណ្ឋាន ពណ៌ទឹកក្រូចឆើត និងពាក់ម៉ាសគ្របជិត ដែលជាសញ្ញាបង្ហាញថា កូរ៉េខាងជើងបានបង្កើតកងកម្លាំងពិសេស ដើម្បី ជួយទប់ស្កាត់ ការឆ្លងរាលដាលជំងឺកូវីដ។
កូរ៉េខាងជើងអះអាងថា ខ្លួនគ្មានករណីឆ្លងកូវីដទាល់តែសោះ។
នៅសប្តាហ៍មុន កូរ៉េខាងជើងបានបដិសេធមិនទទួលវ៉ាក់សាំងផលិតនៅចិន ជិត ៣លានដូស ដែលកូរ៉េខាងជើង ត្រូវទទួលបាន តាមរយៈ យន្តការ Covax របស់អង្គការសុខភាពពិភពលោក។
កូរ៉េខាងជើងបានអះអាងថា គ្មានករណីឆ្លងជំងឺកូវីដ ក្នុងទឹកដីរបស់ខ្លួន។ អង្គការសុខភាពពិភពលោក បានលើកឡើងដែរថា គេគ្មានរកឃើញ ករណីឆ្លងជំងឺកូវីដ នៅកូរ៉េខាងជើង។ តាម អង្គការសុខភាពពិភពលោក ការធ្វើតេស្តបុគ្គលិកពេទ្យ និងអ្នកជំងឺក្អក ផ្តាសាយ កូរ៉េខាងជើង ជិត ៤ម៉ឺននាក់ កាលពីពាក់កណ្តាលខែសីហាកន្លងទៅ បានបង្ហាញថា ពួកគេ មានតេស្តអវិជ្ជមានកូវីដ។ អ្នកវិភាគមួយចំនួននៅតែ សង្ស័យ និងមិនជឿថា កូរ៉េខាងជើង គ្មានករណីឆ្លងកូវីដទាល់តែសោះ ដូចការអះអាងរបស់មេដឹកនាំកូរ៉េខាងជើង នោះទេ។
ទោះជាគេពិបាកនឹងជឿ ប៉ុន្តែ ពិធីដង្ហែរក្បួនព្យុហយាត្រា នៅយប់ថ្ងៃពុធទី ៨ កញ្ញា ជាឱកាសដែលមេដឹកនាំកូរ៉េខាងជើង បង្ហាញថា កូរ៉េខាងជើងពិតជាគ្មានករណីឆ្លងជំងឺកូវីដ។ ជាក់ស្តែង អ្នកដែលចូលរួមក្នុងពិធីបុណ្យ តាំងពីមេដឹកនាំ គីម ជុងអ៊ុន រហូតដល់ប្រជាជនសាមញ្ញ គឺគ្មានពាក់ម៉ាស រក្សាគម្លាតអ្វីនោះទេ។ ក្នុងពិធីបុណ្យជាតិ គេឃើញ លោកគីមជុងអ៊ុន ដែលមានរាងស្គម ស្រកទម្ងន់ជាងមុន ឈរសំណេះសំណាល ស្និទ្ធិស្នាលជាមួយ ប្រជាជនកូរ៉េខាងជើង។
កូរ៉េខាងជើង អះអាង ថា គ្មានករណីកូវីដសោះ បន្ទាប់ពីបានរឹតបន្តឹង ខ្លាំងមែនទែន ដូចជា បានបិទព្រំដែន ជាមួយប្រទេសចិន និងបិទខ្ទប់ការធ្វើដំណើរ ដោយសេរី ក្នុងប្រទេស។ វិធានការបិទព្រំដែនជាមួយចិន ដែលជាដៃគូ ពាណិជ្ជកម្ម សំខាន់ជាងគេបំផុត របស់កូរ៉េខាងជើង បានទៅរឹត ច្របាច់ក កូរ៉េខាងជើង។ ភ្នាក់ងាររបស់អង្គការសហប្រជាជាតិ បានលើកឡើងថា ប្រជាជនកូរ៉េខាងជើង ប្រមាណ ៤០ភាគរយ បានរងគ្រោះ ដោយសារគ្រោះអត់ឃ្លាន។ មេដឹកនាំ កូរ៉េខាងជើង លោកគីម ជុងអ៊ុនផ្ទាល់ ក៏ធ្លាប់ទទួលស្គាល់ថា កូរ៉េខាងជើង កំពុងជួបវិបត្តិសេដ្ឋកិច្ច កង្វះផលិតផលកសិកម្ម ដោយសារគ្រោះធម្មជាតិ និងទណ្ឌកម្មពីសហគមន៍អន្តរជាតិ។
ដោយ ផ្តោតអាទិភាពការចូលរួមរបស់ប្រជាជន កសិករក្នុងក្បួនព្យុហយាត្រា នៅក្នុងឱកាសខួប ៧៣ឆ្នាំនៃការបង្កើត សាធារណរដ្ឋប្រជាធិបតេយ្យ ប្រជាមានិតកូរ៉េ ថ្នាក់ដឹកនាំ កូរ៉េខាងជើង ចង់ ផ្ញើសារទៅកាន់ប្រជាជនក្នុងស្រុកថា ថ្នាក់ដឹកនាំ នៅតែយកចិត្តទុកដាក់ គិតដល់សុខទុក្ខរបស់ប្រជាជន។ នេះអាចជាមធ្យោបាយមួយ កុំឲ្យប្រជាជនអាចខឹងសម្បារ ផ្ទុះគំនិត ទៅបង្កើតចលនាបះបោរប្រឆាំងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ