ព្យុងយ៉ាងបង្ហាញមីស៊ីលបាលីស្ទិក ដែលអាចបាញ់ចេញ ពីនាវាមុជទឹក
នៅក្នុងព្យុហយាត្រា យោធា កាលពី យប់ថ្ងៃព្រហស្បតិ៍ម្សិលមិញ កូរ៉េខាងជើងបានបង្ហាញ មីស៊ីលបាលីស្ទិក ដែលអាចបាញ់ចេញពីនាវាមុជទឹក។ របបកុម្មុយនិស្តព្យុងយ៉ាង បង្ហាញសាច់ដុំយោធា នៅ តែប៉ុន្មានថ្ងៃមុនដែលលោកចូ បៃដិន ស្បថចូលកាន់តំណែងជាប្រធានាធិបតី អាមេរិក ដែលត្រូវប្រព្រឹត្តទៅ នៅថ្ងៃទី ២០មករា សប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:៣០
ព្យុហយាត្រាយោធា ដ៏ធំសម្បើម ប្រព្រឹត្តទៅក្រោមអធិបតីភាពរបស់មេដឹកនាំកូរ៉េខាងជើង លោកគីម ជុងអ៊ុន ដែលញញឹម ស្រស់ស្រាយ បក់ដៃ ស្វាគម សមិទ្ធិផល របស់កងទ័ពជាតិ។
នៅក្នុងព្យុហយាត្រា កាលពីយប់ថ្ងៃព្រហស្បតិ៍ ក្រៅតែ ក្បួនទ័ពជើងគោក ក្រុមកាំភ្លើងធំ និងក្បួនរថក្រោះ របបកុម្មុយនិស្តកូរ៉េខាងជើង បង្ហាញផងដែរ មីស៊ីលបាលីស្ទិក ដែលបាញ់ចេញពី នាវាមុជទឹក។ តាម រដ្ឋមន្រ្តី ក្រសួងការពារជាតិកូរ៉េខាងជើង ដែលដកស្រង់សំដីដោយទីភ្នាក់ងារព័ត៌មានរដ្ឋ KCNA មីស៊ីលបាលីស្ទិក បាញ់ចេញពីនាវាមុជទឹក ដែលជា អាវុធ ដ៏មានកម្លាំង ខ្លាំងជាងគេ នៅក្នុង ពិភពលោក និងដែលមានវត្តមាននៅទីលានគីម អ៊ីលស៊ុង ជាភស្តុតាងបង្ហាញកម្លាំងខ្លាំងមហិមាររបស់កងទ័ពបដិវត្តន៍កូរ៉េខាងជើង។
រូបភាពរបស់ទីភ្នាក់ងារព័ត៌មានរដ្ឋKCNA បានបង្ហាញ រថយន្ត ដឹកមីស៊ីល ដែលមានបំពាក់ក្បាលគ្រាប់ សខ្មៅ ចំនួន ៤ នៅក្នុងក្បួនព្យុហយាត្រា កាលពី យប់ថ្ងៃព្រហស្បតិ៍។ តាមអ្នកជំនាញអាមេរិក លោកAnkit Panda នៃវិទ្យាស្ថាន Carnegie Endowment គេមិនដែលធ្លាប់ឃើញ ម៉ូដែល មីស៊ីលប្រភេទនេះ ទេពីមុនមក។
កន្លងមក កូរ៉េខាងជើង ធ្លាប់បានបង្ហាញ មីស៊ីល ធុនតូច ប៉ុន្តែ គេមិនដឹងថា តើវាអាចបាញ់ចេញពីនាវាមុជទឹកដែរឬទេ។ នៅក្នុងមហាសន្និបាត បក្សពលករ កូរ៉េខាងជើង នៅ សប្តាហ៍មុន មេដឹកនាំ កូរ៉េខាងជើង លោកគីម ជុងអ៊ុនធ្លាប់បានប្រកាសហើយថា កូរ៉េខាងជើង កំពុងរៀបចំប្លង់ សម្រាប់សាងសង់ នាវាមុជទឹកដើរដោយថាមពលនុយក្លេអ៊ែរ។
មីស៊ីលបាលីស្ទិកបាញ់ចេញពីនាវាមុជទឹកនឹងអាចធ្វើឲ្យទីក្រុងព្យុងយ៉ាង បង្កើតបានយុទ្ធសាស្រ្តថ្មី ដូចជា អាចចាប់ផ្តើមការវាយប្រហារ ដោយមិនឲ្យអាមេរិកដឹងខ្លួនមុន ឬមួយកូរ៉េខាងជើងអាចបើកការវាយប្រហារ ដោយមិនចាំបាច់ បាញ់មីស៊ីលពីដីគោក។
អ្នកជំនាញជាច្រើនវាយតម្លៃថា ការផ្លាស់ប្តូរ រដ្ឋបាលថ្មីអាមេរិក ជាកង្វល់មួយថ្មីសម្រាប់មេដឹកនាំកូរ៉េខាងជើង ដែលបានចាត់ទុក អនាគតប្រធានាធិបតីអាមេរិក ជាឆ្កែឆ្កួត។ នៅពេល រដ្ឋបាលលោកចូ បៃដិន នឹងត្រលប់ទៅប្រើនយោបាយការទូតចាស់ ពោលគឺចរចា ត្រឹមថ្នាក់មន្រ្តីជំនាញ នៅមុន ជំនួបកំពូលរវាងមេដឹកនាំ គេវាយតម្លៃថា កូរ៉េខាងជើងបានប្រើរូបភាព មហាសន្និបាតបក្សកុម្មុយនិស្តលើកទី ៨ ហើយនិងក្បួនព្យុហយាត្រា បង្ហាញមីស៊ីល សាច់ដុំយោធា លើកនេះ ដើម្បី ធ្វើជាសារ ដាក់សម្ពាធ ទាមទារចង់បានសម្បទាន នៅក្នុងការចរចាជាមួយអាមេរិក។ ការចរចា ដែលបានជាប់គាំង រហូតមក ដោយសារតែ កូរ៉េខាងជើង មិនព្រមលះបង់ចោលកម្មវិធីផលិតអាវុធនុយក្លេអ៊ែរ ជាថ្នូរនឹងការដកទណ្ឌកម្មរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ