អាមេរិក-ចិន៖កិច្ចសន្ទនាតាមទូរស័ព្ទលើកទី១ ក្នុងរយៈពេល ៧ខែរវាងលោកចូ បៃដិន និងលោកស៊ី ជីនពីង
ចុះផ្សាយនៅថ្ងៃ៖
ស្តាប់ - ០៧:៤០
នៅថ្ងៃព្រហស្បតិ៍ ទី៩ កញ្ញា ប្រធានាធិបតីអាមេរិកលោកចូ បៃដិន និងសមភាគីចិនលោកស៊ី ជីនពីងបានជជែកគ្នាតាមទូរស័ព្ទរយៈពេល ៩០នាទី។ គិតតាំងពីខែកុម្ភៈមក នេះជាកិច្ចសន្ទានាតាមទូរស័ព្ទលើកទី១ រវាងមេដឹកនាំនៃប្រទេសមហាអំណាចសេដ្ឋកិច្ចលំដាប់ទី១ និងលំដាប់ទី២ ក្នុងលោក។ នៅក្នុងកិច្ចសន្ទនា លោកបៃដិន និងជិនពីងបាននិយាយត្រង់ទៅ ត្រង់មកដោយផ្តោតសំខាន់ពីទំនាក់ទំនងទ្វេភាគី។ គួររម្លឹកថា ចិន និងអាមេរិកបានស្គាល់ទំនាក់ទំនងរកាំរកូសខ្លាំងណាស់នៅក្នុងជំនាន់ប្រធានាធិបតីអាមេរិកលោកដូណាល់ ត្រាំ។
បើគេពិនិត្យមើលជារួមលើខ្លឹមសារដែលលោកចូ បៃដិន និងស៊ី ជីនពីងបាននិយាយគ្នា គឺមានលក្ខណៈទូលំទូលាយដែលម្នាក់ៗបាននិយាយដោយគ្មានការលាក់លៀម និងនិយាយត្រង់ទៅ ត្រង់មកអស់ពីពោះដោយមិនខ្លាចអ្នកណាខឹងអ្នកណាទេ។ គេអាចនិយាយបានថា លោកបៃដិនបាននិយាយប្រាប់លោកជីនពីងពីអ្វីដែលអាមេរិកសប្បាយចិត្ត និងមិនសប្បាយចិត្តទៅលើអ្វីដែលចិនបានធ្វើ ហើយលោកជីនពីងវិញក៏បាននិយាយប្រាប់លោកបៃដិនពីអ្វីដែលចិនពេញចិត្ត និងមិនពេញចិត្តចំពោះទង្វើដែលអាមេរិកបានធ្វើ។ ជារួម លោកបៃដិន និងលោកជីនពីងបានផ្តោតខ្លាំងលើទំនាក់ទំនងទ្វេភាគីអាមេរិក ចិន។
លោកបៃដិន និងលោកជីនពីងបានយល់ឃើញដូចគ្នាថា អាមេរិក និងចិនត្រូវតែធ្វើអ្វីៗគ្រប់យ៉ាងទាំងអស់ដើម្បីមានទំនាក់ទំនងល្អរវាងគ្នា។ ពិតណាស់ អាមេរិក និងចិនជាគូប្រជែង និងបន្តស្ថិតជាគូប្រជែង។ តែអ្វីដែលលោកបៃដិនចង់ចៀសវាង គឺមិនចង់ឃើញការប្រជែងគ្នានេះប្រែក្លាយទៅជាជម្លោះ នេះបើតាមការបញ្ជាក់របស់សេតវិមាន។ ពីខាងចិនវិញ លោកជីនពីងបាននិយាយប្រាប់លោកបៃដិនច្បាស់ៗថា អរិភាពដែលអាមេរិកធ្វើលើចិនបានបង្កចេញនូវផលវិបាកពិតប្រាកដនៅក្នុងទំនាក់ទំនងទ្វេភាគី នេះបើតាមការចុះផ្សាយរបស់ទូរទស្សន៍រដ្ឋចិន CCTV។
តាម CCTV ដដែល លោកជីនពីងបានបញ្ជាក់ប្រាប់លោកបៃដិនថា បើអាមេរិក និងចិនប្រឈមមុខដាក់គ្នា គឺប្រទេសទាំងពីរ រួមទាំងពិភពលោកទាំងមូលជាអ្នករងគ្រោះ។ សម្រាប់ប្រធានាធិបតីចិន អានាគត និងវាសនារបស់ពិភពលោកគឺអាស្រ័យទាំងស្រុងលើសមត្ថភាពរបស់ចិន និងអាមេរិកក្នុងការគ្រប់គ្រងទំនាក់ទំនងរបស់ខ្លួនឱ្យបានល្អ។ ដោយឡែក មន្រ្តីជាន់ខ្ពស់អាមេរិកម្នាក់បានបញ្ជាក់ប្រាប់ក្រុមអ្នកកាសែតថា លោកបៃដិន និងជីនពីងក៏បាននិយាយគ្នាលើសំណុំរឿងផ្សេង ដូចជាបញ្ហាអាកាសធាតុ ឬមួយក៏ជំងឺកូវីដ១៩។
សន្ទនាគ្នាផ្ទាល់គ្រាន់បើជាងបន្តដៀមដាម និងវាយប្រហារគ្នាពីចម្ងាយ
គ្រប់គ្នាកំពុងចង់ដឹងថា តើរវាងលោកចូ បៃដិន និងលោកស៊ី ជីនពីង អ្នកណាបានចុចទូរស័ព្ទហៅទៅអ្នកណាមុន?។ បន្ទាប់ពីបាននៅស្ងៀមស្ងាត់អស់រយៈពេល ៧ខែ មេដឹកនាំនៃប្រទេសមហាអំណាចសេដ្ឋកិច្ចទាំងពីរក្នុងលោកបាននិយាយគ្នា និងថែមទាំងនិយាយគ្នាត្រង់ទៅ ត្រង់មកទៀតផង។ គួររម្លឹកថា លោកបៃដិន និងលោកជីនពីងធ្លាប់បាននិយាយគ្នាតាមទូរស័ព្ទលើកទី១ ក្នុងខែកុម្ភៈ ពោលនៅក្រោយលោកបៃដិនទើបចូលកាន់តំណែងជាផ្លូវការ។ តាំងពីពេលនោះមក គឺស្ងាត់ឈឹង និងមានពេលខ្លះ ភាពស្ងាត់ឈឹងនេះត្រូវបានជំនួសដោយការវាយប្រហារ និងការដៀមដាមដាក់គ្នាដោយពាក្យសម្តី។ នេះអាចជាហេតុផលមួយដែលបានជំរុញឲ្យលោកចូ បៃដិន និងលោកស៊ី ជីនពីងសម្រេចចិត្តជួបសន្ទនាគ្នាដោយផ្ទាល់តាមទូរស័ព្ទពេលនេះ។
គួរបញ្ជាក់ថា រដ្ឋបាលអាមេរិកក្នុងជំនាន់លោកបៃដិនធ្លាប់មានកិច្ចសន្ទនាជាមួយចិនក្នុងខែមីនាកន្លងទៅ។ កាលណោះ ប្រមុខការទូតអាមេរិកលោកអង់តូនី ប៊្លីនកិនបានទទួលជួបថ្នាក់ដឹកនាំជាន់ខ្ពស់ចិនក្នុងរដ្ឋអាឡាស្កា។ តែជំនួបពេលនោះមិនមានដំណើរការដោយរលូនទេ ព្រោះមានការដំឡើងសំឡេង និងការតឹងសរសៃ ក ដាក់គ្នា។ នេះអាចជាហេតុផលមួយទៀតដែលអាមេរិក និងចិនឲ្យសារៈសំខាន់ និងយល់ថា មានតែការជួបសន្ទនាគ្នាថ្នាក់កំពូលទើបគេអាចកាត់បន្ថយភាពតានតឹង និងអាចស្វែងយល់គ្នាទៅវិញ ទៅមកឲ្យបានស៊ីជម្រៅ។
មានចំណុចច្រើនដែលអាមេរិក និងចិនបន្តមិនចុះសម្រុងគ្នា
គេបានដឹងថា អាមេរិកក្នុងជំនាន់ប្រធានាធិបតីលោកដូណាល់ ត្រាំ និងចិនបានស្គាល់ទំនាក់ទំនងតានតឹងខ្លាំងរវាងគ្នា។ នេះក៏ដោយសារតែលោកត្រាំបានបញ្ឆេះសង្រ្គាមពាណិជ្ជកម្មជាចំហប្រឆាំងនឹងចិនតាមរយៈការប្រើនយោបាយដំឡើងពន្ធលើទំនិញចិននាំចូលអាមេរិក។ សម្រាប់លោកត្រាំដែលគិតប្រយោជន៍អាមេរិកជាធំបានមើលឃើញថា សេដ្ឋកិច្ចដែលអាមេរិកមានជាមួយចិន និងភាពជាដៃគូរវាងអាមេរិក ចិន ពិសេសការប្រកួតប្រជែងរវាងអាមេរិក និងចិនជាការប្រកួតប្រជែងមិនស្មើភាព។
ខុសពីលោកត្រាំ លោកបៃដិនបានការពារលើគោលការណ៍ពហុភាគីនិយមដោយអំពាវនាវឲ្យបិទបញ្ចាប់គំនិតដែលគិតប្រយោជន៍អាមេរិកជាធំ។ តែក្នុងពេលជាមួយគ្នា លោកបៃដិនមិនបានបោះបង់ចោលនូវនយោបាយពាណិជ្ជកម្មជាមួយចិនដែលបន្សល់ទុកដោយលោកត្រាំទេ ពិសេសរក្សាទុកដដែលនូវច្បាប់ពន្ធគយ។ ក្រៅពីរឿងពាណិជ្ជកម្ម នៅមានរឿងជាច្រើនផ្សេងទៀតដែលអាមេរិក និងចិនកំពុងបន្តយល់ឃើញមិនដូចគ្នា ពិសេសទាក់ទងនឹងរឿងតៃវ៉ាន់ ទីបេ ហុងកុង ស៊ីនជាំង ឬមួយក៏រឿងនៅសមុទ្រចិន។
នៅពេលដែលលោកចូ បៃដិនរម្លឹកពីផលប្រយោជន៍អាមេរិកដែលចង់ឃើញសន្តិភាព ស្ថិរភាព និងវិបុលភាពនៅក្នុងតំបន់ឥណ្ឌូប៉ាស៊ីហ្វិក។ លោកស៊ី ជីនពីងមិនញញើតចោទអាមេរិកពីបទធ្វើឲ្យទំនាក់ទំនងរវាងអាមេរិក និងចិនស្គាល់ភាពល្អក់ កករ។ ចិនយល់ថា រឿងតៃវ៉ាន់ ទីបេ ហុងកុង ស៊ីនជាំង ឬមួយក៏រឿងសមុទ្រចិនជារឿងផ្ទៃក្នុងរបស់ចិនដែលអាមេរិកមិនត្រូវលូកដៃកកូរកកាយទេ។ បើពិនិត្យមើលមួយភ្លែតទៅ អាមេរិក និងចិនបានយល់ឃើញដូចគ្នាពីផលប្រយោជន៍នៃការមានទំនាក់ទំនងល្អរវាងគ្នាសម្រាប់ទ្វេភាគីក៏ដូចជាសម្រាប់ពិភពលោក។
តែបើពិនិត្យឲ្យជិតបន្តិច អាមេរិក និងចិននៅមានចំណុចមិនចុះសម្រុងគ្នាជាច្រើនដែលពិបាកនិយាយគ្នា។ ចូរកុំភ្លេចថា អាមេរិក និងចិនមានទំនាក់ទំនងជាគូប្រជែងច្រើនជាងទំនាក់ទំនងជាដៃគូ នោះបើអ្នកទាំងពីរដឹងថា ពួកគេត្រូវការគ្នាទៅវិញមកសម្រាប់ប្រយោជន៍ទ្វេភាគី និងពិភពលោកក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ