អាមេរិកបើកកិច្ចប្រជុំទល់មុខគ្នាលើកដំបូងជាមួយពួកតាលីបង់ចាប់តាំងពីដកទ័ពពីអាហ្វហ្កានីស្ថាន
ចុះផ្សាយនៅថ្ងៃ៖
ស្តាប់ - ០៥:៤១
សហរដ្ឋអាមេរិក និងពួកតាលីបង់ចាប់បើកកិច្ចពិភាក្សាទល់មុខគ្នាជាលើកដំបូង រាប់ចាប់តាំងពីអាមេរិកដកទ័ពចេញពីប្រទេសអាហ្វហ្កានីស្ថានមក។ បើតាមក្រសួងការបរទេសអាមេរិក ជំនួបដែលមានរយៈពេលពីរថ្ងៃនេះត្រូវរៀបចំឡើងក្នុងទីក្រុងដូហា និងចាប់ផ្តើមពីថ្ងៃសៅរ៍ ទី ៩ តុលានេះទៅ។ ហេតុអ្វីអាមេរិកជួបចរចាជាមួយពួកតាលីបង់? តើអាមេរិកអាចទទួលស្គាល់របបគ្រប់គ្រងតាលីបង់ដែរទេ?
ជំនួបទល់មុខគ្នារវាងមន្ត្រីអាមេរិក និងតំណាងតាលីបង់
ជាដំបូងគេគួរដឹងថា សហរដ្ឋអាមេរិកនៅតែមានទំនាក់ទំនងជាមួយក្រុមតាលីបង់ចាប់តាំងពីពួកគេវាយដណ្តើមយកបានទីក្រុងកាប៊ុលកាលពីខែពាក់កណ្តាលខែសីហា នៅខណៈដែលកងទ័ពអាមេរិកដកខ្លួនចេញពីប្រទេសអាហ្វហ្កានីស្ថាន។
ប៉ុន្តែ កិច្ចប្រជុំរយៈពេលពីរថ្ងៃដែលចាប់ផ្តើមនៅថ្ងៃសៅរ៍ ទី ៩ តុលានេះ នឹងក្លាយជាជំនួបជាន់ខ្ពស់និងជំនួបទល់មុខគ្នាជាលើកដំបូងរវាងគណៈប្រតិភូអាមេរិកនិងតំណាងជាន់ខ្ពស់របបតាលីបង់។
គណៈប្រតិភូជាន់ខ្ពស់ក្រុងវ៉ាស៊ីនតានរួមមានមន្រ្តីមកពីក្រសួងការបរទេស ទីភ្នាក់ងារអាមេរិកសម្រាប់ការអភិវឌ្ឍន៍អន្តរជាតិ USAID និងមន្ត្រីមកពីអង្គភាពចារកម្មអាមេរិក។
តាមរយៈជំនួបនេះ សហរដ្ឋអាមេរិកនឹងដាក់សម្ពាធពួកតាលីបង់ឲ្យគោរពសិទ្ធិប្រជាជនអាហ្វហ្កានីស្ថានទាំងអស់ រួមបញ្ចូលទាំងសិទ្ធិស្ត្រីនិងក្មេងស្រី ព្រមទាំងការបង្កើតរដ្ឋាភិបាលចម្រុះមួយដោយមានការគាំទ្រយ៉ាងទូលំទូលាយ។
ចំណុចអាទិភាពមួយទៀតដែលអាមេរិកនឹងយកទៅនិយាយជាមួយតំណាងតាលីបង់ គឺការទាមទារឲ្យរបបតាលីបង់ប្រកាន់ខ្ជាប់នូវការប្តេជ្ញាដែលថានឹងមិនបណ្តោយឲ្យប្រទេសអាហ្វហ្កានីស្ថានក្លាយជាជម្រកឬសម្បុករបស់ពួកអាល់កៃដា ឬ ពួកក្រុមជ្រុលនិយមផ្សេងទៀតឡើយ។
មួយវិញទៀត ដោយមើលឃើញថាអាហ្វហ្កានីស្ថាន កំពុងប្រឈមខ្លាំងទៅនឹងការធ្លាក់ចុះសេដ្ឋកិច្ច ហើយប្រឈមខ្លាំងនឹងវិបត្តិមនុស្សធម៌ធ្ងន់ធ្ងរ មន្ត្រីអាមេរិកក៏នឹងដាក់សម្ពាធផងដែរឲ្យក្រុមតាលីបង់បើកភ្លើងខៀវអនុញ្ញាតឲ្យទីភ្នាក់ងារមនុស្សធម៌នានាចូលទៅកាន់តំបន់ដែលកំពុងត្រូវការជំនួយ ដោយសេរី។ នេះបើយោងតាមការឲ្យដឹងពីអ្នកនាំពាក្យក្រសួងការបរទេសអាមេរិកកាលពីថ្ងៃសុក្រម្សិលមិញ។
អនុញ្ញាតឲ្យពលរដ្ឋអាមេរិកអាចចាកចេញពីអាហ្វហ្កានីស្ថានបាន
ក្នុងជំនួបរយៈពេលពីរថ្ងៃជាមួយតំណាងរបបតាលីបង់ អាទិភាពសំខាន់ចុងក្រោយគេមួយទៀតរបស់រដ្ឋបាលលោកចូ បៃដិន គឺការអនុញ្ញាតឲ្យពលរដ្ឋអាមេរិកសម្ព័ន្ធមិត្តអាចចាកចេញពីអាហ្វហ្កានីស្ថានបានប្រសិនណាបើពួកគេចង់ធ្វើដូច្នោះ។
ទាក់ទង់រឿងនេះ សហរដ្ឋអាមេរិកនិយាយថាកាលពីគ្រាកន្លងមក ក្រុមតាលីបង់បានសហការជាមួយខ្លួនក្នុងការបើកផ្លូវឲ្យពលរដ្ឋអាមេរិកធ្វើដំណើរចាកចេញពីប្រទេសអាហ្វហ្កានីស្ថានបាន។
នៅពេលក្រុមតាលីបង់ ដណ្តើមគ្រប់គ្រងបានអំណាចទាំងស្រុងនៅអាហ្វហ្កានីស្ថានសហរដ្ឋអាមេរិក និងប្រទេសសម្ព័ន្ធបានដឹកជម្លៀសពលរដ្ឋ និងសម្ព័ន្ធមិត្តអាហ្វហ្កានីស្ថាន បានជាង ១២៤ ០០០នាក់។
យោងតាមន្ត្រីអាមេរិក នៅមានពលរដ្ឋអាមេរិកប្រមាណ ១០០ នាក់ដែលនៅសេសសល់។ ពួកគេភាគច្រើនជាពលរដ្ឋអាមេរិកដើមកំណើតអាហ្វហ្កានីស្ថាន ដែលនៅមិនទាន់សម្រេចចិត្តថាត្រូវចាកចេញ ឬក៏អត់។ ប៉ុន្តែទន្ទឹមគ្នានេះ ទីក្រុងវ៉ាស៊ីនតោនបានទទួលស្គាល់ដែរថាខ្លួនមិនអាចដឹកបញ្ជូនសម្ព័ន្ធមិត្តអាហ្វហ្កានីស្ថានជាច្រើននាក់ដែលចង់ចាកចេញក្នុងអំឡុងប្រតិបត្តិការដឹកជម្លៀសមនុស្សដ៏ធំ និងដ៏មានគ្រោះថ្នាក់កាលពីខែសីហាកន្លងទៅ។
បច្ចុប្បន្ននេះ នៅមានជនជាតិអាហ្វហ្កានីស្ថានដែលជាសម្ព័ន្ធមិត្តអាមេរិកជាច្រើនពាន់នាក់ទៀតនៅមិនទាន់អាចចាកចេញពីប្រទេស ហើយពួកគេកំពុងប្រឈមនឹងការធ្វើទុក្ខបុកម្នេញពីសំណាក់ របបតាលីបង់។
តើកិច្ចប្រជុំជាន់ខ្ពស់រវាងមន្ត្រីក្រុងវ៉ាស៊ីនតោននិងតំណាងតាលីបង់អាចមានន័យថាអាមេរិកព្រមទទួលស្គាល់របបតាលីបង់?
ចម្លើយនោះគឺអត់ទេ! ទោះបីជាបើកកិច្ចពិភាក្សាទល់មុខគ្នាជាមួយពួកតាលីបង់ក្តី ក៏ក្រសួងការបរទេសអាមេរិកបានគូសបញ្ជាក់យ៉ាងច្បាស់ហើយថាកិច្ចប្រជុំនេះមិនមែនជាសញ្ញាបង្ហាញថា ទីក្រុងវ៉ាស៊ីនតោនកំពុងទទួលស្គាល់របបគ្រប់គ្រងរបស់ពួកតាលីបង់នៅអាហ្វហ្កានីស្ថានឡើយ។
សម្រាប់សហរដ្ឋអាមេរិក មុននឹងទទួលស្គាល់ភាពស្របច្បាប់ណាមួយគឺទាល់តែក្រុមតាលីបង់អនុវត្តជាក់ស្តែងនូវអ្វីដែលខ្លួនបានសន្យាដូចជា មិនសងសឹកគូប្រជែង គោរពសិទ្ធិស្ត្រី និងគោរពសិទ្ធិសេរីភាពសារព័ត៌មានជាដើម។ល។
បើយោងតាមសម្តីរបស់មន្ត្រីជាន់ខ្ពស់អាមេរិកម្នាក់ និងដែលមានចុះផ្សាយនៅលើសារព័ត៌មាន Reuters កិច្ចប្រជុំទល់មុខជាលើកដំបូងរវាងអាមេរិកនិងពួកតាលីបង់នេះគឺជាកិច្ចការងារមួយក្នុងចំណោមទំនួលខុសត្រូវជាច្រើនផ្សេងទៀតដែលមន្ត្រីក្រុងវ៉ាស៊ីនតោនត្រូវបន្តធ្វើដើម្បីផលប្រយោជន៍ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ