វិបត្តិថាមពលឡើងថ្លៃធ្វើឲ្យធ្យូងថ្ម ប្រភពបញ្ចេញឧស្ម័នកាបូនិកកាន់តែពេញនិយម
ចុះផ្សាយនៅថ្ងៃ៖
ស្តាប់ - ០៧:៤៩
កំណើនសេដ្ឋកិច្ចចិនធ្លាក់ថយចុះបន្តិច នៅត្រីមាសទី៣។ តាមទិន្នន័យ ដែលការិយាល័យស្ថិតិជាតិចិនចុះផ្សាយនៅថ្ងៃចន្ទនេះ កំណើនសេដ្ឋកិច្ចចិនសម្រាប់ត្រីមាសទី ៣ (ពីខែកក្កដា ដល់ខែ កញ្ញា) មានប្រមាណ ៤,៩%។ ដូចចិន និងឥណ្ឌា ប្រទេសនៅអាស៊ីផ្សេងទៀត នៅតែមានសេដ្ឋកិច្ចពឹងផ្អែកខ្លាំងលើថាមពលធ្យូងថ្ម ដែលតាមពិតជាប្រភពបញ្ចេញឧស្ម័នកាបូន ឧស្ម័នផ្ទះកញ្ចក់ ធ្វើឲ្យផែនដីឡើងកំដៅ។ ចិន និងប្រទេសអាស៊ីមួយចំនួនបានសន្យាចាត់វិធានការមួយចំនួន ដើម្បីកាត់បន្ថយ ការបញ្ចេញឧស្ម័នកាបូនិក ប៉ុន្តែ បែរជានៅតែពឹងផ្អែកលើធ្យូងថ្ម ដែលជាប្រភពបញ្ចេញឧស្ម័នកាបូនិក។
សុខភាពសេដ្ឋកិច្ចចិនមានសញ្ញាកាន់តែមិនល្អ បន្ទាប់ពីការិយាល័យស្ថិតិជាតិចិន បានបង្ហាញតួលេខ នៅថ្ងៃចន្ទនេះថា កំណើនសេដ្ឋកិច្ចចិន នៅត្រីមាសទី៣បានធ្លាក់ចុះ មកនៅត្រឹម ៤,៩% បន្ទាប់ពីកើនឡើង ដល់ ៧,៩% នៅត្រីមាសទី២ឆ្នាំនេះ។ ជាតួលេខទាបបំផុត គិតចាប់តាំងពីដើមឆ្នាំ ២០២០។ ចិនមានកំណើនសេដ្ឋកិច្ចយឺតដោយសារតែចិន កំពុងជួបបញ្ហាខ្វះភ្លើងអគ្គិសនី រួមទាំងតម្លៃវត្ថុធាតុដើមឡើងថ្លៃ។
ងើបចាកផុតពីវិបត្តិកូវីដមុនគេក្នុងពិភពលោក ចិនក៏ធ្លាប់មានកំណើនសេដ្ឋកិច្ច ខ្ពស់ជាងគេដែរ ជាមួយនឹងការនាំចេញខ្លាំង ក្នុងពេលប្រទេសទាំងអស់ ក្នុងពិភពលោក មានសេដ្ឋកិច្ចត្រដាបត្រដួសដោយសារវិបត្តិកូវីដ។
ប៉ុន្តែ កំណើនសេដ្ឋកិច្ចចិន ថយចុះ នៅត្រីមាសទី ៣ ដោយសារមូលហេតុសំខាន់មួយចំនួន ដូចជា ការខ្វះចរន្តអគ្គិសនី សម្រាប់រោងចក្រឧស្សាហកម្ម ការឆ្លងរាតត្បាត ឡើងវិញ នៃជំងឺកូវីដ នៅតាមទីក្រុងសេដ្ឋកិច្ចមួយចំនួន កាលពីខែ សីហា កន្លងទៅ បញ្ហាក្នុងសង្វាក់ផ្គត់ផ្គង់វត្ថុធាតុដើម ជាពិសេស ធ្យូងថ្ម ហើយនិងចុងក្រោយ គឺការធ្លាក់ថយចុះនៃវិស័យអចលនទ្រព្យ នៅក្រោយ កើតមានវិបត្តិប្រាក់បំណុលរបស់Evergrande ដែលជាក្រុមហ៊ុន អចលនទ្រព្យ ដ៏ធំជាងគេរបស់ចិន។
ទោះចាកផុតពីវិបត្តិកូវីដ ប៉ុន្តែ កំណើនសេដ្ឋកិច្ចរបស់ចិននៅតែអាចរងការគំរាមកំហែង ព្រោះត្រូវដឹងថា សេដ្ឋកិច្ចចិននៅពឹងអាស្រ័យខ្លាំងលើថាមពលបានមកពីធ្យូងថ្ម។ ប៉ុន្តែ នៅប៉ុន្មានខែមកនេះ នៅពេលសេដ្ឋកិច្ចពិភពលោកចាប់ផ្តើមងើបឡើងវិញ នៅក្រោយ វិបត្តិកូវីដ តម្រូវការថាមពល សម្រាប់ជំរុញ សេដ្ឋកិច្ច ក៏បានកើនឡើង នៅគ្រប់កន្លែង ក្នុងពិភពលោក ដែលជាហេតុធ្វើឲ្យតម្លៃ ធ្យូងថ្ម ប្រេង និងឧស្ម័ន កើនឡើងថ្លៃ ទៅតាមនោះដែរ។
ចិនត្រូវការធ្យូងថ្មខ្លាំង ព្រោះថា រោងចក្រអគ្គិសនីភាគច្រើនរបស់ចិន ដើរដោយថាមពលធ្យូងថ្ម។ ដូច្នេះ នៅពេលធ្យូងថ្មឡើងថ្លៃ រោងចក្រផលិតអគ្គសនីចិនមួយចំនួនបានបន្ថយសកម្មភាពរបស់ខ្លួន។ ដោយសារការខ្វះចរន្តអគ្គិសនីក្រុមហ៊ុន រោងចក្រឧស្សាហកម្ម ក៏ត្រូវរអាក់រអួល បន្ថយសកម្មភាពផលិតទៅតាមនោះទេ។
នយោបាយបៃតងរបស់រដ្ឋាភិបាលចិនរួមចំណែកធ្វើឲ្យតម្លៃធ្យូងថ្ម ឡើងថ្លៃ
ចិនខ្វះខាតធ្យូងថ្ម សព្វថ្ងៃ នេះ ក៏ដោយសារនយោបាយរបស់រដ្ឋអំណាចចិន នៅប៉ុន្មានឆ្នាំចុងក្រោយនេះ ដែលមានគោលដៅ ចង់ឲ្យចិនលែងសូវពឹងអាស្រ័យលើថាមពលធ្យូងថ្ម ដែល ជាថាមពលកខ្វក់ ប្រភពបញ្ចេញឧស្ម័នកាបូនិក ឧស្ម័នផ្ទះកញ្ចក់។ ប្រធានាធិបតីចិន លោកស៊ី ជីនពីងធ្លាប់បានប្រកាសនៅ អង្គការសហប្រជាជាតិ ថា ចិននឹងមានអព្យាក្រិត្យកាបូន ឬកាបូនសូន្យ នៅឆ្នាំ ២០៦០ មានន័យថា ចិននឹងស្រូបយកកាបូន ឲ្យបានស្មើនឹងចំនួនកាបូន ដែលខ្លួនបញ្ចេញ។ ដើម្បីសម្រេចគោលដៅនេះ រដ្ឋាភិបាលចិន បានចាប់ផ្តើមបិទជាបណ្តើរៗ អាជីវកម្មធ្យូងថ្ម នៅភាគខាងជើង ប្រទេស ដែលធ្លាប់រងការចោទប្រកាន់ថា បានបំពុលបរិស្ថានយ៉ាងធ្ងន់ធ្ងរ។
រោងចក្រផលិតធ្យូងថ្ម ដែលនៅមានជីវិត ផ្សេងទៀត ត្រូវប្រឈមនឹងបទវិន័យ ច្បាប់បរិស្ថាន និងសន្តិសុខតឹងតែង ជាងមុន។ គេវាយតម្លៃថា ច្បាប់បរិស្ថាន និងសន្តិសុខថ្មីរបស់ចិន ជាដើមហេតុធ្វើឲ្យចិនជួបការខ្វះខាតធ្យូងថ្ម។ ឧទាហរណ៍ ទោះមានតម្រូវការធ្យូងថ្ម នៅទីផ្សារ ប៉ុន្តែ ក្រុមហ៊ុនផលិតធ្យូងថ្មចិនមួយចំនួន នៅតែមិនហ៊ានបង្កើនសកម្មភាពផលិតកម្មរបស់ខ្លួននោះទេ ព្រោះថា ក្នុងករណីដែលកើតមានគ្រោះថ្នាក់ ស្លាប់បាត់បង់ជីវិតរបស់កម្មករ ដោយសារ បញ្ហាខ្វះសុវត្ថិភាព នោះ ម្ចាស់អាជីវកម្មរ៉ែធ្យូងថ្ម ត្រូវមានទោសជាប់ពន្ធនាគារ និងបង់ប្រាក់ពិន័យធ្ងន់ធ្ងរ។ ដោយសារតែម្ចាស់អាជីវកម្មកាត់បន្ថយការផលិត ធ្យូងថ្ម កាន់តែកម្រ ហើយនិងឡើងថ្លៃ ដែលនេះជារឿងឈឺក្បាលខ្លាំងណាស់សម្រាប់រោងចក្រផលិតអគ្គិសនី។
ចង់ ឬមិនចង់ វិបត្តិលើកនេះ វាបានឆ្លុះបញ្ចាំងឲ្យគេឃើញកាន់តែច្បាស់ ពីផលវិបាកនៃយុទ្ធសាស្ត្រ ចង់បានអព្យាក្រិត្យភាពកាបូន ដែលរដ្ឋាភិបាលចិន បានកំណត់ សម្រាប់៤០ឆ្នាំខាងមុខ។
គេនៅតែមិនអាចបោះបង់ចោល ធ្យូងថ្ម ដែលជាប្រភពបញ្ចេញឧស្ម័នកាបូនិក
វិបត្តិថាមពលឡើងថ្លៃ ដែលកើតឡើងនៅក្រោយវិបត្តិកូវីដ បានធ្វើឲ្យគេជឿជាក់ជាងពេលណាៗទាំងអស់ថា ពិភពលោកពិតជាមិនអាចទៅកាត់បន្ថយការបញ្ចេញឧស្ម័នកាបូនិក តាមការកំណត់ចែង នៅក្នុងកិច្ចព្រមព្រៀងស្តីពីអាកាសធាតុក្រុងប៉ារីស ឆ្នាំ ២០១៥បាននោះទេ។
វិបត្តិថាមពល ឡើងថ្លៃ នៅពេលនេះ បានស្តែងឲ្យឃើញថា គេមិនអាចឈប់ប្រើធ្យូងថ្ម ដើម្បី ចូលរួម ទប់ទល់កុំឲ្យផែនដី ឡើងកំដៅ ជាង ១,៥អង្សារ នៅចុងសតវត្សរ៍នេះ។ នៅអាស៊ី នាំមុខដោយចិន និងឥណ្ឌា សកម្មភាពសេដ្ឋកិច្ចបានពឹងខ្លាំងលើថាមពលបានមកពីធ្យូងថ្ម។ ដើម្បីប្រយោជន៍សេដ្ឋកិច្ច មើលទៅ គ្មានប្រទេសណាមួយ ដែលអាចសម្រេចគោលដៅ កាត់បន្ថយ ការបញ្ចេញឧស្ម័នកាបូនិកតាមការសន្យារបស់ខ្លួននោះទេ។
វិបត្តិថាមពលឡើងថ្លៃ ជាពិសេស ឧស្ម័ន ហ្គាស នៅទឹកដីអឺរ៉ុប ដោយសារតម្រូវការខ្ពស់សម្រាប់សេដ្ឋកិច្ចងើបឡើងវិញ នៅក្រោយវិបត្តិកូវីដ បានធ្វើឲ្យធ្យូងថ្ម ប្រភពបញ្ចេញឧស្ម័នការបូនិកច្រើនជាងគេ ជាង ហ្គាស ដល់ទៅ ២ដង ដែល គេគ្រោងកាត់បន្ថយ ឲ្យបានអតិបរិមា បែរជាត្រលប់ ប្រភពថាមពលពេញនិយម ដែលគេត្រូវការចង់បានខ្លាំង សម្រាប់សម្រាប់ការផ្គត់ផ្គង់អគ្គិសនីទៅវិញ។
តំបន់អាស៊ី ប៉ាស៊ីហ្វិក ត្រូវគេចាត់ទុកថា ជាអ្នកដែលប្រើប្រាស់ធ្យូងថ្ម ច្រើនជាងគេ ប្រមាណ ៣ភាគ៤នៃធ្យូងថ្មសរុបក្នុងពិភពលោក។ អ្នកប្រើប្រាស់ធ្យូងថ្ម ច្រើនជាងគេ ដែលជាអ្នកទទួលខុសត្រូវបញ្ចេញឧស្ម័នកាបូនិកច្រើនជាងគេ ដូចជា ប្រទេសកំពុងអភិវឌ្ឍន៍ និងប្រទេសប្រទេសក្រីក្រ ក៏ជាអ្នករងផលប៉ះពាល់ខ្លាំងជាងគេ ខាងផ្នែកសុខភាព ផ្លូវដង្ហើម និងគ្រោះធម្មជាតិ ដោយសារការប្រែប្រួលអាកាសធាតុ ដូចជាគ្រោះទឹកជំនន់ទឹកភ្លៀង ខ្យល់ព្យុះ និងគ្រោះរាំងស្ងួត រលកក្តៅខ្លាំង។
ប្រទេសអាស៊ីចំនួន៥ ដូចជាចិន ឥណ្ឌា ជប៉ុន ឥណ្ឌូណេស៊ី និងវៀតណាម ដែលប្រើប្រាស់ធ្យូងថ្មច្រើនជាងគេសម្រាប់ផលិតអគ្គិសនី។ នៅឥណ្ឌូណេស៊ី រដ្ឋាភិបាលធ្លាប់បានសន្យាអព្យាក្រិត្យកាបូននៅឆ្នាំ ២០៦០ដូចប្រទេសចិនដែរ និងចង់ឈប់សង់រោងចក្រអគ្គិសនីដើរដោយថាមពលធ្យូងថ្ម នៅឆ្នាំ ២០៣០ ប៉ុន្តែ រហូតមកដល់ពេលនេះ ឥណ្ឌូណេស៊ី ក៏ដូចជាប្រទេសអាស៊ីផ្សេងទៀត ដូចជាឥណ្ឌា ជាដើម នៅតែ មិនអាចដោះដៃ ឈប់ប្រើធ្យូងថ្ម។ មូលហេតុ គឺបើប្រៀបធៀបនឹងថាមពលផ្សេងទៀត ធ្យូងថ្មមានតម្លៃថោក។ ម្យ៉ាងទៀត បើប្រៀបធៀបនឹងប្រទេសលោកខាងលិខ បណ្តាប្រទេសអាស៊ីភាគច្រើន នៅមិនទាន់មានសមត្ថភាព ហិរញ្ញវត្ថុ រចនាសម្ព័ន្ធ សម្រាប់បង្កើតប្រភពថាមពលស្អាតស្អំ ដូចជា ថាមពលបានមកពីកង្ហារយក្ស ឬផ្ទាំងស្រូបកំដៅព្រះអាទិត្យជាដើម។
ទីភ្នាក់ងារថាមពលអន្តរជាតិAgence internationale de l’énergie បានវាយតម្លៃ ថា ដើម្បីឈានទៅដល់គោលដៅ កាត់បន្ថយ ការបញ្ចេញឧស្ម័នកាបូនិក ដែលជាប្រភពធ្វើឲ្យផែនដីឡើងកំដៅ ក្រុមប្រទេសអ្នកមានមិនអាចសម្រេចគោលដៅបានតែម្នាក់ឯងនោះទេ។ គេត្រូវការជួយប្រទេសកំពុងអភិវឌ្ឍ ប្រទេសក្រីក្រ ផ្សេងទៀត តាមរយៈការផ្តល់ថវិកាបៃតង ការបំពាក់ឧបករណ៍បច្ចេកវិទ្យា ដើម្បីឲ្យប្រទេសទាំងនោះ អាចផលិតបានថាមពល ស្អាតស្អំ ជាមុនសិន មុននឹងអាចលះបង់ចោលទាំងស្រុងប្រេង ឧស្ម័នហ្គាស ធ្យូងថ្ម ដែលជាប្រភពបញ្ចេញឧស្ម័នកាបូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ