តើជំនួបកំពូលហ្សេ២០អាចសម្រេចកម្មវត្ថុអាកាសធាតុ បានយ៉ាងណា ?
ចុះផ្សាយនៅថ្ងៃ៖
ស្តាប់ - ០៧:១៨
ប្រមុខដឹកនាំនៃក្រុមប្រទេសមានសេដ្ឋកិច្ចលូតលាស់ខ្លាំងជាងគេ ២០ដំបូងនៅលើពិភពលោក ឬហៅកាត់ខ្លី ក្រុមប្រទេសហ្សេ២០ ត្រូវជួបប្រជុំគ្នានៅទីក្រុងរ៉ូមប្រទេសអ៊ីតាលី នាថ្ងៃសោរ៍និងអាទិត្យនេះ។ ជាជំនួបកំពូលដែលត្រូវជជែកអំពីប្រធានបទសំខាន់ៗជាច្រើន ជាពិសេស សំណុំរឿងអាកាសធាតុ ការប្រយុទ្ធប្រឆាំងនឹងជំងឺរាតត្បាតសកលកូវីដ១៩ និងការផ្តល់សន្ទុះសេដ្ឋកិច្ចពិភពលោក។ ប៉ុន្តែជាការកត់សម្គាល់ លោកប្រធានាធិបតីចិន និងរុស្ស៊ី មិនបានបង្ហាញវត្តមានដោយផ្ទាល់ទេ។
សំណុំរឿងដែលធំនិងបន្ទាន់ជាងគេមួយ គឺការប្រយុទ្ធប្រឆាំងនឹងការឡើងកម្តៅអាកាសធាតុ។ ប៉ុន្តែមកទល់នឹងម៉ោងនេះ ហ្សេ២០ពុំទាន់សម្រេចការអ្វីបានទេ។ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរស៍ ដែលតែងតែទាញសញ្ញាអាសន្នស្តីពីមហន្តរាយអាកាសធាតុ និងដែលតែងតែចង្អុលមុខបញ្ជាក់ពីទំនួលខុសត្រូវពិសេសរបស់ក្រុមប្រទេសហ្សេ២០ ចំពោះអាកាសធាតុ ទើបបានអំពាវនាវឱ្យមេដឹកនាំក្រុមប្រទេសអ្នកមានដែលកំពុងជួបជុំគ្នានៅក្រុងរ៉ូមថ្ងៃនេះទាំងអស់ ចាប់ផ្តើមសម្រេចកម្មវត្ថុអាកាសធាតុ ធ្វើជាគំរូល្អ នាំមុខពិភពលោកឱ្យបានមុនថ្ងៃបើកសន្និសីទអន្តរជាតិCOP២៦ ដែលនឹងប្រព្រឹត្តនៅថ្ងៃអាទិត្យស្អែកផង។
អ៊ីតាលី ដែលជាម្ចាស់ផ្ទះ ចង់ឱ្យក្រុមហ្សេ២០ចេញសេចក្តីសន្យាជាក់លាក់ផែនការដើរចេញពីថាមពលធ្យូងថ្ម ប៉ុន្តែប្រទេសប្រើធ្យូងថ្មចំបងៗមិនសម្តែងឆន្ទៈល្អទេ ៖ ប្រធានាធិបតីចិនមិនទាំងមកប្រជុំផ្ទាល់ផង - ឥណ្ឌា និងឥណ្ឌូណេស៊ី មិនទាន់សន្យាអ្វីទាំងអស់នៅពេលនេះ។ ប្រធានាធិបតីបារាំង ម៉ាក្រុង ត្រូវជួបជាមួយសមភាគីឥណ្ឌូណេស៊ីលោក វីដូដូ និង នាយករដ្ឋមន្ត្រីឥណ្ឌា ម៉ូឌី ដោយផ្ទាល់ដើម្បីជជែកអំពីរឿងនេះ។ ឯនាយករដ្ឋមន្ត្រីអង់គ្លេសវិញ បានទទួលស្គាល់រួចទៅហើយថា គេមិនអាចបញ្ឈប់ការឡើងកម្តៅអាកាសធាតុ ដោយជំនួបនៅក្រុងរ៉ូមនេះបានទេ។
ហ្សេ២០ តំណាងឱ្យ៨០%នៃផលិតផលសរុបពិភពលោក និង៨០%នៃការបញ្ចេញឧស្ម័នផ្ទះកញ្ចក់។ ដូច្នេះហ្សេ២០ត្រូវតែជាអ្នកផ្តល់សន្ទុះ ជាអ្នកនាំមុខ អនុវត្តតាមកិច្ចព្រមព្រៀងអាកាសធាតុក្រុងប៉ារីស កំរិតការឡើងកម្តៅអាកាសធាតុត្រឹម១,៥អង្សា។ ហ្សេ២០ចង់ចេញសេចក្តីថ្លែងការណ៍អាកាសធាតុសម្រាប់នាំទៅពង្រឹងកម្លាំងសន្និសីទអន្តរជាតិស្តីពីអាកាសធាតុcop២៦ ប៉ុន្តែកិច្ចពិភាក្សាត្រូវជួបការស្មុគស្មាញជាងការគ្រោងទុក ព្រោះលោកប្រធានាធិបតី ស៊ី ជីនពីង និង វ្លាដេមៀ ពូទីន ដែលជាតួអង្គដ៏សំខាន់ពីរសម្រេចមិនមកចូលរួមប្រជុំដោយផ្ទាល់ទេ សុខចិត្តធ្វើតែតាមវីដេអូខុនហ្វេរ៉ង់។
កូវីដនិងការផ្តល់សន្ទុះសេដ្ឋកិច្ច
កាលពីឆ្នាំ២០២០ ដោយហេតុកូវីដ១៩ ជំនួបកំពូលហ្សេ២០ប្រព្រឹត្តទៅតាមអនឡាញ។ ឆ្នាំនេះកូវីដមិនទាន់រលត់និងដោះស្រាយបានដាច់ស្រេចទេ កូវីដនៅតែជាក្តីព្រួយបារម្ភចំបងដដែលរបស់ក្រុមប្រទេសអ្នកមាន នៅលើផែនដី។ ដើម្បីឈានទៅបិទបញ្ចប់ជំងឺរាតត្បាតសកលកូវីដ ហ្សេ២០ បានសម្របខ្លួនតាមកម្មវត្ថុរបស់អង្គការសុខភាពពិភពលោក គឺពន្លឿនការចាក់ថ្នាំបង្ការឱ្យ បានដល់៧០% នៃប្រជាពលរដ្ឋនៅទូទាំងពិភពលោក យ៉ាងយូរនៅពាក់កណ្តាលឆ្នាំ២០២២ ខណៈដែលពេលនេះ មានប្រជាពលរដ្ឋក្នុងប្រទេសក្រីក្រ ប្រមាណ ៥%ប៉ុណ្ណោះ បានទទួលវ៉ាក់សាំងចំនួនដូស។
ការផ្តល់សន្ទុះដល់កំណើនសេដ្ឋកិច្ច ក៏ជាប្រធានបទចំបងមួយដែលមេដឹកនាំហ្សេ២០ ត្រូវលើមកជជែកដែរ។ មួយឆ្នាំ ក្រោយកូវីដ ស្ថានភាពសេដ្ឋកិច្ចចាប់មានសន្ទុះនៅស្ទើរគ្រប់ប្រទេស ដែលជំរុញឱ្យមានបញ្ហាប្រព័ន្ធផ្គត់ផ្គង់ និងកង្វះវត្ថុធាតុដើម និងដែលធ្វើឱ្យតម្លៃថាមពលឡើងថ្លៃ។ ក្នុងបញ្ហានេះប្រធានាធិបតីបារាំង បានអំពាវនាវឱ្យមេដឹកនាំហ្សេ២០ សហការសម្របសម្រួលគ្នាប្រើស្តុក ដើម្បីរក្សាស្ថិរភាពតម្លៃប្រេង។ សង្ឃឹមថាសំណើរបស់លោកនឹងបានទទួលការគាំទ្រ។ ហើយអ្វីដែលច្បាស់ជាងគេ និងសម្រេចបានជាក់លាក់ជាងគេ គឺការយកពន្ធអតិប្បរមាលើក្រុមហ៊ុនពហុជាតិ ចំនួន១៥% ចាប់ពីឆ្នាំ២០២៣ទៅ។ តាមរយៈពន្ធនេះ គេអាចរកចំណូលបន្ថែមបាន១៥០ពាន់លានអឺរ៉ូ។
បន្ទាប់មក មានជំនួបទ្វេភាគី ជាក្រុមតូចៗ ដោយផ្ទាល់ ដើម្បីដោះស្រាយវិវាទផ្សេងៗ ជាក់ស្តែង ជំនួបរវាងលោកប្រធានាធិបតីបារាំងជាមួយប្រធានាធិបតីអាមេរិកបៃដិន ដើម្បីជម្រះសំណុំរឿងលុបកិច្ចសន្យាលក់នាវាមុជទឹក ឬជំនួបរវាងលោកម៉ាក្រុងនឹងលោកនាយករដ្ឋមន្ត្រីអង់គ្លេស ចន ស៊ុន ដើម្បីដោះស្រាយជម្លោះអ្នកនេសាទក្រោយBrexit។
លោកស៊ីជីនពីង អវត្តមាន
ជំនួបកំពូលហ្សេ២០នេះ ជាជំនួបអន្តរជាតិលើកទីមួយ គិតចាប់តាំងពីវិបត្តិកូវីដផ្ទុះឡើងដែលប្រមុខដឹកនាំប្រទេសនីមួយៗ បង្ហាញវត្តមានផ្ទាល់ក្នុងកន្លែងប្រជុំ និងជាឱកាសជួបនិយាយចរចាគ្នាដោយស្រួលផង ប៉ុន្តែលោកស៊ីជីនពីង ប្រធានាធិបតីចិន បែរជាអវត្តមាន មិនបង្ហាញខ្លួនក្បែរប្រមុខដឹកនាំប្រទេសដទៃទេ។
ពុំមានការបញ្ជាក់អ្វីជាផ្លូវការអំពីមូលហេតុដែលលោកស៊ីជីនពីង អវត្តមានក្នុងជំនួបកំពូលហ្សេ២០ និងសន្និសីទអន្តរជាតិCOP២៦នេះទេ ប៉ុន្តែលេសចំបង ទំនងជាគ្មានក្រៅអ្វីពី បញ្ហាកូវីដ ដែលហាក់មានចាប់មានសន្ទុះឆ្លងកើនឡើងជាថ្មីទេ។ តាំងពីកូវីដផ្ទុះឡើង គេឃើញរូបលោកស៊ី ជីនពីង នៅពេញទំព័រមុខរបស់កាសែតក្នុងស្រុក នៅក្នុងកញ្ចក់ទូរទស្សន៍លើពិភពលោក និងសំឡេងទូរស័ព្ទហៅទៅសមភាគីប្រទេសផ្សេងឥតដាច់ តែ លោកប្រធានាធិបតីចិន មិនដែលបង្ហាញវត្តមានសោះ លោកបញ្ជូនតែរដ្ឋមន្ត្រីការបរទេសទៅជំនួស។ សូម្បីតែជំនួបអាកាសធាតុរៀបចំធ្វើក្នុងប្រទេសចិនផ្ទាល់ ក៏លោកមិនចេញមកជួបមេដឹកនាំដទៃដែរ គឺបានត្រឹមថ្លែងសុន្ទរកថាតាមអនឡាញប៉ុណ្ណោះ។ នៅក្នុងជំនួបកំពូលហ្សេ២០ និងCOP២៦ ក៏លោកចេញតែតាមអេក្រង់ដែរ។
សម្រាប់អ្នកវិភាគ ចិនកំពុងធ្វើខ្លួនឱ្យឯកា និងនៅឯការហូតដល់ពាក់កណ្តាលឆ្នាំ២០២២ ក្រោយការប្រកួតកីឡាអូឡាំពិករដូវរងារចប់ ឬដល់ចុងឆ្នាំ២០២២ ក្រោយមហាសន្និបាតបក្សចប់ផង ព្រោះនយោបាយ សូន្យកូវីដរបស់ចិនដែលជាវិធានការដ៏តឹងរឹង ជាតំណាងបរាជ័យនៃនយោបាយរបស់លោកស៊ីជីនពីង។ លោក ស៊ីជីនពីង ត្រូវការពារសុវត្ថិភាព ផ្ទាល់ខ្លួនសិន។ នៅ១០០ថ្ងៃមុនការប្រកួតកីឡាអូឡាំពិករដូវរងារ ករណីឆ្លងថ្មីបានស្ទុះឡើងវិញនៅចិន រហូតជំរុញឱ្យប៉េកាំងបិទខ្ទប់ក្រុងមួយភាគនិងចេញបម្រាមជាថ្មី។ ម្យ៉ាងទៀត ទាក់ទងនឹងអាកាសធាតុ ចិនបានប្រកាសផែនការប្រកបដោយមហិច្ឆតា ដែលប៉េកាំងទំនងមិនអាចគោរពតាមបានទើបមិនចង់មកប្រឈមទល់នឹងក្រុមបស្ចឹមលោក។ ជាចុងក្រោយ ក្នុងបរិបទនៃសង្គ្រាមត្រជាក់រវាងអាមេរិកនិងចិន សំណុំរឿងតៃវ៉ាន់ អាចនឹងត្រូវលើកមកជជែកក្នុងជំនួបហ្សេ២០ ដែលលោកស៊ីជីនពីងមិនត្រូវការពន្យល់បំភ្លឺអ្វី ទាំងអស់។
ចំពោះលោក ពូទីនវិញ លោកសម្រេចមកមិនចូលរួម ក៏ព្រោះលោកតាំងខ្លួនជាអ្នកប្រឆាំងនឹងក្រុមបស្ចឹមលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ