៦ថ្ងៃមុនបើកCOP26 អង្គការឧតុនិយមពិភពលោក ទាញសញ្ញាអាសន្ន ពីគ្រោះថ្នាក់កាន់តែបន្ទាន់នៃវិបត្តិអាកាសធាតុ
កម្រិតនៃឧស្ម័នផ្ទះកញ្ចក់ ក្នុងបរិយាកាស បានកើនឡើងយ៉ាងក្រាស់ នៅក្នុងឆ្នាំ២០២០កន្លងទៅ ចំណែកឯព្រៃអាម៉ាហ្សូន បានបាត់បង់ នូវសមត្ថភាព ស្រូបយកឧស្ម័នកាបូនិក។ នេះគឺជាសារ ទាញសញ្ញាអាសន្ន របស់អង្គការឧតុនិយមពិភពលោក ខណៈដែលសន្និសីទអន្តរជាតិស្តីពីអាកាសធាតុ COP26 នឹងត្រូវចាប់ផ្តើម ក្នុងរយៈពេល៦ថ្ងៃទៀត។ អង្គការសហប្រជាជាតិអំពាវនាវ ឲ្យពិភពលោក ត្រូវតែយកឱកាសនេះរួមគ្នា ប្រឹងប្រែងដោះស្រាយវិបត្តិអាកាសធាតុ។
ចុះផ្សាយនៅថ្ងៃ៖
ស្តាប់ - ០២:៣៨
យោងតាមរបាយការណ៍ចុងក្រោយ ស្តីពីឧស្ម័នផ្ទះកញ្ចក់ របស់អង្គការឧតុនិយមពិភពលោក (OMM) បានបង្ហាញឲ្យឃើញថា មួយផ្នែកនៃព្រៃអាម៉ាហ្សូន មិនមែនជាតំបន់ស្រូបយកឧស្ម័នកាបូនិកនោះទេ តែជាកន្លែងបញ្ចេញឧស្ម័នកាបូនិក ទៅក្នុងបរិយាកាសទៅវិញ។ នេះបើតាមលើកឡើង របស់លោក Petteri Taalas អគ្គលេខាធិការអង្គការនេះ នៅចំពោះមុខអ្នកកាសែត។
លោកបានបញ្ជាក់ថា តួលេខទាំងនេះ គឺជាសញ្ញាអាសន្ន ព្រោះបញ្ហានេះ គឺវាបណ្តាលមកពីការកាប់បំផ្លាញព្រៃឈើ នៅក្នុងតំបន់អាម៉ាហ្សូន។ លោកបានពន្យល់ថា ពាក់កណ្តាលនៃឧស្ម័នកាបូនិក ដែលកើតចេញពីសកម្មភាពរបស់មនុស្ស គឺស្ថិតនៅកកកុញក្នុងស្រទាប់បរិយាកាស។ សល់ពីនេះ គឺត្រូវស្រូបដោយទឹកសមុទ្រ និងព្រៃឈើគ្រប់ដណ្តប់ជុំវិញផែនដី។ ក៏ប៉ុន្តែអ្នកជំនាញ នៃអង្គការឧតុនិយមអន្តរជាតិ កំពុងតែភ័យបារម្ភថា លទ្ធភាពនៃការស្រូបយកឧស្ម័នកាបូនិក កំពុងតែថយចុះ ដោយសារតែការកាប់បំផ្លាញព្រៃឈើ ការឡើងកំដៅទឹកសមុទ្រ និងការឡើងជាតិអាស៊ីតនៅក្នុងសមុទ្រ។
គួរបញ្ជាក់ថា ឧស្ម័នផ្ទះកញ្ចក់នៅក្នុងបរិយាកាស គឺមាន៣ប្រភេទធំៗ គឺឧស្ម័នកាបូនិក CO2 ឧស្ម័នម៉េតាន (CH4) និងឧស្ម័នប្រូតុកស៊ីដ អាហ្សូត (N2O)។ យោងតាមអង្គការឧតុនិយមអន្តរជាតិ កម្រិតឧស្ម័នទាំង៣នេះ បានកើនឡើងខ្លាំងណាស់ ក្នុងឆ្នាំ២០២០កន្លងទៅ។ កម្រិតនៃការកើនឡើង នៃឧស្ម័ននីមួយៗ មានលើសកម្រិតកើនជាមធ្យម ក្នុងរវាង ឆ្នាំ ២០១១-២០២០។ ការចុះថយខ្លាំងនៃសកម្មភាពសេដ្ឋកិច្ច ដោយសារតែវិបត្តិកូវីដ១៩ ក្នុងឆ្នាំកន្លងទៅ មិនបានជះឥទ្ធិពលទាល់តែសោះ ទៅលើកម្រិតឧស្ម័នផ្ទះកញ្ចក់។ អង្គការនេះ បានទាញសញ្ញាអាសន្នថា បើមនុស្សលោក នៅតែប្រើប្រាស់ ថាមពលដើរដោយចំហេះហ្វូស៊ីល ដោយមិនបង្អង់ដៃទេនោះ នោះសីតុណ្ហភាពផែនដី នឹងឡើងកំដៅ យ៉ាងហោច៤°c បន្ថែមទៀត ពីនេះដល់ដំណាច់សតវត្សទី២១។
នៅចុងសប្តាហ៍នេះ សន្និសីទអន្តរជាតិស្តីពីអាកាសធាតុ នឹងចាប់ផ្តើមបើកនៅទីក្រុងGlasgow តំបន់អេកូស។ អង្គការសហប្រជាជាតិ បានសង្ឃឹម និងអំពាវនាវ ថាប្រទេសទាំងអស់នឹងរួមគ្នា យកឱកាសនេះ ដើម្បីបន្ថែមការប្រឹងប្រែង ក្នុងការកាត់បន្ថយការបញ្ចេញឧស្ម័នពុល។ តែយ៉ាងណាក៏ដោយ លោកស្រី Euan Nisbet អ្នកស្រាវជ្រាវនៅ Royal Holloway University of London បានលើកឡើងថា របាយការណ៍របស់អង្គការឧតុនិយមពិភពលោក បានបង្ហាញពីការដើរដល់ចំណុចគ្រោះថ្នាក់ ដែលគ្មានអ្វីទប់បានទៀតទេ។ មហន្តរាយកំពុងខិតជិតមកដល់ ហើយមនុស្សយើងបានត្រឹមតែស្រែក តែមិនអាចធ្វើអ្វីបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ