COP២៦៖ មេដឹកនាំពិភពលោកប្តេជ្ញាបញ្ចប់ការកាប់បំផ្លាញព្រៃឈើនៅឆ្នាំ ២០៣០
ចុះផ្សាយនៅថ្ងៃ៖
ស្តាប់ - ០៦:៤៩
ក្រោយជួបប្រជុំគ្នារយៈពេលពីរថ្ងៃនៅឯសន្និសីទអាកាសធាតុ COP២៦ ក្នុងទីក្រុង Glasgow មេដឹកនាំពិភពលោកគ្រោងនឹងប្រកាសការប្តេជ្ញារួមមួយនៅថ្ងៃអង្គារ ទី២ វិច្ឆិកានេះ។ ជាការប្តេជ្ញាទាក់ទងនឹងការផ្តល់ថវិការាប់ពាន់លានដុល្លារដើម្បីបញ្ចប់ការកាប់បំផ្លាញព្រៃឈើនៅឆ្នាំ ២០៣០។ នេះគឺជាដំណឹងដ៏ល្អមួយ ក៏ប៉ុន្តែសម្រាប់ក្រុមអ្នកការពារបរិស្ថានវិញ រង់ចាំដល់ឆ្នាំ ២០៣០គឺយូរពេកហើយ។
មេដឹកនាំពិភពលោកប្តេជ្ញាបញ្ចប់ការកាប់បំផ្លាញព្រៃឈើនៅឆ្នាំ២០៣០
បើយោងទៅតាមដ្ឋាភិបាលអង់គ្លេសដែលជាម្ចាស់ផ្ទះរៀបចំសន្និសីទអាកាសធាតុរបស់អង្គការសហប្រជាជាតិឬហៅកាត់ថា COP២៦ ការប្តេជាថែរក្សាការពារព្រៃឈើពីការកាប់បំផ្លាញគឺជាការសន្យាមូលមតិគ្នាក្នុងចំណោមមេដឹកនាំពិភពលោក។
ការប្តេជានេះត្រូវបានគាំទ្រដោយមូលនិធិសាធារណៈនិងឯកជនចំនួនប្រមាណជិត ២០ ពាន់លានដុល្លារ ហើយទទួលបានការគាំទ្រពីសំណាក់មេដឹកនាំជាង ១០០ ប្រទេស ដែលតំណាងឲ្យជាង ៨៥% នៃព្រៃឈើពិភពលោក រួមមានទាំងព្រៃទឹកភ្លៀងអាម៉ាហ្សូន ព្រៃភាគខាងជើងនៃប្រទេសកាណាដា និងព្រៃរនាម (ព្រៃអាងស្តុកទឹក) កុងហ្គោ។
នាយករដ្ឋមន្ត្រីអង់គ្លេសលោក បូរីស ចនសុនដែលជាប្រធានដឹកនាំកិច្ចប្រជុំកំពូល COP២៦ បាននិយាយថាកិច្ចព្រមព្រៀងស្តីពីការកាប់បំផ្លាញព្រៃឈើគឺជាចំណុចដ៏សំខាន់នាំពិភពលោកឲ្យដើរឈានឆ្ពោះទៅសម្រេចកម្មវត្ថុកំណត់ការឡើងកម្តៅផែនដីត្រឹមកម្រិត ១,៥ អង្សា។
ព្រៃឈើដែលជាសួតរបស់ភពផែនដីផ្តល់អត្ថប្រយោជន៍ច្រើនណាស់ វាជួយដល់សហគមន៍ ជួយទ្រទ្រង់ការចិញ្ចឹមជិវិត និងជួយដល់ការផ្តត់ផ្គង់ស្បៀង។ ក្រៅពីនេះព្រៃឈើគឺជាប្រភពដ៏សំខាន់ជួយស្រូបយកឧស្ម័នកាបូនិកដែលមនុស្សលោកបញ្ចេញចូលទៅក្នុងបរិយាកាស។ លោកនាយករដ្ឋមន្ត្រីអង់គ្លេសបានលើកឡើងថាព្រៃឈើពិតជាមានសារៈសំខាន់ណាស់សម្រាប់ការរស់រានមានជីវិតរបស់មនុស្សលោក។
ដូច្នោះហើយ តាមរយៈកិច្ចព្រមព្រៀងប្រកបដោយមហិច្ឆតាថ្មីដែលគ្រោងនឹងប្រកាសនៅថ្ងៃអង្គារនេះ មេដឹកនាំពិភពលោក សង្ឈឹមថាការកាប់បំផ្លាញព្រៃឈើនឹងអាចបញ្ចប់បាននៅឆ្នាំ ២០៣០។ ហើយនៅពេលដែលព្រៃត្រូវបានថែរក្សាគង់វង្ស នោះគេក៏សង្ឈឹមដែរថាកម្មវត្ថកំណត់សីតុណ្ហភាពមធ្យមលើភពផែនត្រឹមកម្រិត ១,៥ អង្សានឹងអាចសម្រេចទៅរួចដូចគ្នា។
១០ ឆ្នាំទៀត
គួររំឭកថានៅក្នុងកិច្ចប្រជុំអាកាសធាតុរបស់អង្គការសហប្រជាជាតិក្នុងទីក្រុង ញូវយ៉ក កាលពីឆ្នាំ ២០១៤ មេដឹកនាំពិភពលោកក៏ធ្លាប់បានប្រកាសប្តេជ្ញាស្រដៀងគ្នានេះដែរ ថានឹងទប់ស្កាត់ការកាប់បំផ្លាញព្រៃឈើនៅឆ្នាំ២០២០។
ក៏ប៉ុន្តែ ព្រៃឈើជាច្រើននៅតែត្រូវបានគេកាប់បំផ្លាញជាពិសេសនៅតំបន់អាម៉ាហ្សូន ក្រោមការដឹកនាំរបស់រដ្ឋាភិបាលស្តាំនិយមនៃប្រធានាធិបតីប្រេស៊ីលលោកហ្សាអៀរ បុលសូណារ៉ូ។
រហូតមកទល់ពេលនេះ មនុស្សលោកបានកាប់បំផ្លាញព្រៃឈើដែលមាននៅលើភពផែនដីអស់ប្រមាណជាពាក់កណ្តាលទៅហើយ។ សកម្មភាពបែបនេះបាននឹងកំពុងធ្វើឲ្យវិបត្តិអាកាសធាតុកាន់តែធ្លាក់ចុះដុនដាបថែមមួយកម្រិតទៀត។
Greenpeace ដែលអង្គការបណ្តាញយុទ្ធនាការសកល និងឯករាជ្យដើម្បីបរិស្ថានបានរិះគន់មេដឹកនាំពិភពលោកដែលមិនអាចបិទបញ្ចប់ការកាប់បំផ្លាញព្រៃឈើបាននៅឆ្នាំ ២០២០ និងបានពន្យារពេល ១០ ឆ្នាំទៀត ពោលគឺរហូតដល់ឆ្នាំ ២០៣០។
នាយកប្រតិបត្តិអង្គការ Greenpeace ប្រេស៊ីលលោកស្រី Carolina Pasquali បានមានប្រសាសន៍ថាជនជាតិដើមភាគតិចកំពុងអំពាវនាវមានការការពារព្រៃអាម៉ាហ្សូនឲ្យបាន ៨០% នៅត្រឹមឆ្នាំ ២០២៥។ អ្វីដែលជនជាតិដើមភាគតិច ចង់បានគឺជារឿងត្រឹមត្រូវ និងជាអ្វីដែលគេត្រូវការ។ លោកស្រី Carolina Pasquali បញ្ជាក់បន្ថែម។
ជារួមមកអង្គការសមាគមន៍ជាច្រើន បារម្ភខ្លាចមេដឹកនាំពិភពលោកមិនអាចធ្វើតាមការសន្យាជាថ្មីទៀត និងអាចពន្យាពេលជាលើកទី២ ដូច្នោះពួកគេចង់ឃើញការបញ្ចប់ការកាប់ព្រៃឈើធ្វើឡើងឲ្យបានមុនឆ្នាំ ២០៣០។
ទាក់ទងចំណុចនេះ គួរបញ្ជាក់ជូនដែរថា ប្រទេសហត្ថលេខីដែលត្រូវបានជ្រើសរើសឲ្យពន្លឿនយុទ្ធនាការទប់ស្កាត់កាប់បំផ្លាញព្រៃឈើក្នុងទឹកដីរបស់ពួកគេរួមមាន ប្រទេសប្រេស៊ីល រុស្ស៊ី សហរដ្ឋអាមេរិក ចិន បារាំង និងអូស្ត្រាលី។
ឥណ្ឌាកំណត់គោលដៅអព្យាក្រឹតកាបោននៅឆ្នាំ ២០៧០
នាយករដ្ឋមន្ត្រីឥណ្ឌាលោកណារិនដ្រា ម៉ូឌី បានប្រកាសកាលពីថ្ងៃចន្ទម្សិលមិញនៅឯកិច្ចប្រជុំអាកាសធាតុ COP២៦ នៅទីក្រុង Glasgow ពីគោលដៅកំណត់អព្យាក្រឹតកាបូននៅឆ្នាំ ២០៧០។
ការប្តេជ្ញាឥណ្ឌាគឺជាអ្វីដែលគេទន្ទឹងរង់ចាំយ៉ាងអន្ទះសារ ព្រោះថាប្រទេសយក្សអាស៊ីខាងត្បូងមួយនេះគឺជាអ្នកបញ្ចេញឧស្ម័នផ្ទះកញ្ចក់ធំជាងគេទីបួននៅពីក្រោយប្រទេសចិន សហរដ្ឋអាមេរិក និងសហភាពអឺរ៉ុប។
ទន្ទឹមនេះលោកនាយករដ្ឋមន្ត្រីឥណ្ឌាបានបញ្ជាក់យ៉ាងច្បាស់ថា ការសន្យាកាត់បន្ថយការបំភាយឧស្ម័នពីសំណាក់ប្រទេសឥណ្ឌា និងប្រទេសកំពុងអភិវឌ្ឍន៍ផ្សេងទៀតនឹងត្រូវការជាចាំបាច់ជំនួយហិរញ្ញវត្ថុពីប្រទេសអ្នកមានដែលជាអ្នកបានបញ្ចេញឧស្ម័នផ្ទះកញ្ចក់ជាច្រើន។
ដោយឡែក រដ្ឋាភិបាលនៃប្រទេសប្រេស៊ីលដែលធ្លាប់ទទួលរងការរិះគន់យ៉ាងខ្លាំងចំពោះគោលនយោបាយបរិស្ថានរបស់ខ្លួន ក៏បានប្រកាសកាលពីថ្ងៃចន្ទដូចគ្នាដែរអំពីការកាត់បន្ថយការការបំភាយឧស្ម័នផ្ទះកញ្ចក់។
កាលពីម្សិលមិញនេះ ប្រេស៊ីលបានប្រកាសថាខ្លួននឹងកាត់បន្ថយការបំភាយឧស្ម័នផ្ទះកញ្ចក់កម្រិត ២០០៥ (2005-Level) ឲ្យមានពាក់កណ្តាលនៅឆ្នាំ ២០៣០ ពោលគឺកើនឡើងពីការសន្យាពីលើកមុនដែលមានចំនួន ៤៣%។ ក្រៅពីនេះ ប្រទេសប្រេស៊ីលក៏បានបង្ហាញពីចេតនាចង់សម្រេចបាននូវអព្យាក្រឹតកាបោននាឆ្នាំ ២០៥០ខាងមុខផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ