មេដឹកនាំហ្សេ២០នៅតែខ្វែងគំនិតគ្នាពាក់ព័ន្ធសំណុំរឿងអាកាសធាតុ
ចុះផ្សាយនៅថ្ងៃ៖
ស្តាប់ - ០៦:៥១
មេដឹកនាំក្រុមប្រទេសសេដ្ឋកិច្ចនាំមុនគេហ្សេ២០ កាលពីថ្ងៃសៅរ៍ ៣០ តុលាម្សិលមិញបានសម្រេចមូលមិតគ្នាស្តីពីការយកពន្ធលើក្រុមហ៊ុនពហុជាតិ។ ក៏ប៉ុន្តែទាក់ទងបញ្ហាអាកាសធាតុវិញ មេដឹកនាំហ្សេ២០ តែនៅខ្វែងគំនិតគ្នា និងមិនទាន់អាចឈានដល់កិច្ចព្រមព្រៀងរួមបានឡើយ។ តើជំនួបហ្សេ២០ សម្រេចអ្វីខ្លះទាក់ទងនឹងការយកពន្ធពីក្រុមហ៊ុនពហុជាតិ? ហេតុអ្វីមេដឹកនាំហ្សេ២០នៅតែខ្វែងគំនិតគ្នាជុំវិញសំណុំរឿងអាកាសធាតុ?
កិច្ចព្រមព្រៀងស្តីអំពីការយកពន្ធលើក្រុមហ៊ុនពហុជាតិ
ជំនួបកំពូលនៃក្រុមប្រទេសសេដ្ឋកិច្ចនាំមុខគេឬហៅកាត់ថាហ្សេ២០ ប្រព្រឹត្តធ្វើទៅរយៈពេលពីរថ្ងៃនៅក្នុងទីក្រុងរ៉ូមប្រទេសអ៊ីតាលីដោយចាប់ផ្តើមពីសៅរ៍ ទី៣០ តុលាម្សិលមិញនិងត្រូវបញ្ចប់នៅថ្ងៃអាទិត្យនេះ។
កាលពីថ្ងៃសៅរ៍ម្សិលមិញ ក្រោយជួបពិភាក្សាគ្នា មេដឹកនាំហ្សេ២០ បានចេញសេចក្តីប្រកាសដំបូងដ៏សំខាន់មួយអំពីការអនុម័តលើកិច្ចព្រមព្រៀងជាប្រវត្តិសាស្ត្រដែលតម្រូវឲ្យក្រុមហ៊ុនពហុជាតិត្រូវជាប់ពន្ធអប្បបរមាចំនួន ១៥%។ តាមការគ្រោង ប្រព័ន្ធពន្ធសកលដែលទើបប្រកាសនេះនឹងចូលជាធរមាននៅឆ្នាំ ២០២៣។
កំណែទម្រង់ពន្ធថ្មីនឹងជួយឲ្យប្រទេសនានាទទួលបានចំណែកនៃពន្ធលើប្រាក់ចំណេញដែលក្រុមហ៊ុនពហុជាតិទទួលបាននៅក្នុងប្រទេសរបស់ពួកគេ។ ជាមួយគ្នានេះ គេសង្ឃឹមដែរថាកំណែទម្រង់ប្រព័ន្ធពន្ធនឹងជួយធ្វើឲ្យការយកពន្ធ ពីក្រុមហ៊ុនធំៗ មានយុត្តិធម៌ជាងមុន និងរារាំងបណ្តាប្រទេសនានា ពីការប្រកួតប្រជែងក្នុងការផ្តល់អត្រាពន្ធទាបបំផុតដើម្បីទាក់ទាញការវិនិយោគ ដែលជារឿយៗធ្វើឲ្យក្រុមហ៊ុនធំៗជាច្រើនបង់ពន្ធក្នុងកម្រិតមួយទាប។
នៅត្រង់ចំណុចនេះ គួរបញ្ជាក់ថាផែនការកំណែទម្រង់ប្រព័ន្ធពន្ធសកលដែលគាំទ្ររួចទៅហើយដោយប្រទេសជិត ១៤០នេះ មានក៏មានទិសដៅឈានទៅបិទបញ្ចប់ដែរការអនុវត្តរបស់ក្រុមហ៊ុនធំៗដូចជា Apple និង Google parent Alphabet ដែលជ្រកកោនស្វែងរកប្រាក់ចំណេញនៅក្នុងប្រទេសដែលមានពន្ធទាប។
មេដឹកនាំហ្សេ២០ និយាយមិនទាន់ត្រូវគ្នាពាក់ព័ន្ធសំណុំរឿងអាកាសធាតុ
មេដឹកនាំហ្សេ២០ បានសម្រេចមូលមតិគ្នាជាប្រវត្តិសាស្រ្តលើការយកពន្ធលើក្រុមហ៊ុនពហុជាតិ ក៏ប៉ុន្តែនៅមិនទាន់មានការឯកភាពគ្នាណាមួយស្តីអំពីកម្មវត្ថុអាកាសធាតុលេចចេញជារូបរាងឡើយនៅឯជំនួបហ្សេ ២០។
មេដឹកនាំប្រទេសសេដ្ឋកិច្ចនាំមុខហ្សេ២០ កំពុងស្ថិតក្រោមសម្ពាធក្នុងការបញ្ជាក់ពីការប្តេជ្ញាចិត្តរួមរបស់ពួកគេដើម្បីបុព្វហេតុអាកាសធាតុ ជាពិសេសនៅមុនសន្និសីទអន្តរជាតិអាកាសធាតុ COP26 របស់អង្គការសហប្រជាជាតិដែលនឹងចាប់បើកនៅទីក្រុង Glasgow នាថ្ងៃអាទិត្យនេះហើយដែរ។
ម្ចាស់ផ្ទះរៀបចំជំនួបកំពូលគឺប្រទេសអ៊ីតាលី កំពុងជំរុញប្រទេសសេដ្ឋកិច្ចនាំមុខហ្សេ២០ ឲ្យរួមកម្លាំងគ្នាគាំទ្រគោលដៅរបស់អង្គការសហប្រជាជាតិក្នុងការកំណត់ការឡើងកំដៅផែនដីត្រឹមកម្រិត ១,៥ អង្សា។ នេះគឺជាកម្មវត្ថុមួយដែលមានចែងនៅក្នុងកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥។
នៅមុនកិច្ចពិភាក្សាបិទទ្វាររយៈពេលពីរថ្ងៃ នាយករដ្ឋមន្ត្រីអ៊ីតាលី លោក Mario Draghi បានប្រាប់មេដឹកនាំហ្សេ ២០ ថា មិនថាតែវិបត្តិជំងឺរាតត្បាតកូវីដ ការប្រែប្រួលអាកាសធាតុ រហូតដល់ការបង់ពន្ធដោយយុត្តិធម៌ និងសមធម៌ គេមិនអាចដោះស្រាយបញ្ហាណាមួយបានឡើយ ប្រសិនបើគ្មានការចូលរួមពីអ្នកគ្រប់គ្នាពីក្រុមប្រទេសហ្សេង២០ទាំងអស់ទេនោះ។
ក៏ប៉ុន្តែ សមាជិកក្រុមប្រទេសហ្សេ ២០ ជាច្រើន ដែលស្ថិតនៅក្នុងដំណាក់កាលផ្សេងៗគ្នា នៃការអភិវឌ្ឍន៍សេដ្ឋកិច្ចនៅតែមានការខ្វែងគំនិតគ្នា លើគោលដៅសំខាន់ទាក់ទងការកាត់បន្ថយការបំភាយឧស្ម័នផ្ទះកញ្ចក់ឲ្យដល់សូន្យនៅឆ្នាំ ២០៥០។
សមាជិកក្រុមប្រទេសហ្សេ២០ ដែលរួមមានចិន អាមេរិក ឥណ្ឌា សហភាពអឺរ៉ុប និងរុស្ស៊ី តំណាងឲ្យប្រមាណជា ៨០% នៃផលិតផលក្នុងស្រុកសរុបរបស់ពិភពលោក ហើយការបំភាយឧស្ម័នផ្ទះកញ្ចក់មានចំនួនជិត ៨០ %ឯណោះនៅក្នុងប្រទេសទាំងនោះ។
ដូច្នោះហើយ បើប្រទេសធំៗទាំងនោះនៅតែខ្វែងគំនិតគ្នា នៅតែនិយាយរុញដាក់គ្នាទៅវិញទៅមកថាអ្នកណាគួរធ្វើសកម្មភាពនេះ ឬសកម្មភាពនោះបន្ថែមដើម្បីបុព្វហេតុអាកាសធាតុ នោះមានន័យថាផ្លូវដើរទៅរកច្រកដោះស្រាយវិបត្តិអាកាសធាតុកំពុងជួបឧបសគ្គធំហើយ។
ការទទួលបានវ៉ាក់សាំងប្រឆាំងកូវីដ១៩មិនភាពស្មើភាពគ្នា
ការទទួលបានវ៉ាក់សាំងមិនស្មើភាពគ្នា គឺជាប្រធានបទសំខាន់មួយដែរនៅក្នុងជំនួបកំពូលហ្សេ២០ នាពេលនេះ។ នៅក្នុងពេលបញ្ចេញមតិយោបល់ទៅកាន់អង្គប្រជុំតាមវីដេអូអនឡាញពីចម្ងាយ ទាំងលោកប្រធានាធិបតីចិនស៊ី ជីនពីង និងមេដឹកនាំរុស្ស៊ី វ្ល៉ាឌីមៀរ ពូទីន បានលើកឡើងពីបញ្ហានៃការចែកចាយវ៉ាក់សាំងសកលមិនស្មើគ្នា។
លោកពូទីន កន្លងមកធ្លាប់បានរិះគន់ការមិនស្មើគ្នាភាព ការប្រកួតប្រជែងមិនស្មោះត្រង់ ការការពារនិយម និងការមិនទទួលស្គាល់វ៉ាក់សាំងនិងបណ្ណរចាក់វ៉ាក់សាំងរបស់គ្នាទៅវិញទៅមកក្នុងចំណោមប្រទេសហ្សេ២០មួយចំនួន។
គេមិនរំពឹងទេថានឹងមានការព្រមព្រៀងមូលមតិគ្នាទាក់ទងនឹងវិសមភាពនៃការទទួលបានវ៉ាក់សាំងប្រឆាំងកូវីដ១៩ រវាងប្រទេសអ្នកមាន និងប្រទេសអ្នកក្រ។ ក៏ប៉ុន្តែនាយករដ្ឋមន្ត្រីអ៊ីតាលីលោក Draghi បានជំរុញឲ្យប្រទេសដៃគូទាំងអស់ប្រឹងប្រែងធ្វើអ្វីដែលខ្លួនអាចធ្វើទៅបានដើម្បីសម្រេចគោលដៅរបស់អង្គការសុខភាពពិភពលោក ក្នុងការចាក់វ៉ាក់សាំងជូនប្រជាជននៅទូទាំងពិភពលោកឲ្យបាន ៧០% នៅពាក់កណ្តាលឆ្នាំ ២០២២។ បើតាមទីភ្នាក់សារព័ត៌មានបារាំង AFP គ្រប់មេដឹកនាំនៃប្រទេសមានសេដ្ឋកិច្ចនាំមុខគេហ្សេ២០ សុទ្ធតែបានយល់ព្រមចូលរួមជួយឲ្យគោលដៅនេះសម្រេចទៅបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ