បញ្ហាសេដ្ឋកិច្ចចិនបង្កជាក្តីបារម្ភដល់កំណើនសេដ្ឋកិច្ចសកល
ចុះផ្សាយនៅថ្ងៃ៖
ស្តាប់ - ០៧:០៧
ការធ្លាក់ចុះនៃកំណើនសេដ្ឋកិច្ចចិនបង្កឡើងដោយកង្វះខាតថាមពល និងវិបត្តិទីផ្សារអចលនទ្រព្យ កំពុងតែធ្វើឲ្យគេព្រួយបារម្ភពីសេដ្ឋកិច្ចពិភពលោកទាំងមូល។ ក្រុមសេដ្ឋវិទូបានចាប់ផ្តើមចោទសួរពីផលប៉ះពាល់របស់បញ្ហាសេដ្ឋកិច្ចចិនទៅលើកំណើននៃសេដ្ឋកិច្ចសកល។ សេដ្ឋកិច្ចសកលដែលត្រូវបានជួយយឹតយោងនិងជំរុញដោយកំណើនសេដ្ឋកិច្ចចិនអស់រយៈពេលជាង ២០ឆ្នាំមកហើយ។ ហេតុអ្វីបានជាកំណើនសេដ្ឋកិច្ចរបស់ចិនធ្លាក់ចុះ? តើបញ្ហាសេដ្ឋកិច្ចចិន អាចនឹងជះចេញជាផលវិបាកអ្វីខ្លះ?
កំណើនផលិតផលក្នុងស្រុកសរុបរបស់ចិនសម្រាប់ត្រីមាសទីមួយនៃឆ្នាំ ២០២១នេះ បានកើនឡើងដល់ ១៨,៣%។ តួលេខនេះធ្លាក់ចុះមកនៅត្រឹម ៧,៩% សម្រាប់ត្រីមាសទីពីរ ហើយធ្លាក់ដល់ ៤,៩% សម្រាប់ត្រីមាសទីបី។
មូលហេតុដែលបណ្តាលឲ្យកំណើនសេដ្ឋកិច្ចចិនធ្លាក់ចុះ
មានបញ្ហាធំៗចំនួនបីដែលបានរួមចំណែកធ្វើឲ្យកំណើនសេដ្ឋកិច្ចចិនចុះខ្សោយហើយដើរយឺតជាងមុន។ ទី១៖ វិបត្តិជំងឺកូវីដ១៩ ទី២៖ វិបត្តិថាមពល និងចុងក្រោយគេគឺបញ្ហានៅក្នុងវិស័យអចលនទ្រព្យ។
ដោយសារតែការផ្ទុះឡើងមកវិញនៃជំងឺកូវីដ១៩ រដ្ឋាភិបាលទីក្រុងប៉េកាំងបានដាក់ចេញនូវគោលដៅប្រកបដោយមហិច្ឆតាដែលគេស្គាល់ឈ្មោះថា “ហ្សេរ៉ូកូវីដ” ដោយអនុវត្តនូវវិធានការរឹតបន្តឹងនានាដូចជាបិទខ្ទប់តំបន់ជាច្រើននៅក្នុងប្រទេសជាដើម។ វិធានការរឹតត្បិតក្នុងការកម្ចាត់ជំងឺកូវីដ១៩របស់អាជ្ញាធរចិនបានធ្វើឲ្យសកម្មភាពសេដ្ឋកិច្ចត្រួវជួបភាពរអាក់រអួលខ្លះ លែងអាចដំណើររលូនល្អដូចធម្មតាបាន។
មួយវិញទៀត សម្រាប់ចិន ថាមពលគឺជាប្រភពធនធានមិនអាចខ្វះបានឡើយសម្រាប់ចិញ្ចឹមបំពេញបំប៉នកំណើនសេដ្ឋកិច្ច។ នៅក្នុងខែតុលាកន្លងទៅ មានតំបន់ក្នុងប្រទេសចិនជាច្រើនត្រូវរងនូវបញ្ហាដាច់ភ្លើងគ្មានអគ្គិសនីប្រើប្រាស់ ដោយសារតែរោងចក្រអគ្គិសនីគ្មានធ្យូងថ្មគ្រប់គ្រាន់។ កង្វះថាមពលអគ្គិសនីបានជះផលវិបាកធ្ងន់ធ្ងន់ដល់វិស័យសេដ្ឋកិច្ចរបស់ចិនដែលជាមហាអំណាចសេដ្ឋកិច្ចទី២របស់ពិភពលោក។
បន្ថែមលើនេះ បញ្ហាធ្លាក់ចុះនៃការសាងសង់ក្នុងវិស័យអចលទ្រព្យក៏ជាកត្តារួមចំណែកដ៏ចំបងដែលជះផលអាក្រក់ដល់សេដ្ឋកិច្ចចិន។ ភាពលំបាកនៃវិស័យអចលនទ្រព្យនៅក្នុងប្រទេសចិនដែលបង្កឡើងដោយវិបត្តិបំណុលរបស់ក្រុមហ៊ុនអចលទ្រព្យយក្ស Evergrande បានបង្កជាហានិភ័យដល់កំណើនសេដ្ឋកិច្ចិន ហើយហានិភ័យនេះក៏អាចនឹងឆ្លងរាលដាលចូលដល់សេដ្ឋកិច្ចរបស់ពិភពលោកយើងទាំងមូលដែរ។
បញ្ហារបស់ក្រុមហ៊ុន Evergrande បង្កជាផលវិបាកខ្លាំងដល់សេដ្ឋកិច្ចចិន?
Evergrande ដែលត្រូវបានបង្កើតឡើងក្នុងឆ្នាំ ១៩៩៦ គឺជាក្រុមហ៊ុនអចលនទ្រព្យដ៏ធំបំផុតមួយរបស់ចិន ហើយបើតាមការប៉ាន់ស្មានរបស់ក្រុមអ្នកជំនាញ ទំហំទ្រព្យសកម្មរបស់ក្រុមហ៊ុនយក្សនេះមានតម្លៃរហូតដល់ទៅប្រមាណជា ២៦០ ពាន់លានដុល្លារ។
ក្រុមហ៊ុន Evergrande ផ្តល់ការងារដល់មនុស្សប្រមាណ ២សែននាក់ និងបង្កើតការងារដោយប្រយោលចំនួន ៣លាន ៨ សែននៅក្នុងប្រទេសចិន។ ក៏ប៉ុន្តែនៅមួយរយៈចុងក្រោយនេះការរកស៊ីរបស់ក្រុមហ៊ុនបានជួបឧបសគ្គច្រើន។
អត្រាលក់ផ្ទះ-អាផាតមិន របស់ក្រុមហ៊ុនធ្លាក់ចុះជាខ្លាំង ហើយស្ថានភាពហិរញ្ញវត្ថុរបស់ Evergrande ក៏បានធ្លាក់ក្នុងសភាពដុនដាបដែរ។ Evergrande បានក្លាយជាក្រុមហ៊ុនជាប់បំណុលដ៏ច្រើនបំផុតមួយក្នុងលោក ពោលគឺមានបំណុលសរុបដល់ទៅជាង ៣០០ ពាន់លានដុល្លារ។
ស្ថានភាពហិរញ្ញវត្ថុរបស់ក្រុមហ៊ុនអចលនទ្រព្យដ៏ធំដូចជា Evergrande ត្រូវបានគេពិនិត្យតាមដានយ៉ាងយកចិត្តទុកដាក់ជាទីផុតពីព្រោះថាការដួលរលំរបស់ក្រុមហ៊ុននេះនឹងជះផលប៉ះពាល់យ៉ាងធ្ងន់ធ្ងរដល់កំណើននៃសេដ្ឋកិច្ចរបស់មហាយក្សចិន។
វិស័យអចលនទ្រព្យគឺជាក្បាលម៉ាស៊ីនដ៏សំខាន់មួយចំពោះសេដ្ឋកិច្ចចិន ហើយវាបានដើរតួនាទីយ៉ាងសំខាន់ក្នុងការជួយឲ្យសេដ្ឋកច្ចចិនងើបឡើងវិញក្រោយវិបត្តិជំងឺកូវីដធ្ងន់ធ្ងរ។ បើតាមអ្នកជំនាញ វិស័យអចលនទ្រព្យតំណាងឲ្យ ២៥-៣០ % នៃផលិតផលក្នុងស្រុកសរុបរបស់ប្រទេសចិន។ នៅក្នុងត្រីមាសទីបីនៃឆ្នាំ ២០២១នេះ ផលិតផលក្នុងស្រុកសរុបរបស់ចិនដែលទទួលរងពីវិបត្តិ Evergrande បានកើនឡើងចំនួន ៤,៩%។ អត្រានេះធ្លាក់ចុះពីចំនួន ៧,៩% នៅក្នុងត្រីមាសទីពីរ និងធ្លាក់ចុះពី ១៨,៣% សម្រាប់ត្រីមាសទីមួយក្នុងឆ្នាំ២០២១ដូចគ្នា ដូចបានរៀបរាប់ខាងលើ។
វិបត្តិសេដ្ឋកិច្ចចិនបង្កជាហានិភ័យដល់កំណើនសេដ្ឋកិច្ចពិភពលោក?
ការធ្លាក់ចុះនៃកំណើនសេដ្ឋកិច្ចចិន ជាពិសេសបង្កឡើងដោយវិបត្តិទីផ្សារអចលនទ្រព្យ កំពុងតែធ្វើឲ្យគេព្រួយបារម្ភដែរពីកំណើនសេដ្ឋកិច្ចពិភពលោកទាំងមូល។ សេដ្ឋកិច្ចពិភពលោកដែលត្រូវបានជួយជំរុញដោយកំណើនសេដ្ឋកិច្ចចិន អស់រយៈពេលជាង ២០ ឆ្នាំមកហើយ។
ស្ថានភាពលំបាករបស់វិស័យអចលនទ្រព្យនៅចិនដែលបង្កឡើងដោយបញ្ហាបំណុលរបស់ក្រុមហ៊ុនយក្ស Evergrande អាចបង្កជាហានិភ័យដល់សេដ្ឋកិច្ចពិភពលោក និងប៉ះពាល់ដល់សហរដ្ឋអាមេរិកដូចគ្នា។ នេះគឺជាការព្រមានរបស់ធនាគារកណ្តាលអាមេរិកនៅក្នុងរបាយការណ៍របស់ខ្លួនមួយស្តីពីស្ថិរភាពហិរញ្ញវត្ថុដែលទើបបានចេញផ្សាយកាលពីថ្ងៃចន្ទដើមសប្តាហ៍។
ការទាញជាសញ្ញាអាសន្នខាងលើគឺការផ្លាស់ប្តូរដ៏គួរឲ្យកត់សម្គាល់មួយ ពីព្រោះថាកាលខែកញ្ញាកន្លងទៅ ប្រធានធនាគារកណ្តាលអាមេរិកលោក Jerome Powell ធ្លាប់បានអះអាងពីការជឿជាក់របស់លោកថាសេដ្ឋកិច្ចអាមេរិកដែលជាសេដ្ឋកិច្ចដ៏ធំជាងគេរបស់ពិភពលោកនឹងមិនត្រូវបានប៉ះពាល់ដោយផ្ទាល់ទៅនឹងបញ្ហាដែលកើតឡើងនៅក្នុងប្រទេសចិនឡើយ។
ទាក់ទងរឿងនេះ លោក Gregory Daco អ្នកជំនាញផ្នែកសេដ្ឋកិច្ចនៅសាកលវិទ្យាល័យ Oxford បានមានប្រសាសន៍ថាការធ្លាក់ចុះនៃកំណើនសេដ្ឋកិច្ចប្រទេសចិនតំណាងឲ្យការបាត់បង់ប្រភពនៃថាមពលសម្រាប់សេដ្ឋកិច្ចពិភពលោក។
តែយ៉ាងណាក៏ដោយ សេដ្ឋវិទូរូបនេះបានកត់សម្គាល់ដែរថាថាមវន្តឬភាពស្វាហាប់នៃសេដ្ឋកិច្ចពិភពលោកនៅតែមានអំណោយផលសម្រាប់ពេលនេះ ជាពិសេសចាប់តាំងពីបញ្ហាសេដ្ឋចិននៅចិនត្រូវបានទូទាត់សងជំនួសមកវិញដោយកំណើនសេដ្ឋកិច្ចដ៏រឹងមាំនៅក្នុងសហរដ្ឋអាមេរិក និងនៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ