ចិនសន្យាពន្លឿនគំរូអភិវឌ្ឍសេដ្ឋកិច្ចថ្មី នៅចំពោះមុខអង្គការពាណិជ្ជកម្មពិភពលោក
នៅថ្ងៃពុធទី ២០តុលា ២០២១ នាឱកាសជួបបង្ហាញផែនការពាណិជ្ជកម្មនៅចំពោះមុខអង្គការពាណិជ្ជកម្មពិភពលោក ចិនបានសន្យាពន្លឿនគំរូអភិវឌ្ឍសេដ្ឋកិច្ច ដោយរំពឹងលើទីផ្សារក្នុងស្រុក តែបើកចំហទីផ្សារនៅអន្តរជាតិឱ្យបានធំជាងមុន។ ការបង្ហាញផែនការពាណិជ្ជកម្មនេះ មានទម្រង់វិញ្ញាសាតេស្ត ដែលប្រទេសជាសមាជិកត្រូវឆ្លងកាត់ម្តងម្នាក់ៗ ជារឿយៗ ដោយបិទទ្វារ នៅចំពោះមុខអង្គការពាណិជ្ជកម្មពិភពលោក។
ចុះផ្សាយនៅថ្ងៃ៖
ស្តាប់ - ០២:១២
ក្នុងរបាយការណ៍ដែលអង្គការពាណិជ្ជកម្មពិភពលោកទទួលបាន និងបញ្ចេញមកផ្សព្វផ្សាយ ចិនបានលាតត្រដាងអំពីឆន្ទៈពន្លឿនកិច្ចខំប្រឹងប្រែងតាមគំរូអភិវឌ្ឍសេដ្ឋកិច្ចថ្មី ដែលរំពឹងលើចរាចរណ៍ទីផ្សារក្នុងស្រុក។ ប៉ុន្តែមិនមែនជាសេដ្ឋកិច្ចដែលវិលវល់តែក្នុងស្រុក គ្មានច្រកចេញឡើយ។ ចិននឹងប្រើអំណាចទីផ្សារនិងសេចក្តីត្រូវការក្នុងស្រុកឱ្យអស់លទ្ធភាព សម្រាប់ជាស្ពានចង់ភ្ជាប់ជាមួយទីផ្សារអន្តរជាតិ។ នៅពេលចិនអាចប្រើទីផ្សារក្នុងស្រុកបានប្រសើរឡើង នោះធនធានជាតិនិងអន្តរជាតិក៏បានប្រសើរឡើងដែរ ហើយអាចធានាការអភិវឌ្ឍលឿនខ្លាំងនិងជានិរន្តរ៍ទៀត។ នេះបើតាមខ្លឹមសារពន្យល់ក្នុងរបាយការណ៍។
ប៉េកាំងបានគូសបញ្ជាក់អំពីគម្រោងចង់បើកចំហទីផ្សារដ៏ធំរបស់ចិន ឱ្យបានពេញទំហឹង ដើម្បីបំពេញសេចក្តីត្រូវការដ៏សម្បើមរបស់ប្រជាពលរដ្ឋដល់ជិត១៤០០លាននាក់ ជាមួយកម្មវត្ថុប្រែក្លាយទីផ្សារចិន ទៅជាទីផ្សារពិភពលោក ចែករំលែកជូនគ្រប់គ្នា នរណាក៏អាចចូល នរណាក៏អាចមកបាន។ មិនតែប៉ុណ្ណោះចិននឹងដាក់ឱ្យដំណើរការនយោបាយនាំចូលសកម្ម ទៀត។
ស្តីពីបញ្ហាអាកាសធាតុវិញ របាយការណ៍មានបំពេញទៅដោយពាក្យប្តេជ្ញាចិត្តធ្វើអព្យាក្រិតកាបូននៅឆ្នាំ២០៦០ ដោយបញ្ចេញឧស្ម័នពុលខ្លាំងបំផុតត្រឹមឆ្នាំ២០៣០។ ហើយក្នុងនាមជាប្រទេសកំពុងអភិវឌ្ឍ ចិននឹងបន្តពង្រឹងពង្រីកកិច្ចសហប្រតិបត្តិការជាមួយក្រុមប្រទេសកំពុងអភិវឌ្ឍដូចគ្នា និងចូលរួមចំណែកលុបបំបាត់ភាពក្រីក្រ បន្ធូរបន្ថយបំណុល និងជួយឱ្យមានកំណើនសេដ្ឋកិច្ចក្នុងប្រទេសកំពុងលូតលាស់។
ជាចុងក្រោយ ចិនបានការពារនយោបាយពាណិជ្ជកម្មពហុជាតិ និងធានាបង្រួបបង្រួមកម្លាំងជាមួយសមាជិកអង្គការពាណិជ្ជកម្មដទៃទៀត ដើម្បីពិភពលោកមានលក្ខណៈពហុជាតិនិយម និងមានទស្សនៈវិស័យដូចគ្នានាពេលអនាគតដើម្បីមនុស្សជាតិទាំងមូល ព្រោះផែនដីមានតែមួយទេ អនាគតរួមក៏មានតែមួយដែរ។
នៅក្នុងជំនួបបង្ហាញផែនការពាណិជ្ជកម្មលើកមុន កាលពីឆ្នាំ២០១៨ សហរដ្ឋអាមេរិករបស់លោកដូណាល់ ត្រាំ បានបន្ទោសថាចិនបើកចំហទីផ្សារតិចតួចមិនគ្រប់គ្រាន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ