វ៉េណេស៊ុយអេឡា៖ហេតុអ្វីបានជាគណបក្សប្រឆាំងព្រមចូលរួមបោះឆ្នោត ក្រោយពីបានធ្វើពហិការតាំងពីឆ្នាំ ២០១៧?
ចុះផ្សាយនៅថ្ងៃ៖
ស្តាប់ - ០៦:៥៦
ថ្ងៃអាទិត្យ ទី២១ វិច្ឆិកា ប្រទេសវ៉េណេស៊ុយអេឡារៀបចំបោះឆ្នោតជ្រើសរើសក្រុមប្រឹក្សាឃុំសង្កាត់ ចៅហ្វាយក្រុង និងអភិបាលរដ្ឋ។ នៅក្នុងការបោះឆ្នោតនេះ រដ្ឋាភិបាលរបស់លោកប្រធានាធិបតីនីកូឡា ម៉ាឌូរ៉ូបានអនុញ្ញាតឲ្យមានការតាមដាន ឃ្លាំមើលពីក្រុមអ្នកសង្កេតការណ៍អន្តរជាតិ ពិសេសពីសហភាពអឺរ៉ុប។ ចំណែកគណបក្សប្រឆាំងដែលបានធ្វើពហិការមិនចូលរួមបោះឆ្នោតតាំងពីឆ្នាំ ២០១៧ ក៏បានសម្រេចចិត្តចូលរួមនៅក្នុងការបោះឆ្នោតលើកនេះ។ ការបោះឆ្នោតនេះបានធ្វើឡើង ខណៈដែលប្រទេសកំពុងមានវិបត្តិសេដ្ឋកិច្ច និងសង្គមធ្ងន់ធ្ងរ។
មានការកត់សម្គាល់សំខាន់ចំនួនពីរនៅក្នុងការបោះឆ្នោតនៅវ៉េណេស៊ុយអេឡាពេលនេះ ទី១ គឺការដែលប្រធានាធិបតីលោកនីកូឡា ម៉ាឌូរ៉ូយល់ព្រមឲ្យមានវត្តមានក្រុមអ្នកសង្កេតការណ៍អន្តរជាតិ ពិសេសក្រុមអ្នកសង្កេតការណ៍អឺរ៉ុប។ ចូរកុំភ្លេចថា នេះជាលើកទី១ គិតតាំងពី ១៥ឆ្នាំដែលសហភាពអឺរ៉ុបចូលរួមតាមដាន ឃ្លាំមើលការរៀបចំបោះឆ្នោតនៅវ៉េណេស៊ុយអេឡាការ។ ទី២ គឺការដែលគណបក្សប្រឆាំងសុខចិត្តចូលរួមនៅក្នុងការបោះឆ្នោត ក្រោយពីបានធ្វើពហិការអស់រយៈពេល ៤ឆ្នាំ ពិសេសការបោះឆ្នោតប្រធានាធិបតីកាលពីឆ្នាំ ២០១៨ និងការបោះឆ្នោតសភាកាលពីឆ្នាំ ២០២០។
តែគេមិនត្រូវភ្លេចនិយាយទេថា រូបភាពទាំងអស់នេះជាលទ្ធផលបានមកពីការធ្វើសម្បទានឲ្យគ្នាទៅវិញ ទៅមករវាងគណបក្សកាន់អំណាច និងគណបក្សប្រឆាំងនាកិច្ចចរចាក្នុងប្រទេសម៉ិចស៊ិកកាលពីខែកញ្ញាក្រោមការរៀបចំរបស់ប្រទេសន័រវែស។ នៅក្នុងកិច្ចចរចាកាលណោះ លោកម៉ាឌូរ៉ូយល់ព្រមធ្វើកំណែទម្រង់លើគណៈកម្មការរៀបចំបោះឆ្នោតដោយអនុញ្ញាតឲ្យមានទីប្រឹក្សាបោះឆ្នោតជាតិចំនួន ២នាក់ក្នុងចំណោម ៥នាក់មកពីគណបក្សប្រឆាំង និងយល់ព្រមឲ្យមានវត្តមានអ្នកសង្កេតការណ៍អន្តរជាតិ។ ជាថ្នូរត្រឡប់វិញ គណបក្សប្រឆាំងសុខចិត្តចូលរួមបោះឆ្នោតនៅពេលនេះ។
បើតាមមើលទៅ គណបក្សប្រឆាំងដែលកំពុងបន្តបែកបាក់គ្នា និងកំពុងពិបាកស្វែងរកឯកភាពគ្នាមានក្តីសង្ឃឹមតិចតួចណាស់នឹងឈ្នះគណបក្សកាន់អំណាចរបស់លោកម៉ាឌូរ៉ូ។ គួរបញ្ជាក់ថានៅក្នុងការបោះឆ្នោតពេលនេះ មានបេក្ខជនឈរឈ្មោះសរុបចំនួន ៧០ ០០០នាក់ ហើយពលរដ្ឋវ៉េណេស៊ុយអេឡាត្រូវជ្រើសរើសអភិបាលរដ្ឋចំនួន ២៣រូប រួមទាំងក្រុមប្រឹក្សាសម្រាប់ ៣៣៥ តំបន់នៅទូទាំងប្រទេស។
យុទ្ធសាស្រ្ត និងចក្ខុវិស័យសម្រាប់ឆ្នាំ ២០២៤
គណបក្សប្រឆាំងយល់មិនច្រឡំ និងបានដឹងខ្លួនរួចជាស្រេចថា ខ្លួនពិបាក និងមានសង្ឃឹមស្តួចស្តើងនៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ និងអភិបាលរដ្ឋពេលនេះ។ ពិបាក និងមានសង្ឃឹមស្តួចស្តើង ព្រោះពួកគេកំពុងបន្តបែកបាក់ និងមិនទាន់អាចឯកភាពគ្នាក្នុងការនិយាយសំឡេងតែមួយបាន។ នេះពិតជាអំណោយផលមួយល្អណាស់សម្រាប់គណបក្សកាន់អំណាចរបស់ប្រធានាធិបតីលោកនីកូឡា ម៉ាឌូរ៉ូ។ លោក Henrique Capriles បេក្ខជនម្នាក់មកពីគណបក្សប្រឆាំងបានទទួលស្គាល់ពេញមាត់ថា បើគ្មានការឯកភាពនៅផ្ទៃក្នុងបក្សប្រឆាំង គឺបក្សកាន់អំណាចនឹងឈ្នះ។
ចំណែកក្រុមអ្នកសង្កេតការណ៍បានមើលឃើញដូចគ្នាដោយអះអាងថា មានរដ្ឋយ៉ាងច្រើនបំផុតចំនួន ៦ ក្នុងចំណោម ២៣រដ្ឋដែលគណបក្សប្រឆាំងអាចទទួលបាន។ តែគោលដៅដែលគណបក្សប្រឆាំងបានសំឡឹងមើលតាមរយៈការចូលរួមបោះឆ្នោតពេលនេះ គឺការត្រៀមខ្លួនចូលរួមបោះឆ្នោតប្រធានាធិបតីនៅឆ្នាំ ២០២៤ ខាងមុខ។ សម្រាប់គណបក្សប្រឆាំង ការចូលរួមបោះឆ្នោតពេលនេះជាយុទ្ធសាស្រ្តថ្មីដើម្បីបើកផ្លូវឲ្យមានការត្រឡប់ចូលប្រឡូកក្នុងឆាកនយោបាយពេញមុខ ពេញមាត់ជាថ្មី ក្រោយពីបានធ្វើពហិការអស់រយៈពេល ៤ឆ្នាំ ពិសេសការបោះឆ្នោតប្រធានាធិបតីឆ្នាំ ២០១៨ និងការបោះឆ្នោតសភាឆ្នាំ ២០២០។
គណបក្សប្រឆាំងយល់មិនខុសទេថា ការបន្តនៅក្រៅឆាកនយោបាយនឹងបន្តធ្វើឲ្យពួកគេឯកោ និងបន្តទុកឲ្យគណបក្សកាន់អំណាចរបស់លោកប្រធានាធិបតីម៉ាឌូរ៉ូជិះសេះលែងដៃ។ តែក្នុងពេលជាមួយគ្នា លោកម៉ាឌូរ៉ូក៏ទទួលបានផលចំណេញនយោបាយពីការចូលរួមបោះឆ្នោតរបស់គណបក្សប្រឆាំងពេលនេះដែរ ពិសេសចំពេលដែលលោកម៉ាឌូរ៉ូកំពុងស្វែងរកការគាំទ្រពីសហគមន៍អន្តរជាតិ និងចង់ឃើញសហគមន៍អន្តរជាតិ រួមទាំងអាមេរិកលើកទណ្ឌកម្មសេដ្ឋកិច្ចចេញពីប្រទេសវិញ។
បោះឆ្នោត ឬមិនបោះឆ្នោតជាអាទិភាពទី២ របស់ប្រជាជនភាគច្រើន
ការរៀបចំបោះឆ្នោតពេលនេះធ្វើឡើងចំពេលដែលប្រទេសកំពុងមានវិបត្តិសេដ្ឋកិច្ច និងសង្គមធ្ងន់ធ្ងរ។ វិបត្តិមួយនេះជាលទ្ធផលបានមកពីការជាប់ទណ្ឌកម្មសេដ្ឋកិច្ចអន្តរជាតិ ពិសេសសហរដ្ឋអាមេរិក។ ចំណែកទណ្ឌកម្មសេដ្ឋកិច្ចអន្តរជាតិជាលទ្ធផលបានមកពីវិបត្តិនយោបាយផ្ទៃក្នុងដែលគណបក្សកាន់អំណាចបានសង្កត់ ក ក្រុមប្រឆាំងមកទល់សព្វថ្ងៃ។ ជាប្រទេសជង្រុកប្រេងមួយនៅអាមេរិកឡាទីន តែវ៉េណេស៊ុយអេឡាមិនអាចនាំប្រេងចេញ និងខ្វះប្រេងប្រើ។ ពិតណាស់ ដរាបណាស្ថានការណ៍ប្រទេសនៅបន្តដុនដាបដូចសព្វថ្ងៃ ប្រជាជនវ៉េណេស៊ុយអេឡាភាគច្រើនចង់ឲ្យមានការផ្លាស់ប្តូរ។
តែនៅម្ខាង ពួកគេហាក់មិនអាចបន្តទុកចិត្តលើសមត្ថភាពរបស់គណបក្សកាន់អំណាច និងនៅម្ខាងទៀត ពួកគេក៏ហាក់ពិបាកជឿទុកចិត្តលើគណបក្សប្រឆាំង។ នៅពេលដែលគេសួរពលរដ្ឋថា តើអ្វីទៅជាក្តីបារម្ភអាទិភាពរបស់ពួកគេ?។ ចម្លើយមានខុសគ្នាដែលខ្លះថា បញ្ហាក្រពះជាក្តីកង្វល់ធំជាងគេ ព្រោះទំនិញគ្រប់មុខឡើងថ្លៃខ្លាំងដែលគ្មានលុយទិញ និងខ្លះទៀតថា បញ្ហាសុខភាព និងសន្តិសុខជារឿងសំខាន់ ព្រោះជារៀងរាល់ថ្ងៃ មានការឆក់ លួចប្លន់ និងការស្លាប់ដោយគ្មានថវិកាទិញថ្នាំពេទ្យ។ សរុបមកវិញ ការបោះឆ្នោត ឬមិនបោះឆ្នោតគ្រាន់ជារឿងបន្ទាប់បន្សំប៉ុណ្ណោះសម្រាប់ប្រជាជនវ៉េណេស៊ុយអេឡាភាគច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ