វ៉េណេស៊ុយអេឡា៖សភាប្រកាសចាត់ទុកអាណត្តិថ្មីរបស់លោកនីកូឡា ម៉ាឌុយរ៉ូមិនស្របច្បាប់
នៅក្នុងប្រទេសវ៉េណេស៊ុយអេឡា សភាបានប្រកាសនៅថ្ងៃសៅរ៍ ទី៥ មករានាឱកាសជ្រើសតាំងប្រធានសភាថ្មីថា អាណត្តិថ្មីរបស់លោកប្រធានាធិបតីនីកូឡា ម៉ាឌុយរ៉ូមិនស្របច្បាប់ទេ។ មិនស្របច្បាប់ ព្រោះការបោះឆ្នោតក្នុងថ្ងៃទី២០ ឧសភាកន្លងទៅត្រូវបានក្រុមគណបក្សប្រឆាំងធ្វើពហិកា។ ការប្រកាសរបស់សភាវ៉េណេស៊ុយឡាពេលនេះបានធ្វើឡើង បន្ទាប់ពីបណ្តាប្រទេសក្នុងក្រុមលីម៉ាបានទាមទារឲ្យលោកម៉ាឌុយរ៉ូចុះចេញពីអំណាច។ តាមធម្មតា លោកនីកូឡា ម៉ាឌុយរ៉ូនឹងត្រូវស្បថចូលកាន់តំណែងអាណត្តិទី២ នៅថ្ងៃទី១០ មករា។ តែលោកល្វី ហ្លូរីដូ សមាជិកសភាវ៉េណេស៊ុយអេឡាបានបញ្ជាក់ច្បាស់ៗថា ចាប់ពីថ្ងៃទី១០ មករាទៅ លោកម៉ាឌុយរ៉ូនឹងលែងជាប្រធានាធិបតីទៀតឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
« ចាប់ពីថ្ងៃទី១០ មករាទៅ នីកូឡា ម៉ាឌុយរ៉ូនឹងលែងជាប្រធានាធិបតីទៀតឡើយ។ គេមិនអាចក្លាយជាប្រធានាធិបតីដោយដណ្តើមយកតែម្នាក់ឯងនោះទេ។ ការបោះឆ្នោតក្នុងថ្ងៃទី២០ ឧសភាមិនយុត្តិធម៌ មិនសេរី និងគ្មានការចូលរួមពីគ្រប់ភាគី។ គណបក្សផ្សេងមិនអាចចូលរួមនៅក្នុងការបោះឆ្នោតនោះឡើយ។ សហគមន៍អន្តរជាតិក៏មិនអាចចូលរួមត្រួតពិនិត្យនៅក្នុងការរៀបចំបោះឆ្នោតនោះដែរ។
ដូចដែលក្រុមលីម៉ាបានសេចក្តីថ្លែងការណ៍ក្នុងថ្ងៃសុក្រ ទី៤ មករារួចហើយ ការរៀបចំបោះឆ្នោតក្នុងថ្ងៃទី២០ ឧសភាមិនមែនជាការបោះឆ្នោតមួយដែលគ្រប់គ្នាចង់បាន និងរង់ចាំនោះទេ។ អ៊ីចឹងមានន័យថានៅថ្ងៃទី១០ មករាខាងមុខ វ៉េណេស៊ុយអេឡាអត់មានប្រធានាធិបតីឡើយ។ ដូច្នេះ តួនាទីមួយនេះនឹងត្រូវធានារាប់រងជាបណ្តោះអាសន្នដោយរដ្ឋសភាជាតិ។ រដ្ឋសភាត្រូវបង្កើតឲ្យមានលក្ខខណ្ឌចាំបាច់មួយចំនួនដើម្បីឲ្យមានរូបប្រធានាធិបតីម្នាក់ជាប់ឆ្នោតដោយពលរដ្ឋវ៉េណេស៊ុយអេឡា។
ដូច្នេះ ការងាររបស់យើងគឺនាំប្រទេសវ៉េណេស៊ុយអេឡាទៅរកការរៀបចំបោះឆ្នោតថ្មីយុត្តិធម៌ សេរី និងតម្លាភាព។ ខ្ញុំអាចធានាលោក អ្នកថា ព្រឹត្តិការណ៍នៅថ្ងៃខាងមុខនឹងអនុញ្ញាតឲ្យមានការរៀបចំនីតិវិធីបោះឆ្នោតមួយនេះ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ