បារាំងចរចាអស់១៣ឆ្នាំដើម្បីសម្រេចកិច្ចសន្យាមហាសាលលក់យន្តហោះចម្បាំងឲ្យអេមីរ៉ាតអារ៉ាប់រួម
ចុះផ្សាយនៅថ្ងៃ៖
ស្តាប់ - ០៨:១១
នៅតំបន់ឈូងសមុទ្រពែរ្ស ប្រធានាធិបតីបារាំង លោកអេម៉ានុយអែល ម៉ាក្រុងកំពុងផ្តើមទស្សនកិច្ចការទូត ប៉ុន្តែ ដែលបង្កប់ដោយកិច្ចសន្យាពាណិជ្ជកម្ម នៅថ្ងៃសុក្រទី៣ និងថ្ងៃសៅរ៍ទី ៤ធ្នូ។ នៅក្នុងទស្សនកិច្ច ២ថ្ងៃ ទៅកាន់ប្រទេសមហាសេដ្ឋីប្រេង នៅតំបន់ឈូងសមុទ្រពែរ្ស ដូចជា អេមីរ៉ាត អារ៉ាប់រួម កាតា និងអារ៉ាប៊ី សាអូឌីត ប្រធានាធិបតីបារាំង កំពុងរងការដាក់សម្ពាធផងដែរ ពីអង្គការការពារសិទ្ធិមនុស្ស ដែលបានទាមទារឲ្យបារាំង ប្រកាន់ជំហរ តឹងរ៉ឹង ថ្កោលទោសប្រទេសអារ៉ាប់ អ្នកមានទាំងបី ដែល ល្បីខាងរំលោភសិទ្ធិមនុស្ស។ តើប្រធានាធិបតី បារាំងជ្រើសរើសយកផ្លូវមួយណា? បារាំងដែលជាប្រទេសឲ្យតម្លៃលើការគោរពសិទ្ធិមនុស្ស នឹងសុខចិត្តនិយាយរិះគន់ការរំលោភសិទ្ធិមនុស្សនៅ ប្រទេសអេមីរ៉ាត អារ៉ាប់រួម កាតា និងអារ៉ាប៊ី សាអូឌីត ដោយសុខចិត្តលះបង់ចោលកិច្ចសន្យាពាណិជ្ជកម្មតម្លៃ រាប់ពាន់លានអឺរ៉ូ ដែរឬទេ?
ទស្សនកិច្ចរបស់ប្រធានាធិបតីបារាំង ទៅកាន់ប្រទេសសំខាន់បី នៃតំបន់ឈូងសមុទ្រពែរ្ស មានទិសដៅ ចូលរួមរក្សាស្ថិរភាព តាំងពីតំបន់មេឌីទែរ៉ាណេ រហូតដល់ឈូងសមុទ្រពែរ្ស។ នេះបើតាមសេចក្តីប្រកាសព័ត៌មានរបស់វិមានប្រធានាធិបតីបារាំង។ លោកម៉ាក្រុងធ្វើដំណើរទៅកាន់ប្រទេសអារ៉ាប់ទាំងបី អេមីរ៉ាត អារ៉ាប់រួម កាតា និងអារ៉ាប៊ី សាអូឌីត ដែលបារាំង ចាត់ទុកជាដៃគូសំខាន់ របស់បារាំង និងជាអ្នកដើរតួនាទីចាំបាច់ ក្នុងការដោះស្រាយបញ្ហា នៅតំបន់ដើមបូព៌ា។ តាមគម្រោង ប្រធានាធិបតី បារាំង ត្រូវជជែកជាមួយថ្នាក់ដឹកនាំរបស់ប្រទេសអារ៉ាប់ទាំងបី ពីយុទ្ធសាស្រ្តប្រយុទ្ធប្រឆាំងអំពើភេរវកម្ម ស្ថិរភាព និងសន្តិសុខក្នុងតំបន់ ពីបញ្ហានុយក្លេអ៊ែរអ៊ីរ៉ង់ វិបត្តិសេដ្ឋកិច្ចនៅលីបង់ និងបញ្ហានៅលីប៊ីជាដើម។
តាមវិមានប្រធានាធិបតីបារាំង ប្រទេសបារាំងប្រទេសមហាអំណាចដែលមានស្ថិរភាពនឹងន ជាដៃគូមិនអាចខ្វះបាន និងគួរឲ្យជឿទុកចិត្ត សម្រាប់តំបន់ឈូងសមុទ្រពែរ្ស។ ជាក់ស្តែងសម្រាប់វិបត្តិនុយក្លេអ៊ែរអ៊ីរ៉ង់ដែលជាក្តីកង្វល់សំខាន់របស់ប្រទេសអារ៉ាប់ នៅឈូងសមុទ្រពែរ្ស ប៉ារីសកំពុងព្យាយាមចរចា សម្របសម្រួល ដើម្បីបន្ធូរបន្ថយភាពតានតឹង។
ចរចាអស់១៣ ឆ្នាំ ដើម្បីអាចចុះកិច្ចសន្យាលក់យន្តហោះចម្បាំង៨០គ្រឿងឲ្យអេមីរ៉ាតអារ៉ាប់រួម
ក្រៅពីទស្សនកិច្ចការទូត លោកប្រធានាធិបតីអេម៉ានុយអែលម៉ាក្រុង ដែល អមដំណើរដោយ រដ្ឋមន្រ្តីការបរទេស រដ្ឋមន្រ្តីសេដ្ឋកិច្ច និងរដ្ឋមន្រ្តីក្រសួងការពារជាតិ និងប្រធានក្រុមហ៊ុនបារាំង ធំៗ ជាង ៥០នាក់ បានធ្វើដំណើរទៅប្រទេសមហាសេដ្ឋីប្រេង និងឧស្ម័នធំៗទាំងបី ជាមួយវ៉ាលីស ដាក់ កិច្ចសន្យាលក់សព្វាវុធ ជាពិសេស កិច្ចសន្យាលក់យន្តហោះចម្បាំងRafale របស់បារាំង។
នៅថ្ងៃសុក្រទី ៣ធ្នូ នៅក្រោមអធិបតីភាពរបស់ប្រធានាធិបតីបារាំង និងរាជបុត្រស្នងរាជ្ររបស់អេមីរ៉ាត អារ៉ាប់រួម Mohammed Ben Zayed អេមីរ៉ាតអារ៉ាប់រួម បានចុះកិច្ចសន្យាទិញយន្តហោះ ចម្បាំងRafale របស់បារាំង ចំនួន៨០គ្រឿង និងឧទ្ធម្ភាគចក្រ ១២គ្រឿង ក្នុងតម្លៃសរុប ១៧ពាន់លានអឺរ៉ូ។
អេមីរ៉ាត អារ៉ាប់រួម សម្រេចទិញ យន្តហោះចម្បាំងបារាំង ដល់ទៅ ៨០គ្រឿង គឺច្រើនជាងចំនួន៦០គ្រឿង ដែលបារាំង និងអេមីរ៉ាតអារ៉ាប់រួមធ្លាប់បានចរចាអស់រយៈពេល ១៣ឆ្នាំ។ ឌូបៃ ធ្លាប់ចរចាទិញ យន្តហោះចម្បាំងRafale របស់បារាំង ដើម្បីទៅជំនួសយន្តហោះចម្បាំងចាស់ៗ Mirage ដែលអេមីរ៉ាតអារ៉ាប់ធ្លាប់ទិញ ពីបារាំង កាលពី៣០ឆ្នាំមុន។ ប៉ុន្តែ អេមីរ៉ាតអារ៉ាប់រួម ដែលប្រើយន្តហោះចម្បាំងអាមេរិក ធ្លាប់រារែក មិនទាន់ចង់ទិញ យន្តហោះបារាំង និងបានចរចា ទាមទារឲ្យបារាំងទម្លាក់តម្លៃ ក្នុងហេតុផលថា យន្តហោះចម្បាំងបារាំងមិនសូវប្រកួតប្រជែងដូចយន្តហោះ អាមេរិក។
លើកនេះ អេមីរ៉ាតអារ៉ាប់រួម សម្រេចទិញយន្តហោះចម្បាំង របស់បារាំង ក្នុងចំនួនដ៏ច្រើន ដើម្បី ទៅបំពាក់ឲ្យកងទ័ពរបស់ខ្លួន គឺបន្ទាប់ពី ឃើញ សម្ព័ន្ធមិត្តអាមេរិក ដែលជាអ្នកលក់ផ្គត់ផ្គង់យន្តហោះឲ្យខ្លួន ហាក់ដូចជា ចង់ដកខ្លួនចេញពីតំបន់ដើមបូព៌ា។ សម្រាប់អេមីរ៉ាតអារ៉ាប់រួម បារាំង ជាប្រទេសផ្គត់ផ្គង់លក់សព្វាវុធ ធំមួយទៀត បន្ទាប់ពីអាមេរិក។
នៅកាលៈទេសៈដែលអាមេរិកហាក់ចង់ដោះដៃ ដកខ្លួនចេញពីតំបន់ដើមបូព៌ា ដើម្បី ទៅបោះយុថ្កា ពង្រឹងវត្តមានយោធារបស់ខ្លួននៅតំបន់អាស៊ី ប៉ាស៊ីហ្វិក បារាំងក៏ចង់ឈ្លៀតឱកាសនេះ ដើម្បីទៅពង្រឹងសម្ព័ន្ធភាពរបស់ខ្លួនជាមួយ ប្រទេសអារ៉ាប់ទាំងបី ជាពិសេស អារ៉ាប៊ី សាអូឌីត ប្រទេសមហាសេដ្ឋីប្រេងមួយទៀត ដែលពេលនេះ កំពុងស្ថិតក្នុងក្រសែភ្នែកមិនល្អរបស់អាមេរិក ដោយសារតែករណីឃាតកម្មលើអ្នកកាសែត ដែលមានពាក់ព័ន្ធ រាជបុត្រស្នងរាជ្យ។ ត្រូវដឹងថាដោយសារតែករណីឃាតកម្មសម្លាប់អ្នកកាសែត អារ៉ាប៊ី សាអូឌីត ព្រឹទ្ធសភា អាមេរិក នៅមិនទាន់បោះឆ្នោតយល់ព្រមឲ្យអាមេរិកលក់សព្វាវុធ ទៅឲ្យអារ៉ាប៊ី សាអូឌីតនោះទេ។ សម្រាប់បារាំង ដរាបណាអាមេរិកនៅតែមានទំនាក់ទំនងមិនសូវល្អ ជាមួយ អារ៉ាប៊ី សាអូឌីត បារាំង នៅតែអាចកេងយកប្រយោជន៍ពីកិច្ចសន្យាលក់អាវុធតម្លៃរាប់ពាន់លានអឺរ៉ូ នោះបើទោះបីជាបារាំង ត្រូវធ្វើអ្វីដែលមិនសូវសមភ្នែកអ្នកដទៃក៏ដោយ។
ជាក់ស្តែង នៅថ្ងៃសៅរ៍ស្អែក លោកប្រធានាធិបតីបារាំង នឹងក្លាយជាមេដឹកនាំប្រទេសលោកខាងលិចដំបូងគេ ដែលនឹងចាប់ដៃ រលាក់ជាមួយ រាជបុត្រស្នងរាជ្យ ម៉ូហាម៉េដ បិនសាល់ម៉ាន គិតចាប់តាំងពីរាជបុត្រស្នងរាជ្យមួយនេះ ត្រូវសង្ស័យថា ជាអ្នកនៅពីក្រោយឃាតកម្មសម្លាប់អ្នកកាសែតប្រឆាំង លោកខាស៊្ហូហ្ស៊ី នៅទឹកដីតួកគីក្តី។
បារាំង កំពុងរងការចោទប្រកាន់ថា បានចងសម្ព័ន្ធភាពយោធាជាមួយប្រទេសអារ៉ាប់ដែលកំពុងរងការរិះគន់ខាងរំលោភសិទ្ធិមនុស្សធ្ងន់ធ្ងរ
អង្គការការពារសិទ្ធិមនុស្ស ដូចជា FIFDH និងអង្គការHuman Rights Watch បានរិះគន់ រដ្ឋាភិបាល បារាំងថា គិតតែចង់បានការចំណេញ ពីការលក់សព្វាវុធ ដោយមិនខ្វល់ថា ប្រទេសអេមីរ៉ាត អារ៉ាប់រួម កាតា និងអារ៉ាប៊ី សាអូឌីត ល្បី ខាងរំលោភសិទ្ធិមនុស្សធ្ងន់ធ្ងរ។ ជាក់ស្តែង កាតា កំពុងរងការចោទប្រកាន់ថា បានរំលោភសិទ្ធិជនអន្តោប្រវេសន៍ ដែលកំពុងធ្វើការក្នុងការដ្ឋានសាងសង់ពហុកីឡាដ្ឋានសម្រាប់ការប្រកួតកីឡាបាល់ទាត់ពិភពលោក ឆ្នាំ ២០២២។
ប៉ុន្តែ នៅទីក្រុងដូហា នៅល្ងាចថ្ងៃសុក្រ ប្រធានាធិបតីបារាំង នឹងមិនលើកយករឿង ផលរមាស់ទាំងនោះទៅជជែកជាមួយ ព្រះចៅសុលតង់របស់ប្រទេសកាតានោះទេ។ កាតាជាដៃគូវិនិយោគដ៏ សំខាន់មួយរបស់បារាំង។
ម្យ៉ាងវិញទៀត ក្រុមអង្គការការពារសិទ្ធិមនុស្ស ធ្លាប់បានព្រមាន រដ្ឋាភិបាលបារាំងផងដែរ ពីផលវិបាកនៃការលក់សព្វាវុធ និងបច្ចេកវិទ្យាយោធា ទៅឲ្យប្រទេសដែលជាប់ដៃធ្វើសង្រ្គាមនៅតំបន់ដើមបូព៌ា។ គេកំពុងបារម្ភថា សព្វាវុធរបស់បារាំង ត្រូវបានប្រទេសមួយចំនួន ទិញ យកទៅប្រើ ក្នុងផ្លូវអាក្រក់ ដូចជា សម្រាប់ធ្វើសង្រ្គាម នៅយេម៉ែន ឬសម្រាប់បង្រ្កាបទៅលើអ្នកប្រឆាំងជាដើម។ នៅដើមសប្តាហ៍នេះ វិបសៃត៍មួយឈ្មោះ Disclose បានទម្លាយឲ្យគេដឹងថា កងទ័ពអេហ្ស៊ីបប្រើព័ត៌មានសំងាត់ របស់បេសកកម្ម យោធាបារាំង ដែលបារាំង បានចុះកិច្ចសន្យាជាមួយ អេហ្ស៊ីប ដើម្បីប្រយុទ្ធប្រឆាំង ក្រុមភេរវជន។ តាមDisclose កងទ័ពអេហ្ស៊ីបបានប្រើសម្ងាត់ដែលបានមកពីភាគីបារាំង ដើម្បី យកបង្រ្កាបក្រុមជួញរត់ពន្ធខុសច្បាប់ នៅតាមព្រំដែនលីប៊ី អេហ្ស៊ីប ដែលតាមពិតជាប្រជាជនស៊ីវិល។
ក្រសួងការពារជាតិបារាំង បានសន្យាបើកការស៊ើបអង្កេតពីរឿងនេះ ប៉ុន្តែ យ៉ាងណាក៏ដោយ រដ្ឋាភិបាលបារាំងនៅតែការពារខ្លួនថា បារាំងមិនអាច ផ្តោតសំខាន់តែលើបញ្ហាសិទ្ធិមនុស្ស និងដាក់ទណ្ឌកម្ម ចងដៃជើង ប្រទេសអារ៉ាប់ ដូចជាអារ៉ាប៊ី សាអូឌីតជាដើម ដែលតាមពិតដើរតួនាទីសំខាន់ ក្នុងតំបន់ដើមបូព៌ានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ