អាមេរិកថា ក្រុមប្រទេសG7 ត្រៀមខ្លួនដាក់ទណ្ឌកម្មសេដ្ឋកិច្ច បើសិនរុស្ស៊ីចូលឈ្លានពានអ៊ុយក្រែន
ក្រុមប្រទេសមហាអំណាចឧស្សាហកម្មG7បានបង្ហាញការរួបរួម ឯកភាពគ្នាជាធ្លុងមួយ នៅក្នុងសំណុំរឿងអ៊ុយក្រែន រុស្ស៊ី។ នៅក្នុងកិច្ចប្រជុំថ្នាក់រដ្ឋមន្រ្តីការបរទេស កាលពី ថ្ងៃសៅរ៍ នៅទីក្រុងលីវឺភូល ភាគខាងជើងប្រទេសអង់គ្លេស ក្រុមប្រទេសអ្នកមាន G7 បាននិយាយរួមគ្នា ព្រមានរុស្ស៊ី ពីការដាក់ទណ្ឌកម្មសេដ្ឋកិច្ច បើសិនរុស្ស៊ី ធ្វើសង្រ្គាម ចូលឈ្លានពានប្រទេសអ៊ុយក្រែន។ នៅប៉ុន្មានសប្តាហ៍មកនេះ អាមេរិក អឺរ៉ុប និងអ៊ុយក្រែនផ្ទាល់បានចោទប្រកាន់រុស្ស៊ីថា កំពុងត្រៀមកម្លាំងទ័ពនៅព្រំដែន ដើម្បីចូលឈ្លានពានអ៊ុយក្រែន។ ការចោទប្រកាន់ដែលម៉ូស្គូបានបដិសេធទាត់ចោល។
ចុះផ្សាយនៅថ្ងៃ៖
ស្តាប់ - ០២:៣២
កិច្ចប្រជុំរបស់ក្រុមប្រទេសមហាអំណាចឧស្សាហកម្មG7 ដែលត្រូវបន្តនៅថ្ងៃអាទិត្យនេះ នៅមិនទាន់ចេញសេចក្តីថ្លែងការណ៍រួម នៅក្នុងសំណុំរឿងអ៊ុយក្រែន រុស្ស៊ី ប៉ុន្តែ អ្នកទទួលខុសត្រូវអាមេរិកម្នាក់ ដែលបានចូលរួមក្នុងកិច្ចប្រជុំនៅទីក្រុង Liverpool ប្រទេសអង់គ្លេស បាននិយាយប្រាប់អ្នកកាសែតថា ក្រុមប្រទេស G7ត្រៀមខ្លួនដើម្បីដាក់ទណ្ឌកម្មសេដ្ឋកិច្ចខ្លាំងៗ ក្នុងករណីរុស្ស៊ី រំលោភចូលឈ្លានពានប្រទេសអ៊ុយក្រែន។
នៅថ្ងៃសៅរ៍ ប្រធានាធិបតីអាមេរិក លោកចូ បៃដិនបាននិយាយប្រាប់អ្នកកាសែតដែរថា នៅក្នុងជំនួបជាមួយប្រធានាធិបតី រុស្ស៊ី លោកវ្លាឌីមៀរ ពូទីនកាលពីថ្ងៃអង្គារ លោកបានបញ្ជាក់ហើយថា រុស្ស៊ីនឹងរងផលវិបាកធ្ងន់ធ្ងរខាងផ្នែកសេដ្ឋកិច្ច បើសិន រុស្ស៊ី ធ្វើសង្រ្គាមឈ្លានពានអ៊ុយក្រែន។
នៅក្នុងកិច្ចប្រជុំG7 អាមេរិកបានទាមទារសាជាថ្មីឲ្យរុស្ស៊ីបន្ថយភាពតានតឹងនៅព្រំដែន ជាមួយប្រទេសអ៊ុយក្រែន បន្ទាប់ពីប្រទេសលោកខាងលិច និងអ៊ុយក្រែន ចោទរុស្ស៊ី កំពុងចលនាទ័ព ដើម្បីត្រៀមចូលឈ្លានពានអ៊ុយក្រែន។ សម្រាប់អ្នកទទួលខុសត្រូវអាមេរិក ដែលបានចូលរួមក្នុងកិច្ចប្រជុំG7 យ៉ាងណាក៏ដោយ គេនៅមានផ្លូវដោះស្រាយវិបត្តិអ៊ុយក្រែន តាមការទូត។
នៅត្រង់ចំណុចនេះ ភាគីអាមេរិកបានបញ្ជាក់ថា នឹងបញ្ជូនអនុរដ្ឋមន្រ្តីការបរទេស ទទួលបន្ទុកអឺរ៉ុប លោកស្រី Karen Donfried ទៅកាន់ប្រទេសអ៊ុយក្រែន និងរុស្ស៊ី នៅថ្ងៃចន្ទ និងថ្ងៃពុធសប្តាហ៍ក្រោយ។ បេសកកម្មការទូតរបស់អាមេរិកមានគោលដៅ ទាមទារឲ្យគេអនុវត្តកិច្ចព្រមព្រៀងនៅទីក្រុងMinsk ដើម្បីបិទបញ្ចប់ ជម្លោះប្រដាប់អាវុធនៅតំបន់Donbass ភាគខាងកើតប្រទេសអ៊ុយក្រែន។ សម្រាប់អ្នកទទួលខុសត្រូវអាមេរិក បើសិនរុស្ស៊ីមិនជ្រើសរើសផ្លូវទូតដើម្បីបន្ថយភាពតានតឹងជាមួយអ៊ុយក្រែន នោះក្រុមប្រទេសមហាអំណាចឧស្សាហកម្ម G7 នឹងរួមគ្នា ដើម្បី ធ្វើឲ្យរុស្ស៊ីរងផលវិបាកធ្ងន់ធ្ងរ ដោយសារការរំលោភឈ្លានពានអ៊ុយក្រែន។
ក្រៅពីសំណុំរឿងក្តៅគគុក អ៊ុយក្រែន រុស្ស៊ី ក្រុមប្រទេសមហាអំណាចឧស្សាហកម្មG7 ផ្តោតពិភាក្សាផងដែរ ពីបញ្ហានុយក្លេអ៊ែរអ៊ីរ៉ង់ និងការពង្រីកដែនឥទ្ធិពលដ៏គួរឲ្យព្រួយបារម្ភរបស់ប្រទេសចិន។ សម្រាប់រដ្ឋមន្រ្តីការបរទេសអង់គ្លេស Liz Truss គេត្រូវរួមកម្លាំងគ្នា ដើម្បីប្រឈមតទល់នឹងរបបផ្តាច់ការ អ្នកឈ្លានពានដែលចង់ពង្រួញលំហសេរីភាព និងប្រជាធិបតេយ្យ។ ប្រសាសន៍របស់ប្រមុខការបរទេសអង់គ្លេសស្របតាមឆន្ទៈរបស់អាមេរិកដែលចង់ឲ្យក្រុមប្រទេស G7 ចូលរួមក្នុងយុទ្ធសាស្រ្តតែមួយរបស់ក្រុមប្រទេសលោកខាងលិច ដើម្បី ទប់ទល់មហិច្ឆតារបស់ចិន នៅក្នុងឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ