ជើងហោះហើររាប់ពាន់នៅជុំវិញពិភពលោកត្រូវលុបចោលដោយសាររលកឆ្លងកូវីដ
ចុះផ្សាយនៅថ្ងៃ៖
ស្តាប់ - ០៧:០៩
អ្នកដំណើររាប់លាននាក់នៅទូទាំងពិភពលោក កំពុងឈឺក្បាលវិលមុខព្រោះមិនអាចចេញដំណើរបានដូចការគ្រោងទុក។ ការឆ្លងរាលដាលកូវីដ បង្ខំឲ្យក្រុមហ៊ុនអាកាសចរណ៍ជាច្រើនលុបចោលជើងហោះហើរជាង ៨០០០ ចាប់តាំងពីថ្ងៃសុក្រមុន។ ក្រុមហ៊ុនអាកាសចរណ៍មួយចំនួនអះអាងថាខ្វះបុគ្គលិកធ្វើការដោយហេតុបុគ្គលិកខ្លះបានឆ្លងជំងឺកូវីដ ឬត្រូវជាប់ចត្តាឡីស័ក។
ជើងហោះហើររាប់ពាន់ត្រូវលុបចោលនៅជុំវិញពិភពលោកដោយសារការរីករាលដាលកូវីដ
មកទល់នឹងពេលនេះ ពិភពលោកនៅតែបន្តរងការគំរាមកំហែងពីជំងឺរាតត្បាតកូវីដ១៩ ជាពិសេសពីមេរោគបំប្លែងខ្លួនថ្មីអូមីក្រុង។ ដោយសារកំណើននៃករណីឆ្លងកូវីដ ក្រុមហ៊ុនអាកាសចរណ៍ជាច្រើនបានសម្រេចលុបចោលជើងហោះហើររបស់ខ្លួនទាំងបង្ខំចិត្តដើម្បីទប់ស្កាត់ការឆ្លងរីករាលដាលកូវីដស្របទៅតាមវិធានការរបស់រដ្ឋាភិបាល។
ចាប់តាំងពីថ្ងៃសុក្រមុនមានជើរហោះហើរប្រមាណ ៨ ០០០ត្រូវបានលុបចោល ហើយរាប់ម៉ឺនជើងហោះហើរផ្សេងទៀតត្រូវបានពន្យារពេលចំចុងសប្តាហ៍បុណ្យអូណែលដែលជាអំឡុងពេលនៃការធ្វើដំណើរដ៏មមាញឹកបំផុតមួយប្រចាំឆ្នាំ។
នៅថ្ងៃចន្ទ ទី២៧ ធ្នូនេះ មានជើងហោះហើរជាង១៤០០ត្រូវបានលុបចោល ហើយនៅថ្ងៃអង្គារស្អែកនេះមានជើងហោះហើររាប់រយទៀតកំពុងតែប្រឈមនឹងការលុបចោលរួចស្រេចដែរទៅហើយ។ នេះបើយោងទៅតាមទិន្នន័យរបស់ក្រុមហ៊ុន FlightAware របស់អាមេរិក។
សហរដ្ឋអាមេរិក និងប្រទេសចិនទទួលរងផលប៉ះពាល់ខ្លាំងជាងគេពីការលុប ឬពន្យារពេល ឬក៏លើកម៉ោងជើងហោះហើរ។ ក្រុមហ៊ុនអាកាសចរណ៍អាមេរិកមួយចំនួនលើកហេតុផលពន្យល់ប្រាប់ថាក្រុមហ៊ុនបានបង្ខំចិត្តលុប ឬពន្យារជើងហោះហើរក៏ព្រោះតែក្រុមហ៊ុនខ្វះបុគ្គលិកធ្វើការ ដោយបុគ្គលិកខ្លះធ្វើតេស្តវិជ្ជមានកូវីដ ហើយខ្លះទៀតត្រូវជាប់ធ្វើចត្តាឡីស័ក។
ក្នុងឱកាសបុណ្យអូណែលនិងបុណ្យចូលឆ្នាំសកលនេះ វិស័យអាកាសចរណ៍របស់ពិភពលោកនៅរងផលប៉ះពាល់ច្រើនពីការឆ្លងរាលដាលកូវីដ។ ទោះបីជាចំនួននៃការលុបចោលជើងហោះហើរគឺជាភាគរយតូចមួយនៃចំនួនសរុបក្តី ក៏តួលេខនេះមានចំនួនខ្ពស់ជាងធម្មតាហើយវាកើតឡើងនៅចំឱកាសថ្ងៃបុណ្យចុងឆ្នាំដែលជាវេលាមនុស្សម្នាជាច្រើននៅជុំវិញពិភពលោកកំពុងសង្វាតនិងមមាញឹកធ្វើដំណើរដើម្បីទៅជួបជុំក្រុមគ្រួសារ សាច់ញាតិ បងប្អូន មិត្តភ័ក្តិ។
ភាគច្រើននៃកំណើនករណីឆ្លងកូវីដបណ្តាលមកពីមេរោគបំប្លែងអូមីក្រុង
មេរោគបំប្លែងខ្លួនអូមីក្រុងដែលឆ្លងខ្លាំងបានជំរុញឲ្យករណីឆ្លងកូវីដថ្មីកើនឡើងនៅជុំវិញពិភពលោក។ ប្រឈមនឹងកំណើនករណីឆ្លងកូវីដបង្កដោយមេរោគអូមីក្រុង បណ្តាប្រទេសជាច្រើនបានដាក់ចេញនូវវិធានការរឹតត្បិតជាថ្មីមានតាំងពីការបិទប្រទេសឡើងវិញ ការដាក់កំហិតឲ្យធ្វើចត្តាឡីស័កលើអ្នកដំណើរ ឬការលើកពន្យារពេលកម្មវិធីប្រកួតកីឡាធំៗ។ ក្រៅពីនេះ រដ្ឋាភិបាលនៃប្រទេសជាច្រើនរួមមានសហរដ្ឋអាមេរិក បារាំង និងអ៊ីស្រាអែលជាដើមកំពុងខ្នះខ្នែងផងដែរជំរុញការធ្វើតេស្តនិងការចាក់វ៉ាក់សាំងបង្កាកូវីដដល់ប្រជាជនរបស់ខ្លួន។
ក្រឡេកទៅមើលទីក្រុងស៊ីអានរបស់ចិនវិញ ប្រជាជនរស់នៅទីនោះប្រមាណ១៣លាននាក់ត្រូវអាជ្ញាធរតម្រូវឲ្យស្នាក់នៅតែក្នុងផ្ទះកាលពីថ្ងៃអាទិត្យម្សិលមិញ ខណៈដែលប្រទេសចិនបានកត់ត្រារកឃើញចំនួនករណីឆ្លងកូវីដច្រើនបំផុតមិនធ្លាប់មានក្នុងរយៈពេល ២១ ខែមកនេះ។
អាជ្ញាធរចិនបាននិងកំពុងប្រឹងប្រែងខ្លាំងសម្បើមណាស់ដើម្បីទប់ស្កាត់រលកឆ្លងរាលដាលកូវីដ ព្រោះថាកម្មវិធីប្រកួតកីឡាអូឡាំពិករដូវរងារនៅប៉េកាំងនាខែកុម្ភៈខាងមុខ កាន់តែខិតកៀកជិតមកដល់ហើយ។
ចិនថែមទាំងបានដាក់ចេញនូវការអនុវត្តន៍យុទ្ធសាស្រ្តហ្សេរ៉ូកូវីដដ៏ប្រុងប្រយ័ត្នមានតាំងពីការធ្វើចត្តាឡីស័ក ការបិទខ្ទប់តឹងរ៉ឹង ការធ្វើតេស្តិ៍ ការត្រួតពិនិត្យម៉ត់ចត់លើអ្នកដំណើរមកពីបរទេស ឬក៏ការតាមដានលើការផ្លាសទីរបស់ពលរដ្ឋជាដើម។ យ៉ាងណាក៏ដោយនៅតែមានការផ្ទុះឡើងនៃករណីឆ្លងកូវីដថ្មីជាបន្តបន្ទាប់ដដែលនៅក្នុងប្រទេសចិន រហូតមកទល់នឹងពេលនេះ។
បច្ចុប្បន្នភាពកូវីដនិងការលុបជើងហោះហើរនៅក្នុងបណ្តាប្រទេសនានា
មកទល់នឹងសព្វថ្ងៃនេះ ជំងឺរាតត្បាតកូវីដមានវត្តមានក្នុងពិភពលោកយើងរយៈពេល ២ ឆ្នាំហើយ។ ករណីកូវីដដំបូងបង្អស់ដែលត្រូវបានគេរកឃើញគឺនៅទីក្រុងវូហានប្រទេសចិនក្នុងខែធ្នូ ឆ្នាំ ២០១៩។
គិតត្រឹមថ្ងៃចន្ទ ទី២៧ ធ្នូ ឆ្នាំ ២០២១នេះ មានមនុស្សជាង៥លាន ៤សែននាក់ (៥ ៤១៨ ៥៤១) បានស្លាប់ដោយសារជំងឺកូវីដនៅទូទាំងពិភពលោក និងមានឆ្លងជាង ២៨០ លានករណី (២៨០ ៣៩០ ៤៤៦)។ នេះបើយោងតាមសាកលវិទ្យាល័យ Johns Hopkins របស់អាមេរិក។
ងាកទៅចាប់អារម្មណ៍ពីការលុបជើងហោះហើរនានានៅជុំវិញពិភពលោកវិញ។ យោងតាមការប៉ាន់ស្មានរបស់សមាគមរថយន្តអាមេរិក (The American Automobile Association) មានប្រជាជនអាមេរិកាំងប្រមាណជាង១០៩លាននាក់នឹងធ្វើដំណើរតាមយន្តហោះ រថភ្លើង ឬរថយន្តនៅចន្លោះថ្ងៃទី ២៣ ធ្នូ ដល់ថ្ងៃទី២ ខែមករា។ ចំនួននេះកើនឡើង ៣៤% ធៀបនឹងឆ្នាំមុន។
នៅខណៈនេះ ក្រុមហ៊ុនអាមេរិកដែលរងគ្រោះខ្លាំងជាងគេគឺក្រុមហ៊ុន United ដោយការឆ្លងរាលដាលកូវីដធ្វើឲ្យក្រុមហ៊ុនលុបចោលជើងហោះហើរអស់ប្រមាណ៨៤ និងបន្ទាប់មកទៀតគឺក្រុមហ៊ុនJetBlue ដែលលុបអស់ ៦៦។
ដោយឡែក ក្រុមហ៊ុន FlightAware បានឲ្យដឹងថាជើងហោះហើរភាគច្រើនដែលត្រូវបានលុបចោលនៅថ្ងៃចន្ទនេះគឺជាជើងហោះហើររបស់ក្រុមហ៊ុនចិនដែលរួមមានក្រុមហ៊ុន China Eastern លុបចោលជើងហោះហើរ ២៦៨ និង Air China ដែលបានលុបចោល១៤១។
អាកាសយានដ្ឋានក្នុងទីក្រុងប៉េកាំង និងសៀងហៃក៏រងផលប៉ះពាល់ខ្លាំងណាស់ដែរដោយត្រូវលុបចោលជិត ៣០០ ជើងហោះហើរគិតរួមបញ្ចូលគ្នាទាំងពីរ។ នៅអង់គ្លេសឯណោះវិញក្រុមហ៊ុនអាកាសចរណ៍ British Airways បានលុបចោលជើងហោះហើរចំនួន ៤២ នៅថ្ងៃចន្ទនេះ។ ចំណែកអាកាសយានដ្ឋាន Heathrow នៃទីក្រុងឡុងដ៍មានជើងហោះហើរចំនួន ៤៧ ត្រូវបានលុបចោល។ នេះបើតាមការចុះផ្សាយរបស់សារព័ត៌មាន BBC៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ