លោកបៃដិនបញ្ជាក់ពីការត្រៀមខ្លួនរបស់អាមេរិកទល់នឹងរលកឆ្លងអូមីក្រុង
ប្រឈមនឹងកំណើនករណីឆ្លងកូវីដបង្កដោយមេរោគអូមីក្រុង រដ្ឋាភិបាលនៃប្រទេសជាច្រើនបានដាក់ចេញនូវវិធានការរឹតត្បិតជាថ្មី។ នៅក្នុងសហរដ្ឋអាមេរិក ខណៈបុណ្យណូអែលនិងថ្ងៃចូលឆ្នាំសកលខិតកាន់តែកៀកជិតដល់ លោក ចូ បៃដិន បានបញ្ជាក់ពីការត្រៀមខ្លួនដើម្បីប្រឆាំងទល់នឹងរលកឆ្លងបង្កដោយអូមីក្រុង។ ចំណែកអ៊ីស្រាអែលវិញបានប្រកាសពីយុទ្ធនាការចាក់វ៉ាក់សាំងដូសទី៤ សម្រាប់អ្នកដែលមានអាយុលើសពី៦០ឆ្នាំ និងបុគ្គលិកសុខាភិបាល។
ចុះផ្សាយនៅថ្ងៃ៖
ស្តាប់ - ០២:១៦
មេរោគបំប្លែងខ្លួនអូមីក្រុងដែលបច្ចុប្បន្នមានវត្តមាននៅក្នុងប្រទេសរាប់សិប ហាក់បីដូចជាឆ្លងខ្លាំងជាងមេរោគផ្សេងទៀត បើទោះបីជាមានការលើកឡើងពីដំបូងថាមេរោគប្រភេទនេះមិនបង្កថ្នាក់ខ្លាំងជាងមេរោគដែលតាក៏ដោយ។
ដោយហេតុថាអូមីក្រុងកំពុងឆ្លងរីករាលក្នុងល្បឿនលឿននិងឆ្លងខ្លាំងចូលប្រទេសកាន់តែនៅជុំវិញពិភពលោក រដ្ឋាភិបាលនៃប្រទេសមួយចំនួនបានដាក់ចេញនូវវិធានការរឹតត្បិតឡើងវិញ ជាពិសេសនៅមុនថ្ងៃបុណ្យណូអែលនិងថ្ងៃចូលឆ្នាំសកល។
ពីទីក្រុងវ៉ាស៊ីនតោនកាលពីថ្ងៃអង្គារ ទី២១ ធ្នូម្សិលមិញ លោកប្រធានាធិបតីអាមេរិក ចូ បៃដិន បានប្រកាសអំពីវិធានការថ្មីដើម្បីប្រយុទ្ធប្រឆាំងនឹងកំណើនករណីឆ្លងកូវីដបង្កដោយអូមីក្រុង។ វិធានការនេះរួមមានទាំងការផ្តល់ជូនឧបករណ៍ធ្វើតេស្តតាមផ្ទះដោយឥតគិតថ្លៃចំនួនប្រមាណ ៥០០លាន ដោយចាប់ផ្តើមពីខែមករាខាងមុខ។
“យើងទាំងអស់គ្នាគួរព្រួយបារម្ភពីមេរោគអូមីក្រុង តែមិនត្រូវភ័យស្លន់ស្លោនោះទេ”។ នេះគឺជាការលើកឡើងរបស់លោកបៃដិន ជាមួយនឹងធានាដល់ប្រជាជនដែរថាប្រទេសអាមេរិកនឹងធ្លាក់ខ្លួនរងគ្រោះធ្ងន់ធ្ងរពីមេរោគអូមីក្រុង ដូចកាលពីខែមីនា ឆ្នាំ ២០២០នោះទេ។
បន្ថែមលើនេះ លោកប្រធានាធិបតីអាមេរិកគូសបញ្ជាក់ថារដ្ឋាភិបាលនឹងដាក់ពង្រាយបុគ្គលិកយោធាទៅកាន់មន្ទីរពេទ្យនានា ដឹកជញ្ជូនសម្ភារៈផ្គត់ផ្គង់ទៅរដ្ឋដែលរងគ្រោះខ្លាំង និងដាក់ដំឡើងកន្លែងធ្វើតេស្តថ្មីដោយឥតគិតថ្លៃ។
ដោយឡែកបើតាមប្រមុខការបរទេសអាមេរិកលោក អង់តូនី ប្ល៊ីងកិន សហរដ្ឋអាមេរិកនឹងផ្តល់ជំនួយបន្ថែមចំនួន ៥៨០ លានដុល្លារដល់អង្គការស្ថាប័នអន្តរជាតិជាច្រើនក្នុងគោលដៅប្រយុទ្ធទល់នឹងការឆ្លងរាលដាលកូវីដ។
ចំណែកនៅប្រទេសអ៊ីស្រាអែលវិញ ប្រឈមនឹងកំណើនករណីឆ្លងបង្កដោយអូមីក្រុងនេះដែរ លោកនាយករដ្ឋមន្ត្រីណាវតាលី ប៊ែននែត និយាយថាប្រជាពលរដ្ឋដែលមានអាយុចាប់ពី ៦០ ឆ្នាំឡើងទៅ និងក្រុមគ្រូពេទ្យនឹងមានសិទ្ធិទទួលបានការចាក់វ៉ាក់សាំងកូវីដដូសទី៤ ស្របតាមការណែនាំរបស់ក្រុមអ្នកជំនាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ