លោកចូ បៃដិនបានសម្រេចស្នាដៃអ្វីខ្លះ នៅ១ឆ្នាំដំបូងនៃការកាន់តំណែងជាប្រធានាធិបតី អាមេរិក?
ចុះផ្សាយនៅថ្ងៃ៖
ស្តាប់ - ០៨:០៥
ថ្ងៃទី ២០មករា ជាខួប១ឆ្នាំ នៃការចូលកាន់តំណែងរបស់ចូ បៃដិនជាប្រធានាធិបតីអាមេរិក។ នៅក្នុងសន្និសីទកាសែតដ៏កម្រ កាលពីថ្ងៃ ពុធទី ១៩មករា ២០២២ លោកប្រធានាធិបតីចូ បៃដិន មកពីគណបក្សប្រជាធិបតេយ្យ បានថ្លែងដោយអំណួតពីតុល្យការសេដ្ឋកិច្ច និងសុខភាព ដែលរដ្ឋបាលរបស់លោកសម្រេចបាន នៅក្នុងរយៈពេល១ឆ្នាំមកនេះ។ លោកចូ បៃដិនបានលើកសរសើរស្នាដៃរដ្ឋបាលរបស់លោក ប៉ុន្តែ នៅក្នុងការស្ទង់មតិឯណោះវិញ កូដប្រជាប្រិយភាពរបស់លោកចូ បៃដិនបានធ្លាក់ចុះ គួរឲ្យកត់សំគាល់។ នៅមុនការបោះឆ្នោតសភា ពាក់កណ្តាលអាណត្តិ លោកចូ បៃដិនសន្យាភ្ជាប់ទំនាក់ទំនងជិតស្និទ្ធឡើងវិញ ជាមួយប្រជាជនអាមេរិក។
នៅមួយថ្ងៃមុនខួប ១ឆ្នាំនៃការចូលកាន់តំណែងរបស់ខ្លួន នៅសេតវិមាន លោកប្រធានាធិបតី ចូ បៃដិនបានធ្វើសន្និសីទកាសែត ដើម្បី បូកសរុបសមិទ្ធិផល ស្នាដៃការងារដែលរដ្ឋបាលរបស់លោកបានសម្រេចក្នុងរយៈពេលមួយឆ្នាំមកនេះ។
នៅក្នុងសន្និសីទកាសែត ម្សិលមិញ លោកចូ បៃដិនបានចោទសំណួរបកទៅអ្នកកាសែតវិញថា តើមានប្រធានាធិបតីណាដែលធ្វើបានច្រើនដូចលោក នៅក្នុងរយៈពេល១ឆ្នាំដំបូងនៃការចូលកាន់តំណែងដែរឬទេ? សម្រាប់លោកចូ បៃដិន រដ្ឋបាលរបស់លោកបានសម្រេចស្នាដៃជាច្រើន ក្នុងរយៈពេល ១ឆ្នាំមកនេះ។ លោកចូ បៃដិនបានធ្វើកិច្ចការជាច្រើន ដែលមានជាប់ទាក់ទងនឹងការសន្យារបស់លោក នៅក្នុងយុទ្ធនាការបោះឆ្នោត ពោល គឺដើម្បី ស្រោចស្រង់អាមេរិកចេញពីវិបត្តិសេដ្ឋកិច្ច ដែលបង្កឡើងដោយវិបត្តិកូវីដ។
បញ្ហាកូវីដ គឺជានយោបាយអាទិភាពរបស់រដ្ឋបាលលោកចូ បៃដិន។ នៅក្នុងសន្និសីទកាសែត កាលពី ថ្ងៃពុធម្សិលមិញ លោកចូ បៃដិនបាននិយាយអួតថា រដ្ឋបាលរបស់លោកបានប្រឹងប្រែង ជំរុញឲ្យប្រជាជនអាមេរិក ដល់ទៅ ៧៥%បានទទួលចាក់វ៉ាក់សាំងបង្ការជំងឺកូវីដ។ តួលេខនេះគឺខ្ពស់ឆ្ងាយខ្លាំងណាស់ បើប្រៀបធៀបនឹងរដ្ឋបាលមុន របស់លោកដូណាល់ ត្រាំ ដែលមានប្រជាជនប្រមាណតែ ១%ប៉ុណ្ណោះ ដែលបានទទួលចាក់វ៉ាក់សាំង។
ក្រោមការដឹកនាំរបស់លោកចូ បៃដិន សាលារៀនបានបើកទ្វារឡើងវិញ ចំណែកសកម្មភាពសេដ្ឋកិច្ច កំណើនសេដ្ឋកិច្ច ក៏ចាប់ងើបស្ទុះ ឡើងវិញដែរ។ ជាមួយនឹងការបង្កើតការងារធ្វើ ជាង ៦លាននាក់ គិតចាប់តាំងពីដើមឆ្នាំនេះ អត្រាអ្នកអត់ការងារធ្វើនៅអាមេរិក បានធ្លាក់ចុះ មកនៅត្រឹម ៣,៩%។
កាលពីខែ មីនាឆ្នាំមុន ពោលគឺនៅតែ១០០ថ្ងៃក្រោយ ចូលកាន់តំណែងជាប្រធានាធិបតីអាមេរិក លោកចូ បៃដិនបានទទួលជោគជ័យ ដោយបានជំរុញ ឲ្យព្រឹទ្ធិសភា បោះឆ្នោតកញ្ចប់ថវិកា ជិត២ទ្រីលាន ដុល្លារ សម្រាប់ ផែនការផ្តល់សន្ទុះសេដ្ឋកិច្ច ដែលរួបរឹតដោយវិបត្តិកូវីដ។
និយាយពីនយោបាយការបរទេសវិញ រដ្ឋបាលលោកចូ បៃដិនបាន ត្រលប់មកចូលរួមក្នុងកិច្ចព្រមព្រៀងស្តីពីអាកាសធាតុ និងត្រលប់បន្ធូបន្ថយភាពតានតឹងជាមួយសម្ព័ន្ធមិត្ត នៅអឺរ៉ុប និងចង់ចរចាដើម្បីអាចស្តារកិច្ចព្រមព្រៀងនុយក្លេអ៊ែរអ៊ីរ៉ង់។ ខុសពីរដ្ឋបាលលោកដូណាល់ ត្រាំ ដែលដើរឈ្លោះជាមួយគេឯង មិនថា សម្ព័ន្ធមិត្ត ឬសត្រូវ រដ្ឋបាលលោកចូ បៃដិន បានបង្ហាញថា អាមេរិកបានត្រលប់មកវិញ ក្នុងនាមជាប្រទេសមហាអំណាច ដែលការពារលទ្ធិប្រជាធិបតេយ្យក្នុងលោក។
ព្រឹទ្ធសភាបានបោះឆ្នោត បដិសេធមិនធ្វើកំណែទម្រង់ច្បាប់បោះឆ្នោត
នៅតែប៉ុន្មានម៉ោងក្រោយ សន្និសីទកាសែតរបស់លោកចូ បៃដិន ព្រឹទ្ធសភា បានបោះឆ្នោត កប់ចោល សំណើធ្វើកំណែទម្រង់ច្បាប់បោះឆ្នោត ដែលលោកចូ បៃដិន បានទាមទារ ដើម្បីផ្តល់លទ្ធភាពច្រើនឲ្យប្រជាជនអាមេរិកាំងស្បែកខ្មៅ បានទៅបោះឆ្នោត។ ប្រជាជនអាមេរិកាំងស្បែកខ្មៅ ដែលជាអ្នកគាំទ្រគណបក្សប្រជាធិបតេយ្យរបស់លោកចូ បៃដិន។
នៅក្រោយការសម្រេចរបស់ព្រឹទ្ធសភា លោកចូ បៃដិនបាននិយាថា លោកខកចិត្ត។ កិច្ចការសំខាន់ដែលលោកចូ បៃដិនមិនបានធ្វើ នៅក្នុងរយៈពេល១ឆ្នាំមកនេះ គឺលោកមើលស្រាល ស្ថានការណ៍ពេក។ លោកជឿថា ជាមួយ សំឡេង គ្រប់គ្រាន់របស់គណបក្សប្រជាធិបតេយ្យ នៅព្រឹទ្ធសភា ច្បាប់ដែលលោកស្នើឡើង ប្រហែលមិនអាចជួបវិបត្តិជាប់គាំងនៅព្រឹទ្ធសភា នោះទេ ប៉ុន្តែ លោកយល់ខុស ព្រោះ នៅក្នុងជួរគណបក្សរបស់លោក ក៏មានចរន្តប្រឆាំងនឹងសំណើធ្វើកំណែទម្រង់របស់លោកដែរ។
នៅប៉ុន្មានខែមុនការបោះឆ្នោត សភា ពាក់កណ្តាលអាណត្តិ គេជឿថា លោកចូ បៃដិនគួរផ្តោតសំខាន់លើការផ្សះផ្សារពង្រឹង សាមគ្គីភាព ក្នុងជួរបក្សរបស់លោក ពោលគឺធ្វើយ៉ាងណាដើម្បីអាចជំរុញ ឲ្យគណបក្សអាចនៅរក្សាឬ ឈ្នះ អាសនៈកាន់តែច្រើន នៅក្នុងការបោះឆ្នោតសភា នៅចុងឆ្នាំនេះ។ ប៉ុន្តែ លោកចូ បៃដិនវិញ បានបញ្ជាក់នៅថ្ងៃម្សិលមិញថា កិច្ចការនៅចំពោះមុខរបស់លោកនៅពេលនេះ គឺការចុះជួបផ្ទាល់ជាមួយប្រជាជន ដើម្បីឲ្យពួកគេ ជឿទុកចិត្ត លើនយោបាយកំណែទម្រង់របស់លោក ជាជាងបញ្ចុះបញ្ចូល អ្នកនយោបាយ ដែលគិតប្រយោជន៍បក្ស ជាជាងប្រយោជន៍សង្គម។
ក្នុងរយៈពេល១ឆ្នាំ កូដប្រជាប្រិយរបស់លោកចូ បៃដិន ធ្លាក់ចុះ ពី៥៧% មកនៅត្រឹម ៤០% គ្រាន់តែចូលកាន់តំណែងជាប្រធានាធិបតីអាមេរិក លោកចូ បៃដិនបានជំរុញយុទ្ធនាការចាក់វ៉ាក់សាំង បានច្រើន ដើម្បីជំរុញសកម្មភាពសេដ្ឋកិច្ច។ ការណ៍នេះបានធ្វើឲ្យលោកបានទទួលការគាំទ្រពីប្រជាជនអាមេរិក ហើយកូដប្រជាប្រិយភាពរបស់លោកបានកើនឡើងដល់៥៧%។ ប៉ុន្តែ ក្តីប្រាថ្នារបស់លោកចូ បៃដិន ដែលសន្យាយកឈ្នះ វិបត្តិកូវីដ ក៏ត្រូវរំខាន បំផ្លាញ ដោយមេរោគបំប្លែងខ្លួន ដែលតា និងចុងក្រោយគឺអូមីក្រុង ដែលធ្វើឲ្យអាមេរិកធ្លាក់ខ្លួនសាជាថ្មី ទៅក្នុងវិបត្តិកូវីដ។
ដោយសារការឆ្លងរាតត្បាត របស់អូមីក្រុង ប្រជាជនអាមេរិកជាច្រើនលាននាក់ ត្រូវអាក់ខាន ជាប់គាំង មិនអាចធ្វើដំណើរទៅជួបជុំគ្រួសារ ប្រារព្ធពិធីបុណ្យដាច់ឆ្នាំ។ ទី២ ដោយសារវិបត្តិកូវីដ សតិអារម្មណ៍ធ្វើការរបស់ប្រជាជនមិនសូវមូល។ បុគ្គលិកមួយភាគបានឈប់ពីការងារ ធ្វើឲ្យរោងចក្រឧស្សាហកម្មមួយចំនួន ត្រូវជាប់គាំង ខ្វះបុគ្គលិក និងមិនអាចធានាការផ្គត់ផ្គង់ទំនិញ សេវាកម្មដោយរលូនដូចមុន។ មួយវិញទៀត ជាមួយ បញ្ហាក្នុងការដឹកជញ្ជូន ជម្លោះពាណិជ្ជកម្មជាមួយចិន និងការឡើងថ្លៃនៃថាមពល វត្ថុធាតុដើម នៅក្នុងពិភពលោក ប្រជាជនអាមេរិកកំពុងជួបបញ្ហាខ្លាំងជាងគេ គឺទំនិញឡើងថ្លៃ។ អាមេរិកបានជួប អត្រាអតិផរណាខ្ពស់ដល់ ៧% គឺជាកម្រិតដ៏ខ្ពស់ មិនធា្លប់មាននៅក្នុងរយៈពេល ៤០ឆ្នាំចុងក្រោយនេះ។ វិបត្តិអតិផរណា ហើយអាមេរិកនៅតែមិនទាន់ងើបរួចផុតពីវិបត្តិកូវីដ ដោយសារនៅតែមានអ្នកឆ្លងដល់ទៅរាប់សែននាក់ ក្នុងមួយថ្ងៃៗ។ គឺបញ្ហាសំខាន់ទាំងពីរនេះហើយដែលធ្វើឲ្យកូដប្រជាប្រិយរបស់លោកចូ បៃដិនធ្លាក់ចុះ។
មួយវិញទៀតដែរ គឺជឿថា នយោបាយដកទ័ពអាមេរិកពីអាហ្វហ្កានីស្ថាន ដែលធ្វើឲ្យអាមេរិករងការរិះគន់នៅឆាកអន្តរជាតិ ក៏ផ្តល់រូបភាពមិនល្អរបស់រដ្ឋបាលលោកចូ បៃដិន នៅក្នុងក្រសែភ្នែករបស់ប្រជាជនអាមេរិក ដែលតែងគិតថា អាមេរិកជាមហាអំណាចគំរូដែលមិនអាចបន្ទោសបាន។ សំណុំរឿងអន្តរជាតិមួយទៀត ដែលធ្វើឲ្យរដ្ឋបាលលោកចូ បៃដិន មានរូបភាពមិនល្អដែរ វិបត្តិអ៊ុយក្រែន។ នៅថ្ងៃម្សិលមិញ សេតវិមានបានចេញមុខមកបកស្រាយ ឡើងវិញ បន្ទាប់ពីលោកចូ បៃដិន បាននិយាយថា រុស្ស៊ី ប្រហែលជាអាចចូលឈ្លានពានក្នុងទ្រង់ទ្រាយតូច នៅអ៊ុយក្រែន។ ហើយក្នុងពេលនោះ ប្រទេសលោកខាងលិច ប្រហែលជានឹងមិនអន្តរាគមន៍លូកដៃស្រុះគ្នាជួយអ៊ុយក្រែន។ សមាជិកព្រឹទ្ធសភាមកពីគណបក្សសាធារណរដ្ឋ បានចេញមុខរិះគន់ភ្លាមៗថា រដ្ឋបាលលោកចូ បៃដិនទន់ខ្សោយ នៅចំពោះមុខការគំរាមរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ