អាមេរិកឈប់នាំចូលទំនិញផលិតនៅស៊ីនជាំងនិងដាក់ទណ្ឌកម្មក្រុមហ៊ុនបច្ចេកវិទ្យាចិន
ជាប់ចោទថារំលោភសិទ្ធិពលរដ្ឋជនជាតិភាគតិចអ៊ុយហ្គួរ សហរដ្ឋអាមេរិក បានរឹតបន្តឹងវិធានការ និងទណ្ឌកម្មប្រឆាំងចិនកាន់តែខ្លាំងឡើង។ នៅថ្ងៃព្រហស្បតិ៍ទី ១៦ធ្នូនេះ អាមេរិកចេញច្បាប់ហាមឃាត់ការនាំចូលទំនិញផលិតនៅស៊ីនជាំងផង និងបានប្រកាសដាក់ទណ្ឌកម្មលើក្រុមហ៊ុនបច្ចេកវិទ្យា ធំៗរបស់ចិនចំនួន៨ទៀត។
ចុះផ្សាយនៅថ្ងៃ៖
ស្តាប់ - ០១:៤១
ក្រសួងពាណិជ្ជកម្មអាមេរិកបានបញ្ចេញឈ្មោះក្រុមហ៊ុនឯកជនចិន ក្នុងវិស័យបច្ចេកវិទ្យាយោធានិងតាមដាន ចំនួន៣៧ ក្នុងបញ្ជីខ្មៅ ដែលត្រូវកំរិតការនាំចូល ព្រោះក្រុមហ៊ុនទាំងនេះមានសកម្មភាពផ្ទុយនឹងនយោបាយការបរទេស និងផលប្រយោជន៍សន្តិសុខអាមេរិក។ បន្ទាប់មក អាមេរិកបាន ហាមឃាត់មិនឱ្យពលរដ្ឋអាមេរិករកស៊ីនិងធ្វើវិនិយោគជាមួយក្រុមហ៊ុនបច្ចេកវិទ្យាជាន់ខ្ពស់របស់ចិនចំនួន៨ក្រុមហ៊ុន ក្នុងនោះ មានមួយជាក្រុមហ៊ុនផលិតដ្រូនដ៏ធំជាងគេបំផុតនៅលើពិភពលោក DJI។ ក្នុងថ្ងៃព្រហស្បតិ៍ទី ១៦ធ្នូម្សិលមិញដដែល ព្រឹទ្ធសភាអាមេរិក បានអនុម័តជាឯកច្ឆ័ន្ទ ច្បាប់ហាមឃាត់ ការនាំចូលទំនិញផលិតនៅស៊ីនជាំង ដោយរដ្ឋបណ្ឌិតសភាវិទ្យាសាស្ត្រសុខាភិបាលយោធា និងដោយវិទ្យាស្ថានជីវបច្ចេកវិទ្យាចំនួន ១១។ សម្រាប់ព្រឹទ្ធសភាអាមេរិក នេះជាទណ្ឌកម្មដើម្បីប្រយុទ្ធប្រឆាំងនឹងការចាប់បង្ខំមនុស្សឱ្យធ្វើការ និងរំលោភសិទ្ធិពលរដ្ឋជនជាតិភាគតិចអ៊ុយហ្គួរ។
ដោយគ្មានបង្អង់ ចិនបានបញ្ចេញតបវិញនៅថ្ងៃសុក្រនេះ ប្រឆាំងដាច់ខាតនឹងវិធានការអាមេរិក និងបានប្តេជ្ញាចាត់វិធានការតបតវិញ ដើម្បីរក្សាប្រយោជន៍ក្រុមហ៊ុនរបស់ចិន។ នៅចំពោះមុខអ្នកសារព័ត៌មាន អ្នកនាំពាក្យក្រសួងការបរទេសចិន បានបន្ទោសអាមេរិកថាបានប្រឌិតលេសគ្រប់បែបយ៉ាង និងប្រើវិធីត្រួតពិនិត្យការនាំចូលហួសប្រមាណ ដើម្បីគាបក្រុមហ៊ុនចិន។
សូមបញ្ជាក់បន្ថែមថា នៅក្នុងបញ្ជីទណ្ឌកម្មថ្មីនេះ សហរដ្ឋអាមេរិកមិនត្រឹមតែ ដាក់ដៅលើក្រុមហ៊ុនចិនទេ ក្រុមហ៊ុនបច្ចេកវិទ្យានៅហ្សកហ្ស៊ី ម៉ាឡេស៊ី និងតួកគី ក៏មានជាប់ក្នុងបញ្ជីខ្មៅដែរ។ បញ្ជីទណ្ឌកម្មនេះនឹងចាប់មានសុពលភាព នៅពេលប្រធានាធិបតី ចូ បៃដិន ចុះហត្ថលេខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ