វិបត្តិអ៊ុយក្រែន៖ អាមេរិកគំរាមសម្លាប់គម្រោងបំពង់បង្ហូរឧស្ម័នរុស្ស៊ី Nord Stream 2
ចុះផ្សាយនៅថ្ងៃ៖
ស្តាប់ - ០៨:១០
នៅក្នុងវិបត្តិអ៊ុយក្រែន ក្រុមប្រឹក្សាសន្តិសុខអង្គការសហប្រជាជាតិនឹងបើកកិច្ចប្រជុំបន្ទាន់នៅថ្ងៃចន្ទ ដើមសប្តាហ៍ក្រោយ ទៅតាមការស្នើឡើងរបស់សហរដ្ឋអាមេរិក។ នៅក្នុងកិច្ចសន្ទនាតាមទូរស័ព្ទ ជាមួយប្រធានាធិបតីអ៊ុយក្រែន កាលពីថ្ងៃព្រហស្បតិ៍ទី២៧ មករា ប្រធានាធិបតីអាមេរិក លោកចូ បៃដិន បាននិយាយថា រុស្ស៊ី នឹងអាចចូលឈ្លានពានអ៊ុយក្រែន នៅខែកុម្ភៈខាងមុខ។ កាលលើកឡើងរបស់ប្រធានាធិបតីអាមេរិកធ្វើឡើង នៅថ្ងៃដែល រុស្ស៊ីបានសំដែងការខកចិត្តខ្លាំង បន្ទាប់ពីអាមេរិកបដិសេធមិនព្រមធ្វើតាមសំណើចង់បានរបស់រុស្ស៊ី ស្តីពីការបដិសេធសមាជិកភាពរបស់អ៊ុយក្រែន ក្នុងអង្គការអូតង់។
កាលពីថ្ងៃ ព្រហស្បតិ៍ទី ២៧ មករា ប្រធានាធិបតីអាមេរិកបាននិយាយទូរស័ព្ទជាមួយប្រធានាធិបតីអ៊ុយក្រែន ដែលនៅក្នុងនោះ លោកបានវាយតម្លៃថា រុស្ស៊ីនឹងអាចឈ្លានពានចូលអ៊ុយក្រែន នៅខែកុម្ភៈខាងមុខ។ ប៉ុន្តែ ជាមួយគ្នានោះ លោកប្រធានាធិបតីចូ បៃដិនបាននិយាយប្រាប់សមភាគី អ៊ុយក្រែន ថា អាមេរិកនឹងចាត់វិធានការខ្លាំង បើសិនរុស្ស៊ីឈ្លានពានអ៊ុយក្រែន។ លើសពីនោះ លោកចូ បៃដិនបានពិភាក្សាពីការផ្តល់ជំនួយសេដ្ឋកិច្ចបន្ថែមដល់អ៊ុយក្រែន។
នៅថ្ងៃព្រហស្បតិ៍ដដែល ដើម្បី ដាក់សម្ពាធលើរុស្ស៊ី អាមេរិកបានទាមទារឲ្យក្រុមប្រឹក្សាសន្តិសុខអង្គការសហប្រជាជាតិ កោះប្រជុំបន្ទាន់ ដើម្បីនិយាយពីវិបត្តិអ៊ុយក្រែន ដែលកំពុងរងការគំរាមកំហែងឈ្លានពានពីសំណាក់រុស្ស៊ី។
ប៉ុន្តែ ដោយសារតែរុស្ស៊ីជាសមាជិកអចិន្ត្រៃយ៍ និងមានសិទ្ធិវេតូ នៅក្រុមប្រឹក្សាសន្តិសុខអង្គការសហប្រជាជាតិ នោះ គេគ្មានសង្ឃឹមថា ក្រុមប្រឹក្សាសន្តិសុខនឹងអាចចេញសេចក្តីសម្រេចណាមួយ ដើម្បីដាក់ទណ្ឌកម្មលើរុស្ស៊ីនោះទេ។
រឿងនេះយើងធ្លាប់ឃើញកន្លងមករួចហើយ ជាពិសេស ចាប់តាំងពីរុស្ស៊ី កាត់យកទឹកដី គ្រីមេរបស់អ៊ុយក្រែននៅឆ្នាំ ២០១៤មក រុស្ស៊ីបានលើកដៃវេតូរហូត មិនឲ្យក្រុមប្រឹក្សាសន្តិសុខអង្គការសហប្រជាជាតិ បោះឆ្នោត ចេញសម្រេចដាក់ទណ្ឌកម្មណាមួយលើខ្លួននោះទេ។
អាមេរិកដឹងថា រុស្ស៊ីនឹងប្រើសិទ្ធិវេតូរបស់ខ្លួន មិនឲ្យក្រុមប្រឹក្សាចេញសេចក្តីសម្រេចណាមួយប្រឆាំងខ្លួន ទាក់ទងនឹងវិបត្តិអ៊ុយក្រែនលើកនេះ។ ប៉ុន្តែ នៅតែទាមទារឲ្យមានកិច្ចប្រជុំបន្ទាន់របស់ក្រុមប្រឹក្សាសន្តិសុខ។
តាមឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfieldដែលជាអ្នកដាក់សំណើឲ្យមានការកោះប្រជុំនៅក្រុមប្រឹក្សាសន្តិសុខ នៅថ្ងៃចន្ទ បើទោះបីជារុស្ស៊ីមានសិទ្ធិវេតូ ប៉ុន្តែ រុស្ស៊ីនឹងត្រូវគេដាក់ឲ្យឯកោ។ បើសិនគ្រប់ប្រទេសរួបរួមគ្នា នោះសំឡេងវេតូរបស់រុស្ស៊ីនឹងចុះខ្សោយ ដូចក្នុងករណីបោះឆ្នោតលើរឿង កាត់ទឹកដីគ្រីមេ។
នៅក្រោយ រុស្ស៊ី កាត់យកទឹកដីគ្រីមេ របស់អ៊ុយក្រែន នៅឆ្នាំ ២០១៤ ទោះបីជាក្រុមប្រឹក្សាសន្តិសុខ មិនអាចចេញសេចក្តីសម្រេចថ្កោលទោស រុស្ស៊ី ប៉ុន្តែ រុស្ស៊ីបាននៅ ឯកោ ព្រោះមានសំឡេងបោះឆ្នោតប្រឆាំង រុស្ស៊ី ដល់ទៅ ១៣សំឡេង ដោយមានតែរុស្ស៊ីម្នាក់ឯងប៉ុណ្ណោះ ដែលបោះឆ្នោតប្រឆាំង និងមានសំឡេងអនុប្បវាទតែមួយ គឺចិន។
ឯកអគ្គរដ្ឋទូតអាមេរិកសង្ឃឹមថា គ្រប់សមាជិករបស់ក្រុមប្រឹក្សាសន្តិសុខប្រាកដជាមិនចង់ឃើញរុស្ស៊ី ឈ្លានពានអ៊ុយក្រែន បង្កអសន្តិសុខក្នុងពិភពលោក។ ដូច្នេះ គេនឹងបោះឆ្នោតប្រឆាំងរុស្ស៊ី នៅក្នុងកិច្ចប្រជុំ នៅចន្ទ ដើមសប្តាហ៍ក្រោយនេះ។
ចិនគាំទ្រការព្រួយបារម្ភរបស់រុស្ស៊ី នៅចំពោះមុខការពង្រីកដែនយោធារបស់អូតង់
ចិនបានបង្ហាញជំហររបស់ខ្លួនរួចហើយ នៅក្នុងអំឡុងកិច្ចសន្ទនាតាមទូរស័ព្ទរវាងប្រមុខការបរទេសចិន និងអាមេរិក កាលពីថ្ងៃម្សិលមិញ។ ម្សិលមិញ ប្រមុខការទូតអាមេរិក លោកអង់តូនី ប្លីងកិនបានស្វែងរកជំនួយពីចិន ដើម្បីឲ្យទៅបញ្ចុះបញ្ចូលរុស្ស៊ីព្រោះថា ការរំលោភឈ្លានពានណាមួយរបស់រុស្ស៊ីទៅលើប្រទេសអ៊ុយក្រែន នឹងបង្កឲ្យមានគ្រោះថ្នាក់ដល់សន្តិសុខពិភពលោក និងជាពិសេស សេដ្ឋកិច្ច ដែលជាសរសរពឹងផ្អែកសំខាន់របស់ប្រទេសចិន។
ប្រមុខការទូតចិន យល់ស្រប និងអំពាវនាវឲ្យគ្រប់ភាគីអត់ធ្មត់ កុំធ្វើសកម្មភាពទាំងឡាយណាដែលរឹតតែញុះញង់ បង្កឲ្យមានវិបត្តិកាន់តែតានតឹង។ ប៉ុន្តែ យ៉ាងណាក៏ដោយ រដ្ឋមន្រ្តីការបរទេស ចិន លោកវ៉ាងយី បានបញ្ជាក់ទៅសមភាគីអាមេរិកថា ចិនគាំទ្រ ការយល់ឃើញ និងក្តីបារម្ភរបស់រុស្ស៊ី អំពីសន្តិសុខរបស់ខ្លួន នៅចំពោះមុខការពង្រីកដែនឥទ្ធិពលយោធារបស់ប្រទេសលោកខាងលិច ទៅក្នុងតំបន់អឺរ៉ុបខាងកើត ដែលជាប់ព្រំដែនរុស្ស៊ី។
ដោយមិននិយាយចំៗឈ្មោះ អង្គការអូតង់ ប្រមុខការទូតចិន បាននិយាយថា ការពង្រាយតាំងទី កងទ័ពរបស់ក្រុមប្រទេសណាមួយនោះ មិនប្រាកដថា ជាការធានាសន្តិសុខ នៅក្នុងពិភពលោកនោះទេ។
ជាមួយការអះអាងយ៉ាងដូច្នេះ រុស្ស៊ី គឺបានទទួលការគាំទ្រជាផ្លូវការពីប្រទេសចិន។ នេះមិនមែនជារឿងថ្មីនោះទេ។ រុស្ស៊ី និងចិន ដែលរងការរិះគន់ដូចគ្នា ពីអាមេរិក និងសហភាពអឺរ៉ុប ដោយសារសំណុំរឿងរំលោភសិទ្ធិមនុស្ស បានខិតចូលជិតគ្នាកាន់តែខ្លាំង។ សម្ព័ន្ធភាព ការរឹតចំណងមិត្តភាពរវាងចិន និងរុស្ស៊ីនឹងស្តែងកាន់តែច្បាស់ នៅខែក្រោយនេះ នៅពេលប្រធានាធិបតីរុស្ស៊ីនឹងក្លាយជាមេដឹកនាំសំខាន់ជាងគេដែលទៅចូលរួម ឈរនៅលើវេទិកា ក្នុងការប្រកួតកីឡាអូឡាំពិករដូវរងា នៅទីក្រុងប៉េកាំង ក្នុងខណៈពេលដែល មេដឹកនាំអាមេរិក និងប្រទេសលោកខាងលិចផ្សេងទៀត ពហិកាមិនបញ្ជូនមន្រ្តីរដ្ឋាភិបាលទៅប៉េកាំង ដើម្បីដាក់សម្ពាធរដ្ឋអំណាចចិន ក្នុងរឿង រំលោភសិទ្ធិមនុស្សនៅខេត្តស៊ីនជាំង។
នៅក្នុងឱកាសជួបប្រជុំទ្វេភាគីជាមួយប្រធានាធិបតីចិន នៅទីក្រុងប៉េកាំង នៅដើមខែកុម្ភៈ ប្រធានាធិបតី រុស្ស៊ីលោកវ្លាឌីមៀរ ពូទីន នឹងពិភាក្សាសំខាន់ពីទំនាក់ទំនងសេដ្ឋកិច្ច រវាងប្រទេសទាំងពីរ ជាពិសេស គឺការផ្គត់ផ្គង់ឧស្ម័ន ដែល រុស្ស៊ីធានាលក់ទៅឲ្យប្រទេសចិន។ អាមេរិកធ្លាប់បានប្រាប់ទៅចិន ហើយថា សង្រ្គាមឈ្លានពានរបស់រុស្ស៊ី ទៅលើអ៊ុយក្រែន នឹងធ្វើឲ្យ ពិភពលោកកើតមានវិបត្តិថាមពល ដែលនេះជាបញ្ហាធំណាស់សម្រាប់ចិន ដែលត្រូវការថាមពលឧស្ម័នសម្រាប់សេដ្ឋកិច្ច។
អាមេរិកបង្កើនការដាក់សម្ពាធលើរុស្ស៊ី ដោយគំរាមសម្លាប់គម្រោងបំពង់បង្ហូរហ្គាសNord Stream 2ដែលជាប្រភពចំណូលសំខាន់របស់រុស្ស៊ី
តាំងពីដំបូងទី អាមេរិកបានគំរាមដាក់ទណ្ឌកម្មសេដ្ឋកិច្ចដែលនឹងធ្វើឲ្យរុស្ស៊ីខាតបង់ធ្ងន់ធ្ងរ ប្រសិនបើរុស្ស៊ីហ៊ានចូលឈ្លានពានអ៊ុយក្រែន។ កន្លងមក ប្រធានាធិបតីអាមេរិកធ្លាប់ពន្លយថា អាមេរិកនឹងអាចដាក់ទណ្ឌកម្មសេដ្ឋកិច្ចផ្ទាល់ទៅលើប្រធានាធិបតីរុស្ស៊ី លោកវ្លាឌីមៀរ ពូទីន ឬហាមមិនឲ្យក្រុមហ៊ុនរុស្ស៊ីប្រើប្រាស់លុយដុល្លារ សម្រាប់ការដោះដូរអន្តរជាតិជាដើម។ ចុងក្រោយនេះ គឺគម្រោងបំពង់បង្ហូរឧស្ម័ន Nord Stream 2ដែលជាផ្ទាំងស៊ីបដាក់ទណ្ឌកម្មមួយទៀតរបស់អាមេរិក។ គម្រោងបំពង់បង្ហូរឧស្ម័ន ដែលអាមេរិកបានប្រឆាំងតាំងពីដំបូងទី ក្នុងហេតុផលថា វានឹងផ្តល់ប្រយោជន៍សេដ្ឋកិច្ចដល់រុស្ស៊ី។
កន្លងមក រឿងគម្រោងបំពង់បង្ហូរឧស្ម័ន Nord Stream 2ដែលតភ្ជាប់ពីរុស្ស៊ី ទៅអាល្លឺម៉ង់ មិនត្រូវបានអាមេរិកលើកមកនិយាយនោះទេ ព្រោះថារឿងនេះវាមានពាក់ព័ន្ធផ្ទាល់នឹងផលប្រយោជន៍របស់អាល្លឺម៉ង់ដែរ។ បំពង់បង្ហូរឧស្ម័ន Nord Stream 2ដែលចំណាយពេលសាងសង់ អស់៥ឆ្នាំ និងទឹកប្រាក់ជាង ១១ពាន់លានអឺរ៉ូ នឹងក្លាយជាបំពង់បង្ហូរឧស្ម័នសំខាន់មួយ ទៀត ដែលបង្ហូរឧស្ម័នផ្ទាល់ពីទឹកដីរុស្ស៊ី ទៅអាល្លឺម៉ង់ ដោយឆ្លងកាត់សមុទ្របាល់ទិក។
អាល្លឺម៉ង់ធ្លាប់ជំទាស់ និងព្យាយាម បង្វែរមិនឲ្យគម្រោងការបំពង់បង្ហូរឧស្ម័នអាល្លឺម៉ង់ រុស្ស៊ី មកឡូកឡំក្នុងរឿងជម្លោះនយោបាយអន្តរជាតិនោះទេ។ ប៉ុន្តែ លើកនេះ អាមេរិកចេញមុខ គំរាមសម្លាប់គម្រោងលក់ឧស្ម័នរបស់រុស្ស៊ី ទៅអាល្លឺម៉ង់ នៅបន្ទាប់ពី រដ្ឋាភិបាលថ្មីរបស់អាល្លឺម៉ង់ បើកភ្លើងខៀវ។ តាមអ្នកនាំពាក្យរបស់ក្រសួងការបរទេសអាល្លឺម៉ង់ បញ្ជីដាក់ទណ្ឌកម្មសេដ្ឋកិច្ចរបស់ប្រទេសលោកខាងលិចទៅលើរុស្ស៊ី ក្នុងករណីរុស្ស៊ី ចូលឈ្លានពានអ៊ុយក្រែន មានផងដែរគម្រោងបំពង់បង្ហូរឧស្ម័ន Nord Stream 2។
អាល្លឺម៉ង់ ក៏ដូចជារុស្ស៊ីនឹងអាចខាតបង់ប្រយោជន៍ បើសិនរឿងនេះកើតឡើងមែន។ ប៉ុន្តែ សួរថា តើពាក្យគំរាម បញ្ឈប់ការទិញឧស្ម័នពីរុស្ស៊ីនឹងធ្វើឲ្យរុស្ស៊ីចុះចាញ់ដែរឬទេ។ រហូតមកពេលនេះ រុស្ស៊ីនៅមិនទាន់ប្រតិកម្ម ឬបន្ទន់ជំហរណាមួយនោះទេ។ ក្រៅតែអឺរ៉ុប រុស្ស៊ីនៅតែ មានអតិថិជនធំ ដែលនៅត្រូវការទិញឧស្ម័នរុស្ស៊ី នោះគឺចិន។
កិច្ចសន្ទនារវាងប្រធានាធិបតីបារាំង និងរុស្ស៊ី ជាការប៉ុនប៉ងចុងក្រោយ នៃការចរចាការទូត?
នៅក្រោយអាមេរិកប្រកាសបិទផ្លូវ មិនធ្វើតាមការទាមទាររបស់រុស្ស៊ី ផ្លូវចរចាការទូតដើម្បីដោះស្រាយភាពតានតឹងជាមួយរុស្ស៊ី ក្នុងសំណុំរឿងអ៊ុយក្រែន កាន់តែរួញតូចទៅៗ។ នៅថ្ងៃសុក្រទី ២៩មករា ប្រធានាធិបតី បារាំង ត្រូវជួបនិយាយតាមទូរស័ព្ទជាមួយប្រធានាធិបតីរុស្ស៊ី លោកវ្លាឌីមៀរពូទីន ដើម្បី កាត់បន្ថយភាពតានតឹងជាមួយរុស្ស៊ី ក្នុងសំណុំរឿងអ៊ុយក្រែន។ អាចថា ជាឱកាសចុងក្រោយ ដើម្បីបញ្ចុះបញ្ចូលកុំឲ្យរុស្ស៊ីចាត់វិធានការយោធាណាមួយទៅលើអ៊ុយក្រែន។ ប៉ុន្តែ ដោយមើលទៅលើប្រវត្តិទំនាក់ទំនងរវាងប្រទេសទាំងពីរ បារាំង រុស្ស៊ី ដែលធ្លាប់រកាំរកូសនឹងគ្នាដោយសារសំណុំរឿងរំលោភសិទ្ធិមនុស្សនៅរុស្ស៊ី និងការបំពុលមេដឹកនាំប្រឆាំងរុស្ស៊ី នោះ គេមិនសង្ឃឹមច្រើនថា ជំនួបតាមទូរស័ព្ទ រវាងប្រធានាធិបតីបារាំង និងមេដឹកនាំរុស្ស៊ីនឹងផ្តល់លទ្ធផលផ្លែផ្កានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ