អាមេរិកប្រកាសត្រៀមទ័ពទៅពង្រឹងអូតង់ ក្នុងករណីរុស្ស៊ីចូលឈ្លានពានអ៊ុយក្រែន
អាមេរិក និងសម្ព័ន្ធមិត្តអឺរ៉ុបបានបង្ហាញជំហរឯកភាពគ្នាទាំងស្រុង នៅចំពោះមុខការគំរាមកំហែងរបស់រុស្ស៊ី ទៅលើប្រទេសអ៊ុយក្រែន។ នៅក្នុងកិច្ចប្រជុំតាមវីដេអូ កាលពីថ្ងៃចន្ទទី ២៤មករា ប្រធានាធិបតីអាមេរិក លោកចូ បៃដិន និងមេដឹកនាំអឺរ៉ុបបានបញ្ជាក់ពីសារៈសំខាន់នៃដំណោះស្រាយការទូតជាមួយរុស្ស៊ី ក្នុងសំណុំរឿងអ៊ុយក្រែន។ ប៉ុន្តែ ជាមួយគ្នានោះ គេក៏បានព្រមានរុស្ស៊ីពីផលវិបាកសេដ្ឋកិច្ចធ្ងន់ធ្ងរ បើសិនរុស្ស៊ីចូលឈ្លានពានអ៊ុយក្រែន។ នៅក្នុងសេចក្តីប្រកាសព័ត៌មាន សេតវិមានបានលើកឡើងផងដែរពីការពង្រឹងសន្តិសុខនៅជួរសមរភូមិភាគខាងកើតរបស់អង្គការអូតង់។ នៅថ្ងៃចន្ទដដែល ក្រសួងការពារជាតិអាមេរិកបានប្រកាសដាក់ទ័ព ៨៥០០នាក់ ឲ្យស្ថិតក្នុងស្ថានភាពប្រុងជើងការណ៍ ដើម្បីត្រៀមទៅជួយអូតង់ ក្នុងករណីមានការរំលោភឈ្លានពានពីរុស្ស៊ី ទៅលើប្រទេសអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ដោយសារភាពតានតឹងជាមួយរុស្ស៊ី ក្នុងសំណុំរឿងអ៊ុយក្រែន សម្ព័ន្ធអាត្លង់ទិក អូតង់បានប្រកាសដាក់កងទ័ពរបស់ខ្លួនក្នុងស្ថានភាពអាសន្ន និងបានបញ្ជូន បន្ថែមនាវា និងយន្តហោះចម្បាំង ទៅពង្រឹងសន្តិសុខនៅតំបន់អឺរ៉ុបខាងកើត។ នៅក្នុងសេចក្តីប្រកាសព័ត៌មានកាលពីថ្ងៃចន្ទ អគ្គលេខាធិការអង្គការអូតង់ លោកJens Stoltenberg បានអះអាងថា អូតង់នឹងចាត់គ្រប់វិធានការដើម្បីការពារប្រទេសសម្ព័ន្ធមិត្ត ដែលនៅក្នុងនោះមានផងដែរ ការពង្រឹងកម្លាំងនៅភាគខាងកើត។
បច្ចុប្បន្ន អូតង់ពង្រាយទ័ពប្រមាណ ៤០០០នាក់ និងដាក់ប្រចាំការ រថក្រោះ ប្រព័ន្ធខែលមីស៊ីល និងកម្លាំងស៊ើបការណ៍ពិសេស នៅតាមប្រទេសអឺរ៉ុបខាងកើត ដែលមានដូចជា ប៉ូឡូញ លីទុយអានី អេស្តូនីនិងឡេតូនី។ តាមអង្គការអូតង់ បារាំង អេស្ប៉ាញ ដាណឺម៉ាក ហូឡង់ ដែលជាសមាជិករបស់អូតង់ កំពុងពិចារណាបញ្ជូនទ័ព និងនាវា យន្តហោះចម្បាំងទៅអឺរ៉ុបខាងកើត។
នៅថ្ងៃចន្ទម្សិលមិញដែរ ក្រសួងការពារជាតិអាមេរិកបានប្រកាសដាក់ទ័ព ៨៥០០នាក់ឲ្យស្ថិតក្នុងស្ថានភាពប្រុងជើងការណ៍ខ្ពស់។ មានន័យថា ក្នុងរយៈពេលតែ ៥ថ្ងៃ ពួកគេអាចបើកប្រតិបត្តិការរហ័ស ចេញ ទៅអន្តរាគមជួយពង្រឹងកម្លាំងអូតង់ ដែលមានទាហានចម្រុះជាតិសាសន៍ សរុប ៤ម៉ឺននាក់។
ដោយប្រកាសពីលទ្ធភាពបញ្ជូនទ័ពទៅពង្រឹងកម្លាំងទ័ពរបស់អូតង់ ប្រធានាធិបតីអាមេរិកកំពុងដាក់សម្ពាធទៅលើរុស្ស៊ី។ នៅក្នុងកិច្ចប្រជុំជាមួយថ្នាក់ដឹកនាំអឺរ៉ុប តាមវីដេអូសន្និសីទកាលពីថ្ងៃចន្ទ ប្រធានាធិបតីអាមេរិកបាននិយាយពីជំហរឯកភាពគ្នារបស់ប្រទេសលោកខាងលិច ដើម្បី ចាត់វិធានការប្រឆាំងរុស្ស៊ី ក្នុងករណីរុស្ស៊ីចូលវាយប្រហារឈ្លានពានអ៊ុយក្រែន។
ម៉ូស្គូតាមរយៈ អ្នកនាំពាក្យរដ្ឋាភិបាលបានចាត់ទុកសកម្មភាពពង្រាយទ័ពអូតង់ថា ជារោគវក់ចិត្ត។ ម៉ូស្គូបានបន្ទោសផងដែរ ប្រទេសលោកខាងលិចថា ជាអ្នកបង្កហេតុ ធ្វើឲ្យវិបត្តិកាន់តែតានតឹង។ សម្រាប់រុស្ស៊ី ការពង្រឹងទ័ពរបស់អូតង់ នៅក្នុងតំបន់បានស្តែងកាន់តែច្បាស់ថា រុស្ស៊ីជាជនរងគ្រោះ ប៉ុន្តែមិនមែនជាអ្នកបៀតបៀន រំលោភឈ្លានពានប្រទេសណាមួយនោះទេ។
រុស្ស៊ីត្រូវបានអ៊ុយក្រែន និងប្រទេសលោកខាងលិចចោទប្រកាន់ថា នឹងអាចឈ្លានពានអ៊ុយក្រែន នៅដើមឆ្នាំនេះ។ នៅមុនមានព័ត៌មានស្តីពីការពង្រាយទ័ពជាង ១សែននាក់ នៅព្រំដែនជាមួយអ៊ុយក្រែន រុស្ស៊ីធ្លាប់បានព្រមានដែរថា នឹងចាត់វិធានការយោធា បើសិន បស្ចឹមលោកមិនព្រមធ្វើសំបុត្រ ដែលធានា សន្តិសុខឲ្យរុស្ស៊ី តាមរយៈ ការឈប់ពង្រីកដែនឥទ្ធិពលទៅខាងកើត ដែលនៅក្នុងនោះ មានផងដែរ ការបដិសេធមិនឲ្យអ៊ុយក្រែនចូលជាសមាជិករបស់អូតង់។
នៅប៉ុន្មានសប្តាហ៍មកនេះ ការចរចាការទូតរវាងអាមេរិក និងរុស្ស៊ី ស្តីពីសំណុំរឿងអ៊ុយក្រែន មិនបានផ្តល់លទ្ធផលអ្វីនោះទេ។ យ៉ាងណាក៏ដោយ ប្រភពមន្រ្តីទូតអឺរ៉ុបបានពន្លយឲ្យដឹងថា ប្រមុខការទូតរុស្ស៊ី និងអាមេរិក នឹងជួបប្រជុំគ្នាបន្តទៀត ដើម្បីសម្រាលភាពតានតឹង។
ប្រភពមន្រ្តី រុស្ស៊ីវិញបានលើកឡើងពីកិច្ចប្រជុំថ្នាក់ទីប្រឹក្សានយោបាយរបស់រុស្ស៊ី អាល្លឺម៉ង់ បារាំង និងអ៊ុយក្រែន ក្នុងទម្រង់ ណ័ម៉ង់ឌី នៅថ្ងៃពុធទី ២៦មករា។ តាមវិមានប្រធានាធិបតីបារាំង លោកអេម៉ានុយអែលម៉ាក្រុងនឹងជួបសន្ទនាតាមទូរស័ព្ទ ជាមួយប្រធានាធិបតីអ៊ុយក្រែន និងប្រធានាធិបតី រុស្ស៊ី លោកវ្លាឌីមៀរ ពូទីន ដែលនៅក្នុងនោះ លោកនឹងស្នើផ្លូវដោះស្រាយមួយដើម្បីបន្ធូរបន្ថយភាពតានតឹងក្នុងសំណុំរឿងអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ