ទៅជួបផ្ទាល់មេដឹកនាំរុស្ស៊ី លោកម៉ាក្រុងកំពុងធ្វើបេសកកម្មការទូតដ៏ប្រថុយប្រថាន
ចុះផ្សាយនៅថ្ងៃ៖
ស្តាប់ - ០៧:៣៣
ប្រធានាធិបតី បារាំងទៅជួបផ្ទាល់ប្រធានាធិបតីរុស្ស៊ី នៅទីក្រុងម៉ូស្គូ នៅថ្ងៃចន្ទទី ៧ កុម្ភៈឆ្នាំ ២០២២។ ចំណែកនាយករដ្ឋមន្រ្តីអាល្លឹម៉ង់ ទៅវ៉ាស៊ីនតោន ដើម្បីជួបពិភាក្សាជាមួយប្រធានាធិបតីអាមេរិក មុននឹងត្រលប់មកជួបប្រធានាធិបតីរុស្ស៊ី និងអ៊ុយក្រែន នៅសប្តាហ៍ក្រោយ។ បន្ទាប់ពីអាមេរិកបដិសេធ ការទាមទាររបស់រុស្ស៊ី មេដឹកនាំអឺរ៉ុបខំប្រឹងសម្រុកយុទ្ធនាការការទូត ដើម្បីបន្ធូរភាពតានតឹងជាមួយរុស្ស៊ី ជុំវិញ វិបត្តិអ៊ុយក្រែន។ អ៊ុយក្រែន ដែល មន្រ្តីអាមេរិកវាយតម្លៃ ថា នឹងអាចរងការឈ្លានពានក្នុងទ្រង់ទ្រាយធំរបស់រុស្ស៊ី នាពេលឆាប់ៗខាងមុខ។
ប្រធានាធិបតីបារាំង លោកអេម៉ានុយអែលម៉ាក្រុងចេញដំណើរនៅថ្ងៃចន្ទ នេះ ទៅទីក្រុងម៉ូស្គូ ទៅជួបលោកប្រធានាធិបតី រុស្ស៊ី វ្លាឌីមៀរ ពូទីន។ តាមគម្រោង មេដឹកនាំបារាំង និងរុស្ស៊ី នឹងជួបគ្នានៅ ម៉ោង៤រសៀល ម៉ោងនៅប្រទេសបារាំង ត្រូវនឹងម៉ោង ១០ យប់ ម៉ោងនៅកម្ពុជា។ តាមវិមានប្រធានាធិបតីបារាំង លោកម៉ាក្រុងទៅម៉ូស្គូ ក៏ដោយមកពីមានការអញ្ជើញផ្ទាល់របស់លោកប្រធានាធិបតី រុស្ស៊ី វ្លាឌីមៀរពូទីន។
ចាប់តាំងពីកើតមានភាពតានតឹងរវាងប្រទេសលោកខាងលិច និងរុស្ស៊ី ជុំវិញ ការចល័តទ័ពរុស្ស៊ី នៅព្រំដែនអ៊ុយក្រែន លោកប្រធានាធិបតី បារាំងអេម៉ានុយអែលម៉ាក្រុងបានជួបសន្ទនាតាមទូរស័ព្ទ ជាមួយ លោកប្រធានាធិបតី រុស្ស៊ីពូទីន ដល់ទៅ៣ដង។ លោកម៉ាក្រុងក៏ជាមេដឹកនាំប្រទេសលោកខាងលិច ដំបូងគេដែលធ្វើដំណើរទៅជួបផ្ទាល់លោកពូទីន នៅទីក្រុងម៉ូស្គូ។
តាមវិមានប្រធានាធិបតីបារាំង នៅក្នុងកិច្ចសន្ទនាតាមទូរស័ព្ទ កន្លងមក មេដឹកនាំរុស្ស៊ី លោកពូទីន បាននិយាយប្រាប់សមភាគីបារាំងថា លោករង់ចាំជួបផ្ទាល់លោកម៉ាក្រុង ដើម្បីពិភាក្សាបញ្ហាស៊ីជម្រៅ ព្រោះថា លោកម៉ាក្រុង ជាដៃគូចរចាដ៏មានគុណភាព គួរឲ្យជឿទុកចិត្ត។
លោកពូទីនអាចចង់ជួបផ្ទាល់លោកម៉ាក្រុង មកពីលោកម៉ាក្រុងកំពុងធ្វើជាប្រធានវិលជុំសហភាពអឺរ៉ុប ហើយបារាំងផ្ទាល់ក៏ជាអ្នកសម្របសម្រួលកិច្ចប្រជុំណ័រម៉ង់ឌី ស្តីពីវិបត្តិភាគខាងកើតអ៊ុយក្រែន កន្លងមក។ ប៉ុន្តែ ចំនុចនេះ ក៏នៅតែមិនទាន់គ្រប់គ្រាន់ ដើម្បី ជំរុញឲ្យប្រធានាធិបតីរុស្ស៊ីជ្រើសរើសប្រធានាធិបតីបារាំងជាដៃគូពិភាក្សានោះទេ។ លោកពូទីនជ្រើសរើសប្រធានាធិបតីបារាំង មកធ្វើជាដៃគូពិភាក្សាក៏ព្រោះតែលោកពូទីនមើលឃើញថា ផ្ទុយពីមេដឹកនាំអឺរ៉ុបផ្សេងទៀត លោកម៉ាក្រុង មានជំហរ មិនសូវតឹងផ្អឹសដាក់រុស្ស៊ីនោះទេ។
ទោះបារាំងធ្លាប់ចូលរួមជាមួយ សហគមន៍អន្តរជាតិថ្កោលទោសរុស្ស៊ី ក្នុងរឿងកាត់យកទឹកដី គ្រីមេរបស់អ៊ុយក្រែន នៅឆ្នាំ ២០១៤ ប៉ុន្តែ លោកម៉ាក្រុងបានបង្ហាញចិត្តទូលាយដាក់រុស្ស៊ី ដោយបានអំពាវនាវឲ្យគេស្តារទំនាក់ទំនងល្អឡើងវិញជាមួយរុស្សី។ ចាប់តាំងពីចូលកាន់តំណែងជាប្រធានាធិបតីបារាំងនៅឆ្នាំ ២០១៧ លោកម៉ាក្រុង បានជួបផ្ទាល់ជាមួយលោកពូទីន ញឹកញាប់ដល់ទៅ ៣ដង ដោយពីរដងនៅបារាំង និងមួយដង នៅទឹកដីរុស្ស៊ី។
ប្រធានាធិបតីរុស្ស៊ី លោកពូទីនអាចចូលចិត្ត លោកម៉ាក្រុង ដោយសារលោកយល់ឃើញថា លោកម៉ាក្រុងជាមេដឹកនាំអឺរ៉ុបដំបូងគេ ដែលទាមទារឲ្យគេបង្កើតកងកម្លាំងយោធាអឺរ៉ុប ដើម្បីកាត់បន្ថយ ការពឹងអាស្រ័យលើអូតង់ ដែលមានអាមេរិកជាអ្នកកាច់ចង្កូត។ នៅខែ មករាកន្លងទៅ លោកម៉ាក្រុងបានអំពាវនាវឲ្យអឺរ៉ុបបើកការពិភាក្សាផ្ទាល់ជាមួយ រុស្ស៊ី ដើម្បីដោះស្រាយវិបត្តិអ៊ុយក្រែន ជាជាងពឹងផ្អែកលើអាមេរិក។ ជំហររបស់ប្រធានាធិបតី បារាំង ដើម្បីដោះដៃពីអាមេរិក ធ្វើឲ្យប្រធានាធិបតីរុស្ស៊ី ពេញចិត្តពេកក្រៃ ព្រោះថា រុស្ស៊ីគ្មានប្រាថ្នាចង់ឃើញ ទ័ពអាមេរិក ទ័ពអូតង់ ឈរជើង នៅក្នុងទឹកដីអឺរ៉ុបខាងកើត។
វិមានក្រេមឡាំង ជំនួបរវាងលោកម៉ាក្រុង និងលោកពូទីន សំខាន់ ប៉ុន្តែ មិនអាចជួយដោះស្រាយវិបត្តិអ៊ុយក្រែន ដ៏ស្មុគស្មាញ
ដោយសារ នៅក្នុងក្រសែភ្នែករបស់រុស្ស៊ី លោកម៉ាក្រុង ជាដៃគូចរចា ដ៏មានគុណភាព គួរឲ្យទុកចិត្ត និងទន់ភ្លន់ មិនចេះដំឡើងសំឡេងដាក់រុស្ស៊ី ដូច្នេះ គេមិនអាចសង្ឃឹមថា ជំនួបរវាងលោកម៉ាក្រុង និងលោកពូទីននៅថ្ងៃចន្ទនេះនឹងផ្តល់លទ្ធផលធំដុំនោះទេ។
នៅថ្ងៃនេះអ្នកនាំពាក្យរបស់ប្រធានាធិបតីរុស្ស៊ី បានអះអាងរួចហើយដែរថា ជំនួបនៅថ្ងៃនេះនឹងអាចទៅដោះស្រាយវិបត្តិអ៊ុយក្រែនបានទេ ព្រោះបញ្ហាអ៊ុយក្រែន ស្មុគស្មាញ ខ្លាំងណាស់។ ប៉ុន្តែ យ៉ាងណាក៏ដោយ ម៉ូស្គូនៅតែចាត់ទុកថា ជំនួបរវាងប្រធានាធិបតីបារាំង និងរុស្ស៊ី នៅតែសំខាន់ ចាំបាច់ សម្រាប់ដោះស្រាយវិបត្តិអ៊ុយក្រែន។
មុនធ្វើដំណើរទៅជួបលោកពូទីន លោកម៉ាក្រុងផ្ទាល់ក៏ទទួលស្គាល់ដែរថា នៅក្នុងដំណើរទៅជួបលោកពូទីននៅថ្ងៃនេះ គេមិនអាចសង្ឃឹមថា នឹងជំរុញឲ្យរុស្ស៊ី ផ្លាស់ប្តូរជំហរ តែម្នាក់ឯងទេ។ នៅមុនធ្វើដំណើរទៅជួបផ្ទាល់ប្រធានាធិបតីរុស្សី លោកប្រធានាធិបតីបារាំង អេម៉ានុយអែល ម៉ាក្រុងបានលើកឡើងថា រុស្ស៊ីមានសិទ្ធិ សំដែងក្តីបារម្ភពីសន្តិសុខរបស់ខ្លួន នៅចំពោះមុខការដាក់ទ័ពរបស់អូតង់។ សម្រាប់លោកម៉ាក្រុង រុស្ស៊ីគ្មានគោលដៅចង់ឈ្លានពាន លេបយកអ៊ុយក្រែន ប៉ុន្តែ ដោយគ្រាន់តែចង់បញ្ជាក់ឲ្យអឺរ៉ុប និងអូតង់ បញ្ជាក់ជំហរ ក្នុងរឿងពង្រាយទ័ពនៅទឹកដីអឺរ៉ុប។
យ៉ាងណាក៏ដោយ លោកម៉ាក្រុងដែលកំពុងធ្វើជាប្រធានវិលជុំសហភាពអឺរ៉ុប បានសង្កត់ធ្ងន់ដែរថា ការចរចាណាមួយដើម្បីបង្កើតតុល្យភាពកម្លាំងរវាងអឺរ៉ុប និងរុស្ស៊ី ក៏នឹងមិនត្រូវធ្វើឲ្យអឺរ៉ុបចុះខ្សោយ ខាតបង់ប្រយោជន៍នោះដែរ។ តើលោកម៉ាក្រុង នឹងអាចមានទឹកមាត់ប្រៃ ដើម្បីនិយាយចរចាឲ្យប្រធានាធិបតីរុស្ស៊ីស្តាប់ចូលត្រចៀកដែរឬទេ? គេមិនច្បាស់រឿងនេះទេ។
ជារួមទៅ គេមិនអាចសង្ឃឹមអ្វីបានច្រើន ពីជំនួបរវាងលោកម៉ាក្រុង និងលោកពូទីន។ វិមានប្រធានាធិបតីបារាំងវិញ បានអះអាងថា ជំនួបនៅទីក្រុងម៉ូស្គូ នឹងជួយកាត់បន្ថយភាពតានតឹងបានមួយរយៈពេល។ គេវាយតម្លៃថា ជំនួបរវាងលោកម៉ាក្រុង និងលោកពូទីន គឺជាជំនួបដើម្បីពន្យារពេល ឲ្យស្ថានការណ៍ចុះស្ងប់ មួយរយៈ រហូតដល់ចុងខែមេសា។ ពីពេលនេះ រហូតដល់ចុងខែមេសា បារាំងមិនចង់ឃើញ មានសង្រ្គាមផ្ទុះឡើងរវាងរុស្ស៊ី និងអ៊ុយក្រែន នៅទឹកដីអឺរ៉ុប ព្រោះថា ទាំងបារាំង និងប្រទេសអឺរ៉ុបមួយចំនួន ត្រូវរៀបចំការបោះឆ្នោតជ្រើសរើសមេដឹកនាំ។
លោកប្រធានាធិបតីបារាំង ធ្វើនយោបាយការទូតដ៏ប្រថុយប្រថាន
លោកម៉ាក្រុងដំបូងគេដែលជួបបញ្ហា បើសិនលោកម៉ាក្រុងមិនអាចទទួលបានចម្លើយវិជ្ជមានណាមួយ ពីប្រធានាធិបតីរុស្ស៊ី។ លោកម៉ាក្រុង ដឹងថា នៅពេលទៅជួបលោកពូទីន ដែលបានដាក់សម្ពាធខ្លាំងលើអ៊ុយក្រែន និងអឺរ៉ុប រួចហើយតាមរយៈ ការចល័តទ័ព ជាង ១សែននាក់ នៅព្រំដែនអ៊ុយក្រែន លោកកំពុង ធ្វើបេសកកម្មការទូតដ៏ប្រថុយប្រថានខ្លាំង។ លោកម៉ាក្រុងដឹងថា លោកប្រថុយខ្លាំង ព្រោះថា បើសិនលោកត្រលប់ពីម៉ូស្គូវិញ ដោយដៃទទេ គ្មានបានលទ្ធផលអ្វីពីលោកប្រធានាធិបតីរុស្ស៊ី នោះលោកនឹងបាត់បង់ការគាំទ្រ ធ្លាក់កូដប្រជាប្រិយដែលនេះជារឿងមិនល្អទេសម្រាប់យុទ្ធនាការឃោសនាបោះឆ្នោតប្រធានាធិបតី ដែលលោកអាចឈរឈ្មោះសាជាថ្មី។
ប៉ុន្តែ យ៉ាងណាក៏ដោយ លោកម៉ាក្រុងនៅតែប្រថុយ ព្រោះថា យ៉ាងហោច លោកចង់បង្ហាញ ជាពិសេសទៅអាមេរិក និងពិភពលោកឲ្យឃើញថា បារាំងជាដៃគូសំខាន់ ដែលគេមិនអាចមើលរំលងដើម្បីដោះស្រាយវិបត្តិអ៊ុយក្រែន។ ចង់ឬមិនចង់ ចំណុចនេះនឹងធ្វើឲ្យលោកម៉ាក្រុង អាចបញ្ជាក់ប្រាប់ទៅប្រជាជនបារាំងដែលជាម្ចាស់សំឡេងឆ្នោត ថា លោកជាមេដឹកនាំមួយដែលក្លាហាន ហ៊ានប្រថុយគ្រោះថ្នាក់ ដើម្បី បញ្ជាក់តួនាទីរបស់បារាំង ក្នុងដំណើរការដោះស្រាយសំណុំរឿងអន្តរជាតិធំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ