អាល្លឺម៉ង់ជំនះរៀបចំ មហោស្រពភាពយន្តប៊ែរឡាំង ទោះករណីឆ្លងមេរោគកូវីដកំពុងកើនឡើងខ្លាំង
ចុះផ្សាយនៅថ្ងៃ៖
ស្តាប់ - ០៨:៣២
មហោស្រពភាពយន្តអន្តរជាតិ ក្រុងប៊ែរឡាំងលើកទី៧២ ត្រូវបានរៀបចំ ពីថ្ងៃទី ១០ដល់ថ្ងៃទី ២០កុម្ភៈ ជាមួយការអនុវត្តវិធានការរឹតបន្តឹងសុខភាពបំផុត ក្នុងកាលៈទេសៈកូវីដ។ នៅក្នុងមហោស្រពភាពយន្តអន្តរជាតិក្រុងប៊ែរឡាំង International film festival មានខ្សែភាពយន្តដឹកនាំរឿងដោយសមិទ្ធិករខ្មែរពីររឿងត្រូវបានជ្រើសរើសសម្រាប់ប្រកួតប្រជែងយករង្វាន់ខ្លាឃ្មុំមាសរបស់មហោស្រព។ ខ្សែភាពយន្តខ្នាតវែង ទី ១រឿង Everything will be Ok របស់លោករិទ្ធី ប៉ាន់ ត្រូវបានជ្រើសរើសសម្រាប់ពានរង្វាន់ខ្លាឃ្មុំមាសរបស់មហោស្រព ចំណែករឿង ឆ្ងាយដាច់អាល័យ របស់ អ្នកដឹកនាំរឿង លោកលី ប៉ូឡែន ត្រូវបានជ្រើសរើសសម្រាប់ការប្រកួតប្រជែងរង្វាន់ខ្សែភាពយន្តខ្នាតខ្លី។
ទម្រាំរៀបចំឲ្យចេញជាមហោស្រពភាពយន្ត ធម្មតាឡើងវិញ មានន័យថា មានការចាក់បញ្ចាំងនៅរោងកុន និងមានការចូលរួមដោយផ្ទាល់ក្រុមផលិតខ្សែភាពយន្ត ក៏ដូចជាអ្នកកាសែត អ្នករៀបចំ កម្មវិធីមហោស្រព បានជំនះឧបសគ្គ និងការរិះគន់ច្រើនណាស់។ រងការរិះគន់ដោយសារគេវាយតម្លៃថា ការរៀបចំមហោស្រពភាពយន្តប៊ែរឡាំង ដូចធម្មតាឡើងវិញ ដែលបើកឱកាសឲ្យមនុស្សរាប់រយ នាក់ ចេញចូល មកប៉ះចម្លងមេរោគកូវីដដាក់គ្នាក្នុងមហោស្រពនឹងរឹតតែធ្វើឲ្យស្ថានភាពឆ្លងកូវីដនៅអាល្លឺម៉ង់ កាន់តែធ្លាក់ធ្ងន់ធ្ងរថែមទៀត។
អាល្លឺម៉ង់ សព្វថ្ងៃ មានករណីឆ្លង ជាង ២សែននាក់ ក្នុងមួយថ្ងៃៗ។ ក្រសួងសុខាភិបាលអាល្លឺម៉ង់ធ្លាប់បានវាយតម្លៃថា អាល្លឺម៉ង់នឹងអាចជួបករណីឆ្លងខ្ពស់បំផុត នៅពាក់កណ្តាលខែ កុម្ភៈនេះទៀតផង។ បើសិនគេបណ្តោយឲ្យមនុស្សម្នារជួបជុំគ្នា ក្នុងកម្មវិធីមហោស្រពភាព គេខ្លាចថា មហោស្រពភាពយន្តប៊ែរឡាំង នឹងអាចជាកន្លែងផ្ទុះចម្លងមេរោគកូវីដដ៏ធំមួយយ៉ាងដូច្នេះដែរ។
ប៉ុន្តែ សម្រាប់អ្នករៀបចំកម្មវិធីមហោស្រព ដែលបានទទួលការគាំទ្រចេញមុខពីក្រសួងវប្បធម៌ និងប្រព័ន្ធផ្សព្វផ្សាយអាល្លឺម៉ង់ ការរៀបចំមហោស្រពដោយមានការចូលរួមដោយផ្ទាល់សំខាន់ណាស់ បន្ទាប់ពីការអាក់ខានម្តង កាលពីឆ្នាំមុន ដោយនៅពេលនោះ ដោយសារតែបញ្ហាកូវីដ មហោស្រពប៊ែរឡាំងបានរៀបចំការប្រកួតប្រជែង ខ្សែភាពយន្ត តែតាមវីដេអូអនឡាញតែប៉ុណ្ណោះ។ សម្រាប់លោកស្រី Mariette Rissenbeek នាយកប្រតិបត្តិរបស់មហោស្រព គេមិនអាចរៀបចំមហោស្រពភាពយន្តតាមអនឡាញទៀតនោះទេ ព្រោះថា ខ្សែភាពយន្តដែលគេជ្រើសរើសសម្រាប់ការប្រកួតលើកនេះ ត្រូវការអេក្រង់ធំៗ សម្រាប់ការចាក់បញ្ចាំង ដើម្បីឲ្យគណៈមេប្រយោគបានមើលឃើញច្បាស់ ពីគុណភាពរូបភាពនិងសំឡេង។
រឹតបន្តឹងនៅច្រកចេញចូល និងត្រួតពិនិត្យ បណ្ណចាក់វ៉ាក់សាំង របស់អ្នកចូលរួម
ដើម្បី ធានារៀបចំមហោស្រពភាពយន្ត ដូចធម្មតាឡើងវិញ អ្នករៀបចំមហោស្រព ប្រុងប្រយ័ត្ននិងចាត់វិធានការ តឹងរ៉ឹង ខ្លាំងណាស់ ដើម្បីកាត់បន្ថយហានិភ័យ ការចម្លងរាលដាលមេរោគកូវីដ។
រាល់អ្នកចូលរួមក្នុងមហោស្រពទាំងអស់ គឺត្រូវអនុវត្តកាតព្វកិច្ច មួយចំនួនដូចជាទី១ គេត្រូវពាក់ម៉ាស ចំពុះទា ដែលការពារខ្លាំងជាងម៉ាសធម្មតា។ ទី២ រាល់អ្នកចូលរួមត្រូវបង្ហាញ លិខិតចាក់វ៉ាក់សាំងបង្ការកូវីដ ឲ្យបាន២ដូសយ៉ាងតិច។ បន្ថែមពីលើនោះ គេត្រូវធ្វើតេស្តរុកចម្រុះរាល់ថ្ងៃ ដើម្បីរកមេរោគកូវីដ មានន័យថា នៅរាល់ចេញចូល ក្នុងទីតាំងរបស់មហោស្រព មិនថា នៅរោងភាពយន្ត នៅកន្លែងទំនាក់ទំនងរបស់មហោស្រព គឺសុទ្ធតែត្រូវឆ្លងកាត់ការត្រួតពិនិត្យ របស់បុគ្គលិកមហោស្រព ដែលមានម៉ាស៊ីនចាំស្កែនរកព័ត៌មានខាងលើហ្នឹង គឺប័ណ្ណចាក់វ៉ាក់សាំង ហើយនិងតេស្តអវិជ្ជមាន។ បើគ្មានភស្តុតាងពីរហ្នឹងទេ គឺគេមិនអាចចូលរួមក្នុងមហោស្រពបានទេ។
មួយវិញទៀត ដើម្បីកាត់បន្ថយ ការប្រមូលផ្តុំ ពពាក់ពពូននៅក្នុងមហោស្រព អ្នករៀបចំបានកាត់បន្ថយចំនួនអ្នកចូលទស្សនាពាក់កណ្តាល ចំណែកការទទួលភ្ញៀវ ពិធីជប់លឿង ផ្សារលក់ខ្សែភាពយន្តអឺរ៉ុបក៏ត្រូវលុបចោល ដើម្បីគោរពតាមគោលការណ៍ សុវត្ថិភាព ទប់ស្កាត់ការឆ្លងរាលដាលជំងឺកូវីដ។ ម្យ៉ាង គេក៏ត្រូវតម្រូវឲ្យចូលទិញ សំបុត្រ នៅលើវិបសៃតិ៍របស់មហោស្រព ទុកជាមុន ពោលគឺគ្មានការឈរតម្រង់ជួរទិញសំបុត្រផ្ទាល់ដូចមុនទៀតនោះទេ។
ចាប់តាំងពីមហោស្រពបានបើកសម្ពោធតាំងពីថ្ងៃព្រហស្បតិ៍ ទី១០កុម្ភៈ គឺមហោស្រព បានប្រព្រឹត្តទៅដោយរលូន ដោយមិនទាន់មានផ្ទុះករណីឆ្លងកូវីដធំដុំនៅឡើយទេ។
ខ្សែភាពយន្ត ផលិតឡើង ក្នុងសម័យកូវីដមានរូបរាងដូចម្តេច?
នៅក្នុងមហោស្រពប៊ែរឡាំង ខ្សែភាពយន្តដែលចេញដាក់បញ្ចាំងជាលើកទី១ ជាខ្សែភាពយន្តដែលផលិតឡើងនៅក្នុងសម័យកូវីដ សម័យដែលរដ្ឋាភិបាលប្រកាសបិទខ្ទប់ព្រំដែន បិទប្រទេស ដើម្បីកាត់បន្ថយ ការចម្លងរាលដាលមេរោគកូវីដ។
ដោយសារតែវិធានការបិទខ្ទប់ប្រទេស វិធានការរឹតបន្តឹងសុខភាព គម្រោងការថតខ្សែភាពយន្ត ហើយសូម្បីតែសាច់រឿង ក៏ត្រូវផ្លាស់ប្តូរ កែសម្រួលឡើងវិញ ដើម្បីសម្របទៅតាមស្ថានការណ៍កូវីដ ដូចជា គេត្រូវកាត់បន្ថយចំនួនអ្នកសំដែង កាត់បន្ថយកន្លែងថត និងត្រូវថតនៅក្នុងស្ទូឌីយោ ជាជាង នៅតាមទីតាំងតាមបែបធម្មជាតិ។ ឧទាហរណ៍ក្នុងករណីខ្សែភាពយន្តរឿង Peter Von Kant ដែលចាក់បញ្ចាំងនៅថ្ងៃបើកឆាកមហោស្រព កាលពីថ្ងៃព្រហស្បតិ៍ សមិទ្ធិករបារាំង លោកFrançois Ozon ម្ចាស់រឿងនេះបាននិយាយថា វិធានការរឹតបន្តឹងដើម្បី ទប់ស្កាត់ការចម្លងមេរោគកូវីដនៅប្រទេសបារាំង បានបង្ខំឲ្យលោកក៏ដូចជាអ្នកដឹកនាំរឿងផ្សេងទៀតបោះបង់ចោលគម្រោងការថតកុន ក្នុងទ្រង់ទ្រាយធំ។ ជាក់ស្តែង រឿងPeter Von Kant ដែលនិយាយពីខ្សែជីវិតរបស់អ្នកដឹកនាំរឿងអាល្លឺម៉ង់ នៅទីបំផុតត្រូវថតដំឡើងនៅ ទីក្រុងប៉ារីស គឺមិនមែននៅទីក្រុងកូឡូញប្រទេសអាល្លឺម៉ង់ដូចសាច់រឿងដើមនោះទេ។
នៅក្នុងករណីខ្សែភាពយន្តរបស់លោកប៉ាន់ រិទ្ធីរឿង Everything will be ok ដែលជ្រើសរើសសម្រាប់ការប្រកួតប្រជែងយករង្វាន់ ខ្លាឃ្មុំមាស នៅឆ្នាំនេះ គឺ គ្មានទាំងអ្នកសំដែងជាមនុស្សទៅទៀត គឺមានតែតួអង្គជារូបដីឥដ្ឋ។ អាចនិយាយបានថា ទោះមានវិបត្តិកូវីដ វិធានការរឹតបន្តឹងការធ្វើដំណើរផ្លាស់ទី និងការកាត់បន្ថយការប្រមូលផ្តុំមនុស្ស នៅកន្លែងថត លោកប៉ាន់ រិទ្ធីហាក់បានសម្របខ្លួនរួចទៅហើយសម្រាប់កាលៈទេសៈ ដែលគេតម្រូវឲ្យកាត់បន្ថយ ការប្រមូលផ្តុំមនុស្ស ព្រោះ ថា គ្រប់តួអង្គ ក្នុងសាច់រឿងរបស់លោកធ្វើពីដីឥដ្ឋ ហើយក្រុមការងាររបស់លោកថតភាគច្រើនតែក្នុងស្ទូឌីយោតែប៉ុណ្ណោះ។
Everything will be ok របស់លោកប៉ាន់ រិទ្ធី
ស្ថិតក្នុងចំណោមខ្សែភាពយន្ត ចំនួន១៨ មកពីប្រទេសចំនួន១៥ Everything will be ok របស់លោកប៉ាន់ រិទ្ធីត្រូវបានចាក់បញ្ចាំងជាផ្លូវការកាលពីថ្ងៃទី ១២ កុម្ភៈ ក្នុងក្របខ័ណ្ឌប្រកួតប្រជែងយករង្វាន់ធំ ខ្លាឃ្មុំមាសរបស់មហោស្រពប៊ែរឡាំងលើកទី៧២។ នេះជាលើកទី២ ដែលលោកប៉ាន់ រិទ្ធីបានត្រលប់មកចូលរួមក្នុងមហោស្រព បន្ទាប់ពីបានទទួលរង្វាន់ខ្សែភាពយន្តឯកសារល្អបំផុតរបស់មហោស្រពប៊ែរឡាំង កាលពី ២ឆ្នាំមុន សម្រាប់រឿង Irradiated។ ជាការកត់សំគាល់ ចំណងជើងរឿង Everything will be ok យកតាមអក្សរសរសេរនៅលើអាវយឺតរបស់ក្មេងស្រី ភូមា ម្នាក់ ដែលត្រូវបានកងទ័ពរបបសឹកភូមាបាញ់សម្លាប់ នៅក្នុងបាតុកម្មប្រឆាំងរដ្ឋប្រហារនៅភូមានៅឆ្នាំមុន។
តាមលោកប៉ាន់ រិទ្ធី លោកមានគំនិតសរសេររឿង Everything will be ok នេះឡើង ដោយផ្អែកទៅលើព្រឹត្តិការណ៍ជាច្រើនដែលកើតឡើង នៅក្នុងពិភពលោក នៅ២ឆ្នាំមកនេះ ពោលគឺចាប់តាំងពីមានវិបត្តិកូវីដ នៅឆ្នាំ ២០២០។ នៅ២ឆ្នាំមកនេះ មានហេតុការណ៍ច្រើនដែលកើតឡើង ដូចជា វិធានការបិទខ្ទប់ប្រទេស ដាក់មនុស្សឲ្យនៅក្នុងផ្ទះក្នុងហេតុផលទប់ស្កាត់ការឆ្លងមេរោគកូវីដ ការកើនឡើងនៃបាតុកម្មប្រឆាំងវិធានការបិទខ្ទប់ កាតព្វកិច្ចចាក់វ៉ាក់សាំងក្នុងហេតុផលការពារសេរីភាពបុគ្គល ការកើនឡើងនៃរូបភាពវីដេអូ សារបញ្ចេញមតិ ពាសពេញបណ្តាញសង្គម និងការកើនឡើងនៃជម្លោះនៅក្នុងពិភពលោក ការកើនឡើងនៃការប្រើអំណាចផ្តាច់ការ ដើម្បី បំបាក់សំឡេងទាមទារលទ្ធិប្រជាធិបតេយ្យ ដូចក្នុងករណីប្រទេសភូមា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ