អាល្លឺម៉ង់សម្រេចបិទព្រំដែនមួយផ្នែកទោះបីមានការរិះគន់ពីសហភាពអឺរ៉ុប
ប្រទេសអាល្លឺម៉ង់បានសម្រេចបិទព្រំដែនរបស់ខ្លួនមួយផ្នែកជាមួយសាធារណរដ្ឋឆែក ហើយនិងប្រទេសអូទ្រីសនៅថ្ងៃអាទិត្យ ១៤ កុម្ភៈ ឆ្នាំ២០២១។ បើទោះបីជាទទួលបានការរិះគន់ពីសហភាពអឺរ៉ុបយ៉ាងណាក្តី ការសម្រេចបែបនេះនៅតែធ្វើឡើងដោយសារតែអាល្លឺម៉ង់បារម្ភពីកំណើនករណីឆ្លងនៃវីរុសកូវីដ ១៩ បំប្លែងខ្លួន។
ចុះផ្សាយនៅថ្ងៃ៖
ស្តាប់ - ០២:៣៣
មន្រ្តីប៉ូលិសអាល្លឺម៉ង់ចំនួនមួយពាន់នាក់ ត្រូវបានដាក់ពង្រាយដើម្បីធានាឲ្យបាននូវការត្រួតពិនិត្យតឹងរ៉ឹងនៅតាមព្រំដែន។ វិធានការរបស់រដ្ឋាភិបាលអាល្លឺម៉ង់បែបនេះទទួលរងនូវការរិះគន់យ៉ាងខ្លាំងពីព្រោះថាសម្រាប់សហភាពអឺរ៉ុប នៅពេលដែលប្រទេសជាសមាជិកណាមួយសម្រេចបិទព្រំដែនជាមួយប្រទេសផ្សេងទៀតយ៉ាងលឿនស្លេវបែបនេះ វាមិនមែនជារូបភាពល្អនោះទេ។
នៅឯតំបន់ព្រំដែនក្នុងស្រុកបាវ៉ារៀ (Bavaria) ជាប់ព្រំប្រទល់ជាមួយនឹងរដ្ឋធីរ៉ូល (Tyrol) ដែលជាតំបន់ទេសចរណ៍ដ៏ល្បីមួយកន្លែងរបស់អូទ្រីស គេឃើញមន្រ្តីអាល្លឺម៉ង់ជាច្រើននាក់ពាក់ម៉ាស់និងអាវក្រៅពណ៌លឿងចេញល្បាតព្រំដែនទាំងក្នុងពេលសីតុណ្ហភាពធ្លាក់ចុះត្រជាក់ខ្លាំងក្រោមសូន្យ និងបញ្ឈប់រាល់រថយន្តដែលមកពីអូទ្រីស។
យោងទៅតាមវិធានការថ្មី មានតែជនជាតិអាល្លឺម៉ង់ឬក៏អ្នកដែលរស់នៅក្នុងប្រទេសអាល្លឺម៉ង់ជាអចិន្ត្រីយ៍ប៉ុណ្ណោះដែលត្រូវបានគេអនុញ្ញាតឲ្យចូលទឹកដីនៃប្រទេសមហាអំណាចសេដ្ឋកិច្ចអឺរ៉ុបមួយនេះ។ ហើយពួកគេក៏ត្រូវតែផ្តល់នូវលទ្ធផលតេស្តដែលបង្ហាញថាអវិជ្ជមានកូវីដផងដែរ។
ជុំវិញរឿងនេះ ក្រសួងមហាផ្ទៃអាល្លឺម៉ង់បានឲ្យដឹងថាមានការលើកលែងមួយចំនួនចំពោះបុគ្គលិកដែលធ្វើក្នុងស្ថាប័នសំខាន់ៗមួយចំនួនដូចជា នៅក្នុងវិស័យសុខាភិបាល និងការដឹកជញ្ជូន ក៏ដូចជាសម្រាប់ហេតុផលមនុស្សធម៌បន្ទាន់ផ្សេងៗ។
វិធានការរបស់អាល្លឺម៉ង់ចុងក្រោយនេះ បានធ្វើឲ្យអ្នកដំណើរអូទ្រីសត្រូវចំណាយពេលវេលាយូរជាមុនច្រើនម៉ោងដើម្បីជិះទៅដល់គោលដៅក្នុងប្រទេសអូទ្រីសបាន។ អ្នកដំណើរខ្លះបានត្អូញត្អែរពីទុក្ខលំបាក និងភាពនឿយហត់នៃការបើកបរផ្លូវឆ្ងាយជាងមុនថាប្រៀបបីដូចជាជួបគ្រោះបហន្តរាយ។
ចំណែកគណៈកម្មការអឺរ៉ុបវិញបានចេញមុខរិះគន់លើការរឹតត្បិតព្រំដែនរបស់ប្រទេសអាល្លឺម៉ង់។ ស្នងការសុខភាពសហភាពអឺរ៉ុបលោកស្រីស្តេឡា គីរៀខីដ៍ (Stella Kyriakides) បានមានប្រសាសន៍ថាគេយល់អំពីក្តីបារម្ភរបស់អាល្លឺម៉ង់ចំពោះកំណើនករណីឆ្លងមេរោគកូវីដ១៩ បំប្លែងខ្លួន។
ក៏ប៉ុន្តែ លោកស្រីថាការឆ្លងរាលដាលមេរោគប្រភេទថ្មី មិនអាចបញ្ឈប់បាននោះទេតាមរយៈការបិទព្រំដែន និងថាមានតែការចាក់វ៉ាក់សាំង ព្រមទាំងការអនុវត្តតាមគោលការណ៍នាម័យត្រឹមត្រូវប៉ុណ្ណោះទើបអាចទប់ស្កាត់ការឆ្លងរាលដាលកូវីដបំប្លែងខ្លួនបាន។
សម្រាប់សហភាពអឺរ៉ុប វាគឺជារឿងមិនត្រឹមត្រូវទេក្នុងការដែលប្រទេសណាមួយនៅអឺរ៉ុបសម្រេចតែរៀងៗខ្លួន ត្រឡប់ទៅបិទព្រំដែននឹងគ្នាដូចដែលពួកគេបានធ្វើរួចហើយកាលពីខែមីនាឆ្នាំ ២០២០ កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ