រោងចក្រថាមពលនុយក្លេអ៊ែររបស់អ៊ុយក្រែនរងការវាយប្រហារពីរុស្ស៊ី
ចុះផ្សាយនៅថ្ងៃ៖
ស្តាប់ - ០៦:៤២
សង្គ្រាមអ៊ុយក្រែននៅតែបន្តពុះកញ្ជ្រោលខ្លាំងនៅថ្ងៃ សុក្រ ទី៤ មីនា ឆ្នាំ២០២២នេះ។ ការប្រយុទ្ធគ្នាបានផ្ទុះឡើងយ៉ាងខ្លាំងក្លា រវាងកងទ័ពរុស្ស៊ី និងអ៊ុយក្រែន នៅក្បែររោងចក្រថាមពលនុយក្លេអ៊ែរហ្សេប៉ូរីហ្សៀ (Zaporizhia) ដែលជារោងចក្រដ៏ធំបំផុតមួយរបស់អ៊ុយក្រែនរហូតបង្កឲ្យមានភ្លើងឆាបឆេះឡើង។ សហគមន៍អន្តរជាតិមានក្តីបារម្ភយ៉ាងខ្លាំងចំពោះហេតុការណ៍ដែលបានកើតឡើងនេះ និងបានទាញសញ្ញាអាសន្នអំពី គ្រោះមហន្តរាយដ៏ធំធេងដែលអាចនឹងកើតចេញពីការផ្ទុះឆេះទីតាំងនុយក្លេអ៊ែរ។
រុស្ស៊ីវាយប្រហារលើរោងចក្រថាមពលនុយក្លេអ៊ែរ"ហ្សេប៉ូរីហ្សៀ"
រោងចក្រអគ្គិសនីដើរដោយថាមពលនុយក្លេអ៊ែររបស់អ៊ុយក្រែនដែលរងការវាយប្រហារពីសំណាក់កងទ័ពរុស្ស៊ី គឺជារោងចក្រដ៏ធំបំផុតមួយរបស់អ៊ុយក្រែននិងរបស់អឺរ៉ុប។ រោងចក្រនេះមានឈ្មោះថា ហ្សេប៉ូរីហ្សៀ (Zaporizhia) ស្ថិតនៅប៉ែកខាងត្បូងប្រទេសអ៊ុយក្រែន និងមានចម្ងាយប្រមាណជា ៥២៥គីឡូម៉ែត្រភាគខាងត្បូងនៃទីតាំងនុយក្លេអ៊ែរឈែរណូប៊ីល។ ទីតាំងនុយក្លេអ៊ែរឈែរណូប៊ីលបនេះ ធ្លាប់បានជួបគ្រោះមហន្តរាយដ៏ធ្ងន់ធ្ងរដោយសារផ្ទុះឆេះកាលពីឆ្នាំ ១៩៨៦និងបានសម្លាប់ជីវិតមនុស្សរាប់រយនាក់។
រោងចក្រ ហ្សេប៉ូរីហ្សៀ មានកម្លាំងរហូតដល់ ៦ពាន់មេហ្គាវ៉ាត់ និងអាចផ្គត់ផ្គង់ថាមពលគ្រប់គ្រាន់សម្រាប់ផ្ទះប្រមាណ ៤លានខ្នង។ បន្ទាប់ពីទីតាំងនុយក្លេអ៊ែរឈែរណូប៊ីល ហ្សេប៉ូរីហ្សៀ បានក្លាយទីតាំងនុយក្លេអ៊ែរទី២ដែលធ្លាក់ទៅក្នុងកណ្តាប់ដៃរុស្ស៊ីនៅថ្ងៃសុក្រ ទី៤ មីនា ឆ្នាំ២០២២នេះ។
បើទោះបីជាមានការអំពាវពីទីភ្នាក់ងារថាមពលបរិមាណូអន្តរជាតិកាលពីថ្ងៃព្រហស្បតិ៍ម្សិលមិញក្តី ក៏ប្រទេសរុស្ស៊ីរបស់លោកពូទីនមិនបានយកត្រចៀកស្តាប់សោះឡើយ និងបានបន្តបើកការវាយប្រហារនៅក្បែរទីតាំងនុយក្លេអ៊ែរហ្សេប៉ូរីហ្សៀ ដែលមានម៉ាស៊ីនប្រតិករចំនួន ៦នេះទៀត។
បើតាមអាជ្ញាអ៊ុយក្រែន ទាហានរុស្ស៊ីបានបាញ់ផ្លោងទៅលើរោងចក្ររហូតបណ្តាលឲ្យមានភ្លើងឆាបឆេះឡើងនៅក្នុងអគារហ្វឹកហ្វឺន។ ដំណឹងនេះបានធ្វើឲ្យសហគមន៍អន្តរជាតិភ្ញាក់ផ្អើល និងតក់ស្លុតខ្លាំងណាស់ពីព្រោះថាការវាយប្រហាររបស់កងទ័ពរុស្ស៊ីនេះ វាអាចបង្កឲ្យរោងចក្រនុយក្លេអ៊ែរហ្សេប៉ូរីហ្សៀផ្ទុះឆេះ ហើយក្នុងករណីនេះវានឹងនាំមកនូវគ្រោះមហន្តរាយនុយក្លេអ៊ែរដែលជាហានិភ័យខ្លាំងណាស់សម្រាប់ប្រជាជនអ៊ុយក្រែន ប្រទេសជិតខាងអ៊ុយក្រែន និងអឺរ៉ុបទាំងមូល។
គ្មានការលេចធ្លាយវិទ្យុសកម្ម
អាចថានេះជាដំណឹងល្អមួយដែរពីព្រោះថាបើតាមព័ត៌មានថ្មីចុងក្រោយដែលធ្លាក់មុននេះបន្តិច ក្រុមអ្នកពន្លត់អគ្គីភ័យអាចគ្រប់គ្រងស្ថានការណ៍ និងបានរារាំងមិនឲ្យភ្លើងដែលឆាបឆេះនោះ ឆេះរាលខ្លាំងទៅទីតាំងនុយក្លេអ៊ែរហ្សេប៉ូរីហ្សៀឡើយ។
អ្នកជំនាញនុយក្លេអ៊ែររបស់អ៊ុយក្រែន បានឲ្យដឹថាគ្មានការលេចធ្លាយវិទ្យុសកម្មត្រូវបានរកឃើញនោះទេនៅរោងចក្រ ក្រោយមានភ្លើងឆេះក្នុងអំឡុងពេលដែលកងទ័ពអ៊ុយក្រែនវាយប្រប្រយុទ្ធតតាំងគ្នាជាមួយទាហានរុស្ស៊ី។
ជាការគួរឲ្យកត់សម្គាល់ ក្រោយផ្ទុះហេតុការណ៍ដ៏គួរឲ្យព្រួយបារម្ភនេះ ទីភ្នាក់ងារថាមពលបរិមាណូអន្តរជាតិ ហៅកាត់ IAEA ដែលជាអ្នកមាននាទីជាអ្នកតាមដានឃ្លាំមើលសកម្មភាពនុយក្លេអ៊ែរនៅក្នុងពិភពលោកបានប្រញាប់ចាត់វិធានការឆ្លើយតបជាបន្ទាន់តែម្តង។
ប្រធានទីភ្នាក់ងារថាមពលបរិមាណូរបស់អង្គការសហប្រជាជាតិ បានសម្រេចនៅថ្ងៃសុក្រនេះធ្វើដំណើរទៅកាន់តំបន់ឈែរណូប៊ីល ក្នុងគោលដៅបើកកិច្ចចរចាជាមួយទាំងភាគីអ៊ុយក្រែន និងរុស្ស៊ីដើម្បីជជែកគ្នាស្តីពីការធានាសន្តិសុខនៅទីតាំងនុយក្លេអ៊ែរនានារបស់អ៊ុយក្រែន។
សេចក្តីសម្រេចរបស់ទីភ្នាក់ងារថាមពលបរិមាណូអន្តរជាតិនេះធ្លាក់មកតែប៉ុន្មានម៉ោងប៉ុណ្ណោះ ក្រោយកងទ័ពរុស្សីប្រកាសពីជ័យជម្នះក្នុងការបានដណ្តើមយករោងចក្រថាមពលហ្សេប៉ូរីហ្សៀមកគ្រប់គ្រង។
សហគមន៍អន្តរជាតិថ្កោលទោសរុស្ស៊ី
មិនបង្អង់យូរហើយ មេដឹកនាំពិភពលោកនិងស្ថាប័នអន្តរជាតិជាច្រើនបាននាំគ្នាបរិហារថ្កោលទោសប្រទេសរុស្ស៊ីយ៉ាងខ្លាំងដែលបានបើកការវាយប្រហារទៅលើទីតាំងរោងចក្រថាមពលនុយក្លេអ៊ែររបស់អ៊ុយក្រែន។
ពីទីក្រុងឡុង៍ លោកនាយករដ្ឋមន្ត្រីអង់គ្លេសបូរីស ចនសុន បានចោទប្រកាន់ប្រធានាធិបតីរុស្ស៊ីលោក ពូទីន ថាបានប្រព្រឹត្តទង្វើគ្រោះថ្នាក់ដែលអាចគំរាមកំហែងដល់សុវត្ថិភាពនៃទ្វីបអឺរ៉ុបទាំងមូល។ ទន្ទឹមនេះ លោកប្រមុខរដ្ឋាភិបាលអង់គ្លេស ក៏បានអំពាវនាវឲ្យមានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់ផងដែរដើម្បីជជែកពិភាក្សាគ្នាអំពីសកម្មភាពរបស់រុស្ស៊ីនៅឯទីតាំងនុយក្លេអ៊ែរក្នុងទឹកដីអ៊ុយក្រែន។
អង្គការអូតង់ក៏មិននៅស្ងៀមដែរ។ លោក យែន ស្តុលទែនប៊ែរ ដែលជាប្រធានអង្គការអូតង់និយាយថាសកម្មភាពដ៏គ្រោះថ្នាក់របស់រុស្ស៊ីនៅទីតាំងនុយក្លេអ៊ែររបស់អ៊ុយក្រែនសបង្ហាញឲ្យឃើញកាន់តែច្បាស់ថាគេមិនអាចនៅព្រងើយកន្តើយទុកឲ្យសង្គ្រាមនៅអូសបន្លាយទៀតនោះទេ។
លោកប្រមុខអង្គការអូតង់ បានឆ្លៀតគូសបញ្ជាក់ដែរថាវាចាំបាច់ណាស់ដែលគេត្រូវបញ្ចប់សង្គ្រាមនេះឲ្យបានឆាប់រហ័ស ហើយត្រូវដកទ័ពរុស្ស៊ីទាំងអស់ចេញពីទឹកដីអ៊ុយក្រែន។ វិបត្តិអ៊ុយក្រែននេះគួរតែដោះស្រាយដោយសន្តិវិធីតាមផ្លូវទូត។ លោកស្តុលទែនប៊ែរ បន្ថែម។
ចំណែកនាយករដ្ឋមន្ត្រីអ៊ីតាលីលោក ម៉ារីយូ ដ្រាហ្គី (Mario Draghi)វិញ តាមរយៈ សេចក្តីថ្លែងការណ៍មួយ លោកបានថ្កោលទោសការវាយប្រហារដ៏សាហាវរបស់រុស្ស៊ីទៅលើរោងចក្រថាមពលនុយក្លេអ៊ែរអ៊ុយក្រែន។ លោក បានចាត់ទុកទង្វើរបស់រុស្ស៊ីនេះថាជាការវាយប្រហារលើសន្តិសុខរបស់មនុស្សគ្រប់គ្នាតែម្តង។
ស្រដៀងគ្នានេះដែរ អង្គការ Greenpeace បានថ្កោលទោសយ៉ាងខ្លាំងចំពោះការវាយប្រហាររបស់រុស្ស៊ីនៅទីតាំងនុយក្លេអ៊ែរ ព្រោះថាវាអាចបង្កឲ្យមានគ្រោះមហន្តរាយដ៏ធំក្រៃ។ “លោកពូទីន... ឥឡូវនេះកំពុងតែប្រថុយនឹងគ្រោះមហន្តរាយនុយក្លេអ៊ែរ”។ នេះគឺជាប្រសាសន៍របស់លោក Pat Venditti នាយកប្រតិបត្តិ Greenpeace នៅក្នុងសេចក្តីថ្លែងការណ៍មួយ ដោយបានបន្ថែមទៀតថា “នេះគួរតែជាលើកចុងក្រោយហើយ ដែលយើងបានឃើញយោធារុស្ស៊ីចូលទៅជិតរោងចក្រនុយក្លេអ៊ែររបស់អ៊ុយក្រែន”។
ងាកទៅប្រទេសអ៊ុយក្រែនឯណោះវិញ លោកប្រធានាធិបតី ហ្សេឡេនស្គី និយាយថាការវាយប្រហាររបស់រុស្ស៊ីលើរោងចក្រថាមពលនុយក្លេអ៊ែរហ្សេប៉ូរីហ្សៀ អាចបង្កគ្រោះថ្នាក់ធំលើស ៦នៃការបំផ្លិចបំផ្លាញដ៏ធ្ងន់ធ្ងរដោយសារការផ្ទុះឆេះកាលពីឆ្នាំ ១៩៨៦ នៅទីតាំងនុយក្លេអ៊ែរឈែរណូប៊ីល។
លោកហ្សេឡេនស្គីបានសង្កត់ធ្ងន់ថាប្រសិនបើមានការផ្ទុះឆេះរោងចក្រថាមពលនុយក្លេអ៊ែរ នោះវាគឺជាទីបញ្ចប់នៃអ្វីៗទាំងអស់។ ទីបញ្ចប់នៃទ្វីបអឺរ៉ុបតែម្តង។ ហើយលោកនិយាយទៀតទាល់តែអឺរ៉ុបបញ្ចេញសកម្មភាពជាបន្ទាន់រួមគ្នា ទើបអាចបញ្ឈប់សកម្មភាពរបស់ទាហានរុស្ស៊ីបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ