ទីភ្នាក់ងារAIEA អំពាវនាវឲ្យរុស្ស៊ីបញ្ឈប់សកម្មភាពប្រឆាំងទីតាំងនុយក្លេអ៊ែរអ៊ុយក្រែន
មួយថ្ងៃក្រោយ មហាសន្និបាតអង្គការសហប្រជាជាតិចេញសេចក្តីសម្រេចទាមទារឲ្យរុស្ស៊ីដកកងទ័ពចេញជាបន្ទាន់ពីអ៊ុយក្រែន ទីភ្នាក់ងារថាមពលបរិមាណូអន្តរជាតិ AIEA ដែលមាននាទីជាអ្នកតាមដានឃ្លាំមើលសកម្មភាពនុយក្លេអ៊ែរនៅក្នុងពិភពលោកបានចេញសេចក្តីសម្រេចមួយដែរ នៅថ្ងៃព្រហស្បតិ៍ទី ៣មីនា ដើម្បី អំពាវនាវឲ្យកងទ័ពរុស្ស៊ីបញ្ឈប់ ជាបន្ទាន់សកម្មភាព ដ៏គ្រោះថ្នាក់ ទៅលើទីតាំងនុយក្លេអ៊ែរ ក្នុងទឹកដីអ៊ុយក្រែន។
ចុះផ្សាយនៅថ្ងៃ៖
សេចក្តីសម្រេចដែលស្នើឡើងដោយកាណាដា និងប៉ូឡូញបានទទួលការបោះឆ្នោតគាំទ្រដោយសំឡេងភាគច្រើន នៅក្រុមប្រឹក្សាភិបាលរបស់ទីភ្នាក់ងារថាមពលបរិមាណូអន្តរជាតិ ហៅកាត់ជាភាសាបារាំងថា AIEA នៅទីក្រុងវីយ៉ែន ប្រទេសអូទ្រីស។ រុស្ស៊ី និងចិន បានបោះឆ្នោតប្រឆាំង ចំណែក ប្រទេសចំនួន ៥ ដូចជា ប៉ាគីស្ថាន ឥណ្ឌា អាហ្វ្រិកខាងត្បូង សេណេហ្កាល់បានបោះឆ្នោត អនុប្បវាទ។
សម្រាប់អ្នកតំណាងចិន នៅAIEA ចិនបានបោះឆ្នោតប្រឆាំង ព្រោះថា សេចក្តីសម្រេចដើរហួសដែនសមត្ថកិច្ច ដោយសារមានលាយឡំរឿងនយោបាយ។ ឯកអគ្គរដ្ឋទូតរុស្ស៊ីប្រចាំ AIEA យល់ស្របការលើកឡើងរបស់ភាគីចិន ប៉ុន្តែ អ្នកតំណាងអាមេរិក លោកLouis Bono អះអាងវារឿងត្រឹមត្រូវដែលក្រុមប្រឹក្សាភិបាលរបស់ទីភ្នាក់ងារថាមពលបរិមាណូអន្តរជាតិត្រូវចេញមុខប្រតិកម្ម សំដែងសោកស្តាយ ព្រោះថា ទីភ្នាក់ងារមានតួនាទី ធានាឲ្យមានការប្រើប្រាស់ដោយសន្តិភាព ថាមពលនុយក្លេអ៊ែរក្នុងពិភពលោក។
នៅក្នុងសេចក្តីសម្រេច ដែលទីភ្នាក់ងារព័ត៌មានបារាំងបានទទួលមកចុះផ្សាយ នៅថ្ងៃព្រហស្បតិ៍ ទីភ្នាក់ងារថាមពលបរិមាណូ អន្តរជាតិ ហៅកាត់ជាភាសាបារាំងថា AIEA បានអំពាវនាវឲ្យរុស្ស៊ីបញ្ឈប់ជាបន្ទាន់ សកម្មភាពប្រឆាំងទីតាំងនុយក្លេអ៊ែរអ៊ុយក្រែន។ សម្រាប់ទីភ្នាក់ងារ AIEA សង្រ្គាមឈ្លានពានរបស់រុស្ស៊ីកំពុងបង្កការគំរាមកំហែងធ្ងន់ធ្ងរ ដោយផ្ទាល់ដល់សន្តិសុខរបស់ទីតាំងនុយក្លេអ៊ែរ និងបុគ្គលិកធ្វើការនៅទីនោះ។ ការវាយប្រហាររបស់កងទ័ពរុស្ស៊ីអាចបង្កឲ្យមានឧប្បត្តិហេតុ ឬគ្រោះថ្នាក់នុយក្លេអ៊ែរ ដែលជាហានិភ័យខ្លាំងណាស់សម្រាប់ប្រជាជនអ៊ុយក្រែន រដ្ឋជិតខាងអ៊ុយក្រែន និងសហគមន៍អន្តរជាតិទាំងមូល។
អ៊ុយក្រែនមានម៉ាស៊ីនប្រតិករចំនួន១៥ នៅរោងចក្រនុយក្លេអ៊ែរចំនួន ៤ និងនៅទីតាំងជាច្រើនផ្សេងទៀត នៅក្នុងប្រទេស។ ទីតាំងនុយក្លេអ៊ែរ ឈែរណូប៊ីល ដែលបានជួបគ្រោះមហន្តរាយដ៏ធ្ងន់ធ្ងរ ដោយសារ ផ្ទុះឆេះ កាលពីឆ្នាំ ១៩៨៦ បានធ្លាក់ទៅក្នុងដៃគ្រប់គ្រងរបស់ទាហានរុស្ស៊ី តាំងពីថ្ងៃទី ២៦កុម្ភៈ។
នៅថ្ងៃចន្ទ ដើមសប្តាហ៍នេះ ទីភ្នាក់ងារAIEA បានព្រមានពីគ្រោះថ្នាក់ ផ្ទុះនុយក្លេអ៊ែរ នៅពេលឃើញកងទ័ពរុស្ស៊ី បោះជំហានកាន់តែទៅជិតទីតាំងនុយក្លេអ៊ែរ Zaporija ភាគខាងកើតអ៊ុយក្រែន ដែលមានម៉ាស៊ីនប្រតិករចំនួន ៦។
នៅពេលចាប់បើកអង្គប្រជុំកាលពីថ្ងៃព្រហស្បតិ៍ ប្រធានទីភ្នាក់ងារថាមពលបរិមាណូអន្តរជាតិ លោកRafael Grossi បានព្រមានថា រាល់គ្រោះថ្នាក់ផ្ទុះឆេះនៅទីតាំងនុយក្លេអ៊ែរនឹងបង្កឲ្យមានផលវិបាក ការឈឺចាប់របស់មនុស្សជាតិ និងការបំផ្លាញបរិស្ថានដ៏ធ្ងន់ធ្ងរ។ អគ្គនាយករបស់AIEA វាយតម្លៃថា ដើម្បី សុវត្ថិភាព និងសន្តិសុខរបស់ទីតាំងនុយក្លេអ៊ែរ អ៊ុយក្រែន គេត្រូវបញ្ឈប់ជាបន្ទាន់ជម្លោះប្រដាប់អាវុធនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ