សង្រ្គាមអ៊ុយក្រែនកំពុងរំលេចចេញនូវសង្រ្គាមព័ត៌មានរបស់រុស្ស៊ី និងអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៥១
នៅរុស្ស៊ី ស្រ្តីសកម្មជនប្រឆាំងសង្រ្គាមអ៊ុយក្រែនម្នាក់បានសម្រុកចូលក្នុងស្ទូឌីយោផ្សាយរបស់ទូរទស្សន៍រដ្ឋរុស្ស៊ីដ៏ល្បីល្បាញជាងគេ កាលពីយប់ថ្ងៃចន្ទ ទី១៤មីនាដោយបានលើកបដាប្រឆាំងសង្រ្គាម។ វាជារូបភាពដ៏កម្រ នៅរុស្ស៊ី ជាទីដែលអាជ្ញាធររុស្ស៊ី បានបិទបណ្តាញសង្គម រឹតបន្តឹងរាល់ការផ្សព្វផ្សាយព័ត៌មានទាក់ទងនឹងសង្រ្គាមអ៊ុយក្រែន។ នៅក្នុងសង្រ្គាមអ៊ុយក្រែន ក្រៅតែពីសង្រ្គាមប្រយុទ្ធគ្នាលើសមរភូមិប្រយុទ្ធ ក៏មានដែរ សង្រ្គាមព័ត៌មានដែលកើតមានឡើង នៅភាគីទាំងសងខាង អ៊ុយក្រែន និងរុស្ស៊ី។
ប្រព័ន្ធផ្សព្វផ្សាយអន្តរជាតិ និងបណ្តាញសង្គមបានចុះផ្សព្វផ្សាយព្រោងព្រាត រូបភាពស្រ្តីសកម្មជន រុស្ស៊ីម្នាក់ ដែលបានសម្រុកចូលស្ទូឌីយោ ផ្សាយរបស់ទូរទស្សន៍រដ្ឋរុស្ស៊ី និងលើកបដា ប្រឆាំងសង្រ្គាម នៅក្នុងកម្មវិធីផ្សាយផ្ទាល់តែម្តង។
ស្រ្តីសកម្មជនរុស្ស៊ីដែលសម្រុកចូលស្ទូឌីយោទូរទស្សន៍ រុស្ស៊ី កាលពីយប់ថ្ងៃចន្ទ មានឈ្មោះថា Marina Ovsiannikova អាយុ ៤៤ឆ្នាំ ដែលជាកូនកាត់ រុស្ស៊ីនិង អ៊ុយក្រែន។ តាមអង្គការការពារសិទ្ធិបាតុករ រុស្ស៊ី ឈ្មោះ OVD Info Marina ជាអ្នកកាសែតម្នាក់របស់ទូរទស្សន៍ Pervy Kanal ជាទីដែលកើតមានឧប្បតិ្តហេតុ កាលពីយប់ម្សិលមិញ។ នៅក្នុងសារវីដេអូ ដែលនាង Marina បានផលិតឡើងនៅមុនត្រូវប៉ូលិសចាប់ខ្លួន និងដែលត្រូវបានអង្គការOVD Info យកមកចុះផ្សាយ នាង Marina បាននិយាយថា ក្នុងនាមជាកូនដែលមានឪពុកជាជនជាតិអ៊ុយក្រែន និងម្តាយរុស្ស៊ី នាងមិនដែលធ្លាប់គិតថា នឹងមានសង្រ្គាមអ៊ុយក្រែន រុស្ស៊ីនោះទេ។ នៅប៉ុន្មានឆ្នាំមកនេះ នាងធ្វើការឲ្យទូរទស្សន៍ Pervy Kanal ដោយបានផ្សព្វផ្សាយពាក្យឃោសនាឲ្យក្រេមឡាំង។ នាងខ្មាស់ដែលអនុញ្ញាតឲ្យពាក្យកុហក ភូតភត្រូវបានចេញតាមទូរទស្សន៍។ នាងខ្មាស់អៀនដែលបានធ្វើឲ្យប្រជាជនរុស្ស៊ីក្លាយជាខ្មោចរស់(Zombi)។
តាមរូបភាពចុះផ្សាយព្រោងព្រាតដោយប្រព័ន្ធផ្សព្វផ្សាយអន្តរជាតិ Marinaបានលួចលើកបដា នៅពីក្រោយខ្នងពិធីការនីទូរទស្សន៍ម្នាក់ នៅក្នុងកម្មវិធីម៉ោងផ្សាយព័ត៌មានដ៏ល្បីជាងគេ របស់ទូរទស្សន៍ Pervy Kanal ដែលមានអ្នកតាមដាន រាប់លាននាក់ នៅរុស្ស៊ី។ នៅលើបដា របស់នាងMarina មានសរសេរអក្សរអង់គ្លេសធំៗថាទេចំពោះសង្គ្រាម។ និងជាភាសារុស្ស៊ីថា សូមកុំជឿ ពាក្យឃោសនា។ នៅទីនេះ ពួកគេកំពុងកុហក អ្នករាល់គ្នា។ និងថា ប្រជាជនរុស្ស៊ី ប្រឆាំងនឹងសង្គ្រាម។
នៅប៉ុន្មានវិនាទីនៃការផ្សាយព័ត៌មានផ្ទាល់ ទស្សនិកជនរុស្ស៊ី ប្រាកដជាបានឃើញ សកម្មភាពប្រឆាំងសង្រ្គាម របស់Marina នៅមុនពេលដែលអ្នកចាត់ចែងកម្មវិធីរបស់ទូរទស្សន៍ បានកាត់ផ្តាច់ការផ្សាយផ្ទាល់ ទៅជាការចាក់បទយកការណ៍ស្តីពីមន្ទីរពេទ្យរុស្ស៊ី។
តាមអង្គការការពារសិទ្ធិបាតុកររុស្ស៊ី នាង Marina ត្រូវបានប៉ូលិសចាប់ឃុំខ្លួន។ ទីភ្នាក់ងារព័ត៌មានរុស្ស៊ី ឈ្មោះ Tass បានចុះផ្សាយថា នាង Marina អាចរងការចោទប្រកាន់ ពីបទបំផ្លាញមុខមាត់កងទ័ពរុស្ស៊ី ដែលធ្វើឲ្យនាងអាចត្រូវផ្តន្ទាទោសជាប់ពន្ធនាគារ ១៥ឆ្នាំ។ នៅលើបណ្តាញសង្គម ទាំងភាសាអង់គ្លេស អ៊ុយក្រែន និងរុស្ស៊ី ស្រ្តីសកម្មជនរុស្ស៊ីបានទទួលការស្ញប់ស្ញែង កោតសរសើរសម្រាប់ភាពក្លាហានរបស់នាង ដែលហ៊ានលះបង់ចោលសិទ្ធិសេរីភាពផ្ទាល់ខ្លួន ដើម្បី បំភ្លឺភ្នែកប្រជាជនរុស្ស៊ី។ នៅរុស្ស៊ី ប្រជាជនមួយចំនួនធំ នៅតែជឿតាមការផ្សព្វផ្សាយរបស់ទូរទស្សន៍រដ្ឋរុស្ស៊ី ដែលមិនដែលនិយាយពីរឿងធ្វើសង្រ្គាមនៅ អ៊ុយក្រែនម្តងឡើយ។ ផ្ទុយទៅវិញ ទូរទស្សន៍រុស្ស៊ីផ្សាយតែថា រុស្ស៊ីកំពុងបើកប្រតិបត្តិការ ទ័ពពិសេស ដើម្បី ទប់ស្កាត់អំពើប្រល័យពូជសាសន៍ និងលុបបំបាត់ចោលរបបណាហ្ស៊ី នៅអ៊ុយក្រែន តែប៉ុណ្ណោះ។
រុស្ស៊ីប្រកាសសង្រ្គាមប្រឆាំងអ្នកកាសែត និងបុគ្គលដែលនិយាយពីសង្រ្គាមអ៊ុយក្រែន
បន្ទាប់ពីបើកធ្វើសង្រ្គាមនៅទឹកដីអ៊ុយក្រែន នៅថ្ងៃទី ២៤ កុម្ភៈ រុស្ស៊ីក៏បានប្រកាសសង្រ្គាមផងដែរ ប្រឆាំងនឹងប្រព័ន្ធផ្សព្វផ្សាយបរទេស បុគ្គល និងបណ្តាញសង្គមទាំងឡាយណាដែលហ៊ាននិយាយពីរុស្ស៊ីធ្វើសង្រ្គាមនៅអ៊ុយក្រែន។ នៅថ្ងៃទី ៤ខែមីនានេះ សភារុស្ស៊ីបានបោះឆ្នោតអនុម័តច្បាប់ថ្មីមួយ សម្រាប់ប្រឆាំងព័ត៌មានកុហកបោកប្រាស់។ ច្បាប់ថ្មីនេះសំដៅ ដាក់ទោសពន្ធនាគារ ១៥ឆ្នាំលើរាល់បុគ្គល ទាំងឡាយណា ដែលផ្សព្វផ្សាយព័ត៌មានមិនពិត ស្តីពីកងទ័ពរុស្ស៊ី ឬអ្នកដែលអំពាវនាវឲ្យមានការដាក់ទណ្ឌកម្មលើរុស្ស៊ី។ ច្បាប់ថ្មីបានទៅបិទសិទ្ធិសេរីភាពបញ្ចេញមតិ នៅរុស្ស៊ី កាន់តែខ្លាំងឡើង។ វាមិនត្រឹមតែធ្វើឲ្យប្រជាជនរុស្ស៊ីផ្ទាល់ដែលត្រូវបិទមាត់ មិនហ៊ានចុះថ្នល់ធ្វើបាតុកម្ម ប៉ុន្តែ អ្នកកាសែតបរទេស និងសកម្មជនប្រឆាំងរដ្ឋាភិបាលរុស្ស៊ី ជាច្រើនបានចាកចេញពីទឹកដីរុស្ស៊ី ដោយសារតែខ្លាចត្រូវចាប់ខ្លួន និងជាប់ពន្ធនាគារដោយសារតែនិយាយពាក្យសង្រ្គាមរុស្ស៊ី នៅអ៊ុយក្រែន។
ក្រៅតែពីបង្កើតច្បាប់ប្រឆាំងព័ត៌មានមិនពិត អាជ្ញាធររុស្ស៊ីនៅបានបិទជាបន្តបន្ទាប់បណ្តាញសង្គម ដូចជាហ្វេសប៊ុក ទ្វីតធ័រ អាំងស្តាក្រាម។ គោលដៅ គឺដើម្បីបិទខ្ទប់ព័ត៌មាន កុំឲ្យប្រជាជនរុស្ស៊ី កុំឲ្យដឹងរឿងច្រើនទាក់ទងនឹងសកម្មភាពយោធារបស់រុស្ស៊ី នៅប្រទេសអ៊ុយក្រែន។ ដូចនិយាយខាងដើម ដោយសារតែគ្មានការផ្សព្វផ្សាយទូលំទូលាយស្តីពីសង្រ្គាមនៅអ៊ុយក្រែន នៅរុស្ស៊ី ប្រជាជនភាគច្រើនដែលមើល ស្តាប់តែទូរទស្សន៍ វិទ្យុរដ្ឋរុស្ស៊ី នៅជឿស្លុង តាមការឃោសនារបស់រដ្ឋាភិបាលដែលថា កងទ័ពរុស្ស៊ីកំពុងធ្វើប្រតិបត្តិការពិសេសដើម្បីការពារជនជាតិរុស្ស៊ី នៅអ៊ុយក្រែន។
សម្រាប់ប្រជាជនរុស្ស៊ីមួយភាគតូចដែលតាមដានព័ត៌មានពីបរទេសបានចុះថ្នល់ធ្វើបាតុកម្មប្រឆាំងសង្រ្គាមអ៊ុយក្រែន។ ប៉ុន្តែ រហូតមកដល់ពេលនេះ ពួកគេត្រូវអាជ្ញាធររុស្ស៊ី បង្រ្កាបយ៉ាងចាស់ដៃ។
តាមអង្គការការពារសិទ្ធិបាតុករ គិតចាប់តាំងពីមានសង្រ្គាមនៅអ៊ុយក្រែន មានជនជាតិរុស្ស៊ី ជាង ១៣០០០នាក់ នៅរុស្ស៊ី ត្រូវបានប៉ូលិសចាប់ឃុំខ្លួន ដោយសារតែធ្វើបាតុកម្មប្រឆាំងសង្រ្គាមរុស្ស៊ីនៅអ៊ុយក្រែន។
អ៊ុយក្រែនប្រើសង្រ្គាមព័ត៌មានសម្រាប់បង្អាប់មុខមាត់មហាអំណាចយោធារុស្ស៊ី
ធម្មតា ទេ ប្រឈមនឹងសត្រូវដែលជាមហាអំណាចមានសមត្ថភាពយោធខ្លាំងជាងខ្លួន ដូចជារុស្ស៊ី អ៊ុយក្រែន មានតែប្រើសង្រ្គាមព័ត៌មានប៉ុណ្ណោះ ដើម្បីយកឈ្នះរុស្ស៊ី។ តាំងពីថ្ងៃដែលកងទ័ពរុស្ស៊ី ចូលឈ្លានពាន ហើយរុស្ស៊ីនៅ ស្ងៀមមិនប្រកាសអ្វីទាំងអស់ ភាគីអ៊ុយក្រែន បានផ្តើមសង្រ្គាមព័ត៌មានដើម្បី បំបាក់មុខមាត់រុស្ស៊ី។ សង្រ្គាមព័ត៌មានរបស់រដ្ឋាភិបាលអ៊ុយក្រែន ដែលបង្ហាញពីការបំផ្លិចបំផ្លាញ អ៊ុយក្រែន ដោយសារស្នាដៃរបស់កងទ័ពរុស្ស៊ី បានទាក់ទាញសមានចិត្តមនុស្សក្នុងពិភពលោកឲ្យជួយស្តាយស្រណោះ និងគាំទ្រប្រជាជនអ៊ុយក្រែន នៅចំពោះមុខការឈ្លានពានរបស់រុស្ស៊ី។
នៅបរទេស ភាគីរុស្ស៊ី ព្យាយាមការពារបុព្វហេតុធ្វើសង្រ្គាមរបស់ខ្លួននៅអ៊ុយក្រែន តាមរយៈការផ្សព្វផ្សាយចោទប្រកាន់អ៊ុយក្រែនថា ដឹកនាំដោយក្រុមណាហ្ស៊ី ឬមានអាវុធគីមី។ ប៉ុន្តែ ប្រទេសលោកខាងលិច និងអ៊ុយក្រែន បានចោទប្រកាន់ ការផ្សព្វផ្សាយព័ត៌មានមិនពិត របស់រុស្ស៊ី ដែលគ្មានគោលដៅអ្វីផ្សេង ក្រៅតែពីយកលេស វាយប្រហារអ៊ុយក្រែននោះទេ។ នៅពេលរុស្ស៊ីបានលើកឡើងពីភស្តុតាងដើម្បីចោទប្រកាន់អ៊ុយក្រែន អ៊ុយក្រែនឯណោះ វិញ មានភស្តុតាងស្តែងបំផុត នោះគឺរូបភាព ផ្ទះសម្បែង ត្រូវឆេះបំផ្លាញ ចំណែកប្រជាជនត្រូវរងរបួស រត់ភៀសខ្លួន ដោយសារមីស៊ីលរបស់រុស្ស៊ី។ រូបភាពប្រជាជនអ៊ុយក្រែន ដែលឈឺចាប់ខ្លោចផ្សារដោយសារសង្រ្គាមឈ្លានពានរបស់រុស្ស៊ី មិនអាចជារឿងកុហកបោកប្រាស់នោះទេ។ នេះជាចំណុចខ្លាំងមួយ ដែលរដ្ឋាភិបាលអ៊ុយក្រែន កំពុងប្រើសម្រាប់បញ្ចុះបញ្ចូលមតិអន្តរជាតិឲ្យស្អប់សង្រ្គាមរុស្ស៊ី និងស្អប់មិនទុកចិត្ត ប្រធានាធិបតីរុស្ស៊ី លោកពូទីន ដែលបើតាមអ៊ុយក្រែន គឺជាមនុស្សតែម្នាក់ដែលបង្កហេតុរំលោភធ្វើសង្រ្គាមឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ