សង្រ្គាមអ៊ុយក្រែន៖រុស្ស៊ីប្តឹងប្រឆាំងក្រុមហ៊ុនមេតាដែលយោគយល់ឲ្យមានសារស្អប់មេដឹកនាំ និងទាហានរុស្ស៊ី
រុស្ស៊ីខឹងឆេះដុំ និងប្រកាសបើកការស៊ើបអង្កេត ប្រឆាំងក្រុមហ៊ុនមេតា កាលពីថ្ងៃសុក្រទី ១១មីនា នៅបន្ទាប់ ក្រុមហ៊ុនអាមេរិកាំងដែល ជាម្ចាស់បណ្តាញសង្គមហ្វេសប៊ុក អាំងស្តាក្រាម បានសម្រេច នៅថ្ងៃព្រហស្បតិ៍ថា អនុគ្រោះ មិនលុបចោលសារ ដែលជំរុញ ឲ្យមានការស្អប់ និងការប្រព្រឹត្តអំពើហិង្សាទៅលើទាហាន និងមេដឹកនាំរុស្ស៊ី។ នៅថ្ងៃសុក្រ ឧត្តមស្នងការសិទ្ធិមនុស្សរបស់អង្គការសហប្រជាជាតិបានសំដែងក្តីបារម្ភ និងបានទាមទារឲ្យក្រុមហ៊ុនមេតាផ្តល់ព័ត៌មានលម្អិតជុំវិញការយោគយល់អនុគ្រោះរបស់ខ្លួនទៅលើសារស្អប់ ប្រឆាំងរុស្ស៊ី។
ចុះផ្សាយនៅថ្ងៃ៖
ស្តាប់ - ០៣:០៣
អាជ្ញាធរគ្រប់គ្រងប្រព័ន្ធផ្សព្វផ្សាយរុស្ស៊ីបានសម្រេចបិទបណ្តាញអាំងស្តាក្រាម របស់ក្រុមហ៊ុនមេតា ទៅតាមសំណើរបស់អយ្យការរុស្ស៊ី ដែលបានសម្រេចប្តឹង ចោទប្រកាន់ ក្រុមហ៊ុនមេតា ក្រុមហ៊ុនមេ របស់ហ្វេសប៊ុក និងអាំងស្តាក្រាម ពីបទផ្សព្វផ្សាយសារជំរុញ ឲ្យមានការស្អប់ សម្លាប់ជនជាតិរុស្ស៊ី។
នៅថ្ងៃសុក្រ អយ្យការរុស្ស៊ីបានប្រកាសបើកការស៊ើបអង្កេតប្រឆាំងក្រុមហ៊ុនមេតា នៅក្នុងបទចោទប្រកាន់ ញុះញង់ជាសាធារណៈឲ្យមានការធ្វើសកម្មភាពជ្រុលនិយម និងផ្តល់ជំនួយដល់សកម្មភាពភេរវនិយម។ បទចោទប្រកាន់របស់អយ្យការរុស្ស៊ីផ្តោតសំខាន់ទៅលើអ្នកទទួលខុសត្រូវលើផ្នែកផ្សព្វផ្សាយរបស់ក្រុមហ៊ុនមេតា Andy Stone ដែលបានប្រកាសកាលពីថ្ងៃព្រហស្បតិ៍ ពីការផ្លាស់ប្តូរច្បាប់ទាក់ទងនឹងការត្រួតពិនិត្យលើខ្លឹមសារផ្សព្វផ្សាយ លើបណ្តាញសង្គមហ្វេសប៊ុក និងអាំងស្តាក្រាម។
នៅក្នុងបទសម្ភាសន៍ជាមួយទីភ្នាក់ងារព័ត៌មានបារាំង AFP កាលពីថ្ងៃសុក្រ អ្នកទទួលខុសត្រូវលើការផ្សព្វផ្សាយរបស់ក្រុមហ៊ុនមេ របស់ហ្វេសប៊ុកបានបញ្ជាក់ថា ដោយយោងទៅលើសង្រ្គាមឈ្លានពានរុស្ស៊ី នៅអ៊ុយក្រែន ក្រុមហ៊ុនមេតា នឹងអនុគ្រោះ យោគយល់ ការបញ្ចេញមតិនយោបាយ ទាំងឡាយណា ដែលសំដៅ ប្រឆាំងមេដឹកនាំ និងទាហានរុស្ស៊ី ដែលកំពុងធ្វើសង្រ្គាមនៅអ៊ុយក្រែន។ ជាក់ស្តែង ក្រុមហ៊ុនហ្វេសប៊ុក នឹងមិនលុបចោល សារដែលអាចជំរុញឲ្យមានអំពើហិង្សា ដូចជាថា ស្លាប់ទៅ អាពួកឈ្លានពានរុស្ស៊ី។ ផ្ទុយទៅវិញ សារអំពាវនាវឲ្យមានការស្អប់ ប្រព្រឹត្តអំពើហិង្សាលើប្រជាជនរុស្ស៊ី នៅតែហាមឃាត់ដាច់ខាត នៅលើបណ្តាញសង្គមរបស់ក្រុមហ៊ុនមេតា។
នៅរុស្ស៊ី បណ្តាញអាំងស្តាក្រាមល្បីល្បាញ និងនិយមប្រើខ្លាំងណាស់ ក្នុងចំណោមយុវជនរុស្ស៊ី។ ការបិទបណ្តាញអាំងស្តាក្រាមនឹងប៉ះពាល់ដល់អ្នកប្រើប្រាស់រុស្ស៊ី ដែលមួយចំនួនប្រើបណ្តាញសង្គមសម្រាប់ជំនួញលក់ទំនិញអនឡាញ។ នៅមុនអាំងស្តាក្រាម អាជ្ញាធររុស្ស៊ីបានប្រកាសបិទហ្វេសប៊ុក នៅថ្ងៃទី ៤មីនា បន្ទាប់ពីហ្វេសប៊ុក សម្រេចឈប់ឲ្យប្រព័ន្ធផ្សព្វផ្សាយរុស្ស៊ី ប្រើប្រាស់បណ្តាញសង្គម នៅក្រោយ រុស្ស៊ីចូលធ្វើសង្រ្គាម នៅអ៊ុយក្រែន។
ជុំវិញ ការសម្រេចរបស់ក្រុមហ៊ុនមេតា ដែលប្រកាសលែងរឹតបន្តឹង លុបចោល ខ្លឹមសារ ដែលជំរុញ ឲ្យមានការស្អប់ ប្រឆាំងទាហានរុស្ស៊ី លោកស្រី Elizabeth Throssel អ្នកនាំពាក្យ របស់ឧត្តមស្នងការសិទ្ធិមនុស្សរបស់អង្គការសហប្រជាជាតិ ដែលមានទីស្នាក់ការនៅទីក្រុងហ្សឺណែវ បានសំដែងក្តីបារម្ភ ព្រោះថា ជំហរមិនច្បាស់លាស់របស់ក្រុមហ៊ុនមេតា នឹងអាចជំរុញឲ្យមានសារ ស្អប់ប្រឆាំងជនជាតិរុស្ស៊ីជាទូទៅ។
តាម អ្នកនាំពាក្យរបស់ឧត្តមស្នងការសិទ្ធិមនុស្ស ក្រុមហ៊ុនមេតាត្រូវតាមដាន ការខូចខាត បង្កឡើងការផ្លាស់ប្តូរគោលនយោបាយរបស់ក្រុមហ៊ុន ប៉ុន្តែ ជាមួយគ្នានោះ គេក៏ទទួលស្គាល់ផងដែរពីភាពស្មុគស្មាញក្នុងផ្លូវច្បាប់ ទាក់ទងនឹងសិទ្ធិសេរីភាពបញ្ចេញមតិ។ គេអាចថា នៅក្នុងជម្លោះប្រដាប់អាវុធ ដូចជានៅអ៊ុយក្រែន ជាទីដែលកងទ័ពរុស្ស៊ី ធ្វើសង្រ្គាមឈ្លានពានអ៊ុយក្រែន ការអំពាវនាវឲ្យមានការប្រព្រឹត្តអំពើហិង្សាទៅលើភាគីដែលចូលរួម ផ្ទាល់ក្នុងសង្រ្គាម គឺជារឿងដែលគេមិនគួរហាមឃាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ