ជំនួបកំពូលវិសាមញ្ញរបស់បក្សសម្ព័ន្ធអូតង់ផ្តោតពីសង្រ្គាមនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៥៣
នៅថ្ងៃព្រហស្បតិ៍ ២៤មីនា ឆ្នាំ២០២២នេះ មេដឹកនាំលោកខាងលិចកំពុងត្រៀមជួបប្រជុំគ្នានៅឯជំនួបកំពូលវិសាមញ្ញរបស់បក្សសម្ព័ន្ធអូតង់ដើម្បីជជែកពិភាក្សាពីសង្គ្រាមនៅអ៊ុយក្រែន។ លោក ប្រធានាធិបតីអាមេរិកចូ បៃដិន ដែលកំពុងមានវត្តមាននៅក្នុងទីក្រុងព្រុចសែលក៏នឹងចូលរួមកិច្ចប្រជុំនេះដែរដើម្បីកៀរគរសម្ព័ន្ធមិត្តឲ្យចាត់វិធានការរួមប្រឆាំងនឹងរុស្ស៊ីដែលបើកការឈ្លានពានលើអ៊ុយក្រែន។
អង្គការអូតង់បើកជំនួបកំពូលវិសាមញ្ញដោយផ្តោតជាសំខាន់លើសង្គ្រាមអ៊ុយក្រែន
នៅថ្ងៃព្រហស្បតិ៍នេះ ពិភពលោកកំពុងបើកភ្នែកធំៗរង់ចាំតាមដានមើលកិច្ចប្រជុំកំពូលវិសាមញ្ញរបស់បក្សសម្ព័ន្ធអូតង់ដែលផ្តោតជាសំខាន់តែម្តងលើសង្គ្រាមនៅអ៊ុយក្រែន។
លោកប្រធានាធិបតីអាមេរិក ចូ បៃដិនបានអញ្ជើញទៅដល់ទីក្រុងព្រុចសែលប្រទេសប៊ែលហ្ស៊ិកហើយដើម្បីចូលរួមកិច្ចប្រជុំរបស់អង្គការអូតង់ មុនជំនួបកំពូលហ្សេ៧ និងជំនួបកំពូលរបស់សហភាពអឺរ៉ុប។ ជំនួបទាំងអស់នេះសុទ្ធតែផ្តោតជាពិសេសពីសង្រ្គាមនៅអ៊ុយក្រែន។
មកទល់នឹងពេលនេះ សង្គ្រាមអ៊ុយក្រែននៅមិនទាន់នាំឲ្យមានការប៉ះទង្គិចគ្នាផ្នែកយោធាដោយផ្ទាល់រវាងរុស្ស៊ី និងបក្សសម្ព័ន្ធអូតង់នោះទេ។ ក៏ប៉ុន្តែ មានការបារម្ភកាន់តែខ្លាំងឡើងថារុស្ស៊ីអាចនឹងវាយប្រហារទៅលើអ៊ុយក្រែនដោយប្រើអាវុធគីមី ឬអាវុធជីវសាស្ត្រ ឬក៏អាចឈានដល់ប្រើអាវុធនុយក្លេអ៊ែរទៀតក៏ថាបាន។
នៅក្នុងកិច្ចប្រជុំរបស់បក្សសម្ព័ន្ធអូតង់នៅថ្ងៃនេះមានចំណុចពីរសំខាន់ដែលប្រទេសសមាជិកអូតង់គ្រោងនឹងសម្រេចរួមគ្នាដែលទី១ នោះគឺការផ្តល់អាវុធយុទ្ធភណ្ឌបន្ថែមទៀតសម្រាប់អ៊ុយក្រែន និងទី២ បន្ថែមទណ្ឌកម្មជាច្រើនទៀតលើសេដ្ឋកិច្ចរបស់រុស្ស៊ី។
ប្រតិបត្តិការសឹករបស់រុស្ស៊ីលើអ៊ុយក្រែនបានដាស់ឲ្យអង្គការអូតង់ភ្ញាក់និងមានកម្លាំងខ្លាំងឡើងវិញ។ នៅមុនជំនួបកំពូលថ្ងៃនេះ ប្រមុខអង្គការអូតង់ លោក យែន ស្តុលទែនប៊ែរ បាននិយាយថាប្រទេសរុស្ស៊ីរបស់លោកពូទីនបានកសាងកំហុសដ៏ធំមួយក្នុងការបញ្ជូនទ័ពទៅវាយឈ្លានពានអ៊ុយក្រែន។ ហើយដើម្បីការពារប្រឆាំងទល់នឹងប្រទេសរុស្ស៊ីដែលកំពុងពង្រីកប្រតិបត្តិការសឹករបស់ខ្លួន លោកស្តុលទែនប៊ែរ ថាអូតង់នឹងបញ្ជូនកម្លាំងទ័ពរបស់ខ្លួនបន្ថែមទៀតជាពិសេសនៅទីតាំងសំខាន់ៗក្នុងប្រទេសចំនួន៤ គឺប៊ុលហ្គារី ហុងគ្រី រូម៉ានី និងស្លូវ៉ាគី។
ក្រៅពីនេះ ក្រុមប្រទេសសមាជិកអូតង់ក៏គ្រោងផ្តល់ការគាំទ្របន្ថែមដល់អ៊ុយក្រែនដែរដើម្បី ប្រឆាំងនឹងការគំរាមកំហែងដោយអាវុធនុយក្លេអ៊ែរ និងអាវុធគីមីពីសំណាក់រុស្ស៊ី។
វិបត្តិមនុស្សធម៌
ក្រោយកិច្ចប្រជុំជាមួយមេដឹកនាំអូតង់ចប់ ថ្ងៃសៅរ៍ខាងមុខប្រធានាធិបតីអាមេរិកលោក ចូ បៃដិន នឹងធ្វើដំណើរសំដៅទៅកាន់ទីក្រុងវ៉ាសូវីប្រទេសប៉ូឡូញ។ ប៉ូឡូញដែលមកទល់នឹងពេលនេះគឺជាប្រទេសដែលទទួលជនភៀសអ៊ុយក្រែនច្រើនជាងគេបំផុត។
ក្នុងចំណោមជនភៀសខ្លួនអ៊ុយក្រែនសរុបទាំងជាង ៣លាន ៦សែននាក់ មានជាង ២លាននាក់ឯណោះកំពុងស្នាក់នៅក្នុងប្រទេសប៉ូឡូញ។ ក្រៅតែមានតួនាទីជាតួអង្គដ៏សំខាន់មួយនៅក្នុងវិបត្តិអ៊ុយក្រែន ទីក្រុងវ៉ាសូវីក៏ជាសម្ព័ន្ធមិត្តដ៏សំខាន់របស់ក្រុងវ៉ាស៊ីតោនដែរ និងកំពុងទទួលកងទ័ពអាមេរិករាប់ពាន់នាក់។
ក្រោយទៅដល់ទីក្រុងវ៉ាសូវី លោកបៃដិននឹងជួបពិភាក្សាជាមួយប្រធានាធិបតី ប៉ូឡូញ លោក អាន់ដ្រេ ឌូដា (Andrzej Duda) ពីវីធីដែលអាមេរិករួមជាមួយនឹងសម្ព័ន្ធមិត្ត ព្រមទាំងដៃគូរបស់អាមេរិកធ្វើការឆ្លើយតបទៅនឹងវិបត្តិមនុស្សធម៌ និងបញ្ហាសិទ្ធិមនុស្សដែលជះចេញមកពីទង្វើឈ្លានពានរបស់រុស្ស៊ីលើអ៊ុយក្រែន។
នៅថ្ងៃចន្ទដើមសប្តាហ៍នេះ លោក បៃដិន ក៏បានពិភាក្សាដែរជាមួយប្រធានាធិបតីបារាំង ម៉ាក្រុង មេដឹកនាំអាល្លឺម៉ង់ អូឡាហ្វ ស្ហុលស៍ ប្រមុខរដ្ឋអ៊ីតាលី ម៉ារីយ៉ូ ដ្រាហ្គី និងជាមួយលោកបូរីស ចនសុន នាយករដ្ឋមន្ត្រីអង់គ្លេស។
មេដឹកនាំប្រទេសធំៗទាំង៥ បានជជែកពិភាក្សាគ្នាអំពីកង្វល់ដ៏ធំរបស់ពួកគេជុំវិញកលល្បិចដ៏ឃោរឃៅរបស់ក្រុងមូស្គូនៅអ៊ុយក្រែន រួមមានការវាយប្រហាររបស់រុស្ស៊ីលើជនស៊ីវិលផង។ ក្រៅពីនេះ លោកបៃដិននិងសម្ព័ន្ធមិត្តក៏បានពិនិត្យមើលពីបញ្ហាសន្តិសុខ និងជំនួយមនុស្សធម៌សម្រាប់អ៊ុយក្រែន ព្រមទាំងលទ្ធភាពនៃបទឈប់បាញ់ដែរ។
នៅត្រង់ចំណុចនេះ គួរបញ្ជាក់ជូនថាក្នុងបរិបទនៃសង្គ្រាមនៅអ៊ុយក្រែន កាលថ្ងៃទី២១មីនា សហភាពអឺរ៉ុបបានអនុម័តយុទ្ធសាស្រ្តការពារជាតិថ្មីមួយដើម្បីបង្កើនសមត្ថភាពចេញធ្វើអន្តរាគមន៍របស់ខ្លួន រួមទាំងការបង្កើនកងកម្លាំងប្រតិកម្មរហ័សឲ្យឡើងដល់ចំនួន ៥ពាន់នាក់ផង។
លោក ហ្សេឡេនស្គី អំពាវនាវឲ្យពិភពលោករួមគ្នាប្រឆាំងនឹងសង្គ្រាមរបស់រុស្ស៊ី
គិតត្រឹមថ្ងៃព្រហស្បតិ៍ ទី២៤ មីនានេះ រយៈពេលមួយខែហើយដែលរុស្ស៊ីបានចាប់ផ្តើមការវាយប្រហារដ៏គួរឲ្យតក់ស្លុតទៅលើអ៊ុយក្រែន។
ក្នុងខណៈនេះ មេដឹកនាំអ៊ុយក្រែនលោកវ៉ូឡូឌីមៀរ ហ្សេឡេនស្គី នៅតែបង្ហាញពីភាពអង់អាចក្លាហានរបស់លោក និងនៅតែតស៊ូបន្តរួមសុខទុក្ខជាមួយប្រជាជនហើយនិងកងទ័ពអ៊ុយក្រែនឯក្នុងប្រទេស។
មុនត្រូវថ្លែងសារតាមវីដេអូនៅក្នុងជំនួបរបស់អូតង់ តាមរយៈសុន្ទរកថាទូរទស្សន៍ពីរដ្ឋធាទីកៀវកាលពីយប់ថ្ងៃពុធម្សិលមិញ លោកហ្សេឡេនស្គីបានអំពាវនាវឲ្យប្រជាជននៅទូទាំងពិភពលោក ចុះផ្លូវតវ៉ាប្រឆាំងនឹងសង្គ្រាមដែលបង្កឡើងដោយរុស្ស៊ី។ ទន្ទឹមនេះ លោកក៏បានអំពាវនាផងដែរដល់មេដឹកនាំលោកខាងលិចដែលនឹងជួបប្រជុំគ្នាក្នុងកំពូលរបស់អូតង់ក្នុងទីក្រុងព្រុចសែលនៅថ្ងៃនេះឲ្យបង្កើនការផ្គត់ផ្គង់អាវុធទៅឲ្យអ៊ុយក្រែន។
"ពិភពលោកត្រូវតែបញ្ឈប់សង្រ្គាម។ ក្នុងជីវិតរស់នៅប្រចាំថ្ងៃ មនុស្សគ្រប់រូបត្រូវចេញពីការិយាល័យ ផ្ទះសម្បែង និងសាលារៀនក្នុងបរិយាកាសសន្តិភាព។ សូមចូលរួមជាមួយនិមត្តិសញ្ញារបស់អ៊ុយក្រែន ដើម្បីគាំទ្រអ៊ុយក្រែន គាំទ្រសេរីភាព និងគាំទ្រដល់អាយុជីវិតមនុស្ស"។ នេះគឺជាការប្រកាសរបស់មេដឹកនាំអ៊ុយក្រែនលោកហ្សេឡេនស្គី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ