លោក ចូ បៃដិន លើកឡើងថាមិនយូរទេ រុស្ស៊ីអាចនឹងប្រើអាវុធគីមី អាវុធជីវសាស្ត្រមកលើអ៊ុយក្រែន
កាលពីថ្ងៃចន្ទទី២១មីនា លោកចូ បៃដិនបានលើកឡើងថា មានសញ្ញាដែលបញ្ជាក់ថា រុស្ស៊ីអាចនឹងប្រើអាវុធគីមី និងអាវុធជីវសាស្ត្រមកលើអ៊ុយក្រែន។ សញ្ញានោះ គឺថាទីមួយលោកពូទីន កំពុងតែទ័លច្រកខ្លាំង។ ហើយមួយទៀត គឺរុស្ស៊ីបានចាប់ផ្តើមបំផុសបំផុលពាក្យចចាមអារ៉ាម ចោទអាមេរិក អូតង់ និង អ៊ុយក្រែន ថាមានអាវុធប្រភេទនេះ។
ចុះផ្សាយនៅថ្ងៃ៖
ថ្លែងនៅក្នុងកម្មវិធីជួបជុំមួយ ជាមួយក្រុមអ្នកជំនួញអាមេរិក កាលពីថ្ងៃចន្ទ លោក ចូ បៃដិន បានលើកឡើងថា វាច្បាស់ណាស់ហើយ ដែលរុស្ស៊ី កំពុងតែត្រៀមប្រើអាវុធគីមី និងអាវុធជីវសាស្ត្រ មកលើអ៊ុយក្រែន។
លោក ចូ បៃដិន បានពន្យល់ថា លោកពូទីន នាពេលនេះ គឺខ្នងកំពុងទល់ដល់ជញ្ជាំង ទ័លច្រកហើយ។ ជាងនេះទៀត ថ្មីៗនេះ រុស្ស៊ីបានចាប់ផ្តើមបំផុសបំផុលពាក្យចចាមអារ៉ាម ចោទប្រកាន់អាមេរិក និងអូតង់ ថាមានលាក់អាវុធគីមី អាវុធសរីរាង្គ នៅអឺរ៉ុប និងបានចោទថាអ៊ុយក្រែនមានអាវុធប្រភេទនេះថែមទៀតផង។ ដូច្នេះបើតាមការវិភាគរបស់លោក នេះគឺជាសញ្ញាបង្ហាញថា មិនយូរទេ រុស្ស៊ី ប្រាកដជាប្រើអាវុធកាចសាហាវ២ប្រភេទនេះ មកលើអ៊ុយក្រែន។
លោកស្រី ជែន សាគី អ្នកនាំពាក្យសេតវិមាន បានសរសេរលើ Twitter ថា រុស្ស៊ីកំពុងតែផ្សព្វផ្សាយព័ត៌មានប្រឌិតក្លែងក្លាយ ចោទអាមេរិកថាមានលាក់អាវុធគីមី និង អាវុធជីវសាស្ត្រនៅអឺរ៉ុប។ ហើយចិន វិញ ក៏បានយកព័ត៌មានក្លែងក្លាយ កុហកបោកប្រាស់នេះ ទៅឃោសនាបន្តដែរ។ ដូច្នេះ អាមេរិក ត្រូវតែតាមដានសង្កេត ឲ្យបានជាប់ស្អិត ព្រោះរុស្ស៊ីអាចនឹងប្រើប្រាស់ អាវុធកាចសាហាវទាំង២ប្រភេទនេះ។
លោកចូ បៃដិន បានបញ្ជាក់ជាថ្មីថា ប្រសិនបើរុស្ស៊ី ហ៊ានប្រើអាវុធកាចសាហាវទាំង២ប្រភេទនេះ ទៅលើអ៊ុយក្រែន គឺអាមេរិក រួមទាំងអូតង់ និងរួមគ្នាឆ្លើយតបទៅរុស្ស៊ីវិញឲ្យចាស់ដៃ។ តែយ៉ាងណា លោក ចូ បៃដិន មិនបានបញ្ជាក់លំអិតទេ ថាការឆ្លើយតបវិញទៅលើរុស្ស៊ីនេះ គឺធ្វើទៅក្នុងរូបភាពបែបណា បែបទណ្ឌកម្មសេដ្ឋកិច្ច ឬតាមផ្លូវយោធា។ លោក ចូ បៃដិន គ្រាន់តែលើកឡើងថា លោកពូទីន ដឹងច្បាស់ហើយ ថាអូតង់មានការសាមគ្គីគ្នា រឹងមាំកម្រិតណា ក្នុងសំណុំរឿងនេះ។
គួរកត់សំគាល់ថា ប៉ុន្មានថ្ងៃចុងក្រោយនេះ កងទ័ពរុស្ស៊ី បានបន្ថែមការវាយប្រហារខ្លាំងសម្បើមណាស់ ជាមួយនឹងអាវុធមីស៊ីលធុនធំ ដូចជាមីស៊ីលអ៊ីពែរសូនិក និងមីស៊ីលក្រ័រស្យែរជាដើម។ កាលពីយប់ថ្ងៃអាទិត្យឈានចូលថ្ងៃចន្ទ ទីតាំងផ្សារទំនើបដ៏ធំមួយ នៅទីក្រុងកៀវ ត្រូវបានកម្ទេចទាំងស្រុងដោយគ្រាប់មីស៊ីលរបស់រុស្ស៊ី។ យោងតាមលោកអភិបាលក្រុងកៀវ គិតមកត្រឹមពេលនេះ មានប្រជាជនស៊ីវីល នៅទីក្រុងកៀវ ចំនួន៦៥នាក់បានស្លាប់ ដែលក្នុងនោះមានកុមារ៤នាក់។ ក្រៅពីនេះ មានរបួសជាង៣០០ផ្សេងទៀត។ នៅក្រុងម៉ារីយូប៉ូលវិញ រុស្ស៊ីបន្តទំលាក់គ្រាប់បែក ព័ទ្ធទីក្រុងនេះជិតឈឹង បន្ទាប់ពីភាគីអ៊ុយក្រែន បានបដិសេធមិនព្រមលើកទង់ជ័យស ទៅតាមការទាមទាររបស់រុស្ស៊ី។ ប្រជាជនជាង៣សែននាក់ ដែលនៅជាប់គាំងក្នុងទីក្រុងនេះ កំពុងរស់នៅក្នុងលក្ខខណ្ឌដ៏លំបាកបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ