លោកបៃដិននិងលោកម៉ូឌីពិភាក្សាគ្នាត្រង់ទៅត្រង់មកពីសង្គ្រាមនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៣៣
នៅក្នុងជំនួបតាមវីដេអូកាលពីថ្ងៃចន្ទ ទី១១ មេសាម្សិលមិញ លោកប្រធានាធិបតីអាមេរិក ចូ បៃដិន និងនាយករដ្ឋមន្ត្រីលោក ណារិនដ្រា ម៉ូឌី បានផ្តោះប្តូរយោបល់គ្នាត្រង់ទៅត្រង់មកស្តីពីសង្គ្រាមអ៊ុយក្រែន។ ភាគីអាមេរិកបានខិតខំបញ្ចុះបញ្ចូលឲ្យឥណ្ឌាដើរចេញពីជំហរអព្យាក្រឹត និងបែរមកថ្កោលទោសលើសង្គ្រាមឈ្លានពានរបស់រុស្ស៊ីនៅអ៊ុយក្រែន។ ក៏ប៉ុន្តែ កិច្ចខិតខំប្រឹងប្រែងរបស់អាមេរិកនេះហាក់មិនសូវទទួលបានផលប៉ុន្មាននោះទេ។
ជំនួបបៃដិន-ម៉ូឌីផ្តោតលើសង្គ្រាមនៅអ៊ុយក្រែន
នៅក្នុងជំនួបតាមវីដេអូកាលពីថ្ងៃចន្ទ ទី១១ មេសាម្សិលមិញ ក្រៅពីផ្តោតលើទំនាក់ទំនងទ្វេភាគី សង្គ្រាមនៅអ៊ុយក្រែនក៏ជាប្រធានរឿងធំដែលលោកប្រធានាធិបតីអាមេរិកចូ បៃដិន បានលើកយកទៅពិភាក្សាគ្នាជាមួយសមភាគីឥណ្ឌាលោក ណារិនដ្រា ម៉ូឌីដែរ។
ទីក្រុងវ៉ាស៊ីនតោនមើលឃើញថាឥណ្ឌាគឺជាដៃគូយុទ្ធសាស្ត្រដ៏សំខាន់មួយក្នុងការរាំងខ្ទប់ឥទ្ធិពលរបស់ចិននៅក្នុងតំបន់អាស៊ីប៉ាស៊ីហ្វិក។ ប៉ុន្តែ សង្គ្រាមនៅអ៊ុយក្រែនបាននឹងកំពុងធ្វើឲ្យទំនាក់ទំនងរវាងទីក្រុងវ៉ាស៊ីនតោននិងញូវដេលីជួបភាពតានតឹងនឹងគ្នានៅមួយរយៈពេលចុងក្រោយនេះ។
ដើម្បីលាងជម្រះនូវមន្ទិលសង្ស័យរវាងគ្នា លោកបៃដិន និងលោកម៉ូឌី បាននិយាយផ្តោះប្តូរយោបល់គ្នាត្រង់ទៅត្រង់មកពីសង្គ្រាមនៅអ៊ុយក្រែន។ លោកបៃដិន បានចាប់ផ្តើមកិច្ចប្រជុំ ដោយសាទរចំពោះទំនាក់ទំនងយ៉ាងស៊ីជម្រៅរវាងសរហដ្ឋអាមេរិកនិងឥណ្ឌា ហើយបាននិយាយថាលោកចង់បន្តការពិគ្រោះយោបល់យ៉ាងជិតស្និទ្ធជាមួយនាយករដ្ឋមន្ត្រីឥណ្ឌាពាក់ព័ន្ធសង្រ្គាមនៅអ៊ុយក្រែន។
បន្ទាប់មកទៀត លោក បៃដិនបានស្នើយមេដឹកនាំឥណ្ឌាកុំឲ្យបង្កើនការទិញប្រេងពីរុស្ស៊ីនៅខណៈដែលអាមេរិកនិងប្រទេសជាច្រើនផ្សេងទៀតកំពុងតែព្យាយាមយ៉ាងខ្លាំងកាត់ផ្តាច់ប្រភពចំណូលរបស់ទីក្រុងមូស្គូបន្ទាប់ពីចូលឈ្លានពានអ៊ុយក្រែន។
រឿងទិញប្រេងរបស់រុស្ស៊ីគឺជាចំណុចដ៏សើបខ្លាំងមួយ។ ចាប់តាំងពីទីក្រុងមូស្គូចូលធ្វើសង្គ្រាមវាយអ៊ុយក្រែនមក អាមេរិកនិងប្រទេសសម្ព័ន្ធមិត្តបានដាក់ទណ្ឌកម្មសេដ្ឋកិច្ចយ៉ាងចាស់ដៃលើរុស្ស៊ីរហូតធ្វើឲ្យរុស្ស៊ីពិបាកមិនអាចលក់ប្រេងបានងាយស្រួលដូចមុនឡើយ។ ក៏ប៉ុន្តែ ឥណ្ឌាមិនបានខ្វល់ពីទណ្ឌកម្មសេដ្ឋកិច្ចទាំងនោះឯណា និងបានបន្តទិញប្រេងរុស្ស៊ីរហូតធ្វើឲ្យអាមេរិកខឹងអន់ចិត្តនិងកើតចិត្តបារម្ភមិនតិចឡើយ។
អាមេរិកនិងឥណ្ឌាពិបាកនិយាយចុះសម្រុងគ្នាទាក់ទិនសង្រ្គាមអ៊ុយក្រែន?
សហរដ្ឋអាមេរិកហាក់មិនអាចសម្រេចបានលទ្ធផលជាដុំកំភួនឡើយក្នុងការអូសទាញឥណ្ឌាឲ្យដើរចេញពីជំហរអព្យាក្រឹត និងបែរមកថ្កោលទោសរុស្ស៊ីវិញជុំវិញរឿងដែលរុស្ស៊ីចូលធ្វើសង្គ្រាមឈ្លានពានអ៊ុយក្រែន។
ក្រោយលោកបៃដិនស្នើសុំឲ្យឥណ្ឌាឈប់បង្កើនការទិញប្រេងពីរុស្ស៊ី លោកណារិនដ្រា ម៉ូឌី មិនបានធ្វើការប្តេជ្ញាចិត្តជាសារធារណៈឈប់ទិញប្រេងរបស់រុស្ស៊ីដែលជាប្រភពនៃភាពតានតឹងជាមួយនឹងអាមេរិកឡើយ។
ចំណែកឯលោកប្រធានាធិបតីអាមេរិកបៃដិនវិញ ក៏មិនបានបន្ថែមការទាមទារធំដុំណាមួយពីឥណ្ឌាដែលជាសម្ព័ន្ធមិត្តយុទ្ធសាស្ត្រដ៏សំខាន់ក្នុងការទប់ស្កាត់ឥទ្ធិពលរបស់ចិនដែលកំពុងកើនឡើងនៅក្នុងតំបន់អាស៊ីប៉ាស៊ីហ្វិកឡើយ។
លោកបៃដិន បានបិទបញ្ចប់កិច្ចប្រជុំជាមួយនាយករដ្ឋមន្ត្រីឥណ្ឌាលោកម៉ូឌី ដោយគ្រាន់តែនិយាយថាភាគីទាំងពីរបានប្តេជ្ញាពង្រឹងទំនាក់ទំនងនឹងគ្នា ចំណែកមន្ត្រីសេតវិមានវិញក៏មិនហ៊ាននិយាយអ្វីឡើយត្រង់ចំណុចថាតើឥណ្ឌាឈរនៅខាងបស្ចិមលោកក្នុងការថ្កោលទោសលោកពូទីនឬក៏អត់ និងថាជម្រើសចុងក្រោយគឺរដ្ឋាភិបាលឥណ្ឌារបស់លោកម៉ូឌីជាអ្នកសម្រេច។
យ៉ាងណាក៏ដោយ អ្នកនាំពាក្យសេតវិមានអ្នកស្រី ជែន សាគី បាននិយាយថាលោកប្រធានាធិបតីអាមេរិកបៃដិនបានគូសបញ្ជាក់យ៉ាងច្បាស់ដែរហើយពីជំនឿចិត្តរបស់លោកដែលថាឥណ្ឌានឹងមិនបង្កើនការនាំចូលថាមពលនិងទំនិញផ្សេងៗទៀតពីរុស្ស៊ី។
នៅត្រង់ចំណុចនេះ គួរជម្រាបជូនដែរថាលោកបៃដិននិងលោកម៉ូឌីនឹងជួបគ្នាដោយផ្ទាល់នៅថ្ងៃទី២៤ ខែឧសភាខាងមុខនៅឯទីក្រុងតូក្យូក្នុងជំនួបកំពូលនៃបក្សសម្ព័ន្ធចតុភាគីដែលរួមមានទាំងអូស្ត្រាលីនិងជប៉ុនផងដែរ។
ឥណ្ឌាអាចប្រឈមនឹងទណ្ឌកម្មរបស់អាមេរិកដែរទេ?
សហរដ្ឋអាមេរិកចង់ឲ្យឥណ្ឌាក្លាយជាចំណែកមួយនៃយុទ្ធសាស្ត្ររបស់ខ្លួនក្នុងការធ្វើឲ្យរុស្ស៊ីកាន់តែឯកោខ្លាំងឡើងក្នុងឆាកអន្តរជាតិ។ ក៏ប៉ុន្តែក្នុងពេលជាមួយគ្នានេះ អាមេរិកក៏មិនចង់ធ្វើឲ្យឥណ្ឌាចុះខ្សោយនោះទេដោយហេតុថាបើឥណ្ឌាចុះអន់ខ្សោយ នោះអាមេរិកនឹងបាតបង់សម្ព័ន្ធមិត្តយុទ្ធសាស្ត្រដ៏សំខាន់មួយក្នុងការប្រឆាំងទល់នឹងចិនទាំងផ្នែកការទូតនិងយោធា។
មកទល់នឹងពេលនេះ ទីក្រុងវ៉ាស៊ីនតោនមិនបានរិះគន់ឥណ្ឌាដោយផ្ទាល់នោះទេ ប៉ុន្តែបានចេញសេចក្តីថ្លែងការណ៍ដែលអ្នកជំនាញហៅថាជាសារព្រមានកម្រិតស្រាលដល់ក្រុងញូវដេលី។
កន្លងមក អាមេរិកធ្លាប់បានព្រមានរួចហើយថាប្រទេសណាដែលហ៊ានជួយរុស្ស៊ីឲ្យគេចផុតពីការដាក់ទណ្ឌកម្មអន្តរជាតិ ប្រទេសទាំងនោះនឹងទទួលរងផលវិបាកជាមិនខាន។
យ៉ាងណាក៏ដោយ អាមេរិកនៅមិនទាន់ចាត់វិធានការរារាំងឥណ្ឌាលើយន្តការទូទាត់ប្រាក់រូពីរបស់ឥណ្ឌាជាមួយលុយរូប្លិ៍របស់រុស្ស៊ីឡើយ ដូច្នោះហើយទើបឥណ្ឌាអាចឆ្លៀតឱកាសទិញប្រេងដែលបញ្ចុះតម្លៃដោយប្រទេសរុស្ស៊ី។ ឥណ្ឌាបានទិញប្រេងឆៅយ៉ាងហោចណាស់ក៏ ៣លានបារ៉ែលដែរពីរុស្ស៊ីចាប់តាំងពីផ្ទុះសង្គ្រាមអ៊ុយក្រែននាថ្ងៃទី២៤ ខែកុម្ភៈមក។
កាលពីថ្ងៃទី២១ ខែមីនាកន្លងទៅនេះ លោកចូ បៃដិន បាននិយាយថាក្នុងចំណោមប្រទេសសម្ព័ន្ធមិត្តរបស់អាមេរិក ឥណ្ឌាគឺជាប្រទេសខុសគេតែមួយគត់ដែលហាក់បានប្រកាន់ជំហរខុសពីអាមេរិកទាក់ទិនសង្គ្រាមឈ្លានពានរបស់រុស្ស៊ីទៅលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ