បៃដិនអញ្ជើញទៅបំពេញទស្សនកិច្ចនៅអាស៊ី ដើម្បីបញ្ជាក់មហិច្ឆតាអាមេរិក
ចុះផ្សាយនៅថ្ងៃ៖
ស្តាប់ - ០៧:០២
លោកចូ បៃដិនត្រូវអញ្ជើញទៅដល់ក្រុងសេអ៊ូល នៅរសៀលថ្ងៃសុក្រទី ២០ ឧសភា ក្នុងក្របខ័ណ្ឌនៃការបំពេញទស្សនកិច្ចមួយជុំនៅអាស៊ី ជាលើកទីមួយ ក្នុងនាមជាប្រធានាធិបតីអាមេរិក។ លោក បៃដិន នឹងជួបប្រធានាធិបតីកូរ៉េខាងត្បូងថ្មីលោក យូន ស៊ុកយោល ដែល មានយុទ្ធសាស្ត្រខិតរកអាមេរិកខ្លាំង ខុសពីប្រធានាធិបតីមុន រួចបន្តដំណើរទៅប្រទេសជប៉ុន ដើម្បីដឹកនាំបើកជំនួបចតុភាគីអាមេរិក ជប៉ុន ឥណ្ឌា និងអូស្ត្រាលី។ ជាទស្សនកិច្ច ដែលអាមេរិកចង់បញ្ជាក់វត្តមាននិងការយកចិត្តទុកដាក់លើអាស៊ី តែអាចនឹងត្រូវកូរ៉េខាងជើងស្វាគមន៍តាមរយៈការបាញ់សាកល្បងនុយក្លេអ៊ែរផង។
លោកប្រធានាធិបតីអាមេរិក ចូបៃដិន កំពុងបំពេញទស្សនកិច្ចនៅអាស៊ី ដោយចាប់ផ្តើមពី ប្រទេសកូរ៉េខាងត្បូង នៅថ្ងៃនេះ ហើយនៅថ្ងៃអាទិត្យ លោកនឹងអញ្ជើញទៅក្រុងតូក្យូ។ ក្រៅពីជួបពិភាក្សាជាមួយប្រមុខដឹកនាំ ប្រទេសកូរ៉េខាងត្បូង និងជប៉ុនទាំងពីរ លោកបៃដិន ត្រូវធ្វើជាអធិបតីនៅក្នុងជំនួបចតុភាគី អាមេរិក ឥណ្ឌា ជប៉ុន និងអូស្ត្រាលីទៀត។
ការឈ្លានពានអ៊ុយក្រែនពីសំណាក់រុស្ស៊ី ថ្វីបើបានធ្វើរដ្ឋបាលអាមេរិកវក់វីខ្លាំងអស់ជាច្រើនសប្តាហ៍មែន តែក៏បានផ្តល់កម្លាំងនិងជំហាន ការទូត និងតាកទិកថ្មី ឱ្យអាមេរិកបានដើរតួជាមហាអំណាចពិភពលោក។ អាមេរិក ប្រមូលផ្តុំក្រុមប្រទេសបស្ចិមលោកឱ្យសម្រេចរួមគ្នា បញ្ជូនអាវុធទៅឱ្យអ៊ុយក្រែន ឬដាក់ទណ្ឌកម្មសេដ្ឋកិច្ច ហើយបានពង្រីកអង្គការអូតង់ តាមរយៈការទទួលបេក្ខភាពហ្វាំងឡង់និងស៊ុយអែត នៅចំពោះរុស្ស៊ី។ លោកបៃដិន បានថែមទទួលជួបនាយករដ្ឋមន្ត្រីស៊ុយអែត និងប្រធានាធិបតី ន័រវែស នៅសេតវិមានទៀត មុនចេញដំណើរមកអាស៊ី។
បើតាមទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន់ ការផ្តល់ពេល ថាមពលនិងការយកចិត្តទុកដាក់លើអឺរ៉ុប មិនមែនមានន័យថាអាមេរិកមិនភ្លេចអាស៊ី ឬ អាមេរិកមិន ផ្តល់ពេល ផ្តល់ថាមពលនិងការយកចិត្តទុកដាក់លើអាស៊ីទេ។ ប្រធានាធិបតីអាមេរិក ចង់ស្រេះចូលគ្នា នយោបាយអាមេរិកនៅអឺរ៉ុប និងនៅអាស៊ី ជានយោបាយពីររួម គ្នាព្រោះជាការពង្រឹងគ្នាទៅវិញទៅមក។
តៃវ៉ាន់និងកូរ៉េខាងជើង
អាមេរិកចង់លាតត្រដាងឱ្យឃើញអំពីវត្តមាននិង មហិច្ឆតារបស់អាមេរិកចំពោះអាស៊ី ក្នុងទស្សនៈភូមិសាស្ត្រនយោបាយអាមេរិកប្រឈមនឹងចិន។ និយាយឱ្យចំ គឺអាមេរិកចង់បង្ហាញពីរូបភាពពិភពលោករួបរួមគ្នា រវាងអ្នកប្រជាធិបតេយ្យ និងសង្គមបើកចំហ ដោយមានអាមេរិកជាបង្គោល ថាជាអ្នកកំណត់ច្បាប់វិន័យ។ លោកស៊ូលីវ៉ាន់ ជឿថាចិនយល់ច្បាស់ណាស់។
សារនេះគ្មានន័យអវិជ្ជមានដៅតែលើចិនឬប្រទេសណាតែមួយទេ។ ប៉ុន្តែគ្រប់គ្នាសុទ្ធតែដឹងថាចង់សំដៅលើចិននិងតៃវ៉ាន់។ នាយកទីភ្នាក់ងារចារកិច្ចអាមេរិក ធ្លាប់បានអះអាងថា ចិនបានចិនតាមដាន ស្ថានការណ៍នៅអ៊ុយក្រែន យ៉ាងល្អិតល្អន់ដើម្បីប្រៀបធៀបអំពីផលវិបាកនៅពេលចិនចង់ប្រើកម្លាំងយកតៃវ៉ាន់។ ហើយចិនចាប់អារម្មណ៍ជាពិសេស ចំពោះសាមគ្គីភាពរបស់ក្រុមសម្ព័ន្ធអាត្លង់ទិកប្រឆាំងនឹងទង្វើឈ្លានពានរបស់រុស្ស៊ីលើអ៊ុយក្រែនថា នៅពេលអូតង់រួបរួមគ្នា ដាក់ទណ្ឌកម្ម សេដ្ឋកិច្ចនឹងខាតបង់ប៉ុនណា។
ប៉ុន្តែកូរ៉េខាងជើងវិញ មិនយល់ដូចចិនទេ។ កូរ៉េខាងជើងនឹងបន្តសកម្មភាពបង្កហេតុ ដូចទម្លាប់។ បើតាមអ្នកជំនាញអាមេរិក និងកូរ៉េខាងត្បូង ក្នុងអំឡុងពេលទស្សនកិច្ចរបស់ លោក បៃដិន នៅអាស៊ី លោកអាចនឹងបានឮបានដឹងយ៉ាងកៀក ទង្វើសាកល្បងនុយក្លេអ៊ែររបស់កូរ៉េខាងជើងផង។ ចារកិច្ចអាមេរិកសន្និដ្ឋានថា ព្យុងយ៉ាងបានត្រៀមលក្ខណៈចប់សព្វគ្រប់ហើយ ចាំតែឱកាសនឹងបាញ់សាកល្បងមីស៊ីល ឬ នុយក្លេអ៊ែរ បាញ់សាកល្បងទាំងពីរមុខ តែម្តងផង។ ប្រមុខដឹកនាំកូរ៉េខាងជើង ដែលយល់ថាអាវុធនុយក្លេអ៊ែរ ជាមធ្យោបាយបង្ហាញមុខលើឆាកអន្តរជាតិ និងជាមធ្យោបាយបញ្ជាក់អំណាចដឹកនាំប្រទេស ធ្លាប់បានធ្វើការសាកល្បងនុយក្លេអ៊ែរ ចំនួន៦លើកមកហើយ នៅចន្លោះពីឆ្នាំ២០០៦-២០១៧។
ហេតុដូច្នេះហើយបានជា បើទោះបីជាលោកបៃដិន មានជំនក់ជំនាញផ្នែកការទូតយ៉ាងណាក៏ដោយក៏លោកប្រធានាធិបតីអាមេរិក មិនធ្វើដំណើរទៅកាន់តំបន់ស គ្មានកងទ័ពជាប់ប្រទល់កូរ៉េទាំងពីរ ដូចប្រធានាធិបតីអាមេរិកអាណត្តិមុន ដូណាល់ត្រាំ ដែលបានទៅជួបចរចាដោយផ្ទាល់ជាមួយ ប្រមុខគីមជុងអ៊ុនពីរលើកតែគ្មានលទ្ធផលទេ។
សម្រាប់អាមេរិក ការបាញ់សាកល្បងនុយក្លេអ៊ែរជាយថាហេតុរបស់ព្យុងយ៉ាងមិនមែនជាបរាជ័យនៃនយោបាយការបរទេសអាមេរិកទេ។ ផ្ទុយទៅវិញ បើតាមទីប្រឹក្សាសន្តិសុខអាមេរិកដដែល ប្រសិនបើកូរ៉េខាងជើងពិតជាបាញ់សាកល្បងមីស៊ីលមែន នោះអាមេរិកនឹងតម្រែតម្រឹមតកម្លាំងកងទ័ពអាមេរិកនៅ ក្នុងតំបន់។ អាមេរិកនឹងឆ្លើយវត្តមាននៅក្បែរសម្ព័ន្ធមិត្តនិងដៃគូទាំងអស់។
បើតាមអ្នកជំនាញ កូរ៉េខាងជើងសម្រេចពន្លឿនឬពន្យឺតកម្មវិធីនុយក្លេអ៊ែរ អាស្រ័យទៅលើលទ្ធផលនៃជំនួបរវាងលោកបៃដិន និងលោក យូន ស៊ុកយោល នៅថ្ងៃសៅរ៍ស្អែក។
នយោបាយផ្ទៃក្នុងកូរ៉េខាងត្បូង
ប៉ុន្តែសម្រាប់កូរ៉េខាងត្បូងផ្ទាល់វិញ ជាពិសេសសម្រាប់ប្រធានាធិបតីកូរ៉េខាងត្បូងថ្មី ដែលមានយុទ្ធសាស្ត្រខិតរកអាមេរិកខ្លាំង បានទទួលប្រធានាធិបតីអាមេរិកតែ១០ថ្ងៃក្រោយចូលកាន់តំណែង ជាឱកាសដ៏ប្រពៃណាស់សម្រាប់សម្រេចផែនការដឹកនាំប្រទេស។
នៅក្នុងសេចក្តីថ្លែងការណ៍របស់ប្រធានាធិបតី លោក យូន ស៊ុកយោល បានអះអាងថាមិនផ្តោតលើទំនាក់ទំនងជាមួយកូរ៉េខាងជើងតែមួយទេ តែរដ្ឋាបាលកូរ៉េខាងត្បូងថ្មី នឹងពង្រីកវិស័យការទូតជាមួយសហភាពអឺរុប និងអាស៊ីទាំងមីល ពោលគឺមានជំហរដូចអាមេរិក។ ក្នុងវិស័យការពារជាតិ សេអ៊ូលចង់ឱ្យសហរដ្ឋអាមេរិកពង្រឹងពង្រីកកម្លាំង ដើម្បី ឱ្យមានលក្ខណៈកំញ៉ោញកាន់តែខ្លាំង ដូចជាត្រូវពង្រាយបន្ថែមអាវុធយុទ្ធភ័ណ្ឌ ឬអាវុធនុយក្លេអ៊ែរលើផ្ទៃប្រទេសកូរ៉េខាងត្បូង។
ជាមួយលោកចូបៃដិន កូរ៉េខាងត្បូងក៏នឹងជជែកអំពីសេដ្ឋកិច្ចនិងពិសេសអំពីគ្រឿងបន្លាស់ semi-conducteurs ដ៏ចាំបាច់។ គ្រាន់តែអញ្ជើញមកដល់ក្រុងសេអ៊ូលភ្លាម លោកប្រធានាធិបតីបានអញ្ជើញទៅទស្សនារោងចក្រផលិតបន្ទះឈីបរបស់រោងចក្រ Samsung Electronics ភ្លាមតែម្តង។
លោកប្រធានាធិបតីកូរ៉េខាងត្បូង Yoon Suk-yeol នឹងប្រកាសចូលរួមក្នុងគម្រោងសេដ្ឋកិច្ចឥណ្ឌូប៉ាស៊ីហ្វិករបស់លោកបៃដិន ដើម្បីធានាសុវត្ថិភាពបណ្តាញផ្គង់ផ្គង់ភស្តុភារ ដោយគ្មានចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ