កូរ៉េខាងជើង ត្រៀមនឹងបាញ់សាកល្បងនុយក្លេអ៊ែរ ស្វាគមន៍ប្រធានាធិបតីអាមេរិក
កូរ៉េខាងជើងបានត្រៀមលក្ខណៈចប់សព្វគ្រប់ហើយ ហើយអាចនឹងធ្វើការបាញ់សាកល្បងនុយក្លេអ៊ែរ បានគ្រប់ពេលទាំងអស់។ នេះជាពាក្យព្រមានរបស់តំណាងរាស្ត្រកូរ៉េខាងត្បូងម្នាក់។ ចំណែកសហរដ្ឋអាមេរិក ព្យាករថា ការសាកល្បងនុយក្លេអ៊ែរអាចប្រព្រឹត្តទៅក្នុងអំឡុងពេលលោកប្រធានាធិបតីចូ ដៃដិន បំពេញទស្សនកិច្ចនៅក្រុងសេអ៊ូលផង។
ចុះផ្សាយនៅថ្ងៃ៖
ស្តាប់ - ០១:៥២
ទោះបីជាកូរ៉េខាងជើងកំពុងរងរលកចម្លងរាតត្បាតកូវីដ ដោយមានអ្នកក្តៅខ្លួន (វិជ្ជមាន)ជិត២លាននាក់ក៏ដោយ ក៏ព្យុងយ៉ាងមិនបោះបង់ផែនការសាកល្បងនុយក្លេអ៊ែរដែរ។ កូរ៉េខាងជើង បានត្រៀមលក្ខណៈរួចស្រេចហើយ និងរង់ចាំតែឱកាសល្អសម្រាប់បាញ់តែប៉ុណ្ណោះ។ នេះបើតាមប្រសាសន៍របស់លោក Ha Tae-Keung ទៅកាន់អ្នកសារព័ត៌មាន ដោយយោងតាមព៌តមានផ្តល់ដោយភ្នាក់ងារចារកិច្ចជាតិ។
រូបភាពផ្កាយរណបបានបង្ហាញឱ្យឃើញពីសកម្មភាពនៅក្នុងរូងដីនៃមជ្ឈមណ្ឌលសាកល្បងនុយក្លេអ៊ែរ Punggye-ri ដែលកូរ៉េខាងជើងធ្លាប់អះអាងបានរំសាយកាលពីឆ្នាំ២០១៨ដែរ។ បើតាមលោក ជេក ស៊ុយលីវ៉ាន់ ទីប្រឹក្សាសន្តិសុខជាតិរបស់សេតវិមាន ព្យុងយ៉ាងអាចនឹងបាញ់សាកល្បងជាថ្មី នូវមីស៊ីល រយៈឆ្ងាយ ឬក៏មីស៊ីលពាំនុយក្លេអ៊ែរ ឬទាំងពីរតែម្តងផង នៅមុន ឬ ក្រោយ ឬពេល លោកប្រធានាធិបតីអាមេរិក ចូ ដៃដិន កំពុងស្ថិតនៅក្នុងតំបន់។ កូរ៉េខាងជើងពិតជានឹងបញ្ចេញសកម្មភាព បង្កហេតុ ស្វាគមន៍ដំណើរទស្សនកិច្ចនៅអាស៊ីជាលើកទីមួយ របស់ប្រធានាធិបតីបៃដិន ជាប្រាកដ។ លោក ចូបៃដិន ត្រូវអញ្ជើញមកដល់ក្រុងសេអ៊ូលនៅល្ងាចថ្ងៃសុក្រទី ២០ឧសភា ដើម្បីបើកជំនួបកំពូលជាមួយប្រធានាធិបតី កូរ៉េខាងត្បូងថ្មី រួចបន្តដំណើរទៅជប៉ុនទៀត។
សម្រាប់អ្នកវិភាគ គ្មានអ្វីអាចបញ្ឈប់កូរ៉េខាងជើងបានទេ ពេលនេះ។ ចូលឆ្នាំ២០២២ភ្លាម ព្យុងយ៉ាងបានសម្រុកធ្វើការសាកល្បងមីស៊ីល៦លើករួចមកហើយ ដោយមិនខ្វល់ពីសំណើសុំចរចារបស់អាមេរិក និងទណ្ឌកម្មអន្តរជាតិទេ។ ហើយគម្រោងសាកល្បងនុយក្លេអ៊ែរជាលើកទី៧ អាចបង្កប់អត្ថន័យមួយបន្ថែមទៀត បើតាមការវិភាគ គឺដើម្បីបង្វែរចំណាប់អារម្មណ៍របស់ពលរដ្ឋកូរ៉េខាងជើងចេញពីវិបត្តិកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ