វត្តមានរបស់លោកពូទីនក្នុងជំនួបកំពូលBRICSសបញ្ជាក់ថារុស្ស៊ីមិននៅឯកោ
ចុះផ្សាយនៅថ្ងៃ៖
ស្តាប់ - ០៨:០៦
ជំនួបកំពូលលើកទី១៤របស់ក្រុមប្រទេសដែលមានសេដ្ឋកិច្ចកំពុងលូតលាស់ហៅកាត់ថា BRICS ដែលមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងបានចាប់ផ្តើមនៅថ្ងៃព្រហស្បតិ៍នេះ ដោយមានចិនធ្វើជាម្ចាស់ផ្ទះ។ ទោះធ្វើឡើងតាមសន្និសីទវីដេអូដោយគ្មានការចូលរួមផ្ទាល់មែន ប៉ុន្តែ ជំនួបកំពូលក្រុមប្រទេសBRICSលើកនេះ បើកឱកាសឲ្យប្រធានាធិបតីរុស្ស៊ី លោកពូទីនចេញមុខមាត់នៅលើឆាកអន្តរជាតិ ក្នុងខណៈពេលដែលក្រុមប្រទេសលោកខាងលិចដាក់ទណ្ឌកម្មសេដ្ឋកិច្ច និងព្យាយាមដាក់រុស្ស៊ីឲ្យនៅឯកោ ដោយសារការធ្វើសង្រ្គាមឈ្លានពានប្រទេសអ៊ុយក្រែន។ ជាមួយBrics លោកពូទីនត្រលប់មកបង្ហាញមុខនៅលើឆាកអន្តរជាតិ។
ក្រុមប្រទេសទាំង៥ ដែលមានសេដ្ឋកិច្ចកំពុងលូតលាស់ ហៅកាត់ថា Bricsបានបើកជំនួបកំពូល តាមរយៈវីដេអូនៅថ្ងៃព្រហស្បតិ៍។ ជាការកត់សំគាល់ គេឃើញប្រធានាធិបតីរុស្ស៊ី លោកពូទីនបង្ហាញមុខ ក្នុងកិច្ចប្រជុំជាមួយប្រធានាធិបតីចិន និងប្រធានាធិបតីរបស់ឥណ្ឌា ប្រេស៊ីល និងអាហ្វ្រិកខាងត្បូង។ ចាប់តាំងពីររុស្ស៊ីចូលធ្វើសង្រ្គាមឈ្លានពានអ៊ុយក្រែន និងរងជាប់ទណ្ឌកម្មសេដ្ឋកិច្ច ពីប្រទេសលោកខាងលិច នេះជាលើកទី១ ដែលគេឃើញ ប្រធានាធិបតីរុស្ស៊ី លោកពូទីនចូលរួមក្នុងព្រឹត្តិការណ៍អន្តរជាតិ។ វត្តមានរបស់ប្រធានាធិបតីរុស្ស៊ីក្នុងជំនួបកំពូលក្រុមប្រទេសBrics សបង្ហាញឲ្យឃើញថា ផែនការរបស់ក្រុមប្រទេសលោកខាងលិចដែលចង់ដាក់ឲ្យរុស្ស៊ី ឲ្យនៅឯកោដោយសារតែចូលធ្វើសង្រ្គាមនៅអ៊ុយក្រែន ត្រូវបរាជ័យធ្លាក់ទឹក
ក្រុមប្រទេសលោកខាងលិចបានដាក់ទណ្ឌកម្មសេដ្ឋកិច្ចលើរុស្ស៊ីក្នុងបំណងដាក់គំនាបឲ្យរុស្ស៊ីដកទ័ពឈប់ធ្វើសង្រ្គាមឈ្លានពានអ៊ុយក្រែន។ អាមេរិក និងសម្ព័ន្ធមិត្តនៅអឺរ៉ុបព្យាយាមគ្រប់មធ្យោបាយដើម្បីឲ្យធ្វើឲ្យរុស្ស៊ីឯកោ ដូចជាការដាក់ទណ្ឌកម្មលើវិស័យប្រេងរុស្ស៊ី ដករុស្ស៊ីលែងឲ្យប្រើប្រាស់ប្រព័ន្ធធនាគារអន្តរជាតិ និងដកក្រុមហ៊ុនលែងឲ្យវិនិយោគនៅរុស្ស៊ីតទៅទៀត។
ភ្លាមៗ សេដ្ឋកិច្ចរបស់រុស្ស៊ីបានរងប៉ះពាល់ដោយសារទណ្ឌកម្មសេដ្ឋកិច្ចរបស់លោកខាងលិច។ ប៉ុន្តែ សេដ្ឋកិច្ចរុស្ស៊ីដែលពឹងផ្អែកខ្លាំងលើការនាំចេញប្រេង មិនងាយដួលរលំ ព្រោះរុស្ស៊ីត្រូវអរគុណ ដល់ប្រទេសចិន និងឥណ្ឌាដែលបានទិញនាំចូលប្រេង ដ៏គំហុកពីរុស្ស៊ីចាប់តាំងរុស្ស៊ីរងទណ្ឌកម្មដោយសារសង្រ្គាមឈ្លានពានអ៊ុយក្រែន។
រុស្ស៊ី និងលោកពូទីន មិនងាយនឹងឯកោ នៅលើឆាកអន្តរជាតិ ព្រោះថា មហាយក្សអាស៊ី ចិន និងឥណ្ឌា មិនត្រឹមតែនៅបន្តទិញប្រេង ដែលអាចជាផ្នែកមួយនៃការគាំទ្រហិរញ្ញវត្ថុរុស្ស៊ី ប៉ុន្តែ ចិននិងឥណ្ឌាក៏មិនបានចេញមុខថ្កោលទោសការឈ្លានពានរបស់រុស្ស៊ីនៅអ៊ុយក្រែនដែរ។ លើកលែងតែប្រេស៊ីលដែលបោះឆ្នោតគាំទ្រ សេចក្តីសម្រេចរបស់អង្គការសហប្រជាជាតិ ដែលថ្កោលទោសការឈ្លានពានរបស់រុស្ស៊ី ចិន បានបោះឆ្នោតប្រឆាំង ចំណែក ឥណ្ឌា និងអាហ្វ្រិកខាងត្បូង ដែលជាសមាជិករបស់ក្រុមប្រទេសBrics បានបោះឆ្នោតអនុប្បវាទ។
ដោយសារតែ សមាជិករបស់ប្រទេសBricsមិនបានចេញមុខរិះគន់រុស្ស៊ី ហើយមហាអំណាចចិនផ្ទាល់ដែលមានទម្ងន់សេដ្ឋកិច្ចខ្លាំងក្នុងចំណោមប្រទេសBrics បានចេញមុខនិយាយការពារផលប្រយោជន៍ និងសន្តិសុខរបស់រុស្ស៊ី យ៉ាងដូច្នេះ រុស្ស៊ីរបស់លោកពូទីនកាន់តែមានជំនឿចិត្ត និងឆ្លៀតឱកាសយកជំនួបកំពូលក្រុមប្រទេសBrics ដើម្បីពង្រឹងចំណងសម្ព័ន្ធភាពជាមួយប្រទេសសមាជិកដទៃទៀត។ ជាក់ស្តែង នៅក្នុងវេទិកាសេដ្ឋកិច្ចរបស់ក្រុមប្រទេសBrics កាលពីថ្ងៃពុធម្សិលមិញ លោកពូទីនបានប្រកាសថា រុស្ស៊ីកំពុងអភិវឌ្ឍបង្វែរសកម្មភាពសេដ្ឋកិច្ច និងការវិនិយោគរបស់ខ្លួនជាមួយប្រទេសដៃគូដែលគួរឲ្យជឿជាក់។ ឧទាហរណ៍ រុស្ស៊ីកំពុងចរចាដើម្បីបើកទីផ្សាររបស់ខ្លួនសម្រាប់ហាងឥណ្ឌា និងរថយន្តរបស់ចិន។ បើតាមប្រធានាធិបតីរុស្ស៊ី ក្រៅពីការទិញនាំចូលប្រេងរុស្ស៊ី ទៅចិន និងឥណ្ឌាកើនឡើងខ្លាំង នៅប៉ុន្មានខែចុងក្រោយនេះ រុស្ស៊ីនឹងបង្កើនការសហការផងដែរក្នុងវិស័យកសិកម្ម។ បន្ថែមពីលើនោះ រុស្ស៊ីនឹងបង្កើនការនាំចេញស្បៀង ស្រូវសាលីទៅកាន់ប្រទេសសមាជិករបស់Brics។
សង្រ្គាមអ៊ុយក្រែនជំរុញក្រុមប្រទេសទាំង៥ BRICSសម្រេចកិច្ចការដែលជាប់គាំងកន្លងមក
សង្រ្គាមអ៊ុយក្រែនបានរំលេចឲ្យឃើញនូវការបែងចែកក្រុមប្រទេសជាពីរប្លុក គឺប្លុកក្រុមប្រទេសលោកខាងលិចដែលចេញមុខដាក់ទណ្ឌកម្មរុស្ស៊ី ដោយសារតែរុស្ស៊ីធ្វើសង្រ្គាមអ៊ុយក្រែន និងក្រុមប្រទេសមួយក្រុមទៀត ដូចជាចិន និងឥណ្ឌា ដែលនៅស្ងៀម មិនរិះគន់រុស្ស៊ី ដោយសារតែផលប្រយោជន៍ភូមិសាស្រ្តនយោបាយ និងសេដ្ឋកិច្ច។
ដោយសារតែទណ្ឌកម្មសេដ្ឋកិច្ចរបស់ប្រទេសលោកខាងលិច ដែលធ្វើឲ្យរុស្ស៊ីខ្ទាតចេញពីប្រព័ន្ធធនាគារអន្តរជាតិ នឹងជំរុញរុស្ស៊ីបង្កើនការចរចា ដើម្បីសម្រេចឲ្យបាន ការអនុវត្ត ការទូទាត់ទំនិញរវាងក្រុមប្រទេសសមាជិកBrics ដោយមិនប្រើប្រាស់ ប្រាក់ដុល្លារអាមេរិក ពោលគឺដើម្បីឯករាជ្យពីប្រាក់ដុល្លារអាមេរិក។
មួយវិញ ក្រុមប្រទេសBrics ជាក្រុមប្រទេសមានសេដ្ឋកិច្ចកំពុងលូតលាស់ ទំនងជាចង់យកឱកាសដែលទណ្ឌកម្មរបស់ក្រុមប្រទេសលោកខាងលិចទៅលើរុស្ស៊ី បង្កឲ្យមានវិបត្តិខ្វះស្បៀង ទំនិញឡើងថ្លៃលើកនេះ ទៅបញ្ចុះបញ្ចូលប្រទេសភាគខាងត្បូងដទៃទៀតឲ្យចូលជាសមាជិករបស់ខ្លួនបន្ថែមទៀត ពោលគឺដើម្បីប្រមូលកម្លាំងធំគ្រប់គ្រាន់ ទប់ស្កាត់កុំឲ្យក្រុមប្រទេសមហាអំណាចឧស្សាហកម្ម នាំមុខដោយអាមេរិកចេះតែសម្រេចចិត្តលើជោគវាសនាពិភពលោកដូចសព្វថ្ងៃនេះ។
ចិនចង់ប្រមូលប្រទេសនៅខាងត្បូងឲ្យរួមកម្លាំងជាមួយBrics ដើម្បីឲ្យខ្លាំងដូចG7
ជំនួបកំពូលក្រុមប្រទេសទាំង៥ដែលមានសេដ្ឋកិច្ចកំពុងលូតលាស់ត្រូវបានគេមើលឃើញថា អាចជាអនាគតគូប្រជែងរបស់ជំនួបកំពូលនៃក្រុមប្រទេសមហាអំណាចឧស្សាហកម្មG7។
ក្រុមប្រទេសទាំង ៥ Brics រួមគ្នាមានប្រជាជនសរុប ជាង ៣ពាន់លាននាក់ ហើយផលិតផលក្នុងស្រុកសរុបរបស់ប្រទេសទាំង ៥នេះ តំណាង១ភាគ៤នៃផលិតផលក្នុងស្រុកសរុបរបស់ពិភពលោក។ ដូច្នេះ គេមិនអាចមើលស្រាលទំងន់នយោបាយ និងសេដ្ឋកិច្ចរបស់ក្រុមប្រទេសទាំង៥។ ប៉ុន្តែយ៉ាងណាក៏ដោយ ក្រុមប្រទេសBrics នឹងមិនអាចពង្រីកចំនួនសមាជិកឲ្យបានច្រើនដើម្បីរួមកម្លាំងខ្លាំងដូចក្រុមប្រទេសមហាអំណាចឧស្សាហកម្មG7បានដែរ។ ហេតុអ្វីបានជាដូច្នេះ? ហេតុផលគឺទំនាក់ទំនងរវាងសមាជិករបស់Bricsមិនសាមញ្ញងាយស្រួលនោះទេ។ ជាពិសេស ចិន និងឥណ្ឌា ដែលបើទោះបីជានិយាយចុះសម្រុងគ្នាក្នុងផ្នែកសេដ្ឋកិច្ច ប៉ុន្តែប្រទេសមហាយក្សអាស៊ីទាំងពីរនៅតែប្រឈមមុខ ដាក់គ្នាខាងផ្នែកយោធាដោយសារជម្លោះព្រំដែន។ កន្លងមក ចិនបានព្យាយាមដើរអញ្ជើញប្រទេសមានសេដ្ឋកិច្ចសំខាន់មួយចំនួន ដូចជា ថៃ តាហ្ស៊ីគីស្ថាន និងនីហ្សេរីយ៉ា ជាដើម ឲ្យចូលរួមក្នុងជំនួបកំពូលBrics ក្នុងន័យបញ្ចុះបញ្ចូលឲ្យប្រទេសទាំងនោះចូលរួមកម្លាំងជាមួយ BRICS ប៉ុន្តែ ឥណ្ឌាតែងចេញមុខប្រឆាំង ព្រោះឥណ្ឌាដឹងថា ចិនដែលនាំមុខគេនៅក្នុងចំណោមប្រទេសBrics នឹងបង្កើនឥទ្ធិពលរបស់ខ្លួនលើប្រទេសសមាជិកដទៃទៀត ដើម្បីសម្រេចមហិច្ឆតាផ្ទាល់ខ្លួន។
ម្យ៉ាងឥណ្ឌា មិនចង់ឲ្យBrics មានទម្ងន់នយោបាយខ្លាំងទៅតាមការចង់បានរបស់ចិន ព្រោះតែឥណ្ឌាមិនចង់អាមេរិកដែលជាសម្ព័ន្ធមិត្តយោធាខឹងសម្បារ ដែលឥណ្ឌាចូលរួមដៃជាមួយចិន និងរុស្ស៊ី ដើម្បីប្រឆាំងអាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ