លោកស៊ី ជីនពីង លើកឡើងថា ការពង្រីកសម្ព័ន្ធភាពយោធា គឺជាមូលហេតុបណ្តាលឲ្យកើត "វិបត្តិនៅអ៊ុយក្រែន"
ថ្ងៃព្រហស្បតិ៍ទី២៣មិថុនានេះ លោកស៊ី ជីនពីង នឹងដឹកនាំជំនួបកំពូលពីចម្ងាយ នៃក្រុមប្រទេសកំពុងមានសេដ្ឋកិច្ចរីកលូតលាស់ខ្លាំងទាំង៥ ដែលមានចិន រុស្ស៊ី ប្រេស៊ីល ឥណ្ឌា និងអាហ្វ្រិកខាងត្បូង។ នៅក្នុងសុន្ទរកថា ត្រៀមបើកជំនួបកំពូលនេះ លោកប្រធានាធិបតីចិន បានថ្លែងថា វិបត្តិនៅអ៊ុយក្រែន គឺជាផលវិបាក កើតចេញពីការពង្រីកសម្ព័ន្ធយោធារបស់ក្រុមមួយ ដោយមិនគិតពីសន្តិសុខរបស់អ្នកផ្សេង។ ការលើកឡើងថា របស់លោកស៊ី ជីនពីងនេះ គឺហាក់បានសំដៅដោយមិនបញ្ចេញឈ្មោះ ថាសង្គ្រាមនៅអ៊ុយក្រែន គឺជាកំហុសរបស់អូតង់ និងអាមេរិក។
ចុះផ្សាយនៅថ្ងៃ៖
ស្តាប់ - ០២:៣៦
“មនុស្សជាតិ បានពើបប្រទះនូវសង្គ្រាមពិភពលោក ចំនួន២ដង និងក្រោយមកបានឆ្លងកាត់សម័យសង្គ្រាមត្រជាក់ ដែលប្លុកទាំង២បានប្រជែង ប្រយុទ្ធគ្នាបង្កជាផ្សែងខ្មៅអួអ័ព្ទ”។ នេះគឺជាសំដីរបស់ លោកស៊ី ជី ដែលទីភ្នាក់ងារព័ត៌មានចិន ស៊ីនហ័រ បានផ្សាយកាលពីរសៀលថ្ងៃពុធ ទី២២មិថុនា។
លោកប្រធានាធិបតីបានថ្លែងបន្ថែមថា “ប្រវតិ្តសាស្ត្រជូរចត់នេះ បានបង្ហាញឲ្យពិភពលោកយើងឃើញថា ការប្រឈមមុខដាក់គ្នារវាងក្រុមប្លុកអំណាច២ គឺវាមិនអាចនាំមក នូវសន្តិភាព និងសន្តិសុខបានទេ។ ផ្ទុយទៅវិញគឺមាននាំមកនូវ តែសង្គ្រាម និងជម្លោះ”។ លោកស៊ី ជីនពីង បានសង្កត់ធ្ងន់ថា “វិបត្តិនៅអ៊ុយក្រែន វាគឺជាសញ្ញាអាសន្នប្រាប់ទៅយើងគ្រប់គ្នាឲ្យដឹងថា ការងប់ងល់វង្វេងចង់តែពង្រីកសម្ព័ន្ធភាពយោធា ដើម្បីបង្អួតកំលាំងបំភ័យម្នាក់ទៀត ដោយមិនខ្វល់ពីសន្តិសុខរបស់អ្នកផ្សេងនោះ គឺវានឹងនាំទៅដល់ចំនុចទ័លច្រកផ្នែកសន្តិសុខ”។
គួរកត់សំគាល់ថា សំដីលើកឡើងរបស់លោកស៊ី ជីនពីង នេះ ទោះមិនបានបញ្ចេញឈ្មោះឲ្យចំ តែវាហាក់មានន័យសំដៅ ថាសង្គ្រាមនៅអ៊ុយក្រែន គឺជាកំហុសរបស់អូតង់ និងសហរដ្ឋអាមេរិក។ វាគឺជាសំដី ដែលមានខ្លឹមសារគាំទ្ររុស្ស៊ីដោយប្រយោល។ ជាងនេះទៀត លោកស៊ី ជីនពីង បានប្រយ័ត្នមិនប្រើពាក្យ “សង្គ្រាមនៅអ៊ុយក្រែន” ទេ គេប្រើត្រឹមពាក្យ “វិបត្តិនៅអ៊ុយក្រែន”។ ក្នុងនោះដែរ លោកស៊ី ជីនពីង បានចាត់ទុកទណ្ឌកម្មសេដ្ឋកិច្ច ដែលក្រុមប្រទេសលោកខាងលិច បានដាក់ទៅលើរុស្ស៊ី ថាជាអាវុធមុខ២ ធ្វើឲ្យអ្នកដាក់វា មុតរបួសខ្លួនឯងវិញ។
គួរបញ្ជាក់ថា សុន្ទរកថាដែលលោកស៊ី ជីនពីងទើបតែបានថ្លែងនេះ គឺដើម្បីត្រៀមបើកជំនួបកំពូល ក្រុមប្រទេសសេដ្ឋកិច្ចកំពុងលូតលាស់ទាំង៥ ហៅកាត់ថា Brics ដែលមាន ចិន រុស្ស៊ី ឥណ្ឌា ប្រេស៊ីល និងអាហ្វ្រិកខាងត្បូង។ តាមការគ្រោងទុក លោកពូទីន លោកណារិន្ទ្រម៉ូឌី លោកបុលសូណារ៉ូ និងលោក រ៉ាម៉ាផូសា នឹងមានវត្តមានពីចំងាយ ក្នុងជំនួបកំពូលនេះ ជាមួយលោកស៊ី ជីនពីង។
ក្នុងចំណោមប្រទេសទាំងនេះ ទាំងចិន ទាំងឥណ្ឌា និងអាហ្វ្រិកខាងត្បូង សុទ្ធតែបានបដិសេធ មិនប្រកាសថ្កោលទោសរុស្ស៊ី ចំពោះការធ្វើសង្គ្រាមឈ្លានពាននៅអ៊ុយក្រែនទេ។ កាលពីសប្តាហ៍កន្លងទៅ លោក ស៊ី ជីនពីង បានទូរស័ព្ទទៅនិយាយជាមួយលោកពូទីន ដោយបានធានាអះអាងថា ចិននឹងបន្តជួយគាំទ្ររុស្ស៊ី ក្នុងកិច្ចការអធិបតេយ្យភាព និងសន្តិសុខ។ ជាងនេះទៀត យោងតាមទីភ្នាក់ងារថាមពលអន្តរជាតិ AIE ខណៈដែលរុស្ស៊ីរងទណ្ឌកម្មបស្ចឹមលោក មិនអាចលក់ប្រេងបាន ចិន និងឥណ្ឌា បានសំរុកជួយទិញប្រេងរុស្ស៊ីយ៉ាងគំហុក នាប្រមាណពីខែមីនាដល់ខែឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ