ហ្សេ២០គ្មានលទ្ធផល តែអាមេរិកនិងចិនរកឃើញភាពស្រុះស្រួលគ្នា
ចុះផ្សាយនៅថ្ងៃ៖
ស្តាប់ - ០៦:២២
នៅថ្ងៃសៅរ៍ទី ៩ កក្កដា ២០២២នេះ រដ្ឋមន្ត្រីការបរទេសអាមេរិក និង ចិន បានជួបពិភាក្សាគ្នាដោយផ្ទាល់ នៅទីក្រុងបាលី ប្រទេសឥណ្ឌូណេស៊ី។ ជំនួបដ៏កម្រ ដើម្បីស្វែងរកការបន្ធូរបន្ថយភាពតានតឹងរវាងអាមេរិក-ចិននេះ ប្រព្រឹត្តទៅក្រោយការបិទបញ្ចប់កិច្ចប្រជុំកំពូលហ្សេ២០ ដែលគ្មានលទ្ធផល។ ក្រៅអំពីជំនួបទ្វេភាគីអាមេរិក-ចិន រដ្ឋមន្ត្រីការបរទេសនៃបណ្តាប្រទេសលោកខាងលិចជាច្រើនទៀត មានជាអាទិ៍អឺរ៉ុបនិងអូស្ត្រាលី ក៏បានជួបពិភាក្សាជាមួយលោកវ៉ាងយី ដែរ ដើម្បីស្តារទំនាក់ទំនងជាមួយចិន។
លោកប្រមុខការទូតអាមេរិក អង់តូនី ប្លីងកិន បានប្រកាសថា ជំនួបរយៈពេលជិត ៥ម៉ោងជាមួយរដ្ឋមន្ត្រីការបរទេសចិន លោក វ៉ាង យី ថ្ងៃនេះមានលក្ខណៈស្ថាបនា មានប្រយោជន៍និងស្មោះត្រង់ណាស់។ ថ្វីបើប្រទេសទាំងពីរមានទំនាក់ទំនងដ៏ស្មុគស្មាញនឹងគ្នាមែន ប៉ុន្តែកិច្ចពិភាក្សាបានប្រព្រឹត្តទៅប្រកបដោយភាពជឿជាក់។ ភាគីទាំងពីរបានព្រមព្រៀងសម្រុះសម្រួលគ្នា ស្តារទំនាក់ទំនងឱ្យបានប្រសើរឡើង ធ្វើយ៉ាងណានាំតែផលចំណេញ និងលទ្ធផលឱ្យគ្នាទៅវិញទៅមក។ នេះបើតាមកំណត់ហេតុរបស់ក្រសួងការបរទេសចិន។
នាឱកាសពិភាក្សាគ្នានោះ លោកប្លីងកិន មិនភ្លេចសម្តែងក្តីព្រួយបារម្ភរបស់អាមេរិក ជុំវិញការបង្កើនវត្តមានកងទ័ពនិងសកម្មភាពបង្កហេតុ របស់បេកាំង ដាក់តៃវ៉ាន់ទេ។ ជាពិសេសទៅទៀត លោកប្រមុខការទូតអាមេរិក បានស្នើសុំទៅសមភាគីចិន ឱ្យដកខ្លួនចេញពីរុស្ស៊ី ហើយ ប្រកាសថ្កោលទោសទង្វើឈ្លានពានរុស្ស៊ីលើអ៊ុយក្រែន រួចបង្ខំមូស្គូឱ្យព្រមបើកច្រកផ្លូវ ដើម្បីអាចដឹកជញ្ជូនស្បៀងអាហារដែលជាប់កុននៅអ៊ុយក្រែន។ លោក ប្លីងកិន សំលឹងឃើញថា នៅក្នុងជំនួបហ្សេ២០ កាលពីថ្ងៃម្សិលមិញ រុស្ស៊ីគ្មានកាយវិការចង់សហការអ្វីទាំងអស់។ រដ្ឋមន្ត្រីការបរទេសរុស្ស៊ី លោក សែរហ្គៃ ឡាវ្រូស ថែមទាំងបានដើរចេញពីជំនួបកំពូល ទាំងកណ្តាលទី នៅពេលឮគ្រប់ភាគីរិះគន់សង្គ្រាមរុស្ស៊ីនៅអ៊ុយក្រែន។ នៅទីបំផុត ជំនួបកំពូលហ្សេ២០ បានបិទបញ្ចប់ទៅដោយគ្មានលទ្ធផល គ្មានសេចក្តីថ្លែងការណ៍រួម ហើយគ្មាន ទាំងការថតរូបជួបជុំគ្នាជាប្រពៃណីផង។
បញ្ចៀសជម្លោះ
ប្រមុខការទូតចិន លោក វ៉ាងយី បានជួបលោក សែកហ្គៃ ឡាវ្រូស រដ្ឋមន្ត្រីការបរទេសរុស្ស៊ី តាំងពីថ្ងៃព្រហស្បតិ៍ម្ល៉េះ។ កិច្ចពិភាក្សាទល់មុខគ្នាផ្តោតស្ទើរទាំងស្រុងទៅលើសំណុំរឿងសង្គ្រាមនៅអ៊ុយក្រែននេះតែម្តង។ នៅពេលនោះលោក ឡាវ្រូស បានបញ្ជាក់ប្រាប់សមភាគីចិនថា ក្រុមលោកខាងលិចប្រកាន់ជំហរតឹងតែងខ្លាំងដាក់រុស្ស៊ី តែម៉ូស្គូក៏មានអ្នកគាំទ្រនិងយល់ចិត្តកាន់ច្រើនឡើងពីសហគមន៍អន្តរជាតិ ក្នុងនោះមានមួយគឺមហាមិត្តចិន។ គំនិតរបស់ក្រុមលោកខាងលិចដែលចង់ដាក់រុស្ស៊ីឱ្យនៅឯកា មិនបានសម្រេចទេ។ នេះបើតាមសំដីរបស់លោក ឡាវ្រូស រដ្ឋមន្ត្រីការបរទេសរុស្ស៊ីដដែល។
អ្នកទទួលខុសត្រូវអាមេរិកក៏ដឹងយ៉ាងច្បាស់ណាស់ដែរថាការភ្ជាប់ទំនាក់ទំនងល្អឡើងវិញជាមួយប៉េកាំងនៅពេលនេះ នៅស្តួងស្តើងខ្លាំងណាស់។ អ្នកជំនាញអាមេរិកមានសង្ឃឹមនិងរំពឹងលើការប្តូរផ្លាស់ក្រុមការងារថ្មីដែលអាចមានសមត្ថភាពធ្វើការជាមួយអាមេរិកបាន ព្រោះសេដ្ឋកិច្ចចិនពេលនេះកំពុងឈរច្រាសខ្យល់ ពោលគឺរងឥទ្ធិពលពីនយោបាយតឹងតែងរបស់ខ្លួនឯង។
ប៉ុន្តែយ៉ាងណាក៏ដោយ ក៏ការជួបជជែកគ្នាដោយផ្ទាល់ ជាប្រការល្អប្រពៃជាងគេ ព្រោះមានន័យថាគឺប្រទេសទាំងពីរចាប់ផ្តើមគិតគូររកវិធានការទប់ស្កាត់កុំឱ្យជម្លោះរវាងគ្នាកាន់តែរីកធំធាត់ រហូតក្លាយជាជម្លោះដែលមិនអាចគ្រប់គ្រងបាន។ បន្ទាប់មកការជួបគ្នា ជាសញ្ញាបញ្ជាក់ថាភាគីទាំងពីរព្រមព្រៀងបញ្ចៀសការតតាំងដាក់គ្នា។ នេះបើតាមចំណាប់អារម្មណ៍របស់កាសែតផ្លូវការចិន Global Time ដែលមានទម្លាប់តែរិះគន់អាមេរិក។
នៅមុនជួបសមភាគីអាមេរិកបន្តិច លោកវ៉ាងយី បានប្រកាសប្រាប់អ្នកសារព័ត៌មានថាចិននិងអាមេរិក ជាប្រទេសដ៏ធំជាងគេពីរ ដែលចាំបាច់ត្រូវការធ្វើការជាមួយគ្នា និងរក្សាទំនាក់ទំនងជាធម្មតានឹងគ្នា ហើយត្រូវផ្តោះប្តូរទំនាក់ទំនងគ្នាជាបន្តទៅទើបបាន។
មិនចង់ឃើញរុស្ស៊ី តែចង់ជួបចិន
ថ្វីបើក្រុមប្រទេសលោកខាងលិច ទាំងអាមេរិក អឺរ៉ុប អូស្ត្រាលី មិនចង់ជួបរុស្ស៊ី នៅក្បែររុស្ស៊ី មែន ប៉ុន្តែពួកគេមិនហ៊ានអវត្តមានក្នុងជំនួបហ្សេ២០ទេ ព្រោះម្យ៉ាងមិនចង់ឱ្យរុស្ស៊ីបានដៃប្រើវេទិកាហ្សេ២០ សម្រាប់ឃោសនាបំប៉ោងនយោបាយធ្វើសង្គ្រាមនៅអ៊ុយក្រែនរបស់គេផង និងម្យ៉ាងទៀត ជាឱកាសដែលពួកគេអាចឆ្លៀតជួបជាមួយភាគីដ៏សំខាន់ គឺចិន។
កាលពីម្សិលមិញ ប្រមុខការទូតសហភាពអឺរ៉ុបបានជួបសមភាគីចិន នៅទីក្រុងបាលី ដើម្បីផ្តល់សន្ទុះថ្មី វិជ្ជមាន ទុកដាក់ការខ្វែងគំនិតគ្នាឱ្យនៅម្តុំសិន ហើយងាកមកស្វែងរកភាពស្រុះស្រួលគ្នា ការពារពិភពលោកបែបពហុជាតិនិយម ប្រឆាំងរាល់គ្រប់សកម្មភាពកាត់ពុះនិងរំលោភច្បាប់សេដ្ឋកិច្ច។
បន្ទាប់ពីអាក់អន់ចិត្ត និងមានទំនាក់ទំនងធ្លាក់ចុះដុនដាបយ៉ាងខ្លាំងតាំងពីឆ្នាំ២០១៩មក នៅថ្ងៃសៅរ៍នេះ អូស្ត្រាលីក៏បានបើកជំនួបជាន់ខ្ពស់ ដោយផ្ទាល់ជាលើកទីមួយ ជាមួយចិនដែរ។ សម្រាប់លោកនាយករដ្ឋមន្ត្រីអូស្ត្រាលី ជំនួបរវាងប្រមុខការទូតអូស្ត្រាលីនិងសមភាគីចិន លោកវ៉ាងយី ជាជំហានទីមួយ នៃការបើកកិច្ចសហការជាមួយចិន លើផ្នែកដែលចាំបាច់ តែផ្នែកដែលត្រូវការពារអូស្ត្រាលីនឹងការពារយ៉ាងមុះមុតដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ