ប្រឈមនឹងកំហឹងតវ៉ារបស់ប្រជាជន ប្រធានាធិបតី និងនាយករដ្ឋមន្រ្តីស្រីលង្កាប្រកាសចុះចេញពីតំណែង
ចុះផ្សាយនៅថ្ងៃ៖
ស្តាប់ - ០៩:២២
នៅស្រីលង្កា ស្ថានការណ៍នយោបាយកំពុងពុះកញ្ជ្រោលខ្លាំង។ ប្រធានាធិបតីស្រីលង្កា លោក ហ្គោតាបាយ៉ា រ៉ាចាប៉ាក់សេ ដែលបានរត់គេចពីគេហដ្ឋាន ដោយសារការសម្រុកចូលរបស់ក្រុមបាតុករ បានប្រកាសកាលពីថ្ងៃសៅរ៍ ទី៩កក្កដា ថា លោកនឹងចុះចេញពីតំណែង នៅថ្ងៃពុធសប្តាហ៍ក្រោយ។ នៅថ្ងៃសៅរ៍ ក្រុមបាតុករស្រីលង្កាបានសម្រុកចូលលុកលុយផ្ទះ និងការិយាល័យធ្វើការរបស់ប្រធានាធិបតី។ ចំណែកផ្ទះរបស់នាយករដ្ឋមន្រ្តី ត្រូវគេដុតបំផ្លាញ។
តាំងពីយប់ថ្ងៃសៅរ៍ម្សិលមិញ បាតុករស្រីលង្កា បានស្រែកច្រៀង អបអរ បាញ់កាំជ្រួច បន្ទាប់ពីលឺប្រធានរដ្ឋសភាប្រកាសតាមទូរទស្សន៍ថា លោកប្រធានាធិបតី ហ្គោតាបាយ៉ា រ៉ាចាប៉ាក់សេ នឹងចុះចេញពីតំណែង នៅថ្ងៃ ទី ១៣កក្កដា សប្តាហ៍ក្រោយនេះ ដើម្បីធានាឲ្យមានការផ្ទេរអំណាចដោយសន្តិភាព។
នៅថ្ងៃសៅរ៍ នាយករដ្ឋមន្រ្តីថ្មីរបស់ស្រីលង្កា លោករ៉ានីល វីក្រេមេស៊ីងហ្កេដែលទើបចូលកាន់តំណែងបានជាង ១ខែ ជំនួសបងប្រុសរបស់ប្រធានាធិបតី គឺលោកម៉ាហិនដា រ៉ាចាប៉ាក់សេ ក៏បានប្រកាសចុះចេញពីតំណែងដែរ។
ដោយមានជំនួយបើកផ្លូវរបស់ទាហានដែលបានបាញ់កាំភ្លើងគំរាមក្រុមបាតុករ លោកហ្គោតាបាយ៉ា រ៉ាចាប៉ាក់សេបានភៀសខ្លួន ចេញពីគេហដ្ឋានប្រធានាធិបតី នៅតែប៉ុន្មានម៉ោង មុនពេលដែលបាតុកររាប់រយនាក់ លើកគ្នា សម្រុកចូល កាលពីថ្ងៃសៅរ៍។ លោកហ្គោតាបាយ៉ា រ៉ាចាប៉ាក់សេ ទើបរើមកនៅគេហដ្ឋានប្រធានាធិបតី បានប៉ុន្មានខែប៉ុណ្ណោះ បន្ទាប់ពីផ្ទះឯកជនរបស់លោកត្រូវក្រុមបាតុករ ឡោមព័ទ្ធ ធ្វើបាតុកម្មតវ៉ានៅប៉ុន្មានខែមកនេះ។
តាមទីភ្នាក់ងារព័ត៌មានបារាំង AFP លោកប្រធានាធិបតី ហ្គោតាបាយ៉ា រ៉ាចាប៉ាក់សេបានឡើងជិះកប៉ាល់យោធាចេញពីក្រុងកូឡុំបូ សំដៅភាគខាងត្បូងស្រីលង្កា។ ប្រភពយោធាស្រីលង្កាវិញ បាននិយាយថា លោកប្រធានាធិបតីត្រូវធ្វើដំណើរទៅដល់មូលដ្ឋានទ័ពជើងទឹក នៅភាគខាងជើង ប្រទេសកោះស្រីលង្កា នៅថ្ងៃ អាទិត្យ។ នៅពាក់កណ្តាលអាធ្រាត្រ ប្រធានសេនាធិការកងទ័ពស្រីលង្កាបានអំពាវនាវនៅតាមទូរទស្សន៍ឲ្យ មានភាពស្ងប់ស្ងាត់ និងធានាដោះស្រាយវិបត្តិដោយសន្តិវិធី តាមរដ្ឋធម្មនុញ្ញ។ បន្ទាប់មក ប្រធានរដ្ឋសភាស្រីលង្កាបានចេញមុខប្រកាសថា ប្រធានាធិបតីបាននិយាយថា លោកនឹងចុះចេញពីតំណែង នៅថ្ងៃទី ១៣កក្កដាសប្តាហ៍ក្រោយ។
ហេតុអ្វី ប្រធានាធិបតីក្រាញអំណាច សុខចិត្តចុះចេញពីតំណែង នៅពេលនេះ?
ការប្រកាសរបស់ប្រធានរដ្ឋសភាដែលថា លោកហ្គោតាបាយ៉ា នឹងលាលែងពីតំណែងនៅថ្ងៃពុធសប្តាហ៍ក្រោយ គឺជាដំណឹង ដែលគេមិនធ្លាប់ស្រមៃថា នឹងអាចកើតឡើងនោះទេ។ នៅពេលលោកម៉ាហិនដា រ៉ាចាប៉ាក់សេ ដែលជាបងប្រុស ប្រកាសចុះចេញពីតំណែង ទៅតាមការទាមទាររបស់បាតុករ កាលពី២ខែមុន លោកប្រធានាធិបតីហ្គោតាបាយ៉ា បាននិយាយហើយថា លោកមិនចុះចេញពីតំណែងដាច់ខាត។ វាជារឿងមិននឹកស្មានដល់ ព្រោះថា ត្រកូលរ៉ាចាប៉ាក់សេ បានក្រាញ ដឹកនាំស្រីលង្កា ដោយកណ្តាប់ដៃដែក តាំងពីឆ្នាំ ២០០៥ ដោយលោកម៉ាហិនដា ជាបងប្រុសកាន់តំណែងប្រធានាធិបតី ចំណែកប្អូនប្រុស ដែលធ្លាប់ជាមេទ័ព បង្រ្កាបដ៏ហិង្សាលើបក្សប្រឆាំង និងសកម្មជនសិទ្ធិមនុស្ស បានក្លាយជាប្រធានាធិបតី។
ប៉ុន្តែ នៅទីបំផុត លោកហ្គោតាបាយ៉ា រ៉ាចាប៉ាក់សេ ក៏សុខចិត្ត ចុះចេញពីតំណែង។ នេះ មិនមែនដោយសារតែមានសម្ពាធ កម្លាំងបាតុកម្មរបស់ប្រជាជនស្រីលង្កា តែមួយមុខប៉ុណ្ណោះទេ។ តាំងពីមហាបាតុកម្មប្រឆាំងរដ្ឋាភិបាល ផ្ទុះឡើងនៅខែមេសា ប្រធានាធិបតី និងនាយករដ្ឋមន្រ្តី ត្រកូល រ៉ាចាប៉ាក់សេ ទាំងបង ទាំងប្អូន ចាប់ឯកោ បាត់បង់ការគាំទ្រ នៅក្នុងជួរបក្ស នៅពេលរដ្ឋមន្រ្តីសឹងទាំងអស់សុំលាឈប់ពីមុខតំណែង។ ប្រធានាធិបតីហ្គោតាបាយ៉ា បានបាត់បង់សំឡេងភាគច្រើននៅរដ្ឋសភា មួយទៀត បន្ទាប់ពី គណបក្សដៃគូបានទាមទារឲ្យលោកចុះចេញពីតំណែង។
បងប្អូនរ៉ាចាប៉ាក់សេលែងជាវីរបុរសក្នុងក្រសែភ្នែករបស់ប្រជាជនស្រីលង្កា
នៅមុនក្លាយជាផ្ទាំងស៊ីបស្អប់ប្រឆាំង របស់មហាជនស្រីលង្កា បងប្អូនត្រកូល រ៉ាចាប៉ាក់សេ ធ្លាប់ជាវីរបុរស ទទួលបានការគាំទ្រពីប្រជាជនស្រីលង្កា ពីព្រោះ ពួកគេធ្លាប់មានស្នាដៃប្រយុទ្ធប្រឆាំងនឹងក្រុមតាមូល រហូត ឈានទៅបិទបញ្ចប់សង្រ្គាមស៊ីវិល ដ៏រ៉ាំរ៉ៃ នៅឆ្នាំ ២០០៩។
តាំងពីឆ្នាំ ២០០៥ ត្រកូលរ៉ាចាប៉ាក់សេដឹកនាំប្រទេសស្រីលង្កា តាមបែបគ្រួសារនិយម។ បងប្អូនប្រុស ក្មួយក្នុងត្រកូលរ៉ាចាប៉ាក់សេ សុទ្ធតែមានមុខតំណែងនៅក្នុងជួររដ្ឋាភិបាល។ អំពើពុករលួយ គម្លាតរវាង អ្នកមាន និងអ្នកក្រ រវាងគ្រួសាររបស់អ្នកនយោបាយកាន់អំណាច ហើយនិងប្រជាជនស្រីលង្កាជាទូទៅ ត្រូវបានគេឃើញកើតមានជាហូរហែ ប៉ុន្តែ ប្រជាជនស្រីលង្កាសូវប្រកាន់ខឹង និងចុះថ្នល់ តស៊ូធ្វើបាតុកម្មខ្លាំង ដូចពេលនេះ នៅពេល ជីវភាពឆ្នាំងបាយរបស់ពួកគេត្រូវប៉ះពាល់ទាំងស្រុង ដោយសារតែការគ្រប់គ្រងមិនបានរបស់រដ្ឋាភិបាល។
សម្រាប់ប្រជាជនស្រីលង្កា ដែលធ្វើបាតុកម្មរាប់ខែមកនេះ ដោយត្រូវទ្រោមខ្លួន នឹងការបង្រ្កាប បាញ់ទឹក បាញ់ផ្សែងបង្ហូរទឹកភ្នែករបស់អាជ្ញាធរ ការប្រកាសចុះចេញពីតំណែងរបស់ត្រកូលរ៉ាចាប៉ាក់សេ គឺជាដំណឹងដ៏សែនល្អបំផុត។ ពួកគេត្រូវការមេដឹកនាំថ្មី ដែលមានសមត្ថភាពដឹកនាំប្រទេស ឲ្យងើបចេញពីវិបត្តិ គ្មានប្រេងប្រើ គ្មានថ្នាំពេទ្យ និងទំនិញឡើងថ្លៃ កប់ពពក ដូចសព្វថ្ងៃនេះ។ ដោយសារតែខ្វះខាត គ្មានលុយទិញប្រេងពីបរទេស ស្រីលង្កាជាប្រទេសដំបូងគេ ក្នុងពិភពលោក ដែលបានរឹតត្បិត មិនឲ្យប្រជាជនទិញប្រេង ដោយទុកសម្រាប់តែការប្រើប្រាស់ចាំបាច់ ដូចជានៅមន្ទីរពេទ្យជាដើម។
ហេតុអ្វីបានជាស្រីលង្កាធ្លាក់ខ្លួនដល់ថ្នាក់នេះ?
ស្រីលង្កាដែលរស់ពឹងអាស្រ័យខ្លាំង លើប្រាក់ចំណូលមកពីវិស័យទេសចរណ៍ បានដាំក្បាលធ្លាក់ក្នុងវិបត្តិសេដ្ឋកិច្ច នៅពេលវិបត្តិកូវីដផ្ទុះឡើងចាប់ពី២ឆ្នាំមកនេះ។ ប៉ុន្តែ វិបត្តិសេដ្ឋកិច្ចកាន់តែធ្លាក់ចុះអាក្រក់ថែមទៀត ដោយសារតែការដឹកនាំមិនបានល្អរបស់រដ្ឋាភិបាល។ ឧទាហរណ៍ នៅឆ្នាំ ២០១៩ លោកប្រធានាធិបតីហ្គោតាបាយ៉ាបានសម្រេចលុបចោលពន្ធ ដែលធ្វើឲ្យស្រីលង្កាបាត់បង់ប្រាក់ចំណូល ជាតិ ១,៣ពាន់លានដុល្លារ ក្នុងមួយឆ្នាំ។
រដ្ឋាភិបាលស្រីលង្ការងការរិះគន់ខ្លាំងមួយទៀតថា បានដើរទៅខ្ចីប្រាក់បំណុលបរទេស សម្រាប់យកទៅប្រើ មិនត្រឹមត្រូវ មិនចំគោលដៅ ត្រូវការរបស់ប្រទេស។
មួយវិញទៀត ដោយសារតែការនាំចូលច្រើនជាងនាំចេញ ស្រីលង្កាចាប់ផ្តើម ដែលគិតតែទិញនាំចូលពីបរទេស បានចាប់ខើចរូប័យបណ្ណបម្រុងអន្តរជាតិ នៅឆ្នាំ ២០២០។ ដោយសារតែអស់លុយដុល្លារក្នុងដៃ ស្រីលង្កាបានកាត់បន្ថយការទិញនាំចូលដែលសុទ្ធជាវត្ថុធាតុដើមសំខាន់ៗ ដូចជាជីគីមី សម្រាប់វិស័យកសិកម្ម ថ្នាំពេទ្យ និងប្រេង។ ដោយសារតែគ្មានជីគីមី ការប្រមូលផលកសិកម្មបានធ្លាក់ចុះ និងធ្វើឲ្យប្រជាជនបាត់បង់ប្រាក់ចំណូល។ ប្រជាជនស្រីលង្កាជួបបញ្ហាធ្ងន់ធ្ងរមិនធ្លាប់មាន ដោយសារតែគ្មានប្រេង គ្មានភ្លើងអគ្គិសនី ប្រើប្រាស់ គ្មានចរាចរណ៍ដឹកជញ្ជូន បូកផ្សំនឹងទំនិញ ដែលរឹតតែឡើងថ្លៃ ដោយសារវិបត្តិស្បៀង ក្នុងពិភពលោក ដែលកើតចេញមកពីសង្រ្គាមអ៊ុយក្រែន។
តើការចុះចេញពីតំណែង របស់ប្រធានាធិបតី និងនាយករដ្ឋមន្រ្តីអាចដោះស្រាយវិបត្តិសេដ្ឋកិច្ច?
ការលាលែងចេញពីតំណែងរបស់ប្រធានាធិបតី និងនាយករដ្ឋមន្រ្តី នឹងមិនអាចទៅដោះស្រាយបញ្ហាភ្លាមៗនោះទេ។ ប៉ុន្តែ យ៉ាងហោច វាអាចបើកផ្លូវឲ្យស្រីលង្កាស្តារស្ថិរភាពនយោបាយមួយគន្លាក់សិន មុននឹងអាចទៅដោះស្រាយបញ្ហាសេដ្ឋកិច្ច។
ជាក់ស្តែង នៅក្នុងដំណាក់កាលដែលស្រីលង្កា លែងមានប្រធានាធិបតី និងនាយករដ្ឋមន្រ្តី ប្រធានសភា ត្រូវដឹកនាំប្រទេសបណ្តោះអាសន្ន មុននឹងបោះឆ្នោត ជ្រើសតាំងប្រធានាធិបតី និងនាយករដ្ឋមន្រ្តីថ្មី។ បើសិនរដ្ឋាភិបាលថ្មី គ្មានការតវ៉ាប្រឆាំងពីភាគីបក្សនយោបាយណាមួយទេ នោះ ស្រីលង្កា ដែលមានស្ថិរភាពនយោបាយហើយនោះ នឹងអាចមានទឹកមាត់ប្រៃ ទៅចរចា សុំជំនួយពីបរទេស ប្រមាណ ជាង ៣ពាន់លានដុល្លារ ដែលស្រីលង្កាត្រូវការបន្ទាន់សម្រាប់ដោះស្រាយបញ្ហាប្រឈមចំពោះមុខសព្វថ្ងៃនេះ។
មូលនិធិហិរញ្ញវត្ថុអន្តរជាតិបាននិយាយហើយថា គេអាចផ្តល់ប្រាក់កម្ចីដល់ស្រីលង្កា ប៉ុន្តែ រដ្ឋាភិបាលស្រីលង្កាត្រូវធ្វើតាមលក្ខខណ្ឌ នោះគឺ ដំឡើងអត្រាការប្រាក់ ហើយនិងឈប់លើកលែងពន្ធ ដែលជាប្រភពប្រាក់ចំណូលជាតិ។ ធនាគារពិភពលោកវិញ បានសន្យាឲ្យស្រីលង្កាខ្ចី ប្រាក់ ៦០០លានដុល្លារ ចំណែក ក្រុមប្រទេសមហាឧស្សាហកម្ម G7បានសន្យាជួយសម្រាលបន្ទុកប្រាក់បំណុលបរទេសរបស់ស្រីលង្កា។
តើចិន និងឥណ្ឌាដែលចង់ចងសម្ព័ន្ធភាពជាមួយស្រីលង្កា នៅឯណា?
នៅពេល ដែលស្រីលង្កា កំពុងជួបវិបត្តិដ៏ធ្ងន់ធ្ងរ ឥណ្ឌាបានសន្យា ជួយស្រីលង្កា តាមរយៈការផ្តល់ប្រាក់កម្ចី ជាង ១,៥ពាន់លានដុល្លារ បន្ថែមពីលើប្រាក់កម្ចីដែលឥណ្ឌាបានឲ្យស្រីលង្កាខ្ចីកន្លងមក ប្រមាណ ១,៩ពាន់លានដុល្លារ សម្រាប់ការនាំចូលទំនិញ។
ចំណែកចិនវិញ នាយករដ្ឋមន្រ្តីស្រីលង្កាធ្លាប់ធ្វើដំណើរទៅទីក្រុងប៉េកាំង ដើម្បីសុំឲ្យចិនគិតគូរឡើងវិញ រឿង សងប្រាក់បំណុល ជាង៥,៦ពាន់លានដុល្លារ ដែលស្រីលង្កាជំពាក់ចិន។ ដោយសារមិនអាចសងប្រាក់បំណុលទាន់ពេលវេលា ទៅឲ្យចិន ស្រីលង្កាធ្លាប់បានកាត់កំពង់ផែទឹកជ្រៅ ដែលជាទីតាំងយុទ្ធសាស្រ្តយោធា នៅក្នុងតំបន់ ទៅឲ្យចិនគ្រប់គ្រងសម្រាប់រយៈពេល ៩៩ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ